আঞ্চলিক বিদ্যুৎ সন্মিলনৰ আয়োজন ছিক্কিমৰ মুখ্যমন্ত্ৰী শ্ৰী প্ৰেম সিং তামাং আৰু কেন্দ্ৰীয় বিদ্যুৎ তথা গৃহ নিৰ্মাণ আৰু নগৰ পৰিক্ৰমা মন্ত্ৰী শ্ৰী মনোহৰ লালৰ উপস্থিতিত ৰাজধানী গেংটকত ২৬ এপ্ৰিলত কৰা হয়।

এই সন্মিলনত শ্ৰী ৰতন লাল নাথ (ত্ৰিপুৰাৰ বিদ্যুৎ মন্ত্ৰী), শ্ৰী এ টি মণ্ডল (মেঘালয়ৰ বিদ্যুৎ  মন্ত্ৰী), শ্ৰী এফ ৰডিংলিয়ানা (মিজোৰামৰ বিদ্যুৎ  মন্ত্ৰী), শ্ৰী জিক্কে টাকো, বিধায়ক সহ বিদ্যুৎ  উপদেষ্টা (অৰুণাচল প্ৰদেশ) আৰু শ্ৰী সঞ্জীত খৰেল (ছিক্কিমৰ বিধায়ক সহ উপদেষ্টা)ও উপস্থিত থাকে। ইয়াত কেন্দ্ৰীয় বিদ্যুৎ  সচিব, জড়িত ৰাজ্যসমূহৰ সচিব (বিদ্যুৎ/শক্তি), কেন্দ্ৰীয় আৰু ৰাজ্যিক বিদ্যুৎ  উপযোগিতাৰ চিএমডি আৰু বিদ্যুৎ  মন্ত্ৰালয়ৰ উচ্চপদস্থ বিষয়াসকল উপস্থিত থাকে।

কেন্দ্ৰীয় মন্ত্ৰী শ্ৰী মনোহৰ লালে এই উপলক্ষে দিয়া ভাষণত দেশখনক উন্নত ৰাষ্ট্ৰ হিচাপে গঢ়ি তোলাৰ দিশত আগুৱাই যাবলৈ ভৱিষ্যতৰ বাবে সাজু, আধুনিক আৰু আৰ্থিকভাৱে ব্যৱহাৰ্য বিদ্যুৎ  খণ্ডৰ গুৰুত্বৰ ওপৰত আলোকপাত কৰে।

তেওঁ উন্নত ভাৰতৰ লক্ষ্যত উপনীত হোৱাত বিদ্যুতৰ গুৰুত্বৰ ওপৰত জোৰ দিয়ে। তেওঁ লগতে কয় যে এই আঞ্চলিক সন্মিলনে উত্তৰ-পূৰ্বাঞ্চলৰ ৰাজ্যসমূহৰ বিদ্যুৎ  খণ্ডৰ সন্দৰ্ভত নিৰ্দিষ্ট প্ৰত্যাহ্বান আৰু সমাধান চিনাক্তকৰণত সহায় কৰিব।

শ্ৰী মনোহৰ লালে কয় যে বৰ্তমানৰ বিদ্যুতৰ প্ৰয়োজনীয়তা পূৰণৰ ক্ষেত্ৰত ০.১ শতাংশৰ সামান্য পাৰ্থক্য থকাৰ পিছতো ভৱিষ্যতৰ দাবী পূৰণৰ বাবে প্ৰচেষ্টা অব্যাহত ৰাখিব লাগিব। ২০১৪ চনৰ পৰা বিদ্যুৎ উৎপাদন যথেষ্ট বৃদ্ধি পাইছে, আৰু তাপ, জল, পাৰমাণৱিক আৰু নবীকৰণযোগ্য বিদ্যুতকে ধৰি বিভিন্ন উৎপাদন পদ্ধতি অনুসৰণ কৰা উচিত। নিকা শূন্য নিৰ্গমনৰ লক্ষ্যত উপনীত হ’বলৈ হ’লে পৰিৱেশৰ উদ্বেগক সমাধান কৰি অজীৱাশ্ম বিদ্যুতৰ দিশত আগবাঢ়িব লাগিব।

শ্ৰী লালে কয় যে আৰডিএছএছ আৰু পিএম-জনমনৰ দৰে চৰকাৰী আঁচনিৰ জৰিয়তে বিদ্যুৎ বিতৰণ খণ্ডৰ অসুবিধাসমূহ সমাধান কৰা হৈছে আৰু বঞ্চিত পৰিয়ালসমূহক বিদ্যুৎ যোগান ধৰা হৈছে। তেওঁ আলোকপাত কৰে যে দুৰ্বল শুল্ক গাঁথনি, ছাব-অপ্টিমেল বিলিং আৰু সংগ্ৰহ, আৰু চৰকাৰী বিভাগসমূহৰ বকেয়া আৰু ৰাজসাহায্যৰ পৰিশোধত পলম হোৱাৰ বাবে বিতৰণ খণ্ডই প্ৰত্যাহ্বানৰ সন্মুখীন হৈছে। বিতৰণ খণ্ডটোক কাৰ্য্যক্ষম কৰি তুলিবলৈ এটিএণ্ডচিৰ লোকচান আৰু যোগানৰ গড় খৰচ আৰু লাভ কৰা গড় ৰাজহৰ মাজৰ পাৰ্থক্য হ্ৰাস কৰাটো প্ৰয়োজনীয়। ইয়াক লাভ কৰিবলৈ শুল্কই খৰচৰ প্ৰতিফলন ঘটাব লাগিব।

শ্ৰী লালে স্মাৰ্ট মিটাৰিং কামকে ধৰি আৰডিএছএছৰ অধীনত কাম সম্পন্ন কৰাত গুৰুত্ব আৰোপ কৰে, যিয়ে ইউটিলিটিসমূহৰ কাৰ্য্যকৰী লোকচান উন্নত কৰাত যথেষ্ট সহায় কৰিব। চৰকাৰী কলনীকে ধৰি চৰকাৰী প্ৰতিষ্ঠানসমূহক প্ৰিপেইড স্মাৰ্ট মিটাৰিঙৰ বাবে অগ্ৰাধিকাৰ দিয়া উচিত বুলিও তেওঁ গুৰুত্ব আৰোপ কৰে।

কেন্দ্ৰীয় মন্ত্ৰীগৰাকীয়ে কয় যে ৰাজ্যসমূহে বিদ্যুৎ  সুৰক্ষা নিশ্চিত কৰাৰ দিশত কাম কৰিব লাগে আৰু উত্তৰ-পূৰ্বাঞ্চলত পাম্পযুক্ত মজুতকে ধৰি জল বিদ্যুতৰ সম্ভাৱনাৰ প্ৰতি লক্ষ্য ৰাখি ৰাজ্যসমূহে সেই সম্ভাৱনাক ফলপ্ৰসূভাৱে ব্যৱহাৰ কৰাৰ প্ৰচেষ্টা চলাব লাগে।

ভাৰত চৰকাৰৰ সচিব (বিদ্যুৎ), ক্ৰমবৰ্ধমান বিদ্যুতৰ চাহিদা পূৰণৰ বাবে আৰু ভৱিষ্যতৰ সংস্কাৰ আৰু আধুনিকীকৰণক আগুৱাই নিয়াৰ বাবে মূলধনী বিনিয়োগৰ প্ৰয়োজনীয়তাৰ ওপৰত গুৰুত্ব আৰোপ কৰে। কোৱা হৈছে যে বিদ্যুৎ  প্ৰকল্পসমূহৰ দীঘলীয়া অৱধিৰ প্ৰতি লক্ষ্য ৰাখি ২০৩০ বিত্তীয় বৰ্ষৰ বাবে সম্পদ পৰ্যাপ্ততা পৰিকল্পনা অনুসৰি, প্ৰয়োজনীয় বিদ্যুতৰ বাবে আগতীয়াকৈ চুক্তিত উপনীত হোৱাটো গুৰুত্বপূৰ্ণ। ইয়াৰ উপৰিও, বিভিন্ন উপলব্ধ বিত্ত পোষণ আৰ্হি যেনে শুল্ক ভিত্তিক প্ৰতিযোগিতামূলক নিবিদা (টিবিচিবি), নিয়ন্ত্ৰিত শুল্ক ব্যৱস্থা (আৰটিএম), বাজেট সমৰ্থন বা বৰ্তমানৰ সম্পত্তিৰ মুদ্ৰাকৰণৰ জৰিয়তে সম্পদ পৰ্যাপ্ততা পৰিকল্পনা অনুসৰি, আন্তঃৰাজ্যিক সংবহন ক্ষমতাৰ বাবে প্ৰয়োজনীয় ব্যৱস্থা কৰাটোও গুৰুত্বপূৰ্ণ। সচিবগৰাকীয়ে প্ৰয়োজনীয় চুক্তিৰ জৰিয়তে গ্ৰীষ্মকালীন বিদ্যুতৰ চাহিদা পূৰণৰ বাবে ৰাজ্যসমূহৰ পৰিকল্পনাৰ ওপৰতো গুৰুত্ব আৰোপ কৰে।

ছিক্কিমৰ মুখ্যমন্ত্ৰীয়ে নিজৰ ভাষণত অতিথিসকলক আদৰণি জনায় আৰু সমগ্ৰ ৰাজ্যতে বিদ্যুৎ যোগানৰ মানদণ্ড আৰু নিৰ্ভৰযোগ্যতা উন্নত কৰাৰ বাবে ৰাজ্য চৰকাৰে গ্ৰহণ কৰা প্ৰধান পদক্ষেপসমূহৰ বিষয়ে অৱগত কৰে। তেওঁ বিদ্যুৎ  খণ্ডত অধিক সংস্কাৰৰ বাবে ৰাজ্যৰ প্ৰস্তাৱিত পৰিকল্পনাৰ ওপৰতো আলোকপাত কৰে। তেওঁ লগতে ভাৰত চৰকাৰক ৰাজ্য সম্পর্কীয় বিভিন্ন বিষয়ত হস্তক্ষেপ কৰিবলৈ অনুৰোধ জনায়৷

এই সন্মিলনত অংশগ্ৰহণ কৰা ৰাজ্যসমূহে উত্তৰ-পূব অঞ্চলক দিয়া গুৰুত্বৰ বাবে কেন্দ্ৰীয় মন্ত্ৰী শ্ৰী মনোহৰ লালক ধন্যবাদ জ্ঞাপন কৰে আৰু লগতে উত্তৰ-পূৰ্বাঞ্চলৰ বিদ্যুতৰ আন্তঃগাঁথনি আৰু অধিক শক্তিশালী কৰাৰ বাবে ভাৰত চৰকাৰৰ পৰা অবিৰত সহযোগিতা কামনা কৰে।

**********

SK