ప్రపంచంలోనే అసాధారణమైన యానిమేషన్ ప్రతిభను వేవ్స్ 2025 వెలికితీయనుంది. ఈ క్రమంలోనే యానిమేషన్ ఫిలిం మేకర్స్ కాంపిటీషన్ (ఏఎఫ్‌సీ) రెండో రౌండ్‌కు 78 మంది క్రియేటర్లు అర్హత సాధించారు. క్రియేట్ ఇన్ ఛాలెంజ్ సీజన్ -1 లో భాగంగా ఈ పోటీలను డ్యాన్సింగ్ ఆటమ్స్‌ తో కలసి సమాచార, ప్రసార మంత్రిత్వ శాఖ (ఎంఐబీ) నిర్వహిస్తోంది. అయిదు విభాగాల్లో ఈ పోటీలు జరుగుతున్నాయి. అవి యానిమేషన్, ఏఆర్ (ఆగ్మెంటెడ్ రియాల్టీ), వీఆర్ (వర్చువల్ రియాల్టీ), వర్చువల్ ప్రొడక్షన్, విజువల్ ఎఫెక్ట్స్.

ప్రపంచ వినోద పరిశ్రమకు చెందిన ప్రముఖులతో కూడిన జ్యూరీ ప్యానెల్ సినిమా ప్రాజెక్టులను మూల్యాంకనం చేసింది. ఈ విషయంలో సహజత్వం, కథన సామర్థ్యం, వినోద విలువ, మార్కెట్ విలువ, ప్రేక్షకుల్ని నిమగ్నం చేసే విధానం, సాంకేతికతను ఉపయోగించుకున్న విధానం తదితర అంశాలను పరిగణనలోకి తీసుకున్నారు. ఎంటర్టైన్మెంట్ మార్కెటింగ్ నిపుణుడైన జన్ నేగల్, యానిమేషన్ వరల్డ్ నెట్వర్క్ చీఫ్ ఎడిటర్ - వ్యవస్థాపకుడు డాన్ సార్టో, దర్శకుడు – నిర్మాత – రచయిత జియాన్‌మార్కో సెర్రా, ప్రఖ్యాత రచయిత్రి ఇందు రాంచందానీ, పురస్కార విజేతగా నిలిచిన నిర్మాత వైభవ్ పివ్లత్కర్ ఈ జ్యూరీలో సభ్యులుగా ఉన్నారు.

వైవిధ్యం ప్రతిఫలించేలా విద్యార్థులు, ఔత్సాహికులు, నిపుణులు, స్టూడియోలను పోటీదారులుగా ఎంపిక చేశారు. అదనంగా, ఈ పోటీలకు అంతర్జాతీయ దృక్పథాన్ని జోడిస్తూ లండన్, బాలి, కెనడా నుంచి ఎంట్రీలు వచ్చాయి. ఆరోగ్యం, కుటుంబం, విద్య నేపథ్యంలో రూపొందిన మూడు చిత్ర ప్రాజెక్టులు ప్రత్యేక గుర్తింపును సాధించాయి. అర్హత పొందిన వాటి నుంచి తుది పోటీలకు ఎంట్రీలను ఎంపిక చేసే ప్రక్రియ మార్చి 20, 2025తో పూర్తవుతుంది. వాటిని కొత్తగా ఎంపిక చేసిన ప్యానెల్ సభ్యులు సమీక్షిస్తారు.  

అగ్రస్థానంలో నిలిచిన మొదటి మూడు ప్రాజెక్టులకు మొత్తంగా రూ. 5లక్షల నగదు బహుమతి అందజేస్తారు. ఈ కార్యక్రమంలో భాగంగా ముంబయి నగరాన్ని సందర్శించేందుకు అగ్రశ్రేణి క్రియేటర్లను సమాచార, ప్రసార మంత్రిత్వ శాఖ ఆహ్వానిస్తుంది. అక్కడ వారు ప్రపంచం నలుమూలలకు చెందిన నిర్మాతలు, ఓటీటీ వేదికలు, పంపిణీదారులు, పెట్టుబడిదారులకు తమ ప్రాజెక్టులను చూపించవచ్చు. తుది పోటీలకు ఎంపికైన వారి వివరాలు ఏప్రిల్ 10, 2025న లేదా అంతకంటే ముందే ప్రకటిస్తారు.

మరిన్ని వివరాల కోసం waves@dancingatoms.com కు  ఈ-మెయిల్ చేయండి. లేదా https://waves.dancingatoms. ను సందర్శించండి.

***