কেন্দ্ৰীয় যুৱ কল্যাণ আৰু ক্ৰীড়া মন্ত্ৰী ড° মনসুখ মান্ডাভিয়াই আজি ৰাষ্ট্ৰীয় ৰাজধানীত ফিট ইণ্ডিয়া চানডে অন চাইকেল অভিযানৰ নেতৃত্ব দিয়ে। তেওঁৰ লগত চাইকেলিং ক্লাবৰ সদস্য, অলিম্পিক ৰ’ৱাৰ অৰ্জুন লাল জাত, এফআইচিচিআই আৰু চিআইআইৰ বিশেষ অতিথি, ডেকাথলন, যোগ ভাৰত, আৰু মাই ভাৰতৰ প্ৰতিনিধিসকলেও অংশগ্ৰহণ কৰে।

নৱম সপ্তাহত উপনীত হোৱা ফিট ইণ্ডিয়া চানডে অন চাইকেল এতিয়া এক ৰাষ্ট্ৰব্যাপী ফিটনেছ আন্দোলনলৈ ৰূপান্তৰিত হৈছে, য’ত দেশজুৰি ১,২০০তকৈও অধিক ঠাইত চাইকেল চালকসকলে অংশগ্ৰহণ কৰিছে। প্ৰধানমন্ত্ৰী শ্ৰী নৰেন্দ্ৰ মোদীৰ স্থূলতাৰ বিৰুদ্ধে যুঁজ দিবলৈ তেলৰ ব্যৱহাৰ কমোৱা, ব্যায়াম কৰা আৰু স্বাস্থ্যকৰ খাদ্য গ্ৰহণ কৰাৰ আহ্বানৰ পৰা অনুপ্ৰাণিত হৈ ড° মান্ডাভিয়াই এই উদ্যোগটো ৰাষ্ট্ৰৰ স্থূলতাৰ বিৰুদ্ধে যুঁজত উৎসৰ্গা কৰে। অনুষ্ঠানত ভাষণ প্ৰদান কৰি কেন্দ্ৰীয় মন্ত্ৰীগৰাকীয়ে জোৰ দি কয়, “মাননীয় প্ৰধানমন্ত্ৰীৰ দ্বাৰা আৰম্ভ কৰা স্থূলতাৰ বিৰুদ্ধে আমাৰ সমূহীয়া যুঁজত, আমি দৈনন্দিন ফিটনেছ কাৰ্যকলাপ আমাৰ জীৱনৰ এক অংশ কৰিব লাগিব। চাইকেল চলোৱা হৈছে ব্যায়ামৰ সবাতোকৈ সহজ পদ্ধতি, যি ব্যক্তিগত স্বাস্থ্য আৰু পৰিৱেশ দুয়োটাতে গভীৰ প্ৰভাৱ পেলায়। ই কাৰ্বন ফুটপ্ৰিণ্ট কমায় আৰু প্ৰদূষণৰ এক সমাধান প্ৰদান কৰে।”

ফিট ইণ্ডিয়া চানডে অন চাইকেলে প্ৰতিসপ্তাহে এক বিশেষ গোটৰ লোকক আমন্ত্ৰণ কৰে, আগৰ সংস্কৰণসমূহত সেনা ব্যক্তি, ডাকপিয়ন, আৰু ৱেলনেছ বিশেষজ্ঞসকলে অতিথি হিচাপে অংশগ্ৰহণ কৰিছিল। এই সপ্তাহত, কৰ্প’ৰেট ইণ্ডিয়াই অভিযানত অংশগ্ৰহণ কৰি ইয়াৰ সমৰ্থন দেখুৱালে। উদ্যোগটোৰ গুৰুত্বৰ বিষয়ে কথা পাতোতে, চিআইআইৰ স্পৰ্টস্কমৰ ট্ৰেজাৰাৰ বিদুষ্পত চিংঘানীয়াই কয়, “মই মাননীয় ক্ৰীড়া মন্ত্ৰীক এই উদ্যোগ আৰম্ভ কৰাৰ বাবে অভিনন্দন জনাওঁ। এক স্বাস্থ্যবান ভাৰত হৈছে এক অধিক সফল ভাৰত, কিয়নো ভাল স্বাস্থ্য প্ৰত্যক্ষভাৱে উচ্চ উৎপাদনশীলতা আৰু এক শক্তিশালী জিডিপিৰ লগত জড়িত। এটা উদ্যোগ সংস্থা হিচাপে, আমি অধিক কৰ্প’ৰেটক ফিট ইণ্ডিয়া চানডে অন চাইকেলত যোগদান কৰিবলৈ আৰু এই গুৰুত্বপূৰ্ণ আন্দোলনক সমৰ্থন কৰি উৎসাহিত কৰিবলৈ প্ৰতিশ্ৰুতিবদ্ধ।”

অলিম্পিয়ান অৰ্জুন লাল জাতে যোগদান কৰি কয়, “অংশগ্ৰহণকাৰীসকলৰ উত্সাহ অসাধাৰণ আৰু এজন এথলীট হিচাপে মই আনন্দিত যে ইমান সংখ্যক লোকে দেওবাৰৰ পুৱাতে ওলাই আহিছে আৰু ফিটনেছৰ বাবে সময় উৎসৰ্গা কৰিছে। ফিট হৈ থকাটো এটা বিকল্প নহয়, ই সকলোৰে বাবে বাধ্যতামূলক আৰু ফিট ইণ্ডিয়া চানডে অন চাইকেল উদ্যোগটো লোকসকলক তেওঁলোকৰ ফিটনেছ যাত্ৰা আৰম্ভ কৰিবলৈ এক উৎকৃষ্ট অনুপ্ৰেৰণা।”

গুৱাহাটীত, ভাৰতীয় চিকিৎসা সংঘৰ চিকিৎসকসকলে চাই নেচনেল চেণ্টাৰ অফ এক্সেলেন্সত ফিট ইণ্ডিয়া চানডে অন চাইকেল উদযাপনত অংশগ্ৰহণ কৰে। ৩০০তকৈও অধিক সদস্যই ফিটনেছৰ বাৰ্তা বিয়পাই চাইকেল চলায়।

ফিট ইণ্ডিয়া চানডে অন চাইকেল যোৱা কেইবাসপ্তাহত ভাৰতৰ ৪,২০০ ঠাইত আয়োজন কৰা হৈছে, যাৰ ভিতৰত আজিয়েই কেৱল ১,২০০ ঠাইত অনুষ্ঠান অনুষ্ঠিত হৈছে। চানডে অন চাইকেল আয়োজন কৰা ঠাইৰ সংখ্যা বৃদ্ধি পাই আহিছে, কিয়নো সকলো অঞ্চল, বয়সৰ গোট, আৰু সামাজিক পৰ্যায়ৰ নাগৰিকসকলে উত্সাহেৰে এই উদ্যোগত অংশগ্ৰহণ কৰিছে।

*****

Himanshu Pathak/AA