వరల్డ్ ఆడియో విజువల్ అండ్‌ ఎంటర్‌టైన్‌మెంట్ సమ్మిట్-2025 (వేవ్స్‌)లో భాగంగా ప్రతిష్ఠాత్మక రీతిలో శ్రీకారం చుట్టుకున్న ‘క్రియేట్ ఇన్ ఇండియా ఛాలెంజ్’ (సిఐసి) సీజన్-1 అద్భుతమైన అంతిమదశ కార్యక్రమాలు రేపు జియో వరల్డ్ సెంటర్‌లో మొదలవుతున్నాయి. ‘సిఐసి-1’ ముఖ్యంగా- లక్షకుపైగా అంటే... మొత్తం 1,01,349 రిజిస్ట్రేషన్లతో ఓ కొత్త రికార్డును సృష్టించింది. ప్రపంచవ్యాప్తంగా 60కిపైగా దేశాల నుంచి ఔత్సాహకులను ఈ పోటీలు ఆకర్షించాయి. దీన్నిబట్టి, ఈ ప్రతిష్ఠాత్మక కార్యక్రమం అంతర్జాతీయ స్థాయిలో పోటీదారులను ఎంతగా ఆకట్టుకున్నదో స్పష్టమవుతోంది. అసాధారణ స్థాయిలో నమోదు చేసుకున్న ప్రతిభావంతుల సమూహం నుంచి 750 మంది తుది దశకు చేరారు. వీరందరికీ ‘వేవ్స్‌-2025’లో భాగమైన యానిమేషన్, కామిక్స్, ఏఐ, ఎక్స్‌ఆర్‌, గేమింగ్, సంగీతం సహా మరిన్నిటిలో ఆవిష్కరణలసహిత ప్రత్యేక వేదిక ‘క్రియేటోస్ఫియర్‌’పై తమ సృజనాత్మక నైపుణ్యాలను, ఆవిష్కరణల ప్రభావాన్ని ప్రదర్శించే అవకాశం పొందుతారు.

ఏమిటీ క్రియేటోస్ఫియర్‌...?

‘క్రియేటోస్ఫియర్‌’ అంటే- ఆవిష్కరణ, మేధస్సు కలగలసిన తాదాత్మ్యతా లోకం... ఆలోచనలను అనుభవాలుగా మార్చే అసలైన గమ్యంగా దీన్ని రూపొందించారు. సృష్టికర్తలకు కీలక ప్రాధాన్యం లభించే వేదిక... వర్చువల్ రియాలిటీ నుంచి చలనచిత్రాల దాకా, ‘విఎఫ్‌ఎక్స్‌’ నుంచి కామిక్స్ వరకూ, యానిమేషన్ నుంచి గేమింగ్దాకా, సంగీతం నుంచి ప్రసార-డిజిటల్ మీడియా వరకూ విస్తృత శ్రేణి మీడియా, వినోద రంగాల్లో భావన, ప్రయోగం, కళాత్మక నైపుణ్యానికి ఇది సముచిత గుర్తింపునిస్తుంది. ప్రపంచం నలుమూలలాగల అగ్రశ్రేణి సృజనాత్మక మేధావులు, ‘క్రియేట్ ఇన్ ఇండియా ఛాలెంజెస్’ కింద వివిధ పోటీల్లో అంతిమదశకు ఎంపికైన విజేతల మధ్య ఫలవంతమైన చర్చలతోపాటు మరిన్ని ఆవిష్కరణలకు ప్రేరణనిచ్చే వేదిక అవుతుంది. అంతేకాకుండా భాగస్వామ్యాల కూర్పులోనూ తనవంతు తోడ్పాటునిస్తుంది. భారత సృజనాత్మక శక్తిసామర్థ్యాలను ప్రపంచ ప్రేక్షకులతో అనుసంధానిస్తూ వారి ప్రతిభా ప్రదర్శనకు వీలు కల్పిస్తుంది.

“భారత్‌లో సృష్టించండి... ప్రపంచం కోసం సృష్టించండి” (క్రియేట్ ఇన్ ఇండియా-క్రియేట్ ఫర్ ది వరల్డ్) అంటూ ప్రధానమంత్రి దృక్కోణం నుంచి ఉద్యమంలా రూపుదిద్దుకున్న భావనే ‘క్రియేట్ ఇన్ ఇండియా ఛాలెంజెస్’ నిర్వహణకు మూలం. ఆ మేరకు “ఆవిష్కర్తల సంధానం... దేశాల అనుసంధానం” విధానంగా ఈ కార్యక్రమం ముందడుగు వేసింది. ‘వేవ్స్‌’లో కీలకమైన ఈ కార్యక్రమం భారత సృజనాత్మక ఆకాంక్షలకు శక్తిమంతమైన రూపంగా ఆవిష్కృతమైంది. తద్వారా ప్రపంచ మీడియా-వినోద పరిశ్రమలో దేశం అగ్రస్థానానికి చేరువ కావడాన్ని పునరుద్ఘాటిస్తూ ఈ రంగం భవిష్యత్తు ప్రణాళికను కూడా రచిస్తోంది. ‘వసుధైవ కుటుంబకం’... అంటే- యావత్‌ ప్రపంచాన్ని ఒకే కుటుంబంగా పరిగణించే ప్రాచీన భారతీయ తాత్త్విక స్ఫూర్తిని ఇది ప్రతిబింబిస్తుంది.

‘క్రియేట్ ఇన్ ఇండియా ఛాలెంజ్’ సీజన్-1 స్థాయి, ప్రభావం అద్భుతం. ఈ కార్యక్రమం ప్రపంచ సృజనాత్మక ఉద్యమంగా మారింది. ఈ మేరకు వివిధ దేశాల నుంచి 1,100 మందికిపైగా పోటీదారులు నమోదు చేసుకున్నారు. దీంతో ఈ పోటీలు తొలి దశలోనే అంతర్జాతీయ ప్రాచుర్యం పొందాయి. అగ్రశ్రేణి న్యాయనిర్ణేతలు, వారి చురుకైన ఆలోచనలు-భావనలు, బలమైన ఎంపిక ప్రమాణాలతో ‘క్రియేటోస్ఫియర్‌’ కోసం ఉత్తమ ప్రతిభాపాటవాలు గల వారిని అన్ని పోటీల ద్వారా ఎంపిక చేశారు. ఈ పోటీలలో దేశంలోని 28 రాష్ట్రాలు, 8 కేంద్రపాలిత ప్రాంతాలు సహా 20 దేశాల నుంచి అభ్యర్థులు పాల్గొన్నారు. ‘క్రియేట్ ఇన్ ఇండియా ఛాలెంజ్’, క్రియేటోస్ఫియర్’ సాధించిన ఈ విజయాలు వైవిధ్యం, శ్రేష్ఠత, ప్రపంచ ప్రతిస్పందనను ప్రస్ఫుటం చేశాయి.

ప్రతినిధులు, సృష్టికర్తలు, పోటీదారులతో రాబోయే నాలుగు పరిణామశీల రోజుల్లో సృజనాత్మక, అనుసరణీయ, భిన్నత్వంలో ఏకత్వాన్ని ప్రతిబింబించగల శక్తిమంతమైన సమ్మేళనంతో వీక్షకులు తాదాత్మ్యం చెందుతారు. ప్రత్యేకంగా రూపొందించిన మాస్టర్‌క్లాస్‌లు, బృంద చర్చలు, వర్క్‌షాపులు, ప్రెజెంటేషన్లు, ప్రదర్శనల ద్వారా ఒక వృత్తిపరమైన చట్రంలో అర్థవంతమైన సంభాషణలు, భవిష్యత్‌ దార్శనిక భావనలను క్రియేటోస్ఫియర్ పెంపొందిస్తుంది. ‘ఎవిజిసి-ఎక్స్‌ఆర్‌’ ప్రసారం, చలనచిత్రాలు, సంగీతం, డిజిటల్, సోషల్ మీడియా తదితర రంగాలను ఇది ఒకే వేదికపైకి తెస్తుంది. ఇందులో భాగంగా ఈ పోటీల్లో అగ్రస్థానంలో నిలిచిన అంశాలకు సంబంధించి “వర్చువల్ లోక్, విఎఫ్‌ఎక్స్‌ వాల్ట్, ఫిల్మ్ ఫియస్టా, యానిమేషన్ అల్లే, కామిక్ కోనా, మ్యూజిక్ మానియా, ఎయిర్‌వేవ్స్‌, డిజిటల్ డొమైన్, గేమ్ ఆన్” పేరిట 9 ప్రత్యేక విభాగాల్లో ప్రదర్శనలుంటాయి.

భవిష్యత్‌ యువ సృష్టికర్తలకు ఒక వేదికనందించే లక్ష్యంతో ‘క్రియేటోస్ఫియర్‌’ కింద విశిష్ట ‘క్రియేటర్స్‌ అవార్డ్‌’ కార్యక్రమం కూడా నిర్వహిస్తున్నారు. ఈ మేరకు ‘క్రియేట్ ఇన్ ఇండియా ఛాలెంజెస్’ విజేతలకు ఘన సత్కారం లభిస్తుంది. ఈ ఆనందోత్సాహ సంబరాల్లో మీడియా-వినోద రంగాల ప్రసిద్ధ కళాకారులు, ప్రముఖులు, పరిశ్రమ అగ్రగాముల సమక్షంలో సృజనాత్మక విజేతలకు అత్యున్నత గౌరవపురస్కార ప్రదానం ఉంటుంది. సంగీత పోటీల విజేతలు తమ మంత్రముగ్ధ సంగీత ప్రతిభతో ప్రేక్షకులకు వీనులవిందు చేస్తారు. అంటే- ‘క్రియేటోస్ఫియర్’ ఆవిష్కరణల కూడలిగానే కాకుండా సాంస్కృతిక వేడుకగానూ ప్రపంచాన్ని అలరిస్తుంది. భారత బహుముఖ సృజనాత్మక ప్రతిభాపాటవాల వైభవాన్ని ప్రదర్శిస్తుంది.

***