नवी दिल्‍ली, 24 जून 2025

केंद्रीय गृह आणि सहकार मंत्री  अमित शाह यांनी आज नवी दिल्ली येथे श्यामा प्रसाद मुखर्जी ट्रस्टने आयोजित केलेल्या " आणीबाणीची 50 वर्षे" या कार्यक्रमाला संबोधित केले. यावेळी अनेक मान्यवर उपस्थित होते.

आणीबाणीच्या 50 व्या वर्धापनदिनाच्या पूर्वसंध्येला आयोजित कार्यक्रमाला संबोधित करताना केंद्रीय गृहमंत्री अमित शाह म्हणाले की, जेव्हा पंतप्रधान  नरेंद्र मोदी यांनी 11 जुलै 2024 रोजी निर्णय घेतला की दरवर्षी 25 जून हा 'संविधान हत्या दिवस' म्हणून पाळला जाईल, तेव्हा प्रश्न निर्माण झाला की 50 वर्षांपूर्वी घडलेल्या घटनेबद्दल आज बोलून काय साध्य होणार आहे. शाह म्हणाले, मोदीजींनी 'संविधान हत्या दिवस' पाळण्याचा निर्णय घेतला जेणेकरून देशाला हे नेहमी लक्षात राहील की, जेव्हा एखादे सरकार हुकूमशाही बनते, तेव्हा देशाला किती भयंकर परिस्थितीला तोंड द्यावे लागते.  केंद्रीय गृहमंत्र्यांनी सांगितले की, आणीबाणी म्हणजे एका लोकशाही देशातील बहुपक्षीय लोकशाहीचे एका व्यक्तीच्या हुकूमशाहीमध्ये रूपांतरित करण्याचे षड्यंत्र होय. त्यावेळी अनेकांनी वैयक्तिक नुकसान सोसूनही याला तीव्र विरोध केला. ते म्हणाले की, 'आणीबाणी' ही परिस्थिती आणि सक्तीच्या गरजेची नव्हे, तर ती हुकूमशाही वृत्ती आणि सत्तेच्या लालसेची उत्पत्ती आहे.

अमित शाह म्हणाले की, आणीबाणीच्या काळात लोकांच्या जनादेशातून स्थापन झालेली सरकारे संविधानाच्या भावनेला पायदळी तुडवून रातोरात पाडण्यात आली. जेव्हा एखाद्या व्यक्तीची हुकूमशाही गुणवैशिष्ट्ये समोर येतात, तेव्हा काय होते हे देशातील जनतेने आणि विशेषतः तरुण पिढीने कधीही विसरू नये.

केंद्रीय गृहमंत्र्यांनी सांगितले की, आणीबाणी देशाच्या सुरक्षेचे कारण देत लादण्यात आली होती, परंतु त्याचे मुख्य कारण सत्ता वाचवणे हे होते. ते म्हणाले की, तत्कालीन पंतप्रधानांनी संविधानाच्या विविध कलमांचा वापर करून संविधानाची हत्या केली आणि देशाला एका मोठ्या आणीबाणीत ढकलले. ते म्हणाले की, अनेक घटना, निषेध आणि आंदोलनांनी बहुमताने निवडून आलेल्या सरकारची खुर्ची आणि पाया हादरवला होता. देशाला ना कोणताही बाह्य धोका होता ना कोणताही अंतर्गत. खरे तर, जनता जागरूक झाली होती.

तत्कालीन पंतप्रधानांनी कलम 352 चा गैरवापर करून आणीबाणी लागू केली आणि 1 लाख 10 हजार विरोधी नेत्यांना तुरुंगात डांबले. सामाजिक कार्यकर्ते, स्वतंत्र संपादक, वार्ताहर, असंतुष्ट विद्यार्थी नेते आणि विविध सृजनशील कामांशी संबंधित लोकांना देखील तुरुंगात टाकण्यात आले, असे अमित शाह म्हणाले.

केंद्रीय गृहमंत्र्यांनी सांगितले की, आणीबाणीच्या काळात विचार, लेखणी आणि विरोध यांना तुरुंगात टाकण्यात आले. लोकशाही हक्कांची पायमल्ली करण्यात आली आणि यंत्रणांचा अशा प्रकारे गैरवापर करण्यात आला की भारतीय समाज, हा देश आणि या देशातील लोक ते कधीही विसरू शकणार नाहीत. ते म्हणाले की, म्हणूनच पंतप्रधान श्री नरेंद्र मोदी यांच्या नेतृत्वाखालील सरकारने संविधान हत्या दिवस पाळण्याचा निर्णय घेतला आहे. ते म्हणाले की, लोकशाही मार्गाने निवडून आलेली व्यक्ती जेव्हा हुकूमशहा बनते, तेव्हा देशाला किती गंभीर परिणामांना सामोरे जावे लागते, हे संपूर्ण देशाच्या स्मरणात राहिले पाहिजे.

अमित शाह म्हणाले की, आपल्या लोकशाहीचा पाया इतका खोल आहे की, जर कोणत्याही हुकूमशहाने हा पाया हलवण्याचा प्रयत्न केला, तर तो आपले भविष्य उद्ध्वस्त करण्याशिवाय काहीही साध्य करू शकणार नाही. ते म्हणाले की, आजचा दिवस आणीबाणी लादण्याच्या घृणास्पद कृत्याचा निषेध करण्याचा आहे आणि तरुणांनी भविष्यासाठी लोकशाहीचे रक्षण करण्याची मशाल हातात घेण्याचा दिवस आहे.

* * *

S.Kane/S.Patil/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai