પ્રખ્યાત અભિનેતા આમિર ખાને 'સ્ટુડિયો ઓફ ધ ફ્યુચર: પુટિંગ ઈન્ડિયા ઓન ધ વર્લ્ડ સ્ટુડિયો મેપ' શીર્ષક હેઠળની પેનલ ચર્ચામાં જણાવ્યું હતું કે ભારતીય ફિલ્મ મેકર્સ અને નિર્માતાઓએ ભારતીય ફિલ્મ પ્રેક્ષકોની સંખ્યા વધારવા માટે વિવિધ દેશોમાં વિતરણ ચેનલો બનાવવા પર ધ્યાન કેન્દ્રિત કરવાની જરૂર છે. આ ચર્ચા શુક્રવારે જિયો વર્લ્ડ સેન્ટર ખાતે વર્લ્ડ ઓડિયો વિઝ્યુઅલ એન્ડ એન્ટરટેઈનમેન્ટ સમિટ (WAVES) 2025ના બીજા દિવસે યોજાઈ હતી.

ફિલ્મ વિવેચક મયંક શેખર દ્વારા સંચાલિત, આ સત્રમાં ફિલ્મ ઉદ્યોગના અનેક દિગ્ગજોએ હાજરી આપી હતી. જેમાં નિર્માતા રિતેશ સિધવાણી, પ્રાઇમ ફોકસ લિમિટેડના નમિત મલ્હોત્રા, ફિલ્મ નિર્માતા દિનેશ વિજન, પીવીઆર સિનેમાના અજય બિજલી અને પ્રખ્યાત અમેરિકન નિર્માતા ચાર્લ્સ રોવેનનો સમાવેશ થાય છે.

ભારતીય ફિલ્મોની સમૃદ્ધ સંભાવના વિશે વાત કરતા, આમિર ખાને શરૂઆતથી જ વૈશ્વિક વિચારસરણીની મહત્વપૂર્ણ જરૂરિયાત પર ભાર મૂક્યો હતો.

OTT ચર્ચામાં, આમિરે વાત કરી કે કેવી રીતે થિયેટર અને OTT રિલીઝ વચ્ચેની સાંકડી બારી થિયેટર દર્શકોને નિરાશ કરે છે.

વૈશ્વિક બ્લોકબસ્ટર ફિલ્મો, ઓપનહેઇમરના નિર્માતા ચાર્લ્સ રોવેને થિયેટર સિનેમાની સ્થાયી શક્તિ પર ભાર મૂક્યો હતો. તેમણે ઉમેર્યું, "ટીવી અને ઓટીટી પ્લેટફોર્મના ઉદય છતાં, થિયેટરનો અનુભવ બદલી ન શકાય તેવો રહ્યો છે."

ચાર્લ્સ રોવને ભારતીય સ્ટુડિયોને સલાહ આપી હતી કે તેઓ ફક્ત સ્થાનિક સ્તરે ધ્યાન કેન્દ્રિત કરવાથી દૂર રહીને આંતરરાષ્ટ્રીય પહોંચને ધ્યાનમાં રાખીને પ્રોજેક્ટ્સનું નિર્માણ કરે.

દિનેશ વિજને અધિકૃત વાર્તા કહેવાના અને આંતરરાષ્ટ્રીય સ્ટુડિયો સાથે સહયોગના મહત્વ વિશે વાત કરી હતી. તેમણે કહ્યું "તે ફક્ત બજેટનો મામલો નથી. નાના શહેરો સિનેમા માટે વધુ અનુકૂળ છે. પરંતુ વૈશ્વિક સ્તરે જવા માટે, આપણે ગુણવત્તાયુક્ત સામગ્રી અને સરહદ પાર ભાગીદારી પર ધ્યાન કેન્દ્રિત કરવું જોઈએ."

નમિત મલ્હોત્રાએ વાર્તા કહેવાની પદ્ધતિને સુધારવા અને ભારતીય પ્રતિભાને વૈશ્વિક પ્રેક્ષકો સુધી પહોંચવામાં મદદ કરવા માટે ટેકનોલોજી, ખાસ કરીને AIના ઉપયોગની મહત્વપૂર્ણ ભૂમિકા વિશે વાત કરી હતી.

રિતેશ સિધવાનીએ OTT પ્લેટફોર્મ દ્વારા વધતી તકો તરફ ધ્યાન દોર્યું હતું. તેમણે કહ્યું હતું કે, "ઓટીટીએ ભારતીય સામગ્રીને વૈશ્વિક સ્તરે દૃશ્યતા આપી છે. તે આપણને ફોર્મેટ અને કથા સાથે પ્રયોગ કરવાની મંજૂરી આપે છે." અજય બિજલીએ કોવિડ પછી થિયેટરોમાં દર્શકોની સંખ્યામાં ઘટાડા અંગે ચિંતા વ્યક્ત કરી હતી. તેમણે થિયેટર અને ડિજિટલ પ્લેટફોર્મ બંને દ્વારા મુદ્રીકરણ સુનિશ્ચિત કરવા માટે રિલીઝ વિન્ડોનું સમજદારીપૂર્વક સંચાલન કરવાના મહત્વ પર ભાર મૂક્યો હતો.

દિનેશ વિજને એ વાત પર પણ ભાર મૂક્યો કે ટેકનોલોજી અધિકૃત લિપ-સિંક અનુવાદો દ્વારા ભાષા અવરોધોને તોડવામાં મદદ કરી શકે છે, જેનાથી સાંસ્કૃતિક વિશિષ્ટતા શક્ય બને છે અને સાથે સાથે વિશાળ પ્રેક્ષકો સુધી પહોંચે છે.

આ પેનલે સરકાર આ પરિવર્તનને કેવી રીતે સમર્થન આપી શકે છે, તેની ચર્ચા સાથે સમાપન કર્યું હતું. WAVE સમિટમાં, આમિર ખાને કહ્યું: "આ પહેલી વાર છે જ્યારે મેં કોઈ સરકારને આપણા ઉદ્યોગમાં આટલો રસ લેતા જોયું છે. WAVES એ ફક્ત એક સંવાદ નથી - તે નીતિ માટેનો સેતુ છે. તે એક આશાસ્પદ શરૂઆત છે. મને ખાતરી છે કે આપણી ચર્ચાઓ નીતિઓમાં પરિવર્તિત થશે," અભિનેતાએ કહ્યું હતું.

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com