કેન્દ્રીય ગૃહ મંત્રી અને સહકારિતા મંત્રી શ્રી અમિત શાહની અધ્યક્ષતામાં આજે નવી દિલ્હીમાં દિલ્હીનાં મુખ્યમંત્રી શ્રીમતી રેખા ગુપ્તાની ઉપસ્થિતિમાં દિલ્હીમાં કાયદો અને વ્યવસ્થાની સ્થિતિ પર સમીક્ષા બેઠક યોજાઈ હતી. આ પ્રસંગે દિલ્હી સરકારનાં ગૃહ મંત્રી શ્રી આશિષ સૂદ, કેન્દ્રીય ગૃહ સચિવ શ્રી ગોવિંદ મોહન, ઇન્ટેલિજન્સ બ્યૂરોનાં ડિરેક્ટર, દિલ્હીનાં મુખ્ય સચિવ, દિલ્હી પોલીસ કમિશનર તથા કેન્દ્રીય ગૃહ મંત્રાલય, દિલ્હી સરકાર અને દિલ્હી પોલીસનાં વરિષ્ઠ અધિકારીઓ ઉપસ્થિત રહ્યાં હતાં.

સમીક્ષા બેઠક દરમિયાન મહિલાઓ, બાળકો અને વરિષ્ઠ નાગરિકોની સુરક્ષાને મજબૂત કરવા અને રાષ્ટ્રીય રાજધાનીમાં કાયદો અને વ્યવસ્થામાં સુધારો કરવા અને ગુનાખોરીને નિયંત્રિત કરવા માટે કેટલાક પગલાં અને સૂચનો પર વિગતવાર ચર્ચા કરવામાં આવી હતી. જ્યારે દિલ્હી પોલીસની કામગીરીની સમીક્ષા કરતાં ગૃહમંત્રી શ્રી અમિત શાહે જણાવ્યું હતું કે, દિલ્હી પોલીસે દિલ્હીમાં કાયદો અને વ્યવસ્થા જાળવવામાં સારું કામ કર્યું છે. ગૃહ મંત્રીએ આશા વ્યક્ત કરી હતી કે, દિલ્હીની ડબલ એન્જિન ધરાવતી સરકાર પ્રધાનમંત્રી શ્રી નરેન્દ્ર મોદીની અપેક્ષા મુજબ વિકસિત અને સલામત દિલ્હી માટે ડબલ સ્પીડ સાથે કામ કરશે.

કેન્દ્રીય ગૃહ મંત્રી અને સહકારિતા મંત્રીએ દિલ્હી પોલીસને નિર્દેશ આપ્યો હતો કે બાંગ્લાદેશી અને રોહિંગ્યા ઘૂસણખોરોને દેશમાં પ્રવેશવામાં મદદ કરતા સમગ્ર નેટવર્ક સામે કડક કાર્યવાહી થવી જોઈએ. તેમના દસ્તાવેજો બનાવવામાં આવે અને તેમને અહીં રહેવાની સુવિધા આપવામાં આવે. તેમણે કહ્યું કે ગેરકાયદેસર ઘૂસણખોરોનો મુદ્દો પણ રાષ્ટ્રીય સુરક્ષા સાથે જોડાયેલો છે અને તેની સામે કડક કાર્યવાહી થવી જોઈએ અને તેમની ઓળખ કરીને તેમને દેશનિકાલ કરવા જોઈએ.

શ્રી અમિત શાહે ભારપૂર્વક જણાવ્યું હતું કે, જે પોલીસ સ્ટેશનો અને પેટા વિભાગો કામગીરી કરવામાં નિષ્ફળ જાય છે તેમની સામે કડક પગલાં લેવા જોઈએ. તેમણે કહ્યું હતું કે, થર્ડ પાર્ટી સર્વે, જેમ કે લોસ્ટ એન્ડ ડિટેક્ટ, પોલીસ ક્લિયરન્સ સર્ટિફિકેટ, કેરેક્ટર વેરિફિકેશન, ટ્રાફિક મેનેજમેન્ટ, સિનિયર સિટિઝન્સની સુરક્ષા અને હિમ્મત એપ જેવા થર્ડ પાર્ટી સર્વે મારફતે દિલ્હી પોલીસની અન્ય વિવિધ પ્રવૃત્તિઓ વિશે લોકોના સંતોષનું સ્તર જાણવું ખૂબ જ મહત્વપૂર્ણ છે. તૃતીય પક્ષ દ્વારા સમીક્ષા આ પહેલની કાર્યક્ષમતામાં સુધારો કરવામાં મદદ કરશે.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે જણાવ્યું હતું કે, દિલ્હીમાં આંતરરાજ્ય ગેંગને નિર્દયતાથી નાબૂદ કરવી એ દિલ્હી પોલીસની પ્રાથમિકતા હોવી જોઈએ. ગૃહમંત્રીએ કહ્યું હતું કે, ડીસીપી કક્ષાના અધિકારીઓએ પોલીસ સ્ટેશનોમાં જઈને પબ્લિક હિયરિંગ કેમ્પનું આયોજન કરવું જોઈએ અને લોકોની સમસ્યાઓનું નિરાકરણ લાવવું જોઈએ. શ્રી શાહે જણાવ્યું હતું કે, તમામ એસીપીએ તેમનાં હાથ નીચેનાં પોલીસ સ્ટેશનોમાં ગંભીર કેસો પર નજર રાખવી જોઈએ. તેમણે કહ્યું કે આગામી એક વર્ષ માટે દિલ્હી પોલીસે દર ત્રણ મહિનાના અંતરાલમાં ગુનાઓ વિરુદ્ધ વિશેષ અભિયાન ચલાવવું જોઈએ અને બાદમાં તેને દર દોઢ મહિને ચલાવવું જોઈએ.

કેન્દ્રીય ગૃહ પ્રધાને કહ્યું કે માદક દ્રવ્યોના કેસોને પહોંચી વળવા માટે 'ટોપ ટુ બોટમ' અને 'બોટમ ટુ ટોપ' અભિગમ સાથે કામ કરવાની જરૂર છે અને તેના સમગ્ર નેટવર્કને વિખેરી નાખવાની જરૂર છે. તેમણે નિર્દેશ આપ્યો કે દિલ્હીમાં બાંધકામ સંબંધિત બાબતોમાં દિલ્હી પોલીસની પરવાનગીની જરૂર રહેશે નહીં. તેમણે નિર્દેશ આપ્યો હતો કે જેજે ક્લસ્ટરોમાં પ્રાયોગિક ધોરણે 25 સુરક્ષા સમિતિઓની રચના થવી જોઈએ અને તેમના પરિણામો અને અસરકારકતા જોયા પછી પહેલ આગળ વધારવામાં આવી શકે છે.

કેન્દ્રીય ગૃહ પ્રધાને દિલ્હી સરકારને કહ્યું હતું કે, જ્યાં પાણીનો ભરાવો થાય છે તે સ્થળોની ઓળખ કરીને પાણીના ભરાવાને પહોંચી વળવા માટે 'મોનસૂન એક્શન પ્લાન' તૈયાર કરવામાં આવે.

શ્રી અમિત શાહે સૂચના આપી હતી કે, તૂટેલી બસોને કારણે થતા ટ્રાફિક જામને અટકાવવા ડીટીસીએ ક્યુઆરટી તૈનાત કરવી જોઈએ તથા અન્ય વિભાગો સાથે સંકલન કરીને તાત્કાલિક મદદ લેવી જોઈએ તથા ટ્રાફિકમાં આવતા અવરોધને દૂર કરવામાં રિસ્પોન્સ ટાઇમ ઘટાડવો જોઈએ.

કેન્દ્રીય ગૃહ મંત્રી અને સહકારિતા મંત્રીએ કહ્યું કે દિલ્હીની મંડોલી અને તિહાર જેલોને મોડેલ જેલ બનાવવા માટે પ્રયત્નો કરવા જોઈએ. તેમણે દિલ્હી પોલીસને વધારાની પોસ્ટ્સ માટે ભરતીની પ્રક્રિયા ટૂંક સમયમાં શરૂ કરવા જણાવ્યું હતું. તેમણે કહ્યું કે 2020 ના દિલ્હી રમખાણોના કેસોના ઝડપી નિકાલ માટે, દિલ્હી સરકારે વિશેષ વકીલોની નિમણૂક કરવી જોઈએ જેથી આ કેસોનો ટૂંક સમયમાં નિકાલ થઈ શકે.

શ્રી અમિત શાહે જણાવ્યું હતું કે, દિલ્હી પોલીસ અને દિલ્હી સરકાર વચ્ચે પારસ્પરિક સહકારથી જ દેશની રાજધાનીને આદર્શ રાજધાની બનાવી શકાશે. તેમણે ટ્રાફિક વ્યવસ્થાપન, કાયદાના અમલીકરણના માળખાને મજબૂત કરવા, મહિલા અને બાળ સશક્તિકરણ, નાગરિક વિભાગો વચ્ચે પારસ્પરિક સહકાર, ભ્રષ્ટાચારને અંકુશમાં લેવા, સામુદાયિક પોલીસિંગ, સીસીટીવી કેમેરાની જાળવણી અને સંકલન વગેરે પર સંયુક્ત પ્રયાસો કરવા માટે કામ કરવાનું સૂચન કર્યું હતું.

AP/IJ/GP/JD