ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ବ୍ୟାଙ୍କକ୍‌ରେ ବିମ୍‌ଷ୍ଟେକ ଶିଖର ସମ୍ମିଳନୀ ଅବସରରେ ଷ୍ଟେଟ୍ ଆଡ୍‌ମିନିଷ୍ଟ୍ରେସନ୍ କାଉନ୍‌ସିଲ୍‌ର ଅଧ୍ୟକ୍ଷ ଏବଂ ମିଆଁମାର ପ୍ରଧାନମନ୍ତ୍ରୀ ବରିଷ୍ଠ ଜେନେରାଲ ମିନ୍ ଅଙ୍ଗ୍ ହଲାଇଙ୍ଗ୍‌ଙ୍କ ସହ ସାକ୍ଷାତ କରିଛନ୍ତି ।

ଦୁଇ ନେତା ମିଆଁମାରରେ ହୋଇଥିବା ଭୟଙ୍କର ଭୂମିକମ୍ପ ପରବର୍ତ୍ତୀ ପରିସ୍ଥିତି ବିଷୟରେ ଆଲୋଚନା କରିଛନ୍ତି, ଯେଉଁଥିରେ “ଅପରେସନ ବ୍ରହ୍ମା” ଅନ୍ତର୍ଗତ ମିଆଁମାରକୁ ମାନବୀୟ ସହାୟତା, ବିପର୍ଯ୍ୟୟ ସହାୟତା ଏବଂ ଚିକିତ୍ସା ସହାୟତା ପ୍ରଦାନ କରିବା ପାଇଁ ଜାରି ରହିଥିବା ପ୍ରୟାସ ଅନ୍ତର୍ଭୁକ୍ତ । ବରିଷ୍ଠ ଜେନେରାଲ ଭାରତର ସହାୟତା ପ୍ରୟାସ ପାଇଁ କୃତଜ୍ଞତା ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ, ପ୍ରଥମ ସାହାଯ୍ୟକାରୀ ଭାବରେ, ଭାରତ ଏହି ସଂକଟ ସମୟରେ ମିଆଁମାର ସହିତ ଠିଆ ହୋଇଛି ଏବଂ ଆବଶ୍ୟକ ହେଲେ ଅଧିକ ସାମଗ୍ରୀ ସହାୟତା ଏବଂ ସମ୍ବଳ ନିୟୋଜିତ କରିବାକୁ ପ୍ରସ୍ତୁତ ଅଛି ।

ପ୍ରଧାନମନ୍ତ୍ରୀ ସମାବେଶୀ ଏବଂ ବିଶ୍ୱସନୀୟ ନିର୍ବାଚନ ମାଧ୍ୟମରେ ଏକ ଗଣତାନ୍ତ୍ରିକ ପ୍ରକ୍ରିୟାର ଶୀଘ୍ର ପୁନରୁଦ୍ଧାର କରିବାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଛନ୍ତି । ସେ କହିଛନ୍ତି ଯେ, ଭାରତ ବିଶ୍ୱାସ ବୃଦ୍ଧି କରିବା ଏବଂ ଏକ ଶାନ୍ତିପୂର୍ଣ୍ଣ, ସ୍ଥିର ଏବଂ ଗଣତାନ୍ତ୍ରିକ ଭବିଷ୍ୟତ ଆଡକୁ ମିଆଁମାର-ମାଲିକାନାଧୀନ ଏବଂ ମିଆଁମାର ନେତୃତ୍ୱାଧୀନ ପରିବର୍ତ୍ତନକୁ ଆଗକୁ ବଢ଼ାଇବା ପାଇଁ କରାଯାଇଥିବା ପ୍ରୟାସକୁ ସମର୍ଥନ କରୁଛି । ମିଆଁମାରରେ ଚାଲିଥିବା ଜାତିଗତ ହିଂସାର ମାନବିକ ମୂଲ୍ୟକୁ ଉଲ୍ଲେଖ କରି ପ୍ରଧାନମନ୍ତ୍ରୀ ଏହି ବିବାଦର କୌଣସି ସାମରିକ ସମାଧାନ ନାହିଁ ବୋଲି କହିଛନ୍ତି ଏବଂ ଏକ ସମାବେଶୀ ଆଲୋଚନା ମାଧ୍ୟମରେ ସ୍ଥାୟୀ ଶାନ୍ତି ହାସଲ କରାଯାଇପାରିବ ବୋଲି ଗୁରୁତ୍ୱାରୋପ କରିଛନ୍ତି ।

ପ୍ରଧାନମନ୍ତ୍ରୀ ମିଆଁମାର-ଥାଇଲାଣ୍ଡ ସୀମାରେ ସାଇବର-ସ୍କାମ କେନ୍ଦ୍ରରୁ ଭାରତୀୟ ନାଗରିକଙ୍କ ଉଦ୍ଧାର ଏବଂ ସ୍ୱଦେଶ ଫେରାଇ ଆଣିବା ପାଇଁ ମିଆଁମାର ଦ୍ୱାରା ପ୍ରଦାନ କରାଯାଇଥିବା ସମର୍ଥନକୁ ପ୍ରଶଂସା କରିଛନ୍ତି । ଭାରତ-ମିଆଁମାର ସୀମାରେ ବିଦ୍ରୋହୀ କାର୍ଯ୍ୟକଳାପ, ଆନ୍ତଃଦେଶୀୟ ଅପରାଧ ଏବଂ ମାନବ ଚାଲାଣର ସମାଧାନରେ ସହଯୋଗ କରିବାର ଆବଶ୍ୟକତା ଉପରେ ଉଭୟ ପକ୍ଷ ସହମତ ହୋଇଛନ୍ତି ।

ଦୁଇ ନେତା ମିଆଁମାରରେ ଚାଲିଥିବା ଭାରତ ସମର୍ଥିତ ଭିତ୍ତିଭୂମି ବିକାଶ ପ୍ରକଳ୍ପ ବିଷୟରେ ମଧ୍ୟ ଆଲୋଚନା କରିଥିଲେ । ପ୍ରଧାନମନ୍ତ୍ରୀ ମିଆଁମାରର ସମସ୍ତ ସମ୍ପ୍ରଦାୟର ବିକାଶମୂଳକ ଆବଶ୍ୟକତାକୁ ସମର୍ଥନ କରିବା ପାଇଁ ଭାରତର ତତ୍ପରତାକୁ ରେଖାଙ୍କିତ କରିଥିଲେ ।

SR