ಗೌರವಾನ್ವಿತರೇ, ಮತ್ತು ಪ್ರತಿನಿಧಿಗಳೇ, ನಮಸ್ತೆ. ವಿಶ್ವ ಆರೋಗ್ಯ ಸಭೆಯ 78ನೇ ಅಧಿವೇಶನಕ್ಕೆ ಎಲ್ಲರಿಗೂ ಹೃತ್ಪೂರ್ವಕ ಸ್ವಾಗತ ಮತ್ತು ಶುಭಾಶಯಗಳು.

ಸ್ನೇಹಿತರೇ,

ಈ ವರ್ಷದ ವಿಶ್ವ ಆರೋಗ್ಯ ಸಭೆಯ ವಿಷಯ 'ಆರೋಗ್ಯಕ್ಕಾಗಿ ಒಂದು ಜಗತ್ತು'. ಇದು ಜಾಗತಿಕ ಆರೋಗ್ಯಕ್ಕಾಗಿ ಭಾರತದ ದೃಷ್ಟಿಕೋನಕ್ಕೆ ಅನುಗುಣವಾಗಿದೆ. 2023ರಲ್ಲಿ ನಾನು ಈ ಸಭೆಯನ್ನು ಉದ್ದೇಶಿಸಿ ಮಾತನಾಡುವಾಗ, ನಾನು 'ಒಂದು ಭೂಮಿ, ಒಂದು ಆರೋಗ್ಯ'ದ ಬಗ್ಗೆ ಮಾತನಾಡಿದ್ದೆ. ಆರೋಗ್ಯಕರ ಪ್ರಪಂಚದ ಭವಿಷ್ಯವು ಸೇರ್ಪಡೆ, ಸಮಗ್ರ ದೃಷ್ಟಿಕೋನ ಮತ್ತು ಸಹಯೋಗವನ್ನು ಅವಲಂಬಿಸಿದೆ.

ಸ್ನೇಹಿತರೇ,

ಈ ಸೇರ್ಪಡೆಯು ಭಾರತದ ಆರೋಗ್ಯ ಸುಧಾರಣೆಗಳ ತಿರುಳಾಗಿದೆ. ನಾವು ವಿಶ್ವದ ಅತಿದೊಡ್ಡ ಆರೋಗ್ಯ ವಿಮಾ ಯೋಜನೆಯಾದ ಆಯುಷ್ಮಾನ್ ಭಾರತ್ ಅನ್ನು ನಡೆಸುತ್ತೇವೆ. ಇದು 580 ಮಿಲಿಯನ್ ಜನರನ್ನು ಒಳಗೊಳ್ಳುತ್ತದೆ ಮತ್ತು ಉಚಿತ ಚಿಕಿತ್ಸೆಯನ್ನು ಒದಗಿಸುತ್ತದೆ. ಈ ಕಾರ್ಯಕ್ರಮವನ್ನು ಇತ್ತೀಚೆಗೆ 70 ವರ್ಷಕ್ಕಿಂತ ಮೇಲ್ಪಟ್ಟ ಎಲ್ಲಾ ಭಾರತೀಯರಿಗೆ ವಿಸ್ತರಿಸಲಾಗಿದೆ. ನಮ್ಮಲ್ಲಿ ಸಾವಿರಾರು ಆರೋಗ್ಯ ಮತ್ತು ಕ್ಷೇಮ ಕೇಂದ್ರಗಳ ಜಾಲವಿದೆ. ಅವರು ಕ್ಯಾನ್ಸರ್, ಮಧುಮೇಹ ಮತ್ತು ಅಧಿಕ ರಕ್ತದೊತ್ತಡದಂತಹ ರೋಗಗಳನ್ನು ಪರೀಕ್ಷಿಸಿ ಪತ್ತೆ ಮಾಡುತ್ತಾರೆ. ಸಾವಿರಾರು ಸಾರ್ವಜನಿಕ ಔಷಧಾಲಯಗಳು ಮಾರುಕಟ್ಟೆ ಬೆಲೆಗಿಂತ ಕಡಿಮೆ ಬೆಲೆಗೆ ಉತ್ತಮ ಗುಣಮಟ್ಟದ ಔಷಧಿಗಳನ್ನು ಒದಗಿಸುತ್ತವೆ.

ಸ್ನೇಹಿತರೇ,

ಆರೋಗ್ಯ ಫಲಿತಾಂಶಗಳನ್ನು ಸುಧಾರಿಸಲು ತಂತ್ರಜ್ಞಾನವು ಒಂದು ಪ್ರಮುಖ ವೇಗವರ್ಧಕವಾಗಿದೆ. ಗರ್ಭಿಣಿಯರು ಮತ್ತು ಮಕ್ಕಳ ಲಸಿಕೆಯನ್ನು ಪತ್ತೆಹಚ್ಚಲು ನಮ್ಮಲ್ಲಿ ಡಿಜಿಟಲ್ ವೇದಿಕೆ ಇದೆ. ಲಕ್ಷಾಂತರ ಜನರು ವಿಶಿಷ್ಟವಾದ ಡಿಜಿಟಲ್ ಆರೋಗ್ಯ ಗುರುತನ್ನು ಹೊಂದಿದ್ದಾರೆ. ಇದು ಪ್ರಯೋಜನಗಳು, ವಿಮೆ, ದಾಖಲೆಗಳು ಮತ್ತು ಮಾಹಿತಿಯನ್ನು ಸಂಯೋಜಿಸಲು ನಮಗೆ ಸಹಾಯ ಮಾಡುತ್ತಿದೆ. ಟೆಲಿಮೆಡಿಸಿನ್‌ ಯೋಜನೆಯೊಂದಿಗೆ ಯಾರೂ ವೈದ್ಯರಿಂದ ತುಂಬಾ ದೂರವಿಲ್ಲ. ನಮ್ಮ ಉಚಿತ ಟೆಲಿಮೆಡಿಸಿನ್ ಸೇವೆಯು 340 ಮಿಲಿಯನ್‌ಗಿಂತಲೂ ಹೆಚ್ಚು ಸಮಾಲೋಚನೆಗಳನ್ನು ಸಕ್ರಿಯಗೊಳಿಸಿದೆ.

ಸ್ನೇಹಿತರೇ,

ನಮ್ಮ ಉಪಕ್ರಮಗಳಿಂದಾಗಿ, ಅತ್ಯುತ್ತಮ ಬೆಳವಣಿಗೆ ಕಂಡುಬಂದಿದೆ. ಒಟ್ಟು ಆರೋಗ್ಯ ವೆಚ್ಚವು ಗಮನಾರ್ಹವಾಗಿ ಕುಸಿದಿದೆ. ಅದೇ ಸಮಯದಲ್ಲಿ, ಸರ್ಕಾರಿ ಆರೋಗ್ಯ ವೆಚ್ಚವು ಗಣನೀಯವಾಗಿ ಹೆಚ್ಚಾಗಿದೆ.

ಸ್ನೇಹಿತರೇ,

ಜಗತ್ತಿನ ಆರೋಗ್ಯವು ಅತ್ಯಂತ ದುರ್ಬಲರನ್ನು ನಾವು ಎಷ್ಟು ಚೆನ್ನಾಗಿ ನೋಡಿಕೊಳ್ಳುತ್ತೇವೆ ಎಂಬುದರ ಮೇಲೆ ಅವಲಂಬಿತವಾಗಿದೆ. ಜಾಗತಿಕ ದಕ್ಷಿಣವು ವಿಶೇಷವಾಗಿ ಆರೋಗ್ಯ ಸವಾಲುಗಳಿಂದ ಪ್ರಭಾವಿತವಾಗಿದೆ. ಭಾರತದ ವಿಧಾನವು ಪುನರಾವರ್ತಿಸಬಹುದಾದ, ಸ್ಕೇಲೆಬಲ್ ಮತ್ತು ಸುಸ್ಥಿರ ಮಾದರಿಗಳನ್ನು ನೀಡುತ್ತದೆ. ನಮ್ಮ ಕಲಿಕೆಗಳು ಮತ್ತು ಅತ್ಯುತ್ತಮ ಅಭ್ಯಾಸಗಳನ್ನು ಜಗತ್ತಿನೊಂದಿಗೆ, ವಿಶೇಷವಾಗಿ ಜಾಗತಿಕ ದಕ್ಷಿಣದೊಂದಿಗೆ ಹಂಚಿಕೊಳ್ಳಲು ನಾವು ಸಂತೋಷಪಡುತ್ತೇವೆ.

ಸ್ನೇಹಿತರೇ,

ಜೂನ್‌ನಲ್ಲಿ, 11ನೇ ಅಂತಾರಾಷ್ಟ್ರೀಯ ಯೋಗ ದಿನ ಬರುತ್ತಿದೆ. ಈ ವರ್ಷದ ಥೀಮ್ 'ಒಂದು ಭೂಮಿಗೆ ಒಂದು ಆರೋಗ್ಯ'. ಜಗತ್ತಿಗೆ ಯೋಗವನ್ನು ನೀಡಿದ ರಾಷ್ಟ್ರದಿಂದ ಬಂದವನಾಗಿ, ನಾನು ಎಲ್ಲಾ ದೇಶಗಳನ್ನು ಭಾಗವಹಿಸಲು ಆಹ್ವಾನಿಸುತ್ತೇನೆ.

ಸ್ನೇಹಿತರೇ,

ಐ ಎನ್ ಬಿ ಒಪ್ಪಂದದ ಯಶಸ್ವಿ ಮಾತುಕತೆಗಳಿಗಾಗಿ ನಾನು ವಿಶ್ವ ಆರೋಗ್ಯ ಸಂಸ್ಥೆ (WHO) ಮತ್ತು ಎಲ್ಲಾ ಸದಸ್ಯ ರಾಷ್ಟ್ರಗಳನ್ನು ಅಭಿನಂದಿಸುತ್ತೇನೆ. ಭವಿಷ್ಯದ ಸಾಂಕ್ರಾಮಿಕ ರೋಗಗಳನ್ನು ಹೆಚ್ಚಿನ ಸಹಕಾರದೊಂದಿಗೆ ಹೋರಾಡಲು ಇದು ಹಂಚಿಕೆಯ ಬದ್ಧತೆಯಾಗಿದೆ. ಆರೋಗ್ಯಕರ ಪ್ರದೇಶವನ್ನು ನಿರ್ಮಿಸುವಾಗ, ಯಾರೂ ಹಿಂದೆ ಉಳಿಯದಂತೆ ನೋಡಿಕೊಳ್ಳೋಣ. ಈ ಪ್ರಾರ್ಥನೆಯೊಂದಿಗೆ ನಾನು ಭಾಷಣ ಮುಕ್ತಾಯಗೊಳಿಸುತ್ತೇನೆ. ಸರ್ವೇ ಭವನ್ತು ಸುಖಿನಃ ಸರ್ವೇ ಸಂತು ನಿರಾಮಯಾಃ. ಸರ್ವೇ ಭದ್ರಾಣಿ ಪಶ್ಯನ್ತು ಮಾ ಕಶ್ಚಿದ್ ದುಃಖಭಾಗ್ಭವೇತ್॥ ಸಾವಿರಾರು ವರ್ಷಗಳ ಹಿಂದೆಯೇ ನಮ್ಮ ಋಷಿಮುನಿಗಳು ಎಲ್ಲರೂ ಆರೋಗ್ಯವಾಗಿ, ಸುಖವಾಗಿ, ರೋಗಮುಕ್ತರಾಗಿರಬೇಕೆಂದು ಪ್ರಾರ್ಥಿಸಿದ್ದರು. ಈ ದೃಷ್ಟಿ ಜಗತ್ತನ್ನು ಒಂದುಗೂಡಿಸಲಿ.

ಧನ್ಯವಾದಗಳು!

*****