ভারতনা তেরোরিজম থেংনরিবা অসি ঙাক-শেনগী ৱাফম খক নত্তনা, মসি হৌজিক লৈবাক্কী ঙাক-শেনগী কাংলোনগী শরুক অমনি, মসিগী হায়ব্রিদ অমসুং প্রোক্সি লান অসি ঐখোয়গী মরু ফংনা মুৎথৎকনি হায়না মে ১৬, ২০২৫ দা গুজরাতকী ভুজ এয়র ফোর্স স্তেসন্দা নোংথক্কী লান্মীশিংদা ৱা ঙাংবদা রক্ষ মন্ত্রী শ্রী রাজনাথ সিংহনা ফোঙদোকখ্রে। মহাক্না হায়খি হৌজিক চৎনরিবা নোংমৈ কাপ্নবা লেপ্লিবা অসিদি লৈবাক অসিগী থবকশিংদা য়ুম্ফম ওইরগা ভারতনা পাকিস্তান মতম খরগী ওইনা য়েংবনি। করিগুম্ব মখোয়গী লমচৎ-শাজৎশিং ফগৎলক্লবদি, মদু য়াম্না ফরে; অদুবু করিগুম্বা অকায়বা অমা পীরকপা মতমদা, খ্বাইদগী কনবা চৈরাক পীগনি।

রক্ষ মন্ত্রীনা হায়খি মদুদি ওপরেসন সিন্দুর লোইদ্রি; ঐখোয়গী থবকশিং অদু শুপ্নগী ত্রেল্লর অমনি, করিগুম্বা দরকার ওইরবদি ঐখোয়না মপুংফাবা পিকচর উৎকনি। তেরোরিজমদা খুৎ থাবা অমসুং মুৎথৎপা হায়বসি অনৌবা ভারতকী অনৌবা চৎনবীনি।

শ্রী রাজনাথ সিংহনা হায়খি মদুদি ভারতনা অমাং-অতা থোকহনখ্রবা মতুংদা, পাকিস্তান্না অমুক হন্না তেরর ইনফ্রাস্ত্রকচর শেমগৎলকপা মরম্না ইস্লামাবাদতা দোল্লর মিল্লিয়ন কয়া মতেং পাংলিবা অসি অমুক হন্না খন্ননবা ইন্তরনেসনেল মোনিতরি ফন্দদা খঙহনখ্রে। জেস-ই-মোহমদ তেরোরিস্ত লুপ অসিগী লুচিংবা মসুর অজার য়ু.এন্না তেরোরিস্তনি হায়না লাউথোকখ্রবশু মহাক্কী মফমদা লুপা করোর ১৪ পীনবা পাকিস্তান্না লৈবাক অসিগী মীয়ামদগী তেক্সশিং খোমগৎখি। মুরিদকে অমসুং বহাৱালপুরদা লৈবা লাস্কার-ই-তাইবা অমসুং জেস-ই-মোহমদগী তেরর ইনফ্রাস্ত্রকচরশিং অমুক হন্না শেমগৎনবা শেন্থং পীনবা পাকিস্তান সরকারনা লাউথোকখ্রে। তশেংনা আই.এম.এফগী বিল্লিয়ন দোল্লার অমগী শেন্থংগী য়াম্লবা শরুক অমা তেরর ইনফ্রাস্ত্রকচরগী শেন পীবদা শীজিন্নগনি। মসি মালেমগী লুপ অমা ওইরিবা আই.এম.এফনা নাকোয়ননা শেন থাদবা ওইরোইদরা? পাকিস্তানদা পীখিবা শেন্থং অমা হেক্ত তেররগী শেন থাদবদা শীজিন্নগনি। ভারতনা আই.এম.এফতা পীখিবা ফন্দশিং পাকিস্তান নৎত্রগা অতোপ্পা লৈবাক অমদা হকথেংননা নৎত্রগা নাকোইননা তেরর ইনফ্রাস্ত্রকচর শেমগৎনবা শীজিন্নরোইদবনি।

ওপরেসন সিন্দুর মনুংদা ইন্দিয়ান এয়র ফোর্সনা লৌখিবা থৌদাং থাগৎলদুনা, রক্ষ মন্ত্রী শ্রী রাজনাথ সিংহনা হায়খি মদুদি শুপ্নগী মিনিত ২৩ গী মনুংদা নোংথক্কী লান্মীশিংনা পাকিস্তান অমসুং পি.ও.কেদা তেরর কেম্পশিং মাঙহনখি। য়েক্নবগী লম মনুংদা মিসাইলশিং কাপশিনবা মতমদা, মালেমগী লৈবাকশিংনা ভারতকী থৌনা অমসুং তৌবা ঙম্বা খঙখি। আই.এ.এফনা তেরোরিজমগী মথক্ত মসিগী খোঙজং চঙশিনখ্রে; য়েক্নবা লাকশিনবা খক নত্তনা, ওপরেসন মনুংদা মখোয় মাইথিবা পীখি।

রক্ষ মন্ত্রী শ্রী রাজনাথ সিংহনা হায়খি ভারতকী ফাইত্তর এয়রক্রাফনা ঙমখৈ লানশিন্দনা পাকিস্তানগী মফম খুদিংমক্ত কাপশিনবা ঙম্মী। কমদৌনা আই.এ.এফনা তেরর কেম্পশিং অমসুং পাকিস্তানগী এয়র বেজশিং মাঙহনবগে হায়বা মালেম্না উরে। ভারতকী লানগী থৌশিল অমসুং তেক্নোলোজি হোংলে হায়বা আই.এ.এফনা খুদম ওইরে। অনৌবা ভারতনা মপান লৈবাকশিংদগী পুশিল্লকপা খুৎলায়শিং অমসুং প্লেতফোর্মশিংগী মখা পোন্দ্রে হায়বা মখোয়দা তাক্লে, মেদ ইন ইন্দিয়া খুৎলায়শিং হৌজিক ঐখোয়গী লান্মীগী শক্তিগী শরুক অমা ওইরে। ভারত্ত শাবা খুৎলায়শিং মাইথিবা পীবা ঙমদ্রে। ব্রাহমোস মিসাইলগী শক্তি পাকিস্তান মশানা য়াজরে। মেদ ইন ইন্দিয়া মিসাইলনা পাকিস্তানগী নুমিদাংদা নুংথিলগী মতমগুম্না মঙাল ফংহনখ্রে। দি.আর.দি.ওনা পুথোকপা অকাস অমসুং অতোপ্পা রাদার সিস্তেমশিংনা ভারতকী এয়র দিফেন্স সিস্তেমদা মরুওইবা থৌদাং অমা লৌখি।

রক্ষ মন্ত্রী শ্রী রাজনাথ সিংহনা হায়খি মদুদি ভারতকী ঙমখৈশিং মপুংফানা অশোই-অঙাম লৈত্রে হায়বা অমুক হন্না থাজরে। মাইকৈ অনিমক্ত লান্মীশিংগী মরক্ত অৱাংবা থাক্কী থৱায় য়াওবা অমসুং মরৈবাক নুংশিবা উবা ফংলে। ওপরেসন সিন্দুর মনুংদা ঐখোয়গী ফোর্সশিংনা লৈবাক অসি চাউথোকচবা ফাওহনখি।

রক্ষ মন্ত্রী শ্রী রাজনাথ সিংহনা হায়খি ভারতনা পাকিস্তানগী মথক্ত ১৯৬৫, ১৯৭১ অমসুং হৌজিক লান ঙমখিবা ভুজনা উখ্রে। ভুজ অসি মরৈবাক নুংশিবগী লমদম অমনি অমসুং মফম অসিদা লৈবাক্কী য়াইফনবগীদমক লান্মীশিংনা অকনবা ৱারেপ কয়া লৌখি। মমা লৈবাক্কীদমক মখোয়না পাংথোকখিবা থবকশিং অদুগীদমক নোংথক্কী লান্মীশিং অমসুং আর্মদ ফোর্সশিংগী অতোপ্পা থৌনা ফরবা লান্মীশিং অমসুং বি.এস.এফ থাগৎপা ফোঙদোকচরি।

রক্ষ মন্ত্রী শ্রী রাজনাথ সিংহনা হায়খি সরকারনা আর্মদ ফোর্সশিং মখা তানা অনৌবা খুৎলায়শিং, প্লেতফোর্মশিং অমসুং অনৌবা ইনফ্রাস্ত্রচরশিং ফংহল্লি। মপাঙ্গল কনবা লৈবাক অমনা মসিগী মিলিতরি ইকায়খুম্নৈ অমসুং লান্মীদা তেক্নোলোজি অমসুং পীবা য়াবা মতেং খুদিংমক পীরি। মমাংঙৈদা ভারতনা মপান লৈবাকশিংগী লৈবা খুৎলায়শিংগী মখা পোল্লমখি, অদুবু ঙসিদি লৈবাক অসিনা মশানা আর্তিল্লেরি সিস্তেমশিং, রাদার সিস্তেমশিং, মিসাইল সিল্দশিং, দ্রোনশিং অমসুং কাউন্তর দ্রোনশিং শাজরে। ঐখোয় মপান্দগী লৈরম্বদগী মপান্দা থাদোকপা লৈবাক ওইরক্লে অমসুং মসি হৌবদা ঙাইরিবনি।

রক্ষ মন্ত্রী শ্রী রাজনাথ সিংহনা হায়খি তেরোরিজমগী মায়োক্ত শোক্নরিবা লান অসিদা ভারতকী মীয়াম, সরকার, আর্মদ ফোর্সশিং অমসুং অতোপ্পা সেকুরিতি এজেন্সিশিংনা অমতা ওইবা অমসুং ৱাখল তাবা উৎলি অমসুং মীয়াম খুদিংমক লান্মী অমগুম শরুক য়ারি। খোঙথাং খুদিংমক্ত সরকার অমসুং মীয়াম নকশিন্ননা লেপ্লি অমসুং ঐখোয় অমতা ওইবনা, লমদম অসিদগী মপুংফানা তেরোরিজম মুৎথৎকনি অমসুং লৈবাক অনিগী মনিংতম্বদা কনাগুম্বা অমতনা ফত্তবা মীৎয়েং য়েংলকপা ঙম্লোই।

পেহেলগামগী থৌদোক্ত লৈখিদ্রবা মীচমশিং অমসুং ওপরেসন সিন্দুর মনুংদা ইমা লৈবাক্কীদমক থৱায় কৎখ্রবা লান্মীশিংগী মফমদা শ্রী রাজনাথ সিংহনা ইকায়খুম্নবা উৎতুনা মহাক্কী ৱা ঙাংবা হৌখি। মহাক্না অশোকপা লান্মীশিংগী থৌনা থাগৎপা ফোঙদোকখি অমসুং মখোয় অথুবা মতমদা ফগৎলক্নবা থৌনিজখি।

থৌরম অদুদা চীফ ওফ এয়র স্তাফ চীফ মার্সেল এ.পি সিংহ অমসুং অতোপ্পা আই.এ.এফ সেনিয়র ওফিসিএলশিংশু শরুক য়াখি।

****