U Myntri Sorkar pdeng ba dei khmih ia ka Tnad ka rep ka riang bad ka bha ka miat jong ki nongrep, Shivraj Singh Chouhan u la pyllait paidbah ia ka ‘Viksit Krishi Sankalp Abhiyan’ na Sakhigopal jong ka Puri district, Odisha mynta ka sngi. Kane ka sienjam ba kongsan ba la sdang da ka Tnad ka rep ka riang bad ka bha ka miat jong ki nongrep bad ka Indian Council of Agricultural Research (ICAR) ka dei ka sienjam kaba skhem ban pynkylla ia ka rep ka riang jong ka ri India bad ban pynthikna ia ka lawei ha kaba iadei bad ka bam jong ka ri lyngba ka jingsaindur thymmai da ka jingstad saian bad ka jingiashim bynta jong ki nongshong shnong. Ha kane ka campaign kaba 15 sngi, u Chouhan un leit sha kumba 20 tylli ki jylla. Ki sorkar jylla kin don ka bynta kaba kongsan ban pynurlong ia kane ka thong bad la khmih lynti ba baroh ki jylla kin pynlong ia kane ka campaign kaba jop lyngba ka jinglong trai bad jingaiti lut.

Ha ka jingai jingkren jong u, u Myntri sorkar pdeng ba dei khmih ia ka tnad ka rep ka riang bad ka bha ka miat jong ki nongrep u la ong ‘Kane ka campaign kan shim ïa ka rukom ïakren kaba ar bynta, ha kawei ka bynta ki scientist kin ïasam ïa ki jingwad bniah bad ki jingtip ha ka teknikal bad ki nongrep, katba ha kawei pat ka bynta kin lum jingtip shaphang ki jingeh ba ki nongrep ki ïakynduh. Kine ki jinglap kin iarap ban ialam lynti ia ki jingpyrshang ha kaba iadei bad ka jingwad bniah ha ki por ban wan bad ban plie ki lad ki lynti kiba lah ban treikam, kiba iadei bad ka jaka. Ban pyniasoh ia ka ‘Lab to Land’, ki scientist jong ka Indian Council of Agricultural Research bad ki Krishi Vigyan Kendra kin iatreilang bad kane ka camapign.’

U Chouhan u la iathuh ba la thaw ia ki kynhun jong ki 16 hajar ngut ki scientist, ki ban leit na kawei ka shnong sha kawei pat bad ban iakren bad ki nongrep. La thaw haduh 2,170 tylli ki kynhun bad kin sa ïakynduh bad ki nongrep. Kawei ka kynhun kan leit sha 2 tylli ki shnong ha ka shi sngi. Kane ka camapign kan bteng haduh 15 sngi bad kan don ka jingiakren markhmat hapdeng ki nongrep. Da kaba buh ha ka jingmut ia ka jinglong ka suinbneng jong ka jaka, ka um, ka jinglong jong ka khyndew bad kiwei kiwei, yn ai jinghikai ia ki nongrep shaphang ki jait jingthung ba dei ban rep, ia kano ka jait ban pyndonkam, kumno ban pyndonkam ia ka sboh bad kiwei kiwei. Ryngkat bad kata yn pynlong ruh ia ki jingiakren bad ki nongrep ha kaba iadei bad ka rukom rep tynrai bad ka jingrep ia ki symbai jingthung kum ki dai, bad ki oilseed. Ki scientist kin pynbeit ia ki jingeh jong ki nongrep lyngba ka jingiakren markhmat. Ka lynti jong ka jingwad bniah shuh shuh ruh yn sa rai katkum ka jingdonkam jong ka kam.

U Chouhan u la kyntu sa shisien ia ki paidbah baroh ban iasnohkti lang ha kane ka campaign bad ban pynlong ia ka kaba seisoh ha kylleng ka ri.

Haba ai jingkren ha kane ka jingialang, u Myntri Rangbah ka Jylla u Mohan Charan Majhi u la ong ba kane ka ‘Viksit Krishi Sankalp Abhiyan’ ka dei ka sienjam jong ka Sorkar India ban wanrah ka jingsngewthuh hapdeng ki nongrep shaphang ki teknoloji kiba mynta bad ki jait symbai kiba thymmai.

Ia kane ka campaign yn pynlong ha palat 700 tylli ki district naduh ka 29 tarik Jymmang haduh ka 12 tarik Jylliew 2025. Ha kane ka campaign kin iashim bynta haduh 731 tylli ki KVK, 113 tylli ki ICAR institute, ki tnad treikam ha ka jylla bad ki ophisar jong ka tnad ka rep ka riang, horticulture, animal husbandry, fisheries bad ki nongrep. Lyngba kane ka campaign, la shim ia ka sienjam ban bynrap ia ka bynta kaba khlain sha ka rai jong u Myntri Rangbahduh Narendra Modi na ka bynta ka Vikashit Bharat.

*****