U Myntri Rangbah duh Narendra Modi u la iashim bynta ha ka Jhumoir Binandini 2025, ka prokram Jhumoir kaba heh bha ha nongbah Guwahati, Assam mynta ka sngi. Ha ka jingai jingkren ha ka jingialang, u la ong ba ka don ka jinglong kaba shongshit ba dap da ka bor, ka jingshitrhem bad ka jingkmen ha kane ka jingialang. U la kren shaphang ki jingpynkhreh kiba itynnnad jong baroh ki barikor jong ka Jhumoir, kaba pyni ia ka jingiwbih bad ka jingitynnad jong ki kper slasha. U la ong kumba ki briew ki don ka jingiadei ba kyrpang bad ka Jhumar bad ka deiriti jong ka kper slasha, ma u ruh u don kajuh ka jingiadei. U la bynrap ba ka jingbun ki barikor kiba iashim bynta ha ka jingshad Jhumar mynta ka sngi kan sa thaw rekod. Haba kynmaw ia ka jingleit jong u sha Assam ha u snem 2023 haba la thaw rekod ba kynthup 11,000 ngut ki barikor kiba iashim bynta ha ka jingshad Bihu, u Myntri Rangbah duh u la ong ba kadei ka jingsah jingkynmaw kaba ym lah ban klet ia u bad u la bynrap ba u khmih lynti ia kajuh ka jingiashim bynta kaba shitrhem. U la ai khublei ia ka sorkar Assam bad u Myntri Rangbah jong ka ba la pynlong ia ka prokram deiriti kaba itynnad. U la ong ba mynta ka sngi kadei ka sngi kaba sngewsarong ia ka jylla Assam, ha kaba ki briew kiba trei ha ki kper slasha bad ki jaitbynriew riewlum ki iashim bynta ha ki jingrakhe. U la kitbok kitrwiang ia baroh ha kane ka sngi ba kyrpang.

Haba kren shaphang kum kine ki prokram ba heh ba kim dei tang ka dak jong ka jingsngewsarong ia ka jylla Assam, hynrei ka pyni ruh ia ka jingiar jong ka India, u Myntri Rangbah duh u la ong ba ka don ka por haba ka Assam bad ka thain shatei lammihngi ki la shah iehbein ha ka liang ka roi ka par bad ka deiriti. U la ong ba mynta, ma u hi dalade u long u nongrahktien jong ka deiriti ka thain shatei lammihngi. U la ong ba u dei u Myntri Rangbah duh ba nyngkong ban sah ha Kaziranga, Assam bad kyntiew ia ki jingdon jingem jong ka sha ka pyrthei. U la ong ruh ba ha kine ki khyndiat bnai ba la leit, ka ktien Assamese ka la ioh ia ka kyrdan classical language, ka jingithuh kaba ki briew jong ka jylla Assam ki la iai ap da ki phew snem. Shuh shuh, la kynthup ia ka Charaideo Moidam ha ka thup UNESCO World Heritage, ka jingjop kaba kongsan kaba wan na ki sienjam jong ka sorkar jong ki, u la bynrap.

Haba kren shaphang ka burom jong ka Assam, u nongiakhun ba shlur Lachit Borphukan, uba la iada ia ka deiriti bad ka jinglong jingman jong ka Assam pyrshah ia ki Mughal, u Modi u la ban jur ia ka jingrakhe kaba heh ha ka lyngkhuh sngi kha ba 400 jong u Lachit Borphukan bad ong ba la kynthup ruh ia ka tableau ha ka Republic Day parade. U Myntri Rangbah duh u la ong ba u durmot rnong ba 125 phut jong u Lachit Borphukan la shna ha Assam. U la kren ruh shaphang ka jingsdang ia ka Janjatiya Gaurav Divas ban rakhe ia ka hiar pateng jong ka imlang sahlang ki riewlum. Ban kynmaw burom ia ki jingnohsynniang jong ki riewshlur kiba dei ki riewlum, la plie ia ki tribal museum ha kylleng ka ri, u la bynrap.

Haba ong ba ka sorkar jong ki ka la kyntiew ia ka Assam bad ai jingshakri ia ki briew kiba trei ha ki kper slasha, u Myntri Rangbah duh u la ban jur ia ka jingpynbna ia ki bonus na ka bynta ki nongtrei ha ki kper slasha jong ka Assam ban kyntiew ia ka kamai kajih jong ki. U la ban jur ia ka jingkyrshan ba la ai sha kumba 1.5 lak ngut ki longkmie ha ki kper slasha, kiba la ioh T. 15,000 ha ka por ba ki dang pun khun ban iarap ban pynduna ia ki jingkhuslai kiba iadei bad ka pisa. Shuh shuh, ka sorkar Assam ka la plie palat 350 tylli ki Ayushman Arogya Mandir ha ki kper slasha na ka bynta ka jingkoit jingkhiah jong ki longiing, u la bynrap. U Modi u la ong ba palat 100 tylli ki skul model tea garden la plie na ka bynta ki khun jong ki briew kiba trei ha ki kper slasha, bad la thmu ban plie biang sa 100 tylli ki skul. U la ong ruh ba la buh 3% ka jingbhah ha ka OBC quota na ka bynta ki samla jong ki jaitbynriew ba sah ha ki kper slasha bad ka jingiarap kaba T. 25,000 na ka bynta ka jingseng kam lajong ba la ai da ka sorkar Assam. U Myntri Rangbah duh u la pynpaw ka jingngeit skhem ba ka jingkyntiew ia ki karkhana slasha bad ki nongtrei jong ka kan kyntiew ia ka jingkiew shaphrang jong ka Assam bad kyntiew ia ka thain shatei lammihngi sha ki kyrdan ba thymmai. U la ai khublei lypa ia baroh ki nongiashim bynta ha ki jingiashim bynta ban wan jong ki bad kitbok kitrwiang ia ki.

U Lat ka jylla Assam, Lakshman Prasad Acharya, Myntri Rangbah ka jylla Assam, Himanta Biswa Sarma, Ki Myntri sorkar pdeng Dr. S Jaishankar, Sarbananda Sonowal, Myntri Rangbah ka jylla Tripura, Dr. Manik Saha, Myntri Khynnah jong ka sorkar pdeng, Pabitra Margherita ki la iadonlang lem bad kiwei de ki kynrem ki lyndan ha kane ka jingialang.

Ka nongrim

Ka Jhumoir Binandini (Mega Jhumoir) 2025, kadei ka prokram deiriti kaba heh bha ha kaba 8,000 ngut ki nongshad ki iashim bynta ha ka jingshad Jhumoir, ka jingshad tynrai jong ki jaitbynriew kiba trei ha ki kper slasha bad ki jaitbynriew Adivasi jong ka Assam kaba pyni ia ka mynsiem jong ka jingai bynta lang ia baroh, ka jingiatylli bad ka jingsngewsarong ia ka deiriti, bad ka dak jong ka deiriti jong ka Assam. Ka prokram Mega Jhumoir ka pyni ia ki 200 snem jong ka kam slasha, bad kumjuh ruh 200 snem ka jingwan ki karkhana sha Assam.

***