ব্রাহ্মঋষি শ্বামী সাচ্চিদানন্দ জি, শ্রীমথ শ্বামী সুভঙ্গা-নন্দ জি, শ্বামী সরদানন্দজি, শেংলবা সাধুশিং, সরকারগী ঐগী মরুপশিং শ্রী জর্জ কুরিয়ান জি, সংসদকী ঐগী মরুপ শ্রী অদুর প্রকাস জি, অতোপ্পা শক্নাইরবা অহলশিং, ইবেম্মাশিং অমসুং ইবুংঙোশিং।

पिन्ने एनडे ऐल्ला, प्रियपेट्ट मलयाली सहोदिरि सहोदरन मार्कु, एनडे विनीतमाय नमस्कारम्।

পুৱারি ওইরবা থৌদোক অমনা ঐখোয়গী নিংতম্বা ইহৌদা অনৌবা মাইকৈ অমা তাকপতা নত্তনা নিংতম্বগী পান্দম অমসুং নিংতম্বা ভারত অমগী মঙলানগী চপ চাবা ৱাহন্থোক অমা পীখি। চহি ১০০ গী মমাঙদা শ্রী নারায়ন গুরু অমসুং গান্ধী জিগী মরক্ত উনখিবা অদু ঙসি ফাওবা ইথিল পীরি অমসুং চুনরি। চহি ১০০ গী মমাঙদা উনখিবা অদুনা ঙসি ফাওবদা বিকসিত ভারত অমগী অপুনবা পান্দমশিংগী থৌনা অমা ওইরি। পুৱারি ওইরবা থৌরম অসিদা, ঐনা শ্রী নারায়ন গুরু অমসুং গান্ধীজিগী মফমদা ইকায়খুম্নবা উৎচরি।

মরুপশিং,

শ্রী নারায়ন গুরুনা লৈবাক অমসুং খুন্নাইগী থবক তৌনবা ৱাশকখি। খুন্নাইগী তোল্লবা কাংলুপশিংগা ঐগা লৈনবা মরীশিং অদোম খঙলে। মরম অদুনা ঙসি ঐনা খুন্নাইগী তোল্লবশিংগীদমক অচৌবা ৱারেপশিং লৌরিবনি। শ্রী নারায়ন গুরুনা অচুম্বা, থবক অমসুং নুংশিন্না হিংমিন্নবদা থাজবা থমখি। মসিনা ইথিল পীদুনা ঐখোয়দা সবকা সাথ, সবকা বিকাসকী লম্বী তাক্লে। থাজবা অসিনা ঐখোয়দা খ্বাইদগী তোল্লবশিং ফাওবগী লেপ্পা ভারত অমা শেমগৎনবা থৌনা পীরে।

মরুপশিং,

সিবগিরি মথগা লোয়ন্নবা মীওইশিংনা ঐনা কয়া য়াম্না শ্রী নারায়ন গুরু অমসুং সিবগিরি মথতা থাজবা লৈবগে হায়বা খঙলে। মথকী শেংলবা সাধুশিংনা মতম পুম্নমক্ত ঐবু লুনা তৌবীবা অসি ঐগী লাইবক ফবনি। ঐ নিংশিংলি, ২০১৩ দা ঐনা গুজরাতকী চীফ মিনিস্তর ওইরিঙৈদা, কেদরনাথতা মহৌশাগী খুদোংথিবা থোকপদগী সাধু কয়া সিবগিরি মথত পন্দুনা লৈখি। পন্দুনা লৈরিবা মীওইশিং লৌথোক্নবা সিবগিরি মথনা ভারত সরকারদা হায়জখিদে। রাজ্য অমগী চীফ মিনিস্তর অমা ওইরিবা ঐঙোন্দা থাজবা থমদুনা মীয়াম লৌথোক্নবা সিবগিরি মথনা খঙহল্লকখি। ঈশ্বরদগী থৌজালদগী ঐনা সাধুশিং অমসুং ভক্তশিং অশোই-অঙাম য়াওদনা পুরকপা ঙমখি।

মরুপশিং,

কাসিগী খুৎথাংদা ঐনা অদোমগা মরী লৈনরে। চহি চা কয়া সাউথনা কাসি অসি ভারকালা হায়না খঙনৈ। কাসি অসি অৱাং নত্ত্রগা খাগী ওইবা য়াই, ঐগী ওইনা কাসি অসি কাসিনি।

মরুপশিং,

ভারতকী সাধুশিং অমসুং মুনিশিংগী চৎনবীশিং খঙবা অসি ঐগী লাইবক ফবনি। ভারত অসি শক্নাইরবা মীওইশিংনা খুন্নাইগী অনৌবা মাইকৈ তাকখিবা লৈবাক অমনি। অধ্যতিক্কী থবক খরনা খুন্নাইগী থবক ফগৎহনখি। খুন্নাইগী অওনবশিং পুরকপদা শ্রী নারায়ন গুরুনা ইথিল পীখি। মহাক্কী ৱাহৈশিং ‘निवृत्ति पंचकम्’ অমসুং ‘आत्मोपदेश शतकम्’ অসি  অদভাইতা অমসুং অধ্যাতিক্কী মহৈরোয় অমগী লমজিং অমনি।

মরুপশিং,

য়োগ অমসুং ভেতান্তা, সাধনা অমসুং মুক্তি অসি শ্রী নারায়ন গুরুগী মরুওইবা হিরমশিংনি। মরম অদুনা মহাক্না অধ্যাতিক অসি খুন্নাইগী অওনবা পুরক্নবা অমসুং খুন্নাইগী য়াইফনবা পাম্বৈ অমা ওইখি। শ্রী নারায়ন গুরুগী অসিগুম্বা থবকশিংদগী গান্ধীজি ফাওবা ইথিল পীখি অমসুং পাউতাক লৌখি। শ্রী নারায়ন গুরুগা খন্ন নৈনবগী কান্নবশিং গুরুদেব রবিন্দ্রনাথ তেগোরশু ফংখি।

মরুপশিং,

মতম অমদা কনাগুম্বা অমনা শ্রী নারায়ন গুরুগী आत्मोपदेश शतकम् রামানা মহাঋষিদা থিখি। মসি তারবা মতুংদা, রামানা মহাঋষিনা হায়খি-"अवर एल्लाम तेरीन्जवर"। মসিনা হায়রি মদুদি- মহাক্না খুদিংমক খঙই অমসুং ভারতকী সভেত্য, নাত অমসুং ৱাঙুলোন মাঙহন্নবা হোৎনরকপা মতমদা, মদুগী মরাল ঐখোয়গী চৎনবী নত্তে হায়না শ্রী নারায়ন গুরুনা ঐখোয়দা তাকপীখি। ঐখোয় অসি শ্রী নারায়ন গুরু মীওইবা অমা ওইনা অহিংবা সিবা অমা ওইনা উবা মীয়াম্নি। খেন্নবা কয়া লৈরবশু ঐখোয়না খেন্নবা ওইনা উদে। খেন্নবশিং অদু ঐখোয়না অমতা ওইনা উবা ঙম্মী।

মরুপশিং,

শ্রী নারায়ন গুরুগী লাইৱা-“ओरु जाति, ओरु मतम्, ओरु दैवम्, मनुष्यनु” ঐখোয়না খঙলে। মসিগী ৱাখল্লোন অসি ভারতকী হৌরকফম্নি অমসুং লৈবাক অসিগী য়ুম্ফমনি। হন্দক ঐখোয়না মালেমগী য়োগ নুমিৎ পাংথোকপা অদোম উরে। হন্দক্কী থিম অসি মালেম অমা, হকশেল অমগীদমক য়োগ হায়বনি। মসিগী মমাংদা, মালেমগী য়াইফনবা ভারতনা মালেম অমা, হকশেল অমগী থবকশিং হৌদোকখ্রে। ঙসি ভারতনা নুমিৎ অমা, মালেম অমা, গ্রিদ অমগুম্বা মালেমগী থবকশিং মাঙজিল থারি। ঐখোয়না মালেম অমা, ইমুং অমা, তুংলমচৎ অমা হায়বা থিমদা ২০২৩ দা জি-২০ মীফম পাংথোকখ্রে। বসুধাইবা কুতুম্বকমগী ৱাখল্লোন অসি ঐখোয়গী হায়রিবা থবকশিং অসিগা মরী লৈনৈ। শ্রী নারায়ন গুরুগুম্বা সাধুশিংগী ইথিলনা মসিগা মরী লৈনৈ।

মরুপশিং,

মীচং মীখাই নাইদবা খুন্নাই অমা শেমগৎনবা শ্রী নারায়ন গুরুনা পান্দম থমখি। ঙসি লৈবাক অসিনা তাথি তাওইনা তৌদবা অমসুং মীওই খুদিংমক কান্নবা মপুংফানা ফংনবা মাইকৈদা চংশিনবদা ঐ অপেনবা পোকই। চহি ১০-১১ গী মমাঙদা মীওই করোর কয়া মখোয়গী কোকথক্ত য়ুমথক অমা ফাওবা লৈরমদে। খুঙ্গং লাখ কয়াদা অফবা থক্নবা ঈশিং ফংলমদে, লায়না কয়া লায়য়েংনবগী খুদোংচাবা ফংলমদে, লায়রবা, দলিত, ত্রাইবেল, নুপী করোর কয়া মীওইবগী তঙাইফদবা খুদোংচাবশিং ফংদনা লৈখি। ঐখোয়না অহানবা ওইনা মীয়ামগী খনবা সরকার অমা লিংখৎলে। মসিনা মরম ওইদুনা ঐখোয়না প্রধান মন্ত্রী অৱাস য়োজনাগী মখাদা লায়রবশিংদা পাক্কাগী য়ুম করোর কয়া পীরে। য়োজনা অসিগী মখাদা শাবা য়ুমশিংদা গ্যাস, মৈ, তোইলেত ফংহল্লে। জল জিবনগী মখাদা য়ুম খুদিংমক্ত তোতি ঈশিং ফংহল্লে। পি.এম জনমন য়োজনাগী মখাদা ত্রাইবেলশিংগী ফিবম ফগৎহল্লে।

মরুপশিং,

শ্রী নারায়ন গুরুনা মতম পুম্নমক্ত নুপীশিংদা শক্তি পীনবা তকশিনখি। ঐখোয়গী সরকারশু নুপীশিংনা লমজিংবা চাউখৎপগী লাইৱাগা লোয়ননা মাঙলোমদা চঙশিল্লি। অনৌবা হিরমশিংদা নুপীশিং মখোয়গী হকশিং ফংলে। শান্নবদগী হৌরগা স্পেস ফাওবগী লমদা হিরম খুদিংমক্ত ঙসি ইচানুপীশিংনা লৈবাক অসিগী মিংচৎ পুরক্লে। লৈবাক অসিগী মীওই করোর ১৪০ গা লোয়ননা মীয়াম শরুক য়াবগী ৱাখল্লোনগা লোয়ননা ঐখোয় মাঙলোমদা চঙশিল্লি।

মরুপশিং,

শ্রী নারায়ন গুরুনা হায়খি- विद्या कोंड प्रब्बुद्धर आवुका संगठना कोंड शक्तर आवुका, प्रयत्नम कोंड संपन्नार आवुका"। মসিনা হায়খি মদুদি – লাইরিক্কী মতেংনা মঙাল পীবা, লুপগী খুৎথাংদা পাঙ্গল শেমগৎপা, উদ্যোগকী খুৎথাংদা নুংঙাই য়াইফবা পুরকপা। গুরুজিনা সিবগিরিদা সারাদা মথ লিংখৎখি। লায়রবশিংগী ফিবম ফগৎনবা লাইরিক-লাইশুগী পাউতাক পীখি। গুরুদেব সেন্তরশিং অমসুং শ্রী নারায়ন কলচরেল মিসন্না লৈবাক অসিগী সহর কয়াদা মীয়ামগী য়াইফনবা থবক পায়খৎপদা ঐ হরাওই।

মরুপশিং,

চহি কয়াগী মতুংদা ঐখোয়না লৈবাক অসিদা অনৌবা ইজুকেসন পোলিসি অমা হৌদোক্লে। অনৌবা ইজুকেসন পোলিসি অসিনা ইজুকেসন অসি মতমগা চুনবা ওইহনবা অমসুং মীওই খুদিংমক কোনবা খক নত্তনা, মসিনা মমালোলদা লাইরিক তম্বা পুক্নিং থৌগৎলে। মসিগী কান্নবা খুন্নাইগী তোল্লবা কাংলুপশিংনা ফংলে।

মরুপশিং,

হৌখিবা চহি ১০ অসিদা ঐখোয়না আই.আই.তিশিং, আই.আই.এম.শিং, এ.আই.আই.এম.এসশিং লৈবাক অসিদা লিংখৎলে। মসিনা মরম ওইদুনা লায়রবা নহারোলশিং অৱাংবা থাক্কী লাইরিক তম্নবগী অনৌবা খুদোংচাবশিং ফংলে। হৌখিবা চহি ১০ দা ত্রাইবেলশিংগী লমদা এক্লাব্যা মোদেল রেসিদেন্সিএল স্কুল ৪০০ লিংখৎলে।

মরুপশিং,

ঐখোয়না ইজুকেসনগা স্কিল অমসুং খুদোংচাবশিংগা হকথেংননা মরী লৈনহল্লে। স্কিল ইন্দিয়াগুম্বা মিসনশিংনা লৈবাক অসিগী নহারোলশিং মশা মরোমদোম লেপচবা ঙমহল্লে। লৈবাক অসিগী উদ্যোগ চাউখৎলে, প্রাইভেদ সেক্তরদা অওনবশিং পুরক্লে, মুদ্রা য়োজনা, স্তেন্দঅপ ইন্দিয়া য়োজননা দলিত, ত্রাইবেলশিং অমসুং লায়রবশিংদা কান্নবা পীরে।

মরুপশিং,

শ্রী নারায়ন গুরুনা মপাঙ্গল কনবা ভারত অমা পামখি। ভারতকী ফিবম ফগৎনবা ঐখোয়না হিরম খুদিংমক, শেন-থুম, খুন্নাই অমসুং ঙাক-শেনদা ঐখোয় মাঙজিল থাগদবনি। ঙসি লৈবাক অসি লম্বী অসিদা চৎলি। মালেমদা অহুমশুবা খ্বাইদগী চাউবা ইকোনোমি ওইনবা ভারত মাঙলোমদা য়াংনা চঙশিল্লি। হন্দক ভারতকী থৌনা মালেম্না উখ্রে। ওপরেসন সিন্দুরনা ভারতনা তেরোরিজমগী মথক্ত অকনবা থবক পায়খৎলিবা অসি মালেম্না নাখৈ শেংনা খঙলে।

মরুপশিং,

ঙসিগী ভারতনা থাঙলিবা খোঙথাংশিং অসি লৈবাক্কী য়াইফনবা ঙাক্তনি। লান্মীগী দরকার ওইবশিংগীদমক ভারতনা মপান লৈবাকশিংগী মখা পোনবা অদু হন্থরক্লি। দিফেন্স সেক্তরদা ঐখোয় মশা মরোমদোম লেপচবা ঙম্লে। মসিগী ফল ওপরেসন সিন্দুর মনুংদা উবা ফংলে। ভারত্ত শাবা খুৎলায়শিংনা য়েক্নবশিং মিনিত ২২ গী মনুংদা ঐখোয়না নমদুনা চঙজহল্লে। তুংদা ভারতনা শাবা খুৎলায়শিং মালেম শীনবা থুংনা মমিং চৎলগনি হায়না ঐনা থাজৈ।

মরুপশিং,

লৈবাক অসিগী ৱাশকশিং ঙাক্নবা, ঐখোয়না মীয়ামদা শ্রী নারায়ন গুরুগী পাউতাকশিং শন্দোক্কদবনি। মাইকৈ অসিদা ঐখোয়গী সরকারশু থবক পায়খৎলি। শ্রী নারায়ন গুরুগী পুন্সিগা মরী লৈনবা লাইফমশিংগী সিবগিরি সর্কুইত শেমগৎতুনা শম্নহল্লে। অমৃতকালগী মাইকৈদা ঐখোয়গী খোঙচৎ অসিদা লৈবাক অসি মহাক্কী পাউতাকশিং অমসুং থৌজালনা লমজিংগনি হায়না ঐনা থাজৈ। অমতা ওইনা, ঐখোয়না বিকসিত ভারত অমগী মঙলান মঙফাওনহনগদবনি। শ্রী নারায়ন গুরুগী থৌজাল ঐখোয় খুদিংমক্ত ফংনবা ঐনা থৌনিজরি। সিবগিরি মথকী সাধুশিং ঐনা অমুক হন্না কোক নোঞ্জরি। ময়াম পুম্নমক থাগৎপা ফোঙদোকচরি। নমস্কারম !

****