زراعت اور کسانوں کی فلاح و بہبود کے مرکزی وزیر، جناب شیوراج سنگھ چوہان نے آج اڈیشہ میں پوری ضلع کے  سکھی گوپال علاقے سے ’وکست کرشی سنکلپ ابھیان‘ کا آغاز کیا۔ زراعت اور کسانوں کی بہبود کی وزارت اور انڈین کونسل آف ایگریکلچرل ریسرچ (آئی سی اے آر) کے ذریعہ شروع کیا گیا یہ تاریخی اقدام ہندوستانی زراعت کو تبدیل کرنے اور سائنسی اختراعات اور نچلی سطح پر شراکت کے ذریعہ ملک کے غذائی مستقبل کو محفوظ بنانے کی سمت ایک ٹھوس قدم ہے۔ 15 روزہ مہم کے دوران جناب چوہان تقریباً 20 ریاستوں کا سفر کریں گے۔ ریاستی حکومتیں اس مشن کو پورا کرنے میں کلیدی کردار ادا کریں گی اور تمام ریاستوں سے توقع کی جاتی ہے کہ وہ اجتماعی ذمہ داری  اور لگن کے ذریعے اس مہم کو کامیاب بنائیں گے۔

اپنی تقریر میں زراعت اور کسانوں کی بہبود کے مرکزی وزیر نے کہا کہ 'یہ مہم دو طرفہ مواصلاتی طریقہ اپنائے گی، ایک طرف سائنسدان کسانوں کے ساتھ تحقیق اور تکنیکی معلومات کا اشتراک کریں گے، وہیں دوسری طرف کسانوں کو درپیش چیلنجوں کے بارے میں معلومات اکٹھاکریں گے۔ یہ نتائج مستقبل کی تحقیقی کوششوں کی رہنمائی اور عملی، محل وقوع سے متعلق حل فراہم کرنے میں مدد کریں گے۔ 'لیب سے زمین' کو جوڑنے کے لیے، ہماری انڈین کونسل آف ایگریکلچرل ریسرچ اور کرشی وگیان کیندروں کے سائنسداں اس مہم سے منسلک ہوں گے۔

جناب چوہان نے کہا کہ 16 ہزار سائنسدانوں کی ٹیمیں تشکیل دی گئی ہیں، جو گاؤں گاؤں جا کر کسانوں سے بات چیت کریں گی۔ 2170 ٹیمیں تشکیل دی گئی ہیں اور وہ کسانوں سے رابطے میں رہیں گی۔ ایک ٹیم ایک دن میں 2 گاؤں جائے گی۔ یہ مہم 15 دن تک چلے گی اور کسانوں کے درمیان براہ راست رابطہ ہوگا۔ علاقے کی آب و ہوا، پانی، مٹی کے غذائی اجزاء اور دیگر چیزوں کو مدنظر رکھتے ہوئے کسانوں کو آگاہ کیا جائے گا کہ کون سی فصل کاشت کرنی چاہیے، کون سی قسم استعمال کرنی چاہیے، کھاد کا استعمال کیسے کرنا چاہیے، اس کے ساتھ ساتھ قدرتی کاشتکاری اور دالوں اور تیل کے بیجوں کی کاشت کے حوالے سے کسانوں سے بات چیت کی جائے گی۔ سائنسدان براہ راست رابطے کے ذریعے کسانوں کے عملی مسائل حل کریں گے۔ مزید تحقیق کی سمت بھی فیلڈ کی ضرورت کے مطابق طے کی جائے گی۔

جناب چوہان نے ایک بار پھر تمام لوگوں سے اس مہم میں شامل ہونے اور اسے پورے ہندوستان میں موثر اور کامیاب بنانے کی اپیل کی۔

اس موقع پر عوام سے خطاب کرتے ہوئے وزیر اعلیٰ جناب موہن چرن ماجھی نے کہا کہ’وکست کرشی سنکلپ ابھیان' حکومت ہند کی جدید ٹیکنالوجی اور بیجوں کی نئی اقسام کے بارے میں کسانوں میں بیداری پیدا کرنے کے لیے ایک اہم قدم ہے۔

یہ مہم 29 مئی سے 12 جون 2025 تک 700 سے زیادہ اضلاع میں چلائی جائے گی۔ اس مہم میں کے وی کے 731 ، سی  اے آر 113 ادارے، ریاستی سطح کے محکمے اور زراعت، باغبانی، مویشی پالن، ماہی پروری اور اختراعی کسانوں کے اہلکار حصہ لیں گے۔ اس مہم کے ذریعے وزیر اعظم جناب نریندر مودی کے وکست بھارت کے لیے ایک مضبوط باب کا اضافہ کرنے کی کوشش کی گئی ہے۔

*****

ش ح۔ ا س۔ ج