‘‘భారత్ ఇవాళ అభివృద్ధిని, వారసత్వాన్ని.. ఈ రెండింటినీ ముందుకు తీసుకుపోతోంది... ఈ విషయంలో మన కాశీయే అత్యుత్తమ నమూనాగా నిలుస్తోంది.’’

~ప్రధానమంత్రి నరేంద్ర మోదీ

కాశీ ఒక్క నగరం మాత్రమే కాదు... ఇది ఒక నిత్య చైతన్య భరిత ఆత్మ. ఇది గంగానది అలలను ఉఛ్చ్వాసగానూ, నగర ప్రజల శాంత శక్తిని నిశ్వాసగానూ తీసుకు జీవిస్తోంది. ఇక్కడి ప్రాచీన శిలలు గత కాలపు కథలను వినిపిస్తాయి... ఇక ముందుభాగంలో అద్దాలతో నిర్మించిన భవనాలు రేపటి వాగ్దానాల్ని ప్రతిబింబిస్తుంటాయి. ఈ నగరంలో మణికర్ణిక ఘాట్‌ జీవన్మరణాల సంగమ స్థలంగా భాసిస్తూ ఉంటే, ప్రస్తుతం విశాలమైన రహదారులకు, స్మార్ట్ లైటింగుకు, ఆధునిక నడవాల (కారిడార్లు) కు ఈ నగరం స్వాగతం పలుకుతోంది. ఇదే కాశీ యాత్ర... ఇక్కడ పవిత్రత, స్మార్ట్ విధానాలు చెట్టపట్టాల్ వేసుకుని నడుస్తున్నాయి. అవి ఒకదానితో మరొకటి పోట్లాడుకోవడం లేదు. చక్కని సామరస్యంతో యథేచ్ఛగా విహరిస్తున్నాయి. ఇక్కడి ప్రతి వీధీ మీకొక కథని చెబుతుంది. ఇక్కడ మీరు వేసే ప్రతి ఒక్క అడుగులో ఆత్మ, నిర్మాణక్రమం.. వీటి కలయిక వైపునకు మీ దృష్టి మళ్లి తీరాల్సిందే.  

ప్రాచీన కాశీ నగరం ఈ నెల 11న ఒక ప్రగతిశీల ఘట్టానికి సాక్షిగా నిలిచింది. ప్రధానమంత్రి శ్రీ నరేంద్ర మోదీ వారణాసిలో రూ.3,880 కోట్లకు పైగా అభివృద్ధి ప్రాజెక్టులను జాతికి అంకితమివ్వడమే కాక శంకుస్థాపనలు కూడా చేశారు. వృద్ధి తాలూకు ఈ పండుగను ప్రధాని శ్రీ మోదీ ‘‘వికాస్ కా ఉత్సవ్’’ (అభివృద్ధి ఉత్సవం) గా అభివర్ణించారు.

పదేళ్ల కిందట, వారణాసిని చూద్దామంటే వాహనాల రాక-పోకలతో ఇబ్బందులు పడుతూ ఉండడం, దుమ్ము రేగే చుట్టు తిరుగుళ్లతో సర్దుకుపోవాల్సివచ్చేది. ఇవాళ, ఈ నగరం ఆ కథను తిరగరాస్తోంది. ఫుల్‌వరియా ఫ్లయ్ఓవర్, రింగ్ రోడ్డు వంటి ప్రాజెక్టులు ట్రాఫిక్ సమస్యలను తగ్గించేస్తున్నాయి. దీంతో రోజూ ఇంటి నుంచి ఆఫీసులకు వెళ్లిరావాల్సిన వారితోపాటు లక్షలాది తీర్థయాత్రికులకు అమూల్యమైన సమయం ఆదా అవుతోంది. జౌన్‌పూర్, గాజీపూర్, బలియాలతోపాటు మవూ వంటి జిల్లాల మధ్య ప్రయాణం ఇదివరకటితో పోలిస్తే చాలా వేగంగా, చక్కని అనుసంధానం కలిగినదిగా మారి, మెరుగుపడింది.
వారణాసి రింగ్ రోడ్డు, సార‌నాథ్‌లను కలిపే ఒక రోడ్డు బ్రిడ్జి, చాలా కాలంగా కాగితాల మీదే ఉన్న భిఖారీపూర్, మండువాడీహ్ ఫ్లయ్ఓవర్లతోపాటు వారణాసి అంతర్జాతీయ విమానాశ్రయం వద్ద 31వ జాతీయ రహదారిలో రూ.980 కోట్లకు పైగా ఖర్చుతో ఒక హైవే అండర్‌పాస్ రోడ్డు టన్నెల్ (రహదారి సొరంగం) నిర్మాణానికి ప్రధానమంత్రి శంకుస్థాపన చేశారు. ఈ ప్రాజెక్టులు కేవలం కాంక్రీటుతో, ఉక్కుతో రూపుదాల్చే ప్రాజెక్టులు కావు... ఇవి శరవేగంగా విస్తరిస్తూ ప్రపంచానికి తలుపులను తెరుస్తున్న ఓ నగరానికి వెన్నెముక లాంటివి.

ప్రజాజీవనాన్ని ప్రకాశవంతం చేయడంతోపాటు నగరం తళుకులీనేటట్లు చూడాలనే ఉద్దేశంతో ప్రధాని శ్రీ మోదీ కాశీలో విద్యుత్తు నెట్‌వర్కుకు అండదండలను అందించారు. 400 కేవీ సామర్థ్యం గల రెండు సబ్‌స్టేషన్లతోపాటు 220 కేవీ సామర్థ్యం గల ఒక సబ్‌స్టేషనును ఆయన ప్రారంభించారు. వీటిని నిర్మించడానికి రూ.1,045 కోట్లకు పైనే ఖర్చు చేశారు. దీనికి అదనంగా రూ.775 కోట్ల వ్యయంతో చౌకాఘాట్‌లో, గాజీపూర్‌లో కొత్త సబ్‌స్టేషన్లను నిర్మించారు.
 
 అయితే సిసలైన శక్తి... తీగల్లో (వైర్లలో) లేదు.. జ్ఞ‌ానంలో ఉంది. ‘‘విద్యను అందరికీ అందుబాటులో ఉంచాల’’న్న తన దృష్టికోణాన్ని ప్రధాని పక్కాగా అమలుచేస్తూ, నేర్చుకోవడానికి కొత్త అవకాశాలను అందించారు. 356 గ్రంథాలయాలు, 100 ఆంగన్‌వాడీ కేంద్రాలు ఏర్పాటు కావడంతో, గ్రామీణ ప్రాంతాల్ల విద్యాభ్యాసానికి దన్ను లభించింది. స్మార్ట్ సిటీ మిషన్‌లో భాగంగా 77 ప్రాథమిక పాఠశాలల పునరుద్ధరణ పనులకు కూడా ఆయన శంకుస్థాపన చేశారు.
 

పూర్వాంచల్‌లో అన్నింటి కన్నా మిన్నగా, హృదయానికి హత్తుకొనే మార్పుల్లో ఒక మార్పుగా బనాస్ డెయిరీ ఏర్పాటైంది. ఇది వేలాది చిన్న పాడి రైతుల్లో ఆత్మవిశ్వాసాన్ని నింపి, వారిని ఔత్సాహిక వ్యాపార తత్వం కలవారిగా తీర్చిదిద్దింది. పశువులను పెంచి పోషించే కుటుంబాలకు బోనసుల రూపంలో రూ.105 కోట్లకు పైచిలుకు సొమ్మును పంపిణీ చేశారు. లబ్ధిదారుల్లో చాలా మంది మహిళలున్నారు. వారు ‘‘లఖ్‌పతి దీదీ’’ పేరుతో ప్రసిద్ధిగాంచి, గర్వపడుతున్నారు. ఈ మహిళలు సిసలైన సాధికారతకు మారుపేరుగా నిలుస్తున్నారు.

కిసాన్ క్రెడిట్ కార్డు, పశువులకు ఉచిత టీకాలు, రాష్ట్రీయ గోకుల్ మిషన్ వంటి పథకాలు రైతులకు ఎలా సాయపడుతున్నాయో ప్రధాని శ్రీ మోదీ ప్రస్తావించారు. రైతులు పశువులను పుష్టిగలవిగా పెంచి పోషించుకొంటూ, తాము పండించిన పంటలను మెరుగైన మార్కెట్లలో అమ్ముకోగలుగుతున్నారన్న సంగతిని ప్రధాని వివరించారు.
 
ఒకప్పుడు, పూర్వాంచల్ ప్రాంత నివాసులు మంచి వైద్య చికిత్స సదుపాయం కోసం, దూరప్రాంతాలకు వెళ్లాల్సి వచ్చేది. ఆయుష్మాన్ భారత్ పథకంతో ఉత్తరప్రదేశ్‌లో లక్షలాది కుటుంబాలు ఉచిత చికిత్సను పొందుతూ ప్రాణాలను కాపాడుకుంటున్నారు. వయోవృద్ధులకు ‘ఆయుష్మాన్ వయ వందన’ కార్డులను ప్రధాని శ్రీ మోదీ స్వయంగా అందజేశారు. 70 ఏళ్ల కన్నా ఎక్కువ వయస్సున్న వారందరికీ- వారి ఆదాయం ఎంతన్నదానితో సంబంధం లేకుండా- ఉచిత చికిత్స సదుపాయాన్ని ఈ కార్డులు అందిస్తున్నాయి.
 
కాశీలో అభివృద్ధి జరిగిందంటే, అది ఒక్క రోడ్లకు, ఆసుపత్రులకే పరిమితం కాలేదు... కలల విషయంలో కూడా అది వర్తిస్తుంది. కొత్త కొత్త స్టేడియంలతోనూ, ప్రపంచ స్థాయి స్పోర్ట్‌స్ కాంప్లెక్స్‌తోనూ వారణాసిలో యువ క్రీడాకారులు ఇక తాము రాణించడానికి అవసరమైన వేదికలను అందుకోబోతున్నారు. 2036 ఒలింపిక్స్‌ను నిర్వహించాలని భారత్ కోరుకుంటూ ఉంటే గనక అందుకు మన యువత వారి ప్రస్థానాన్ని ఇప్పుడే మొదలుపెట్టాలని ప్రధానమంత్రి గుర్తుచేశారు... మరి వారిని సర్వసన్నద్ధం చేసే బాధ్యతను కాశీ తాను తీసుకుంటోంది.

 తబలా అందించే లయబద్ధ ధ్వనితరంగాల మొదలు జర్దోజీ సూక్ష్మ డిజైన్ల వరకు చూస్తే.. వారణాసిలో సుసంపన్న సంస్క‌ృతి అంతర్జాతీయంగా పేరుప్రఖ్యాతులు సంపాదిస్తోంది. వారణాసి, దాని చుట్టుపక్కల జిల్లాలకు చెందిన 30కి పైగా స్థానిక ఉత్పత్తులు ప్రస్తుతం ప్రతిష్ఠాత్మక జీఐ (జియాగ్రఫికల్ ఐడెంటిఫికేషన్..భౌగోళిక గుర్తింపు) ట్యాగులతో మెరిసిపోతున్నాయి. వీటిలో ప్రజల మనసులు గెలుచుకున్న ఠండాయీ (చల్లని పానీయాలు), భర్వాన్ లాల్ మిర్చ్ (లావు ఎర్ర మిరపకాయల్లో పూర్ణాన్ని పెట్టి వండే తినుబండారం), తిరంగా బర్ఫీలే కాకుండా జౌన్‌పుర్‌లో వండే ఇమార్‌తీ (జాంగ్రీని పోలిన తినుబండారం), పీలీభీత్‌లో తయారుచేసే వేణువు వంటివి కూడా ఉన్నాయి.

ఏక్తా మాల్‌ను ఏర్పాటు చేస్తామని కూడా ప్రధాని శ్రీ మోదీ ప్రకటించారు. దేశంలోని వివిధ ప్రాంతాలకు చెందిన విభిన్న చేతివ‌ృత్తి కళాకారులు తయారు చేసిన వస్తువులు, ఉత్పత్తులను ఈ మాల్‌లో ఒకే చోట- ఇక్కడే కాశీలో- కొలువుదీర్చనున్నారు.
సంప్రదాయం, మార్పుల చౌరస్తాలో వారణాసి నిలబడి ఉంది...ఈ నగరం
ఒక సీదాసాదా సత్యాన్ని చాటిచెబుతోంది... అది... అభివృద్ధి అనేది మానవ జీవనాన్ని మెరుగుపరిచినప్పుడు, అంతేకాక ఏదైనా ప్రాంతానికి ఉన్న ఆత్మను పదిలపరిచినప్పుపడు.. ఈ రెండూ జరిగినప్పుడే ప్రగతి సార్థకం అవుతుందనేదే ఈ వాస్తవం.  నమస్కారాన్ని సూచించే ముకుళిత హస్తాలతో, దృఢ సంకల్పం చెప్పుకొంటూ కాశీ ముందంజ వేస్తోంది.. తన గతాన్ని తలచుకొని గర్విస్తూనూ, మరి అలాగే తన భవిష్యత్తును తీర్చిదిద్దుకోవడానికీనూ.
అదనపు సమాచారం కోసం...

•    https://x.com/narendramodi/status/1766504020967879025(Images) 

•     https://pib.gov.in/PressReleseDetailm.aspx?PRID=2120875&reg=3&lang=1

Lighting Up Kashi

***