Ka Annual Conference of Relief Commissioners bad ka State Disaster Response Force (SDRF) kaba ar sngi jong ki Jylla bad ki UT-2025, ba la pynlong da ka Tnad Kam Pohiing ka la kut noh mynta ka sngi ha New Delhi. U Principal Secretary sha u Myntri Rangbah Duh, Dr. P. K. Mishra u la pyniaid ia ka bynta kaba pynkut ia kane ka jingialang.

Haba kren ha kane ka sngi, u Dr. P K Mishra u la ong ba kane ka jingïalang kaba man la u snem ka dei kaba kham palat ia ka rukom—ka dei ka lad ia baroh ban pynleit jingmut, pynbeit thymmai, bad pynskhem ïa ka rukom treikam ba ïatylli jong ngi ha kaba ïadei bad ka jingpeit ia ka kam kaba iadei bad ka jingjia lynshop ki bor ka mariang. Da kaba kdew ba ka jinglong jong ki jinglynshop ki bor ka mariang ka nang kylla, u la ong ba ngi dei ban pdiang ia kane ka jingshisha lane ki jingma ki iadei iwei pa iwei, ki jingktah ki nang bun, bad ki jingma ki nang kiew stet ban ia kaba ngi lah ban pynkylla ia ki rukom treikam.

U Dr. P K Mishra u la pynpaw ia kine ki kam harum ban pynleit jingmut kham bniah ha ki sngi ban wan, ki ban pynkhlain ia ka jinglong jingman jong ngi ha ki por ban wan:

1. Ka jingpynkhreh bad jingpynsngewthuh ka long kaba kongsan bha ban ialeh pyrshah ia ka jingbym thikna kaba nang kiew halor ki jinglynshop ki bor ka mariang. Ka jingma ka nang kylla bad kumta, dei ban kyntiew ia ka jingpynkhreh jong ki jylla.
2. Na ka bynta ka jingkylla kaba kham bha na ka rukom ai jingiarap bad jubab sha ka rukom pynkhreh bad pynduna jingeh, ki jylla ki donkam ban pyndonkam ia ki jinghikai ba la ioh. Kane ka long kaba donkam bha, khnang ba ki jingshemphang na ki jingjia ba la dep kin ym dei kiba la klet.
3. Katba la pdiang ia ka rukom ai pisa jong ka India ia ka DRR ha ka jingialang bah jong ka pyrthei halor ka DRR kaba la long ha Geneva ha ka 4-6 tarik Jylliew, 2025, ki Jylla ki dei ban pynthikna ban pyndonkam hok ia ki pisa ban pynbha bad pynduna ia ki jingeh.
4. Da kaba kdew sha ka jaka kaba heh jong ka India, kaba pynlong ba nalor ka kynhun ba khlain jong ka ri ban ialeh pyrshah ia ki jingjia ba sngewsih, ki jylla ki dei ban bishar bha bad bei tyngka ha ka jingpynkhlain ia ka bor jong ki tnad kiba don bynta ha ki kam ai jingiarap ha ki jingjia ba sngewsih.
5. Ka jingpynkhreh na ka bynta ki jingjia ba sngewsih kam dei ka kam jong ki kynta hynrei ka dei ka kam jong ki minit, namar man la ka minit ba la shim ha ka jingpynkhreh bad sdang ia ka kam ai jingiarap ka long kaba donkam. Kumta dei ban kyntiew ia ka jingstet jong ka rukom treikam. Ka dang don shibun ban leh halor ka jingai jingtip lypa na ka bynta ki katto katne ki jingjia ba sngewsih.
6. La shem ba ka jingantad ia ki jingduh ha ki katto katne ki jingjia ba sngewsih ki dei kiba kham bun ban ia kaba la antad. Kum ka nuksa, ka jingkyrduh um ka don ka lad ban ktah jur ia ki jingim bad ki jingkamai. Ha kine ki sngi ka jingpom pyrthat ka la kylla sha kawei na ki jingjia ba shyrkhei tam kaba la shim ia ka jingim briew. Kumta, dei ban pynbeit biang ia ki jingpyrshang pynduna jingeh jong ngi ban ialeh pyrshah ia kine ki jait jingjia ba sngewsih.
7. Ki jylla ki dei ban pynleit jingmut ha ki jingiarap kiba duna ka jinglut hynrei kiba don ka jingktah kaba jur ban pynduna ia ki jingma na ki jingjia ba sngewsih. Ki lad pynbeit ia ka jingshlei um ha ki jaka sor ki donkam ban peit ia ka jinglong ka jaka bad ka jinglong ka suinbneng ha kine ki jaka.
8. Ka jingpyndonkam ia ki nongtrei mon sngewbha kum ka jingiadon bynta lang jong ki paidbah lyngba ka Aapda Mitra ka long kaba kongsan bha na ka bynta ban kyntiew ia ka jingtreikam jong ka jingai jingiarap ha ki jingjia ba sngewsih. Ki jylla ki dei ban sngewthuh ia ka bynta ba ka Jan-Bhagidari kaba lah ban don ka bynta kaba heh ban pynlait im ia ki briew hadien ki jingjia ba sngewsih. Ka jingthmu ‘My Bharat’ jong u Myntri Rangbahduh ka dei kaba lah ban pyndonkam na ka bynta ban pynïasoh ïa ki samla ha ka jingaiïarap ha ki jingjia ba sngewsih.
9. Da kaba ban jur halor ka jingkongsan jong ka data ha ka kam kaba iadei bad ki jingjia ba sngewsih, u la kyntu ia baroh ban pyndonkam ia ki bynta jong ka Gati Shakti jong u Myntri Rangbah Duh ban pynbiang ia ki lad ai jingiarap na ka bynta ki jingjia ba sngewsih.
10. Da kaba iohi ïa ki jingeh kiba mih na ki jingjia ba shyrkhei bad ki jingbym thikna, ki jylla ki donkam ban pynbeit thymmai bad pyntreikam biang ïa ki tnat treikam jong ki, ki rukom treikam bad ki rynsan treikam jong ki ban pynkhreh ïalade ban long kiba la kloi ban ïakhun ïa kum kane ka jingjia, da kaba tehlakam ïa ka jingduh ïa ki jingim bad ki mar ki mata.

Ha kane ka jingialang kaba ar sngi la iashim bynta da palat 1000 ngut ki nongmihkhmat na ki Sorkar Jylla/ UT, ki Tnad Sorkar Pdeng/ ki Kynhun/ Seng jong ka Sorkar Pdeng bad na ki SDRF/ Civil Defence/ Home Guards/ ki Kynhun Pynlip Ding ha ki Jylla/ UT.

Ha kane ka jingialang, la pynlong ia ki jingialang bapher bapher bad ki riew shemphang ki la ia kren halor ki bynta kum ka jingai jingtip ba sted, ka jingpeit bniah ia ki jingdonkam hadien ka jingshah pynjulor, ka jingshlei um ha ki jaka sor, ki jingeh ba thymmai bad ka jingpdiang ia ki buit thymmai, ka bynta jong ki bor ialeh pyrshah ia ki jingjia ba sngewsih, ki jingai jinghikai ban pynkhreh lypa, ka jingtrei mon sngewbha, bad kiwei kiwei.

****