امور داخلہ اور باہمی تعاون کے مرکزی وزیر جناب امیت شاہ نے آج گجرات میں گر سومناتھ اور ولساڈ میں 3 شوگر ملوں کے احیاء اور جدید کاری کے پروگرام سے خطاب کیا۔

اس موقع پر امور داخلہ اور باہمی تعاون کے مرکزی وزیر  نے کہا کہ وزیر اعظم جناب نریندر مودی کی طرف سے دیا گیا وعدہ آج پورا ہو رہا ہے اور اس شوگر مل کی بحالی سے اس پورے علاقے اور ولساڈ کے 10,000 سے زیادہ کسانوں کی خوشحالی کے دروازے کھولنے کا کام شروع ہو جائے گا۔

جناب امت شاہ نے کہا کہ وزیر اعظم مودی کی قیادت میں تشکیل دی گئی تعاون کی وزارت نے بہت سے اقدامات کیے ہیں اور زراعت پر انحصار کرنے والے ملک کے کروڑوں کسانوں کی ترقی کے راستے کھولے ہیں ۔ انہوں نے کہا کہ اسی طرح کی ایک پہل میں آج ان تین شوگر ملوں کو انڈین پوٹاش لمیٹڈ کے ذریعے بحال کیا گیا ہے جس میں 60 فیصد حصص کیپٹل کوآپریٹیو کے پاس ہیں۔ جناب  شاہ نے کہا کہ وزیر اعظم مودی جی نے بہت سی شوگر ملوں کے ساتھ توانائی کی پیداوار کو جوڑ کر ایتھنول اور بیجوں کے ذریعے ہمارے انناداتا (خوراک فراہم کرنے والے) کسانوں کو توانائی فراہم کرنے والے کسانوں میں تبدیل کرنے کا کام کیا ہے۔ انہوں نے کہا کہ ایتھنول پیدا کرنے والی کوآپریٹو شوگر ملیں فوڈ سیکیورٹی لانے کے ساتھ ساتھ ملک کے پیٹرولیم امپورٹ بل کو کم کرنے میں بھی مددگار ثابت ہوں گی اور ہمارے کسان مقامی سے عالمی بائیو فیول پروڈیوسرز بھی بن جائیں گے۔ انہوں نے کہا کہ آنے والے دنوں میں ہم ایتھنول کی زیادہ پیداوار کے ساتھ عالمی منڈی میں جائیں گے اور اسے برآمد کریں گے۔

امور داخلہ اور باہمی تعاون کے مرکزی وزیر  نے کہا کہ آج ان 3 شوگر ملوں کی بحالی سے یہاں کے تقریباً دس ہزار کسانوں کی زندگیوں میں بہت بڑی تبدیلی آئی ہے۔ انہوں نے کہا کہ انڈین پوٹاش لمیٹڈ، اسٹیٹ کوآپریٹو بینک، گجرات حکومت اور حکومت ہند نے مل کر ان کسانوں کے مفاد میں یہ بڑا فیصلہ کیا ہے۔ انہوں نے کہا کہ انڈین پوٹاش لمیٹڈ نے نہ صرف شوگر ملوں کو زندہ کیا ہے بلکہ اس نے گنے کے کاشتکاروں کی کئی دیگر طریقوں سے بھی مدد کی ہے۔ جناب شاہ نے کہا کہ گنے کی پیداوار بڑھانے کے لیے نئی اقسام کے بیج متعارف کرانے، گنے کی کٹائی کی مشینیں، ڈرون کی مدد سے کھاد چھڑکنے، ڈرپ اریگیشن سسٹم اور ایتھنول اور گیس بنانے کے لیے کارخانوں کا کام انڈین پوٹاش لمیٹڈ نے  کیا  ہے۔

جناب امت شاہ نے کہا کہ ہمارا مقصد ان تینوں فیکٹریوں سے گنے سے ایتھنول، کمپریسڈ بائیو گیس اور نامیاتی کھاد تیار کرنا ہے۔ انہوں نے کہا کہ وزیر اعظم مودی جی نے کسانوں کی فلاح و بہبود کے لیے بہت سے بے مثال کام کیے ہیں۔ انہوں نے کہا کہ سال 2013-14 میں زراعت کا بجٹ صرف 22 ہزار کروڑ روپے تھا جسے وزیر اعظم مودی نے 2023-24 میں بڑھا کر 1 لاکھ 37 ہزار کروڑ روپے کر دیا، یعنی چھ گنا۔ مسٹر شاہ نے کہا کہ اس کے ساتھ ہی اس وقت کسانوں کو 8.5 لاکھ کروڑ روپے کا قرض مودی جی نے بڑھا کر آج 25.5 لاکھ کروڑ روپے کر دیا ہے۔ انہوں نے کہا کہ یہ کسانوں کی بہبود کے تئیں وزیر اعظم مودی کے وژن کی عکاسی کرتا ہے۔ انہوں نے کہا کہ پوری دنیا میں ڈی اے پی کی قیمت میں اضافہ ہو رہا ہے، لیکن وزیر اعظم مودی نے گزشتہ 10 سالوں سے ملک میں ڈی اے پی پر سبسڈی دے کر اس کی قیمت کو مستحکم رکھا ہے۔ انہوں نے کہا کہ یہ جناب نریندر مودی کی سوچ کا نتیجہ ہے کہ کسانوں کو کم قیمت پر کھاد، ڈرپ ایریگیشن کی سہولیات، قدرتی کھیتی، کسان کریڈٹ کارڈ اور ایتھنول جیسی بہت سی نئی اسکیموں کا فائدہ مسلسل مل رہا ہے۔

مرکزی وزیر تعاون نے کہا کہ انڈین پوٹاش لمیٹڈ نے آج ایک نئی پہل کے ذریعے دس ہزار سے زیادہ کسانوں کی زندگیوں میں روشنی کا کام کیا ہے۔ انہوں نے کہا کہ جب یہ شوگر ملیں پوری رفتار سے کام کرنا شروع کر دیں گی تو یہاں کے کسانوں کے لیے خوشحالی کے دروازے کھلیں گے۔ جناب  شاہ نے کہا کہ وزیر اعظم مودی نے کسانوں سے کیا گیا وعدہ پورا کیا ہے۔ انہوں نے کہا کہ اب ہم سب کو مل کر کاشتکاروں کو ڈرپ اریگیشن کی طرف موڑ کر پانی بچانے کے لیے کام کرنا ہے۔

*******

U.No:8003

ش ح۔ح ن۔س ا