കേന്ദ്ര മന്ത്രിസഭയിലെ എന്റെ സഹപ്രവർത്തകൻ സുകാന്തോ മജുംദാർ ജി, പശ്ചിമ ബംഗാൾ നിയമസഭയിലെ പ്രതിപക്ഷ നേതാവ് സുവേന്ദു അധികാരി ജി, അലിപുർദ്വാറിൻ്റെ ജനപ്രിയ എംപി സഹോദരൻ മനോജ് തിഗ്ഗാ ജി, മറ്റ് എംപിമാർ, എംഎൽഎമാർ, ബംഗാളിലെ എന്റെ സഹോദരീ സഹോദരന്മാരെ!

അലിപുർദ്വാറിന്റെ ഈ ചരിത്ര ഭൂമിയിൽ നിന്ന് ബംഗാളിലെ എല്ലാ ജനങ്ങൾക്കും എന്റെ ആശംസകൾ!

അലിപുർദ്വാറിൻ്റെ ഈ ഭൂമി അതിർത്തികൾ കൊണ്ട് മാത്രമല്ല, സംസ്കാരങ്ങൾ കൊണ്ടും ബന്ധപ്പെട്ടിരിക്കുന്നു. ഒരു വശത്ത് ഭൂട്ടാന്റെ അതിർത്തി, മറുവശത്ത് അസാം. ഒരു വശത്ത് ജൽപൈഗുടിയുടെ സൗന്ദര്യം, മറുവശത്ത് കൂച്ച് ബെഹാറിന്റെ അഭിമാനം. ഇന്ന് ഈ സമ്പന്നമായ ഭൂമിയിൽ നിങ്ങളെയെല്ലാം കാണാനുള്ള ഭാഗ്യം എനിക്ക് ലഭിച്ചു.

സുഹൃത്തുക്കളെ,

ഇന്ത്യ ഒരു വികസിത രാഷ്ട്രമായി മാറാൻ പോകുന്ന ഈ ഘട്ടത്തിൽ, ബംഗാളിന്റെ പങ്കാളിത്തം പ്രതീക്ഷിക്കുന്നതും അനിവാര്യവുമാണ്. ഈ ഉദ്ദേശ്യത്തോടെ, കേന്ദ്ര ​ഗവൺമെൻ്റ് ഇവിടെ അടിസ്ഥാന സൗകര്യങ്ങൾ, നൂതനാശയം , നിക്ഷേപം എന്നിവയ്ക്ക് നിരന്തരം പുതിയ പ്രചോദനം നൽകുന്നു. ബംഗാളിന്റെ വികസനം ഇന്ത്യയുടെ ഭാവിയുടെ അടിത്തറയാണ്. ആ അടിത്തറയിലേക്ക് മറ്റൊരു ശക്തമായ ഇഷ്ടിക ചേർക്കേണ്ട ദിവസമാണ് ഇന്ന്. അൽപ്പം മുമ്പ്, ഈ വേദിയിൽ നിന്ന് ഞങ്ങൾ അലിപുർദ്വാറിലും കൂച്ച് ബെഹാറിലും സിറ്റി ഗ്യാസ് വിതരണ പദ്ധതി ആരംഭിച്ചു. ഈ പദ്ധതിയിലൂടെ, 2.5 ലക്ഷത്തിലധികം വീടുകളിലേക്ക് പൈപ്പ്ലൈൻ വഴി ശുദ്ധവും സുരക്ഷിതവും വിലകുറഞ്ഞതുമായ വാതകം വിതരണം ചെയ്യും. അടുക്കളയിലേക്ക് സിലിണ്ടർ വാങ്ങുന്നതിനെക്കുറിച്ചുള്ള ആശങ്ക ഇത് ഇല്ലാതാക്കുക മാത്രമല്ല, കുടുംബങ്ങൾക്ക് സുരക്ഷിതമായ വാതക വിതരണം ഉറപ്പാക്കുകയും ചെയ്യും. ഇതോടൊപ്പം, സിഎൻജി സ്റ്റേഷനുകളുടെ നിർമ്മാണം പരിസ്ഥിതി സൗഹൃദ ഇന്ധന സൗകര്യങ്ങളും വികസിപ്പിക്കും.ഇത് പണവും സമയവും ലാഭിക്കുകയും പരിസ്ഥിതിക്ക് ആശ്വാസം നൽകുകയും ചെയ്യും. ഈ പുതിയ തുടക്കത്തിന് അലിപുർദ്വാറിലെയും കൂച്ച് ബെഹാറിലെയും പൗരന്മാരെ ഞാൻ അഭിനന്ദിക്കുന്നു. നഗര വാതക വിതരണത്തിന്റെ ഈ പദ്ധതി ഒരു പൈപ്പ്ലൈൻ പദ്ധതി മാത്രമല്ല; ഗവൺമെൻ്റ് പദ്ധതികൾ വാതിൽപ്പടിയിൽ എത്തിക്കുന്നതിന്റെ ഒരു ഉദാഹരണം കൂടിയാണിത്.

സുഹൃത്തുക്കളെ,

കഴിഞ്ഞ കുറച്ച് വർഷങ്ങളായി ഇന്ത്യ ഊർജ്ജ മേഖലയിൽ കൈവരിച്ച പുരോഗതി അഭൂതപൂർവമാണ്. ഇന്ന് നമ്മുടെ രാജ്യം ഗ്യാസ് അധിഷ്ഠിത സമ്പദ്‌വ്യവസ്ഥയിലേക്ക് അതിവേഗം നീങ്ങുകയാണ്. 2014 ന് മുമ്പ് രാജ്യത്തെ 66 ജില്ലകളിൽ നഗര വാതക സൗകര്യങ്ങളുണ്ടായിരുന്നു. ഇന്ന് നഗര വാതക വിതരണ ശൃംഖല 550 ലധികം ജില്ലകളിൽ എത്തിയിട്ടുണ്ട്. ഈ ശൃംഖല ഇപ്പോൾ നമ്മുടെ ഗ്രാമങ്ങളിലും ചെറുപട്ടണങ്ങളിലും എത്തുന്നുണ്ട്. ലക്ഷക്കണക്കിന് വീടുകളിൽ പൈപ്പുകൾ വഴി വാതകം എത്തുന്നു. സിഎൻജി കാരണം പൊതുഗതാഗതത്തിലും മാറ്റങ്ങൾ വന്നിട്ടുണ്ട്. ഇത് മലിനീകരണം കുറയ്ക്കുന്നു. അതായത്, നാട്ടുകാരുടെ ആരോഗ്യം മെച്ചപ്പെടുകയും അവരുടെ പോക്കറ്റിന്മേലുള്ള ഭാരം കുറയുകയും ചെയ്യുന്നു.

സുഹൃത്തുക്കളെ,

പ്രധാൻ മന്ത്രി ഉജ്ജ്വല യോജനയിലൂടെ ഈ മാറ്റം കൂടുതൽ ശക്തി പ്രാപിച്ചു. 2016-ൽ നമ്മുടെ ​ഗവൺമെൻ്റ് ഈ പദ്ധതി ആരംഭിച്ചു. ഈ പദ്ധതി കോടിക്കണക്കിന് ദരിദ്ര സഹോദരിമാരുടെ ജീവിതം സു​ഗമമാക്കി. ഇത് സ്ത്രീകളെ പുകയിൽ നിന്ന് മോചിപ്പിച്ചു, അവരുടെ ആരോഗ്യം മെച്ചപ്പെടുത്തി, ഏറ്റവും പ്രധാനമായി, വീടിന്റെ അടുക്കളയിൽ ബഹുമാനത്തിന്റെ അന്തരീക്ഷം സൃഷ്ടിച്ചു. 2014-ൽ നമ്മുടെ രാജ്യത്ത് 14 കോടിയിൽ താഴെ എൽപിജി കണക്ഷനുകൾ മാത്രമേ ഉണ്ടായിരുന്നുള്ളൂ. ഇന്ന് ഈ സംഖ്യ 31 കോടിയിലധികമാണ്. അതായത് എല്ലാ വീടുകളിലും ഗ്യാസ് എത്തിക്കുക എന്ന സ്വപ്നം ഇപ്പോൾ സാക്ഷാത്കരിക്കപ്പെട്ടിരിക്കുന്നു. ഇതിനായി, രാജ്യത്തിന്റെ എല്ലാ കോണുകളിലും ഗ്യാസ് വിതരണ ശൃംഖല നമ്മുടെ സർക്കാർ ശക്തിപ്പെടുത്തിയിട്ടുണ്ട്. അതിനാൽ, രാജ്യത്തുടനീളമുള്ള എൽപിജി വിതരണക്കാരുടെ എണ്ണവും ഇരട്ടിയിലധികമായി. 2014-ന് മുമ്പ് രാജ്യത്ത് 14 ആയിരത്തിൽ താഴെ എൽപിജി വിതരണക്കാർ മാത്രമേ ഉണ്ടായിരുന്നുള്ളൂ. ഇപ്പോൾ അവരുടെ എണ്ണവും 25 ആയിരത്തിലധികമായി വർദ്ധിച്ചു. ഗ്യാസ് സിലിണ്ടറുകൾ ഇപ്പോൾ എല്ലാ ഗ്രാമങ്ങളിലും എളുപ്പത്തിൽ ലഭ്യമാണ്.

സുഹൃത്തുക്കളെ,

നിങ്ങളെല്ലാവരും ഉർജ്ജ ഗംഗ പദ്ധതിയെക്കുറിച്ച് പരിചിതമാണ്. വാതകാധിഷ്ഠിത സമ്പദ്‌വ്യവസ്ഥയിലേക്കുള്ള വിപ്ലവകരമായ ചുവടുവയ്പ്പാണ് ഈ പദ്ധതി. ഈ പദ്ധതി പ്രകാരം, കിഴക്കൻ ഇന്ത്യയിലെ സംസ്ഥാനങ്ങളിലേക്ക് വാതക പൈപ്പ്‌ലൈനുകൾ ബന്ധിപ്പിക്കുന്നതിനുള്ള പ്രവർത്തനങ്ങൾ നടന്നുവരികയാണ്. പശ്ചിമ ബംഗാൾ ഉൾപ്പെടെ കിഴക്കൻ ഇന്ത്യയിലെ പല സംസ്ഥാനങ്ങളിലും ഇപ്പോൾ പൈപ്പുകൾ വഴി വാതകം എത്തുന്നുണ്ട്. ഇന്ത്യാ ഗവൺമെന്റിന്റെ ഈ ശ്രമങ്ങളെല്ലാം നഗരങ്ങളിലായാലും ഗ്രാമങ്ങളിലായാലും പുതിയ തൊഴിലവസരങ്ങൾ സൃഷ്ടിച്ചു. പൈപ്പ്‌ലൈനുകൾ സ്ഥാപിക്കുന്നത് മുതൽ വാതക വിതരണം വരെ എല്ലാ തലങ്ങളിലും തൊഴിൽ വർദ്ധിച്ചു. വാതകാധിഷ്ഠിത വ്യവസായങ്ങൾക്കും ഇതിൽ നിന്ന് ഒരു ഉത്തേജനം ലഭിച്ചു. ഇപ്പോൾ നമ്മൾ വിലകുറഞ്ഞതും വൃത്തിയുള്ളതും എല്ലാവർക്കും പ്രാപ്യവുമായ ഒരു ഇന്ത്യയിലേക്ക് നീങ്ങുകയാണ്.

സുഹൃത്തുക്കളെ,

ഇന്ത്യൻ സംസ്കാരത്തിന്റെയും അറിവിന്റെയും ശാസ്ത്രത്തിന്റെയും ഒരു പ്രധാന കേന്ദ്രമാണ് പശ്ചിമ ബംഗാൾ. ബംഗാളിന്റെ വികസനമില്ലാതെ വികസിത ഇന്ത്യ എന്ന സ്വപ്നം സാക്ഷാത്കരിക്കാനാവില്ല. ഇത് മനസ്സിൽ വെച്ചുകൊണ്ട്, കഴിഞ്ഞ 10 വർഷത്തിനിടെ കേന്ദ്ര ​ഗവൺമെൻ്റ് ആയിരക്കണക്കിന് കോടി രൂപയുടെ വികസന പ്രവർത്തനങ്ങൾ ഇവിടെ ആരംഭിച്ചു. പൂർവ അതിവേ​ഗ പാതയോ ദുർഗാപൂർ അതിവേ​ഗ പാതയോ, ശ്യാമ പ്രസാദ് മുഖർജി തുറമുഖത്തിന്റെ നവീകരണമോ, കൊൽക്കത്ത മെട്രോയുടെ വികസനമോ, ന്യൂ ജൽപായ്ഗുടി സ്റ്റേഷന്റെ പുനരുജ്ജീവനമോ, ഡൂവർസേ റൂട്ടിൽ പുതിയ ട്രെയിനുകളുടെ പ്രവർത്തനമോ ആകട്ടെ, ബംഗാളിനെ വികസിപ്പിക്കാൻ കേന്ദ്ര ​ഗവണ്മെൻ്റ് സാധ്യമായ എല്ലാ ശ്രമങ്ങളും നടത്തിയിട്ടുണ്ട്. ഇന്ന് ആരംഭിച്ച പദ്ധതി വെറുമൊരു പൈപ്പ്‌ലൈൻ മാത്രമല്ല; അത് പുരോഗതിയുടെ ജീവരേഖയാണ്. നിങ്ങളുടെ ജീവിതം എളുപ്പമാക്കാനും നിങ്ങളുടെ ഭാവി ശോഭനമാക്കാനുമുള്ള ഞങ്ങളുടെ ശ്രമമാണിത്. നമ്മുടെ ബംഗാൾ വികസനത്തിലേക്ക് വേഗത്തിൽ നീങ്ങുമെന്ന പ്രതീക്ഷയോടെ, ഈ സൗകര്യങ്ങൾക്കെല്ലാം ഞാൻ വീണ്ടും എന്റെ ആശംസകൾ നേരുന്നു. ഇപ്പോൾ 5 മിനിറ്റിനുശേഷം, ഞാൻ ഇവിടെ നിന്ന് ഒരു തുറന്ന പ്ലാറ്റ്‌ഫോമിലേക്ക് പോകുന്നു. നിങ്ങൾക്ക് എന്നിൽ നിന്ന് ഒരുപാട് കാര്യങ്ങൾ കേൾക്കാൻ ആഗ്രഹമുണ്ടാകും, ആ പ്ലാറ്റ്‌ഫോം കൂടുതൽ അനുയോജ്യമാണ്, അതിനാൽ ബാക്കിയുള്ള കാര്യങ്ങൾ 5 മിനിറ്റിനുശേഷം ഞാൻ നിങ്ങളോട് പറയും. ഈ പരിപാടിയിൽ ഇത്രമാത്രം മതി, നിങ്ങൾ ഈ വികസന യാത്രയെ ഉത്സാഹത്തോടെയും ആവേശത്തോടെയും മുന്നോട്ട് കൊണ്ടുപോകണം.

ആശംസകൾ, വളരെ നന്ദി.

-SK-