આયર્લેન્ડના અહાકિસ્તા, કોર્કમાં એર ઇન્ડિયા ફ્લાઇટ 182 (કનિષ્ક) બોમ્બ વિસ્ફોટની 40મી વરસીની સ્મૃતિમાં બોલતા, કેન્દ્રીય પેટ્રોલિયમ અને કુદરતી ગેસ મંત્રી શ્રી હરદીપ સિંહ પુરીએ આંતરરાષ્ટ્રીય સમુદાયને આતંકવાદ સામે એક થવા હાકલ કરી છે. "દુનિયાએ ફક્ત આવા ગંભીર શોકના અલગ-અલગ પ્રકરણમાં જ નહીં, પરંતુ આતંકવાદનો સામનો કરવા માટે સામૂહિક, સક્રિય પ્રયાસોમાં એક સાથે આવવાની જરૂર છે " તેમણે કહ્યું હતું.

23 જૂન, 1985ના રોજ એર ઇન્ડિયા ફ્લાઇટ-182ને કેનેડા સ્થિત આતંકવાદીઓ દ્વારા બોમ્બ લગાવીને હવામાં જ તોડી પાડવામાં આવેલી દુર્ઘટનાને યાદ કરતા, જેમાં 80થી વધુ બાળકો સહિત તમામ 329 લોકો માર્યા ગયા હતા, શ્રી પુરીએ કહ્યું કે આ દુર્ઘટના કોઈ અકસ્માત નહોતી પરંતુ "ભારતને વિભાજીત કરવા માંગતા હઠીલા તત્વો દ્વારા ઇરાદાપૂર્વક કરવામાં આવેલું ઘૃણાસ્પદ કૃત્ય હતું."

મંત્રીએ ભારપૂર્વક જણાવ્યું હતું કે આતંકવાદ અને ઉગ્રવાદ ભૂતકાળના મુદ્દાઓ નથી પરંતુ વર્તમાન સમયના ખતરા છે. જે સમગ્ર વિશ્વમાં નિર્દોષ લોકોના જીવનને જોખમમાં મૂકે છે. "જમ્મુ અને કાશ્મીરથી પંજાબ અને મુંબઈ સુધી, ભારત દાયકાઓથી આતંકવાદનો ભોગ બન્યું છે. વારંવાર, આપણા લોકોએ બોમ્બ ધડાકા, હત્યાઓ અને અત્યાચારોનો સામનો કર્યો છે," તેમણે કહ્યું, વિશ્વભરના દેશો આ સમસ્યાનો સામનો કરી રહ્યા છે. તેમણે એ વાત પર પણ પ્રકાશ પાડ્યો કે તેમણે 2024માં વૈશ્વિક આતંકવાદ સંબંધિત મૃત્યુમાં 22 ટકાનો વધારો થયો છે.

આ સહિયારા ખતરાનો સામનો કરવા માટે કેનેડા સરકારને ભારત સાથે જોડાવા હાકલ કરતા, શ્રી પુરીએ કહ્યું: "કેનેડા એક મૂલ્યવાન ભાગીદાર અને મિત્ર છે. અમે એકબીજા સાથે જીવંત સાંસ્કૃતિક અને આર્થિક સંબંધો શેર કરીએ છીએ. ભારત અને કેનેડા લોકશાહી પરંપરાઓથી બંધાયેલા છે."

તેમણે ગુપ્ત માહિતીની આપ-લે, કટ્ટરપંથી વિરોધી પ્રયાસો અને આતંકવાદી ભંડોળને અટકાવવા દ્વારા બંને રાષ્ટ્રો વચ્ચે વધુ ગાઢ સહયોગ માટે વિનંતી કરી હતી. "ભારત વધુ કરવા માટે તૈયાર છે. આપણી સુરક્ષા એજન્સીઓ, ગુપ્તચર તંત્ર અને રાજદ્વારી ચેનલો આવી દુર્ઘટનાઓનું પુનરાવર્તન ન થાય તે સુનિશ્ચિત કરવા માટે વિશ્વ સાથે ભાગીદારી કરવા માટે સંપૂર્ણપણે પ્રતિબદ્ધ છે."

શ્રી પુરીએ 1985ની દુર્ઘટના પછી અહાકિસ્તાના લોકો અને આઇરિશ સરકારની સંવેદનાનો પણ સ્વીકાર કર્યો અને આભાર માન્યો હતો. "તેઓએ શોકગ્રસ્ત પરિવારો માટે પોતાના ઘર અને હૃદય ખોલી નાખ્યા - માનવતાનું એક કાર્ય જે હજુ પણ પ્રેરણા આપે છે."

તેમણે વધુમાં નોંધ્યું કે આપત્તિ પછી ભારત અને આયર્લેન્ડ વચ્ચે બનેલી અનોખી મિત્રતા મજબૂત દ્વિપક્ષીય સંબંધોમાં પરિણમી છે, જેનો વેપાર 2023માં લગભગ USD 16 બિલિયન સુધી પહોંચ્યો છે.

અંતમાં, મંત્રીએ વૈશ્વિક શાંતિ અને સુરક્ષા માટે પ્રયત્નશીલ રહીને પીડિતોની સ્મૃતિને માન આપવાના ભારતના અટલ સંકલ્પનો પુનરોચ્ચાર કર્યો હતો. "આજના સ્મારકને એક સંયુક્ત સંદેશ બનવા દો - જે લોકો નફરત અને આતંક ફેલાવે છે તેઓ ક્યારેય માનવતા, લોકશાહી અને મિત્રતા પર વિજય મેળવી શકશે નહીં."

આ સમારોહમાં આઇરિશ પ્રધાનમંત્રી માઇકલ માર્ટિન, કેનેડિયન જાહેર સલામતી મંત્રી ગેરી આનંદસાંગરી, સ્થાનિક આઇરિશ અધિકારીઓ, પ્રથમ પ્રતિભાવ આપનારાઓ અને પીડિતોના પરિવારો ઉપસ્થિત રહ્યા હતા, દરેકે સાથે મળી આ ગંભીર સ્મૃતિમાં પ્રાર્થના કરી હતી.

AP/IJ/GP/JD