আন্তঃৰাষ্ট্ৰীয় সহযোগিতা বৃদ্ধি আৰু ভাৰতৰ উত্তৰপূৰ্বাঞ্চলৰ বিশ্বব্যাপী বিনিয়োগ বৃদ্ধিৰ দিশত এক গুৰুত্বপূৰ্ণ পদক্ষেপ হিচাপে, উত্তৰপূৰ্বাঞ্চল উন্নয়ন মন্ত্ৰালয়ে ২০২৫চনৰ ১৫এপ্ৰিলত নতুন দিল্লীত ৰাষ্ট্ৰদূতৰ বৈঠকৰ আয়োজন কৰে। এই বৈঠকত ৰাষ্ট্ৰদূত, উচ্চায়ুক্ত আৰু ৮০খনৰো অধিক দেশৰ জ্যেষ্ঠ কূটনৈতিক প্ৰতিনিধিসকলে অংশগ্ৰহণ কৰে। এই অনুষ্ঠানৰ লক্ষ্য আছিল উত্তৰপূৰ্বাঞ্চল (এনইআৰ)ৰ অপৰিসীম সম্ভাৱনা প্ৰদৰ্শন কৰা আৰু বহনক্ষম উন্নয়নৰ বাবে দ্বিপাক্ষিক সম্পৰ্ক শক্তিশালী কৰা।

ৰাষ্ট্ৰদূতৰ সভাত উত্তৰপূৰ্বাঞ্চলৰ উন্নয়ন মন্ত্ৰী শ্ৰী জ্যোতিৰাদিত্য এম সিন্ধিয়াই অংশগ্ৰহণ কৰি অৰ্থনৈতিক আৰু ভূ-ৰাজনৈতিকভাৱে অঞ্চলটোৰ কৌশলগত প্ৰয়োজনীয়তাৰ ওপৰত গুৰুত্ব আৰোপ কৰে। মূল ভাষণত মন্ত্ৰীগৰাকীয়ে উত্তৰপূৰ্বাঞ্চলক সংযোগ, বাণিজ্য আৰু উদ্ভাৱনৰ কেন্দ্ৰলৈ ৰূপান্তৰিত কৰাৰ বাবে ভাৰত চৰকাৰৰ প্ৰতিশ্ৰুতিৰ ওপৰত আলোকপাত কৰে।

তেওঁ লগতে উল্লেখ কৰে যে উত্তৰপূৰ্বাঞ্চলৰ আঠখন ৰাজ্যৰ প্ৰতিখনতে অনন্য শক্তি, সম্পদ আৰু সুযোগ আছে, যাৰ ফলত অঞ্চলটো ভাৰতৰ বিকাশৰ কাহিনীত এক অমূল্য সম্পদ হৈ পৰিছে। ইয়াৰ সমৃদ্ধ সাংস্কৃতিক বৈচিত্ৰ্যৰ পৰা আৰম্ভ কৰি ইয়াৰ প্ৰাকৃতিক সৌন্দৰ্য আৰু কৌশলগত অৱস্থানলৈকে, উত্তৰ-পূৰ্বাঞ্চলত দেশৰ অন্যতম আগশাৰীৰ অৰ্থনৈতিক শক্তি কেন্দ্ৰ হিচাপে আত্মপ্ৰকাশ কৰাৰ অপৰিসীম সম্ভাৱনা আছে।

দক্ষিণ-পূব এছিয়াৰ সৈতে ইয়াৰ সান্নিধ্যই উত্তৰ-পূৰ্বাঞ্চলক ভাৰতৰ এক্ট ইষ্ট নীতিৰ সৈতে সংগতি ৰাখি দক্ষিণ-পূব এছিয়াৰ দেশসমূহৰ প্ৰৱেশদ্বাৰ হিচাপে স্থাপন কৰিছে। মাননীয় মন্ত্ৰীগৰাকীয়ে অংশগ্ৰহণকাৰী দেশসমূহক অঞ্চলটোৰ সমৃদ্ধ সম্পদ আৰু কাৰুশিল্পক পুঁজি হিচাপে লৈ উত্তৰ-পূৰ্বাঞ্চলত সুযোগ অন্বেষণ কৰিবলৈ আমন্ত্ৰণ জনায়।

ড’নাৰ মন্ত্ৰালয়ৰ ৰাজ্য মন্ত্ৰী ডঃ সুকান্ত মজূমদাৰে তেওঁৰ ভাষণত উত্তৰ-পূৰ্বাঞ্চলৰ অপৰিসীম সম্ভাৱনাৰ ওপৰত আলোকপাত কৰে। মাননীয় প্ৰধানমন্ত্ৰীৰ দৃষ্টিভংগীৰ বিষয়ে উল্লেখ কৰি তেওঁ কয় যে উত্তৰ-পূৰ্বাঞ্চলৰ ৰাজ্যসমূহে বিনিয়োগৰ সুযোগ আৰু "বিকশিত ভাৰত" গঢ়ি তোলাৰ বাবে মহান দিশ প্ৰদান কৰে।

তেওঁ যোৱা ১০বছৰত মাননীয় প্ৰধানমন্ত্ৰীৰ নেতৃত্বত উত্তৰ-পূৰ্বাঞ্চলৰ আন্তঃগাঁথনি খণ্ডত হোৱা গুৰুত্বপূৰ্ণ উন্নয়নমূলক পদক্ষেপসমূহৰ ওপৰত আলোকপাত কৰে, যাৰ ভিতৰত আছে বায়ু সম্প্ৰসাৰণ,পথ আৰু ৰে'ল সংযোগ, জলপথ ইত্যাদি। তেওঁ লগতে উল্লেখ কৰে যে মাননীয় প্ৰধানমন্ত্ৰীয়ে উত্তৰ-পূৰ্বাঞ্চলক ভাৰতৰ অষ্টলক্ষ্মী হিচাপে গুৰুত্ব আৰোপ কৰিছে, যি হৈছে দ্ৰুত ঔদ্যোগিকৰণৰ বাবে সাজু এক গুৰুত্বপূৰ্ণ অৰ্থনৈতিক সম্পদ। তেওঁ কয় যে একাধিক খণ্ডত পৰ্যাপ্ত সুযোগৰ সৈতে ভাৰতৰ উত্তৰ-পূৰ্বাঞ্চলে বিনিয়োগকাৰীসকলক ইয়াৰ বিশাল সম্ভাৱনা অন্বেষণ কৰিবলৈ আৰু ইয়াৰ বিকাশ যাত্ৰাৰ অংশ হ'বলৈ আদৰণি জনায়।

অৰুণাচল প্ৰদেশৰ মুখ্যমন্ত্ৰী শ্ৰী পেমা খাণ্ডুৱে অৰুণাচল প্ৰদেশকে ধৰি উত্তৰ-পূৰ্বাঞ্চলৰ অনন্য শক্তিৰ বিষয়ে প্ৰকাশ কৰে।

বৈদেশিক পৰিক্ৰমা মন্ত্ৰী শ্ৰী এছ জয়শংকৰে এটা ভিডিঅ’ বাৰ্তাৰ জৰিয়তে উল্লেখ কৰে যে ভাৰতৰ উন্নয়ন নীতিত উত্তৰ-পূৰ্বাঞ্চল শীৰ্ষস্থানত আছে। তেওঁ কালাদান মাল্টি-মডেল ট্ৰেনজিট প্ৰকল্পৰ গুৰুত্বৰ বিষয়ে উল্লেখ কৰি উত্তৰ-পূৰ্বাঞ্চল, দক্ষিণ-পূব এছিয়াৰ বজাৰৰ প্ৰৱেশদ্বাৰ হোৱাৰ সম্ভাৱনাৰ বিষয়ে কয়।

ড’নাৰ মন্ত্ৰালয়ৰ সচিব শ্ৰী চঞ্চল কুমাৰে উত্তৰ-পূৰ্বাঞ্চলত বিনিয়োগৰ সুযোগৰ বিষয়ে উপস্থাপন কৰে আৰু অঞ্চলটোৰ অব্যৱহৃত সম্ভাৱনাৰ ওপৰত আলোকপাত কৰে। তেওঁ লগতে আই টি আৰু আই টি ই এছ, স্বাস্থ্যসেৱা, কৃষি আৰু আনুষংগিক ক্ষেত্ৰৰ দৰে বিভিন্ন খণ্ডত অঞ্চলটোত উপলব্ধ সুযোগসমূহৰ ওপৰতো আলোকপাত কৰে।  এই সমূহ হৈছে শিক্ষা আৰু দক্ষতা বিকাশ, ক্ৰীড়া আৰু মনোৰঞ্জন, পৰ্যটন আৰু আতিথ্য, আন্তঃগাঁথনি আৰু লজিষ্টিকছ; বস্ত্ৰ, হস্ততাঁত আৰু হস্তশিল্প আৰু শক্তি। তেওঁ কয় যে ড’নাৰ মন্ত্ৰালয় উত্তৰ-পূৰ্বাঞ্চলত নিযুক্তি, আন্তঃগাঁথনি আৰু মানৱ মূলধন বৃদ্ধি কৰিব পৰা প্ৰকল্পসমূহৰ প্ৰতি সম্পদ আৰু বিশেষজ্ঞতা প্ৰেৰণ কৰিবলৈ কূটনৈতিক অভিযান, আন্তঃৰাষ্ট্ৰীয় উন্নয়ন সংস্থা আৰু বিশ্ব বিনিয়োগকাৰীসকলৰ সৈতে ঘনিষ্ঠভাৱে কাম কৰিবলৈ প্ৰতিশ্ৰুতিবদ্ধ।

বৈদেশিক পৰিক্ৰমা মন্ত্ৰালয়ৰ সচিব (পূব) শ্ৰী পেৰিয়াস্বামী কুমাৰনে তেওঁৰ ভাষণত কয় যে উত্তৰ-পূৰ্বাঞ্চলে বাংলাদেশ, ভূটান, চীন, নেপাল আৰু ম্যানমাৰকে ধৰি চুবুৰীয়া দেশসমূহৰ সৈতে আন্তঃৰাষ্ট্ৰীয় সীমা ভাগ কৰি ইয়াক এক কৌশলগত অৱস্থান তথা ভাৰতৰ বাবে দক্ষিণ-পূব এছিয়াৰ প্ৰৱেশদ্বাৰ হিচাপে গঢ়ি তুলিছে। সেয়েহে, অঞ্চলটোক কেৱল দক্ষিণ-পূব এছিয়াৰ ৰাষ্ট্ৰসমূহৰ সংগঠন (আছিয়ান)ৰ সৈতেই নহয়, চুবুৰীয়া দেশসমূহৰ সৈতেও ভাৰতৰ বৰ্ধিত অৰ্থনৈতিক সম্পৰ্কৰ আধাৰ হিচাপে বিকশিত কৰিব পাৰি। তেওঁ গুৰুত্ব আৰোপ কৰি কয় যে উত্তৰ-পূৰ্বাঞ্চল হৈছে বিভিন্ন সংস্কৃতি, পৰম্পৰা আৰু প্ৰাকৃতিক সৌন্দৰ্যৰ এক ভাণ্ডাৰ। ৰাষ্ট্ৰদূতৰ বৈঠক গঠনমূলক আলোচনাত জড়িত হোৱাৰ বাবে এক গুৰুত্বপূৰ্ণ মঞ্চ বুলি তেওঁ উল্লেখ কৰে। অংশীদাৰীত্ব গঢ়ি তোলা, বিনিয়োগক আকৰ্ষিত কৰা আৰু সমৃদ্ধিক চালিত কৰা এই মঞ্চ হৈছে উত্তৰ-পূৰ্বাঞ্চলৰ দ্বাৰা আগবঢ়োৱা বিভিন্ন সুযোগৰ অন্বেষণৰ বাবে আগবাঢ়ি অহাৰ এক সুযোগ।

ৰাষ্ট্ৰদূতসকলৰ এই বৈঠক ২০২৫ ৰ ২৩ আৰু ২৪ মে’ত ড’নাৰ মন্ত্ৰালয়ৰ দ্বাৰা আয়োজিত হ’বলগীয়া উত্তৰ-পূব বিনিয়োগকাৰী সন্মিলনৰ পূৰ্বৰ কাৰ্যকলাপসমূহৰ ভিতৰত অন্যতম আছিল। অনুষ্ঠানটোৱে অভূতপূৰ্ব সঁহাৰি লাভ কৰে। উত্তৰ-পূৰ্বাঞ্চলৰ ৰাজ্যসমূহ-অৰুণাচল প্ৰদেশ, অসম, মণিপুৰ, মেঘালয়, মিজোৰাম, নাগালেণ্ড, ছিকিম আৰু ত্ৰিপুৰাই আগবঢ়োৱা সম্ভাৱনাসমূহ অন্বেষণ কৰিবলৈ ৰাষ্ট্ৰদূতসকলে ভাৰতীয় অংশীদাৰসকলৰ সৈতে অংশগ্ৰহণৰ বাবে গভীৰ আগ্ৰহ প্ৰকাশ কৰে। এই অনুষ্ঠানটোৱে কেৱল অৰ্থপূৰ্ণ আলোচনাক উৎসাহিত কৰাই নহয় বৰঞ্চ ভৱিষ্যতৰ অংশীদাৰিত্ব, অঞ্চলটোত অৰ্থনৈতিক বিকাশ আৰু বহনক্ষম উন্নয়নৰ বাবে ভিত্তি স্থাপন কৰে।

এই অনুষ্ঠানত উত্তৰ-পূৰ্বাঞ্চলৰ উন্নয়ন মন্ত্ৰালয় আৰু ৰাজ্য চৰকাৰসমূহৰ জ্যেষ্ঠ বিষয়াসকল উপস্থিত আছিল।

*****

Samrat/MK