કેન્દ્રીય યુવા બાબતો અને રમતગમત મંત્રી ડો. મનસુખ માંડવિયાએ શનિવારે પૂર્વોત્તરને રમતગમત પ્રતિભાના પાવરહાઉસ તરીકે ઓળખાવતા જણાવ્યું હતું કે ભારત સરકાર આઠ પૂર્વોત્તર રાજ્યોમાંથી એકમાં દર વર્ષે ખેલો ઇન્ડિયા નોર્થઈસ્ટ ગેમ્સનું આયોજન સહિત અનેક પહેલો દ્વારા આ ક્ષેત્રમાં રમતગમત ઇકોસિસ્ટમને મજબૂત બનાવવા માટે સંપૂર્ણપણે પ્રતિબદ્ધ છે. આ રાજ્યોમાં અરુણાચલ પ્રદેશ, આસામ, મણિપુર, મેઘાલય, મિઝોરમ, નાગાલેન્ડ, સિક્કિમ અને ત્રિપુરાનો સમાવેશ થાય છે.

આજે નવી દિલ્હીના ભારત મંડપમ ખાતે રાઇઝિંગ નોર્થઈસ્ટ ઇન્વેસ્ટર્સ સમિટ 2025 દરમિયાન એક વિશાળ સભાને સંબોધતા આ જાહેરાત કરી હતી. ડૉ. મનસુખ માંડવિયાએ જણાવ્યું હતું કે લોકો પૂર્વોત્તરને ભારતના પ્રથમ સૂર્યોદયના ક્ષેત્ર તરીકે જાણતા હતા પરંતુ પ્રધાનમંત્રી નરેન્દ્ર મોદીની સરકારના 10 વર્ષમાં, પૂર્વોત્તર વિકાસ તરફ મજબૂત પ્રગતિ કરી રહ્યું છે. તેમણે કહ્યું કે પૂર્વોત્તર' નયા ભારત'ના વિકાસમાં સતત યોગદાન આપી રહ્યું છે .

2030માં કોમનવેલ્થ ગેમ્સ અને 2036માં સમર ઓલિમ્પિકનું આયોજન કરવાના લક્ષ્ય સાથે, રમતગમત મંત્રીએ કહ્યું કે ભારત જેવો વિશાળ દેશ આખા વર્ષ દરમિયાન આંતરરાષ્ટ્રીય સ્પર્ધાઓનું આયોજન કરવા માટે એક યોગ્ય સ્થળ છે. આ વાતને વિસ્તૃત કરતાં તેમણે કહ્યું કે હાલમાં ભારતમાં ત્રણ ઋતુઓ છે - દક્ષિણ ભારતમાં ચોમાસુ, હિમાલયના ઉપરના વિસ્તારોમાં બરફવર્ષા અને પશ્ચિમ ભારતમાં ઉનાળાની ગરમી. તેમના મતે, પીએમ મોદી દ્વારા 'મેક ઇન ઇન્ડિયા' પહેલની જેમ 'પ્લે ઇન ઇન્ડિયા' માટે ભારત શ્રેષ્ઠ પસંદગી હતી.

"જે રીતે પૂર્વોત્તર પરિવર્તનમાંથી પસાર થઈ રહ્યું છે, રમતગમતના સામાન ઉદ્યોગ અને રમતગમતની ઇકોસિસ્ટમનો વિકાસ થઈ રહ્યો છે, તે દિવસ દૂર નથી જ્યારે વિશ્વ પૂર્વોત્તરમાં રમવા માટે એકત્ર થશે. આજે, ભારતના શ્રેષ્ઠ ખેલાડીઓ પૂર્વોત્તરમાંથી આવી રહ્યા છે. તેઓ ટોચની આંતરરાષ્ટ્રીય સ્પર્ધાઓમાં ભારતનું પ્રતિનિધિત્વ કરી રહ્યા છે અને ભારતીય રમતોને આગળ લઈ જઈ રહ્યા છે. ખેલો ઇન્ડિયા યુથ ગેમ્સ અને યુનિવર્સિટી ગેમ્સની જેમ, અમે દર વર્ષે અહીં ખેલો ઇન્ડિયા નોર્થઈસ્ટ ગેમ્સનું આયોજન કરીશું, જે ફક્ત પ્રતિભા શોધવામાં, ક્ષમતાનો ઉપયોગ કરવામાં મદદ કરશે નહીં પરંતુ આપણી પરંપરાગત રમતોને પ્રદર્શિત કરવા માટે પણ પ્લેટફોર્મ પૂરું પાડશે," ડૉ. માંડવિયાએ જણાવ્યું હતું.

ડૉ. મનસુખ માંડવિયાએ જણાવ્યું હતું કે પૂર્વોત્તરમાં રમતગમતના માળખામાં ઝડપથી વધારો થયો છે, હાલમાં 86 પ્રોજેક્ટ્સ ઉપયોગમાં છે. ખેલો ઇન્ડિયા યોજના હેઠળ 2021માં સમગ્ર પૂર્વોત્તર ક્ષેત્રમાં 64 રમતગમતના માળખાકીય પ્રોજેક્ટ્સ માટે રૂ. 439 કરોડ મંજૂર કરવામાં આવ્યા હતા. આમાં સિન્થેટિક ટર્ફ, બહુહેતુક હોલ, સ્વિમિંગ પુલ અને છાત્રાલયોનો સમાવેશ થાય છે.

રમતગમત મંત્રીએ જણાવ્યું હતું કે આ પ્રદેશમાં 250 ખેલો ઇન્ડિયા સેન્ટર્સ (KICs) છે, જે 8,000 થી વધુ ખેલાડીઓને તાલીમ આપી રહ્યા છે, અને 8 ખેલો ઇન્ડિયા સ્ટેટ સેન્ટર્સ ઓફ એક્સેલન્સ (KISCEs) છે. જે એક મજબૂત પાયાના ઇકોસિસ્ટમ માટે માર્ગ મોકળો કરી રહ્યા છે. હાલમાં, ગુવાહાટી, ઇટાનગર અને ઇમ્ફાલમાં ત્રણ રાષ્ટ્રીય શ્રેષ્ઠતા કેન્દ્રો (NCOEs) 600 રમતવીરોને વિશ્વસ્તરીય તાલીમ આપી રહ્યા છે.

ખેલો ઇન્ડિયાની મહિલાઓ માટેની મુખ્ય યોજનાનું ઉદાહરણ આપતા રમતગમત મંત્રીએ કહ્યું કે ગયા વર્ષે પૂર્વોત્તરની લગભગ 13,000 યુવતીઓએ ASMITA લીગમાં વિવિધ શાખાઓમાં ભાગ લીધો હતો. આ  સાબિત કરે છે કે આ પ્રદેશ ધીમે ધીમે પ્રતિભાની સારી નર્સરી બની રહ્યો છે. જે પછીથી રાષ્ટ્રીય ટીમ માટે મજબૂત બેન્ચ સ્ટ્રેન્થ પ્રદાન કરશે.

ડૉ. માંડવિયાએ એમ પણ જણાવ્યું હતું કે સરકાર સમગ્ર ઉપખંડમાં એક વિશાળ પ્રતિભા ઓળખ અભિયાન શરૂ કરશે.  જ્યાં કોઈપણ ખેલાડીના પ્રદર્શનનો વિડિઓ શૂટ કરી શકે છે અને તેને નેશનલ સ્પોર્ટ્સ રિપોઝીટરી સિસ્ટમ (NSRS) પોર્ટલ પર અપલોડ કરીને રમત મંત્રાલયને મોકલી શકે છે. SAI ઇવેન્ટના સ્થાન પર પ્રતિભા સ્કાઉટ્સ મોકલશે અને રમતવીરના પ્રદર્શનનું મૂલ્યાંકન કર્યા પછી, તેમની ક્ષમતાના આધારે તેને ખેલો ઇન્ડિયા સેન્ટર અથવા NCOE માં સામેલ કરશે.

પૂર્વોત્તર ક્ષેત્રમાં ખેલો ઇન્ડિયા યુનિવર્સિટી ગેમ્સ અષ્ટલક્ષ્મીનું આયોજન કરવામાં આવ્યું હતું. એથ્લેટિક્સ, ફૂટબોલ, બોક્સિંગ અને તીરંદાજી જેવા ક્ષેત્રોમાં મોટા પાયે રાષ્ટ્રીય કાર્યક્રમોનું આયોજન કરવાની ઉત્તરપૂર્વની ક્ષમતા દર્શાવતી આ એક સીમાચિહ્નરૂપ ક્ષણ હતી.

AP/IJ/GP/JD

(Release ID: 2130997)