କେନ୍ଦ୍ର ଶକ୍ତି ଏବଂ ଗୃହ ନିର୍ମାଣ ଏବଂ ସହରାଞ୍ଚଳ ବ୍ୟାପାର ମନ୍ତ୍ରୀ ଶ୍ରୀ ମନୋହର ଲାଲ ବ୍ରାଜିଲର ଅଧ୍ୟକ୍ଷତାରେ ୧୯ ମଇ ୨୦୨୫ରେ ବ୍ରାସିଲିଆରେ ଅନୁଷ୍ଠିତ ବ୍ରିକ୍ସ ଶକ୍ତି ମନ୍ତ୍ରୀମାନଙ୍କ ବୈଠକରେ ଭାରତୀୟ ପ୍ରତିନିଧିମଣ୍ଡଳର ନେତୃତ୍ୱ ନେଇଥିଲେ।

କେନ୍ଦ୍ରମନ୍ତ୍ରୀ ଶକ୍ତି ସୁରକ୍ଷାକୁ ଆଜିର ସବୁଠାରୁ ବଡ଼ ଚ୍ୟାଲେଞ୍ଜ ମଧ୍ୟରୁ ଗୋଟିଏ ବୋଲି ବର୍ଣ୍ଣନା କରିଥିଲେ ଏବଂ ବିଶ୍ୱ ସ୍ତରରେ ଶକ୍ତି ସମ୍ବଳର ସମାନ ଆବଣ୍ଟନକୁ ପ୍ରୋତ୍ସାହିତ କରିବା ସହିତ ଆର୍ଥିକ ସ୍ଥିରତା ଏବଂ ସ୍ଥାୟୀତ୍ୱ ସୁନିଶ୍ଚିତ କରିବା ପାଇଁ ବ୍ରିକ୍ସ ଦେଶମାନଙ୍କ ମଧ୍ୟରେ ସହଯୋଗକୁ ମଜବୁତ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।

ସେ ଏକ ସ୍ଥାୟୀ ଏବଂ ସମାବେଶୀ ଶକ୍ତି ଭବିଷ୍ୟତ ଗଠନ ପାଇଁ ଭାରତର ଅଟଳ ପ୍ରତିବଦ୍ଧତାକୁ ଦୋହରାଇଥିଲେ ଏବଂ 'ଅଧିକ ଅନ୍ତର୍ଭୁକ୍ତ ଏବଂ ସ୍ଥାୟୀ ଶକ୍ତି ପରିଚାଳନା ପାଇଁ ବିଶ୍ୱ ଦକ୍ଷିଣ ସହଯୋଗକୁ ସୁଦୃଢ଼ କରିବା' ବିଷୟବସ୍ତୁ ଅଧୀନରେ ବ୍ରାଜିଲର ନେତୃତ୍ୱକୁ ପ୍ରଶଂସା କଲେ। ସେ ବିଶ୍ୱ ବିକାଶ ଲକ୍ଷ୍ୟ ହାସଲରେ ଶକ୍ତି ସୁରକ୍ଷା, ସମବଣ୍ଟନ ଏବଂ ସୁଲଭତାର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଥିଲେ।

ଶ୍ରୀ ମନୋହର ଲାଲ ଏହି ଅବସରରେ ସ୍ୱଚ୍ଛ ଶକ୍ତି କ୍ଷେତ୍ରରେ ଭାରତର ଦ୍ରୁତ ପ୍ରଗତିକୁ ପ୍ରଦର୍ଶିତ କରୁଥିବା କିଛି ପ୍ରମୁଖ ସଫଳତା ଉପରେ ଆଲୋକପାତ କରିଥିଲେ:

ଗତ ଦଶନ୍ଧିରେ ବିଦ୍ୟୁତ୍ କ୍ଷମତାରେ ୯୦ ପ୍ରତିଶତ ବୃଦ୍ଧି, ୨୦୨୫ ସୁଦ୍ଧା ୪୭୫ ଗିଗାଓ୍ବାଟ୍ ଏବଂ ୨୦୩୨ ସୁଦ୍ଧା ୯୦୦ ଗିଗାଓ୍ବାଟ୍ ପହଞ୍ଚିବାର ଲକ୍ଷ୍ୟ।

ସୌର ଏବଂ ପବନ ଶକ୍ତିର ବିଶ୍ୱର ତୃତୀୟ ସର୍ବବୃହତ ଉତ୍ପାଦକ ହେବା।

ଜାତୀୟ ନିର୍ଦ୍ଧାରିତ ଅବଦାନ (ଏନଡିସି) ହାସଲ କରିବା ଦିଗରେ ଦ୍ରୁତ ଗତିରେ ଅଗ୍ରସର ହେଉଛି।

୨୦ ପ୍ରତିଶତ ଇଥାନଲ୍ ମିଶ୍ରଣ ମାଇଲଖୁଣ୍ଟ ହାସଲ କରିବା, ଜୈବ ଇନ୍ଧନ ଗ୍ରହଣ କରିବା ଏବଂ ନିର୍ଗମନ ହ୍ରାସ କରିବା।

ସ୍ମାର୍ଟ ଗ୍ରୀଡ୍, ଉନ୍ନତ ମିଟରିଂ ଭିତ୍ତିଭୂମି ଏବଂ ସବୁଜ ଶକ୍ତି କରିଡର ସମେତ ବିସ୍ତାରିତ ଟ୍ରାନ୍ସମିସନ୍ ନେଟୱାର୍କରେ ନିବେଶ।

୨୦୪୭ ସୁଦ୍ଧା ୧୦୦ ଗିଗାୱାଟ ପରମାଣୁ କ୍ଷମତାର ଲକ୍ଷ୍ୟ ସମେତ ସବୁଜ ହାଇଡ୍ରୋଜେନ ଏବଂ ପରମାଣୁ ଶକ୍ତି ପାଇଁ ମହତ୍ୱାକାଂକ୍ଷୀ ଲକ୍ଷ୍ୟ ।

ଘରୋଇ କାର୍ବନ କ୍ରେଡିଟ୍ ବଜାରର ଶୁଭାରମ୍ଭ, ବିଶ୍ୱସ୍ତରୀୟ ସହଯୋଗକୁ ଆମନ୍ତ୍ରଣ।

କେନ୍ଦ୍ର ମନ୍ତ୍ରୀ ଶ୍ରୀ ମନୋହର ଲାଲ ଜୈବ ଇନ୍ଧନ କ୍ଷେତ୍ରରେ ସହଯୋଗକୁ ଆହୁରି ବୃଦ୍ଧି କରିବାରେ ଗ୍ଲୋବାଲ୍ ବାୟୋଫୁଏଲ୍ ଆଲାଏନ୍ସର ଭୂମିକା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ ଏବଂ ଶକ୍ତି ସଂରକ୍ଷଣ ସ୍ଥାୟୀ ନିର୍ମାଣ ସଂହିତା, ଛାତ ଉପରେ ସୌର ପଦକ୍ଷେପ ଏବଂ ଦକ୍ଷ ଉପକରଣ ମାନଦଣ୍ଡ ଭଳି ଅଭିନବ କାର୍ଯ୍ୟକ୍ରମ ମାଧ୍ୟମରେ ଶକ୍ତି ଦକ୍ଷତା ପ୍ରତି ଭାରତର ପ୍ରତିବଦ୍ଧତାକୁ ରେଖାଙ୍କିତ କରିଥିଲେ।

ଶ୍ରୀ ମନୋହର ଲାଲ ବିଶ୍ୱ ଶକ୍ତି ମିଶ୍ରଣରେ, ବିଶେଷକରି ବିକାଶଶୀଳ ଦେଶମାନଙ୍କ ପାଇଁ ଜୀବାଶ୍ମ ଇନ୍ଧନର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଥିଲେ। କୋଇଲା ଗ୍ୟାସିଫିକେସନ୍, କାର୍ବନ କ୍ୟାପଚର ଏବଂ ଷ୍ଟୋରେଜ୍, ଏବଂ ସବୁଜ ରାସାୟନିକ ଉଦ୍ଭାବନ ଭଳି ପ୍ରଯୁକ୍ତିବିଦ୍ୟା ମାଧ୍ୟମରେ ସେମାନଙ୍କର ସ୍ୱଚ୍ଛ ଏବଂ ଦକ୍ଷ ବ୍ୟବହାରକୁ ପ୍ରୋତ୍ସାହିତ କରିବା ପାଇଁ ସେ ଅଧିକ ସହଯୋଗ ପାଇଁ ଆହ୍ୱାନ କରିଥିଲେ।

ଶେଷରେ, ଶ୍ରୀ ମନୋହର ଲାଲ ୨୦୨୬ ମସିହାରେ ଭାରତରେ ଅନୁଷ୍ଠିତ ହେବାକୁ ଥିବା ପରବର୍ତ୍ତୀ ବ୍ରିକ୍ସ ଶକ୍ତି ସମ୍ମିଳନୀରେ ଅଂଶଗ୍ରହଣ କରିବା ପାଇଁ ବ୍ରିକ୍ସ ଦେଶମାନଙ୍କୁ ଆମନ୍ତ୍ରଣ କରିଥିଲେ ଏବଂ ବିଶ୍ୱ ଦକ୍ଷିଣ ପାଇଁ ଶକ୍ତି ଏଜେଣ୍ଡାର ନେତୃତ୍ୱ ନେବା ପାଇଁ ନିଜ ଦେଶର ପ୍ରତିବଦ୍ଧତାକୁ ଦୋହରାଇଥିଲେ।

ବ୍ରିକ୍ସ ଦେଶଗୁଡ଼ିକର ଶକ୍ତି ମନ୍ତ୍ରୀମାନଙ୍କ ଦ୍ୱାରା ମିଳିତ ଭାବରେ ଗୃହୀତ ଶକ୍ତି ମନ୍ତ୍ରୀସ୍ତରୀୟ ବିଜ୍ଞପ୍ତିର କିଛି ପ୍ରମୁଖ ଫଳାଫଳ:

ବ୍ରିକ୍ସ ଶକ୍ତି ମନ୍ତ୍ରୀମାନେ ଶକ୍ତି ସୁରକ୍ଷାକୁ ସୁଦୃଢ଼ କରିବା ଏବଂ ମିଳିତ ଜାତିସଂଘର ସ୍ଥାୟୀ ବିକାଶ ଲକ୍ଷ୍ୟ ୭ (ଏସଡିଜି୭)କୁ ଆଗକୁ ବଢାଇବା ପାଇଁ ସେମାନଙ୍କର ପ୍ରତିବଦ୍ଧତାକୁ ଦୋହରାଇଛନ୍ତି, ଯାହା ସମସ୍ତଙ୍କ ପାଇଁ ବିଦ୍ୟୁତ୍, ସ୍ୱଚ୍ଛ ରୋଷେଇ ଏବଂ ଶକ୍ତି ସଙ୍କଟ ସମାଧାନ ଉପରେ ଧ୍ୟାନ କେନ୍ଦ୍ରିତ କରୁଛି। ଜଳବାୟୁ ପରିବର୍ତ୍ତନର ପ୍ରତିକ୍ରିୟାରେ ଏକ ସମାନ, ଅନ୍ତର୍ଭୁକ୍ତ ଏବଂ ସନ୍ତୁଳିତ ଶକ୍ତି ପରିବର୍ତ୍ତନର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ।

ବିକାଶଶୀଳ ଦେଶଗୁଡ଼ିକରେ ଜୀବାଶ୍ମ ଇନ୍ଧନର ନିରନ୍ତର ଭୂମିକାକୁ ସ୍ୱୀକାର କରି, ସେମାନେ ଏସଡିଜି୭ ଏବଂ ବିଶ୍ୱ ଜଳବାୟୁ ଲକ୍ଷ୍ୟ ଅନୁଯାୟୀ ଗ୍ରୀନହାଉସ୍ ଗ୍ୟାସ ନିର୍ଗମନ ହ୍ରାସ କରିବାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ, ଯାହା ପ୍ରଯୁକ୍ତିବିଦ୍ୟା ନିରପେକ୍ଷତା ଏବଂ ସାଧାରଣ କିନ୍ତୁ ପୃଥକ ଦାୟିତ୍ୱ ଏବଂ ସମ୍ପୃକ୍ତ କ୍ଷମତା ( ସିବିଡିଆର-ଆରସି) ନୀତି ଦ୍ୱାରା ପରିଚାଳିତ।

ଶକ୍ତିମନ୍ତ୍ରୀମାନେ ଦୃଢ଼ ସହଭାଗୀତା ପାଇଁ ଆହ୍ୱାନ କରିଥିଲେ, ମୁକ୍ତ, ନିରପେକ୍ଷ ଏବଂ ପକ୍ଷପାତହୀନ ଅନ୍ତର୍ଜାତୀୟ ଶକ୍ତି ବଜାରକୁ ସମର୍ଥନ କରିଥିଲେ ଏବଂ ଶକ୍ତି ବାଣିଜ୍ୟରେ ସ୍ଥାନୀୟ ମୁଦ୍ରାର ବ୍ୟବହାରକୁ ଉତ୍ସାହିତ କରିଥିଲେ।

ଶକ୍ତିମନ୍ତ୍ରୀମାନେ ବ୍ରିକ୍ସ ଶକ୍ତି ଗବେଷଣା ସହଯୋଗ ପ୍ଲାଟଫର୍ମର ମୌଳିକ ଭୂମିକାକୁ ସ୍ୱୀକାର କରିଥିଲେ ଏବଂ ଗଭୀର ସହଯୋଗ ପାଇଁ ଅଦ୍ୟତନ ବ୍ରିକ୍ସ ଶକ୍ତି ସହଯୋଗ ରୋଡମ୍ୟାପ୍ (୨୦୨୫-୨୦୩୦)କୁ ସ୍ୱାଗତ କରିଥିଲେ।

ପ୍ରତ୍ୟେକ ଦେଶର ନିଜସ୍ୱ ଶକ୍ତି ପରିବର୍ତ୍ତନ ଉପାୟ ଏବଂ ଗତି ନିର୍ଣ୍ଣୟ କରିବାର ଅଧିକାର ଉପରେ ପୁନଃ ଗୁରୁତ୍ବଆରୋପ କରି, ମନ୍ତ୍ରୀମାନେ ସମସ୍ତ ଶକ୍ତି ଉତ୍ସର ଦକ୍ଷ ବ୍ୟବହାର ପାଇଁ ସମର୍ଥନ କରିଥିଲେ ଏବଂ ବିକଶିତ ଦେଶଗୁଡ଼ିକରୁ ବିକାଶଶୀଳ ଦେଶଗୁଡ଼ିକୁ ରିହାତି ଏବଂ କମ ମୂଲ୍ୟର ଆର୍ଥିକ ସହାୟତା ବୃଦ୍ଧି କରିବାକୁ ଆହ୍ୱାନ କରିଥିଲେ। ସେମାନେ ସ୍ଥାନୀୟ ମୁଦ୍ରା ପାଣ୍ଠି ମାଧ୍ୟମରେ ସ୍ଥାୟୀ ଶକ୍ତି ଭିତ୍ତିଭୂମିକୁ ପ୍ରୋତ୍ସାହିତ କରିବାରେ ନ୍ୟୁ ଡେଭଲପମେଣ୍ଟ ବ୍ୟାଙ୍କ (ଏନଡିବି)ର ଭୂମିକା ଉପରେ ଆଲୋକପାତ କରିଥିଲେ ।

ମନ୍ତ୍ରୀମାନେ କାର୍ବନ ଇଣ୍ଟେନସିଟି, ଶକ୍ତି ବର୍ଗୀକରଣ ଏବଂ ପ୍ରମାଣପତ୍ରର ପାରସ୍ପରିକ ସ୍ୱୀକୃତି ମୂଲ୍ୟାଙ୍କନ ପାଇଁ ନିରପେକ୍ଷ, ସ୍ୱଚ୍ଛ ଏବଂ ସମନ୍ୱିତ ମାର୍ଗଦର୍ଶିକା ଗ୍ରହଣ କରିବାକୁ ପରାମର୍ଶ ଦେଇଥିଲେ।

ସାମାଜିକ-ଆର୍ଥିକ ବିକାଶ ପାଇଁ ଶକ୍ତି ସୁରକ୍ଷାକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି କହି ସେମାନେ ସ୍ୱଚ୍ଛ ପ୍ରଯୁକ୍ତିବିଦ୍ୟା ପାଇଁ ବଜାର ସ୍ଥିରତା, ଦୃଢ଼ ଭିତ୍ତିଭୂମି, ବିବିଧ ଶକ୍ତି ଉତ୍ସ ଏବଂ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଗୁରୁତ୍ୱ ଉପରେ ଆଲୋକପାତ କରିଥିଲେ। ସେମାନେ ୨୦୩୦ ସୁଦ୍ଧା ଶକ୍ତି ଦକ୍ଷତା ଦ୍ୱିଗୁଣିତ କରିବାର ଲକ୍ଷ୍ୟକୁ ଦୋହରାଇଥିଲେ ଏବଂ ବ୍ରିକ୍ସ ଦେଶମାନଙ୍କ ମଧ୍ୟରେ ସହଯୋଗ ଏବଂ ଜ୍ଞାନ ଆଦାନପ୍ରଦାନ ଉପରେ ଗୁରୁତ୍ୱାରୋପ କରିଥିଲେ। ଶେଷରେ, ସେମାନେ ୨୦୨୬ ମସିହାରେ ଭାରତର ସଭାପତିତ୍ବ ଅଧୀନରେ ବ୍ରିକ୍ସ ଦେଶଗୁଡ଼ିକର ବିଶ୍ୱ ଶକ୍ତି ଭୂମିକାକୁ ବୃଦ୍ଧି କରିବା ଏବଂ ସହଭାଗୀ ପ୍ରାଥମିକତାକୁ ଆଗକୁ ବଢ଼ାଇବା ପାଇଁ ଅଙ୍ଗୀକାର ଦର୍ଶାଇଥିଲେ।

TKM