বিকসিত ভাইব্রেন্ত ভিলেজ প্রোগ্রাম অসি ভারতকী মনুং হুঞ্জিনবা লমদমশিং অমুক হন্না শেমগৎনবা পান্দমদা পায়খৎপা অপুনবা থৌরম অমনি। হোম এফেয়ার্স মিনিস্ত্রিগা খুৎশম্নদুনা য়ুথ এফেয়ার্স অমসুং স্পোর্তসনা পাংথোকপা থৌরম অসি লমদম অমগী লৈঙাকশিং অমসুং ইন্দো-তিবেতান বোর্দর পুলিস ফোর্সনা পায়খৎকদবনি। মে ১৫ দগী মে ৩০, ২০২৫ ফাওবা পাংথোক্কদৌরিবা থৌরম অসিদা লেহ-লাদাখ, হিমাচল প্রদেস অমসুং উত্তরখন্দা মীৎয়েং থমগনি।

থৌরম অসিদা লেহ-লাদাখ, হিমাচল প্রদেস অমসুং উত্তরখন্দগী খনগৎলবা খুঙ্গং ১০০ দা লৈবাক শীনবা থুংবগী মাই ভারত য়ুথ ভোলুন্তিয়ার ৫০০ না খুঞ্জাশিংগা লোয়ননা হকথেংননা থবক তৌমিন্নগনি। লাইরিক-লাইশু অমসুং ইনফ্রাস্ত্রকচর ফগৎহনবা, হকশেল অমসুং নাৎ য়োকখৎপা য়াওনা থৌরম কয়াগী খুৎথাংদা ভোলুন্তিয়ারশিংনা মীয়ামগা থবক তৌমিন্নগনি। মফম অদুগী মীওইশিংগা উনদুনা অমসুং নহারোলশিংগী লুচিংবগী গুনশিং শীজিন্নদুনা, থৌরম অসিনা ঙমখৈগী লমদমশিংদা তুংকোইবা শান্তি অমসুং অফবা অওনবশিং পুরক্নবা পান্দম থম্লি। 

মাই ভারত পোর্তলগী খুৎথাংদা এপ্রিল ২৩, ২০২৫ দগী বিকসিত ভাইব্রেন্ত ভিলেজ প্রোগ্রামগী মিং চনবা হৌরে। থৌরম অসিদা শরুক য়ানবা লৈবাক শীনবা থুংবগী ভোলুন্তিয়ারশিং পুক্নিং থৌগৎলি। য়ু.তিশিংদগী মাই ভারত ভোলুন্তিয়ার ১০ অমসুং শরুক য়ারিবা রাজ্যদগী ১৫ খনগৎকনি। অপুনবা ভোলুন্তিয়ার ৫০০ না থৌরম অসিগী য়াংলেন শরুক ওইনা থবক তৌগনি অমসুং খুঙ্গংশিংদা থবকশিংগী মাঙজিল থাগনি।

থৌরম অসিগী শরুক অমা ওইনা, লাইরিক-লাইশুগী খোঙচৎশিং, নাৎকী থৌরমশিং অমসুং খুঙ্গং চাউখৎনবগী প্রোজেকশিং পায়খৎকনি। ভারতকী ঙমখৈ লমদমশিংগী অঙকপা নাৎ অমসুং খুন্নাইরোলগা নহারোলশিংগা হকথেংনগনি।

নুমিৎ ৭ নি পাংথোক্কদবা থৌরম অসিদা, নুমিৎ অমা মীয়াম চাউখৎনবা অকক্নবা হিরম অমদা কৎথোক্কনি। পাংথোক্কদবা থবকশিং অদুদি;

1. মীয়ামগা উনবা

2. নহারোলশিং লুচিংবা ওইনবা শেমগৎপা

3. নাৎকী থৌরমশিং য়োকখৎপা

4. হকশেলগী লমদা ৱাখল তাহনবা অমসুং মতেং পাংবা

5. স্কিল লৈহনবা অমসুং লাইরিক-লাইশু

6. অকোয়বগী ফিবম ঙাক-শেন্নবা খ্বাইদগী ফবা থবকশিং

7. শীনফম খন্নবগী মতাংদা পাংথোকপা খন্ন-নৈনবা থৌরমশিং

8. শান্নবা, য়োগ অমসুং ধ্যান তৌবা য়াওনা হকচাং ফনা লৈনবা থৌরমশিং

9. মাই দ্রিম ইন্দিয়াদা ওপন মাইক, এসে, ফাইয়ারসাইত চাত অসিনচিংবা।

লৌশিং ফংহনবা অমসুং লৈবাক মীয়াম ৱাখল তামিন্নবা

থৌরম অসিগী খুৎথাংদা নহারোলশিংনা ঙমখৈদা লৈরিবা মীওইশিংগী হেরিতেচ, মায়োক্নরিবা খুদোংচাদবশিং অমসুং খুদোংচাবশিং মশক খঙদোক্নবা অমসুং তাশিন-খোমজিন্নবা খুদোংচাবা ফংগনি। হায়রিবা থবকশিং অসি দিজিতেল প্লেতফোর্মশিং, মীয়াম খন্ন-নৈবশিং অমসুং মহৈলোয়শঙশিংদা উত্তুনা ভারতকী ঙমখৈদা লৈরিবা মীয়ামগী খোল্লাউ লৈবাক অমসুং মালেমগী মীয়ামদা খঙহনবা ঙমগনি।

থৌরম অসিনা নহারোলশিং য়েংবগী খুদোংচাবা পীবা খক নত্তনা লাইরিক-লাইশু, ওন্ত্রেপ্রেন্যুরশিপ, লৌউ-শিংউ নত্ত্রগা লোকেল গভর্নান্সকী অনৌবা প্রোজেকশিংগী খুৎথাংদা হায়রিবা লমদমশিং অসি চাউখৎনবা থৱায় য়াওনা শরুক য়াগনি। মীয়ামগা উনবা অসিনা অমনা অমবু ইকায়খুম্নবা, লৈবাক্কী অপুনবগী ৱাখল চেনহনবা অমসুং মখোয় অরাপ্পা মফমশিংনি হায়না মীরাইবগী মহুত্ত ঙমখৈগী খুঙ্গংশিং নাৎ-চৎনবীশিংগী মৈরাশিং ওইনা শেমগৎকনি।

মীরাইরম্বদগী হরাওবা ফোঙদোক্লকপা: ঙমখৈগী খুঙ্গংশিংগী অনৌবা মশক অমা

ঙমখৈগী খুঙ্গংশিং অসি মেপকী অরোইবদা লৈবনি হায়না মহৌশাগী খন্নদুনা লাকপা অদু কোকহন্নবা থৌরম অসিনা হোৎনরি। ২০৪৭ ফাওবগী মনুংদা বিকসিত ভারতকী মাইকৈদা চঙশিল্লিবা খোঙচৎ অসিদা মখোয় অহানবা খুঙ্গংশিং ওইনা ইকায়খুম্নরে। নহারোলশিং শরুক য়াহন্দুনা মখোয়গী লোল, কলা, ঈশৈ, য়ুমশারোল অমসুং ৱারিশিং উৎনবা হায়রিবা খুঙ্গংশিং অসিদা মফম অমা পীগনি। বিকসিত ভারত ভাইব্রেন্ত ভিলেজ প্রোগ্রাম অসি শুপ্নগী সরকারগী থৌরম অমা নত্তে, মসি নহারোলশিংনা মাঙজিল থাদুনা লৈবাক অসিগী মফম খুদিংমক চাউখৎনবা, মশক তাক্নবা অমসুং ইকায়খুম্নবা ফংনবা মিসন অমনি।

থৌরম অসি হৌদোক্নবা, মিনিস্ত্রিনা শীন্দুনা দিল্লিদা খনগৎলবা ভোলুন্তিয়ারশিংগী ত্রেনিং সেসন অমসুং ওরিয়েন্তেসন থৌরম পাংথোক্কনি। থৌরম অদুদা বিকসিত ভারত ভাইব্রেন্ত ভিলেজ প্রোগ্রাম মপুংফানা পাংথোক্নবা নহারোলশিং শেম শাগনি অমসুং দরকার ওইবা লৌশিং ফংহনগনি। ওরিয়েন্তেসন থৌরম অদুদা নহারোলশিংদা লুচিংবগী গুনশিং চেনহন্নবা, খুঙ্গংগী মীয়ামগী দরকার ওইবশিং হেন্না কুপ্না খঙনবা অমসুং লোকেল গভর্নান্সকী থবকশিং মখোয়গী থবকশিংগা কমদৌনা পুন্না চৎমিন্নগনি হায়বগী মতাংদা তাকপী তম্বীগনি।

থৌরম অসিনা নহারোলশিং খুঙ্গংগী অওনবশিং পুরকপদা মতেং পাংবা খক নত্তনা মখোয় মশা অমসুং শীনফম থৌরম অসিগী খুৎথাংদা চাউখৎকনি। থৌরম অসিনা ভারতকী ঙমখৈগী শরুকশিং অফবা অওনবা অমা পুরক্নবা কেতালিস্ত অমা ওইনা থবক তৌগনি অমসুং লৈবাক শেমগৎপগী থবক্ত থৱায় য়াওনা শরুক য়ানবা নহারোলশিংদা শক্তি পীগনি। মীয়ামগা হকথেংননা থবক তৌনবা নহারোলশিংদা মফম অমা পীবগা লোয়ননা, থৌরম অসিনা লৈবাক্কী অপুনবগী ৱাখল, নাৎকী চাউথোকচবা অমসুং চাউখৎপা হেনগৎহনগনি।

****