Ki Panchayat ha kylleng ka ri ki pynkhreh ban pynlong ïa ka International Day of Yoga (IDY) kaban sa wan kum ka sngi kaba kongsan ryngkat bad ka jingiashim bynta ki paidbah. Kane ka long kum ka jubab ia ka shithi jong u Myntri Rangbah Duh u Narendra Modi ha kaba u la kyntu ïa ki Gram Pradhan ban pynshlur ïa ki nongshong shnong kiba sah hapoh ka jaka jong ka Panchayat jong ki ban ïashim bynta ha ka International Day of Yoga.

U Myntri Rangbah, lyngba katei ka shithi, u la kyntu ia ki Gram Pradhan, ba kin ialam ban pynlong ia ka yoga kum shi bynta jong ka jingim ha ka imlang sahlang. Kum ka jubab ia kane, ki panchayat ki pynlong ïa ki jingïalang yoga ba kyrpang, ki kam ai jingtip paidbah, bad ki jingpyni ïa ka Common Yoga Protocol ha ki skul, ki anganwadi, ki panchayat bhavan, bad ki jaka paidbah, kaba la pynkylla ïa ka IDY 2025 sha ka jan-andolan ba shisha.

Haba pynpaw ïa ka jingkongsan jong ka IDY ka ban sa wan, u Myntri Rangbah Duh u la ong ba kam dei tang ka jingrakhe ha ka pyrthei hynrei ka dei ruh ka jingpyndep ïa ka jingïaid lynti kaba don jingmut kaba shiphew snem jong ka jingmih biang jong ka yoga ha ka pyrthei. "Ka long kaba sngew sarong ba ka yoga ka la pynkylla bha ïa ki jingim ym tang ha India hynrei ha kylleng ka pyrthei," la ong u Myntri Rangbah Duh ha kane ka shithi.

Ka phang pdeng jong une u snem—"Ka Yoga na ka bynta kawei ka Pyrthei, kawei ka Koit ka Khiah"—ka ban jur ym tang ïa ka bha ka miat shimet, hynrei ïa ka mynsiem jong ka jingïatylli hapdeng ka longbriew manbriew, ka jingïatylli bad ka mariang, bad ka bha ka miat jong ka pyrthei. U Myntri Rangbah Duh u la ong ba ka yoga ka dei ka "bynta kaba ym lah ban pyniakhlad na ka kolshor jong ngi" kaba pyniadei ia ka met bad ka jingmut jingpyrkhat bad kaba ialam ia ki briew shimet sha ka jingim kaba pura bad kaba suk.

U la ban jur ba ka yoga ka don ka bynta kaba pynkupbor ha ka jingthmu lang jong ka ri ban ioh ia ka India kaba la kiew shaphrang, da kaba plié lad ban don ki nongshong shnong kiba khlain ha ka met bad ka jingmut jingpyrkhat.

Ha ka shithi jong u, u Myntri Rangbah Duh u la kyntu ia ki Gram Pradhan ban wanrah ia ka jingiashim bynta kaba heh tam na ki nongshong shnong da kaba pynlong ia ki jinghikai yoga ha ki jaka paidbah kum ki panchayat bhavan, ki anganwadi, ki skul, bad ki primary health centre. U la kyntu ïa ki ban pynthikna ïa ka jingïashim bynta kaba kynthup lang ia baroh ki briew—ki khynnah, ki samla, ki kynthei, bad ki tymmen—khnang ba uwei pa uwei u nongshong shnong un ïoh mad ïa ki jingmyntoi jong ka yoga.

U Myntri Rangbahduh u la pynpaw ka jingngeit skhem jong u ba kane ka jingthmu kan poi sha man la ki longïing bad kan ai mynsiem ïa ki briew shimet ban pynlong ïa ka yoga kum ka bynta jong ka jingim ba man la ka sngi jong ki.

U Prataprao Jadhav, Myntri Khynnah ba dei khmih ia ka Tnad Ayush bad Myntri Khynnah ba dei peit ïa ka Koit ka Khiah, u la ai khublei ïa ki jingpyrshang jong ki Gram Panchayat ha kylleng ka ri bad u la ong, “Ka jingiashim bynta na ki Gram Panchayat ka long ka jingpynshisha ïa ka jinglong nongïalam ba ai mynsiem jong u Myntri Rangbah Duh ka ri u Narendra Modi. Ka jingkyntu jong u ka la pynkylla ia ka International Day of Yoga sha ka jan-andolan kaba shisha, ha kaba ki shnong ha kylleng ka ri India ki pdiang ïa ka yoga kum ka rukom im. Kine ki jingpyrshang ki pyni ïa ka jingïadei kaba jylliew jong ka kolshor bad ka jingaiti jong ki paidbah kaba nangroi na ka bynta ka koit ka khiah ba pura lyngba ka yoga.”

U Sarpanch ka shnong Pariyari ha Kerakat, Jaunpur (Uttar Pradesh), u Om Prakash Yadav u la batai kumno ka shithi jong u Myntri Rangbah Duh ka long kum ka khubor kaba sngewtynnat bad ai mynsiem ïa ka imlang sahlang. “Ka shithi ka la sngew kumba ka dei ka khubor na u Myntri Rangbah Duh, bad ka la pynshlur shisha ïa ka shnong jong ngi baroh kawei ban pdiang ïa ka yoga,” u la ong. Hadien kane ka jingkyntu, ka shnong ka la sdang ban pynlong ïa ki jingleh yoga man ka taiew ha Panchayat Bhavan bad sdang ïa ki jingleh yoga na ka bynta ki khynnah skul ban kyntiew ïa ka jingskhem jingmut bad ka rukom im kaba skhem jong ki. La pynlong ruh ïa ka ‘Yoga Yatra’ kaba kyrpang, ha kaba la ïashim bynta shitrhem da baroh ki bynta jong ka shnong, kaba la wanrah ïa ka jingpynsngewthuh paidbah bad ka jingsngew ïatylli kaba khlaiñ lyngba ka yoga.

U Sunil Kumar W, u Gram Pradhan na ka shnong Bandakpur ha Damoh (Madhya Pradesh) u la ai khublei naduh ka dohnud ïa u Myntri Rangbah Duh ka ri u Narendra Modi halor ka khubor ba ai mynsiem jong u ha kane ka sngi rakhe ïa ka International Day of Yoga. “Ka jingthmu jong u Myntri Rangbah Duh ka la pynkylla shisha ïa ka yoga sha ka jingïakhih paidbah, kaba la poi sha man la ki shnong ha kylleng ka ri,” u la ong. Haba kren shaphang ki jingpynkhreh jong ka shnong jong u, u la ong, “Ngi pynthikna ïa ka jingïashim bynta kaba heh tam jong ki paidbah ha ka jaka kaba hap hapoh ka panchayat jong ngi, bad ngin pynlong ïa ka jingleh yoga ba kyrpang hapoh ka Common Yoga Protocol ha ka sngi rakhe ia ka IDY 2025. Ki nongshong shnong jong ngi ki khmih lynti da ka jingkmen ban ïashim bynta ha kane ka jingïalang.” U la ong ruh ba ka jingpynsngewthuh paidbah kaba jylliew ka dang ïaid shakhmat ha ka panchayat ban pynthikna ba man la ka longïing kan ïoh jingtip bad ïoh mynsiem ban ïadon bynta lang ha kane ka jingrakhe.

Ka Pawani Mishra, Sarpanch jong ka Gram Panchayat Khera Kursi ha Kanpur Dehat (Uttar Pradesh), ka la pynpaw ïa ka jingsngew sarong bad ka jingioh mynsiem mar ia ïoh ïa ka shithi jong u Myntri Rangbah Duh ka ri. “Ka long ka kam kaba donburom shibun ia ngi,” ka la ong. “Ka shithi ka la pynshlur ïa ngi ym tang ban leh ïa ka yoga hynrei ban shim ïa ka kum ka rukom im.” Kum ka jingpynkhreh ia ka IDY 2025, ka panchayat ka la pynlong ia ki prokram yoga ba kyrpang kiba iadei bad baroh ki rta. Watla ka dei ka jaka lum, ki samla trai shnong ki la ïawan lang ban thaw ïa ka jaka leh yoga, ha kaba mynta la pynlong ïa ki jingïalang mynstep man ka por. Ki kynhun jong ki kynthei ki la sdang ruh ïa ki jingpynsngewthuh paidbah hapoh ka phang ‘Ka Koit ka Khiah ka dei ka Jingriewspah’, da kaba pynlong ïa ki jingïakren halor ka yoga bad ka jingioh ia ka bam kaba tei ia ka met. Nalor kata, ki jingïakob dro dur bad thoh essay ha ka shnong halor ka phang ‘Ka jingriewspah lyngba ka Yoga’ ki la sakhi ïa ka jingïashim bynta kaba shitrhem da ki khynnah. “Ngi ngeit skhem,” ka la bynrap, “ba lyngba kane ka jingiatrei lang, ka IDY 2025 kan long ka jingrakhe kaba sah nam bad kaba la ïalam shisha da ki paidbah ha ka imlang sahlang.”

****