প্ৰিয় ৰাষ্ট্ৰপতি ট্ৰাম্প,

দুয়োখন দেশৰ প্ৰতিনিধি,

সংবাদ মাধ্যমৰ বন্ধুসকল,

নমস্কাৰ!

প্ৰথমে মোৰ প্ৰিয় বন্ধু ৰাষ্ট্ৰপতি ট্ৰাম্পক মোৰ উষ্ম আদৰণি আৰু আতিথ্যৰ বাবে আন্তৰিক কৃতজ্ঞতা জ্ঞাপন কৰিলোঁ। তেওঁৰ নেতৃত্বৰ জৰিয়তে ৰাষ্ট্ৰপতি ট্ৰাম্পে ভাৰত-আমেৰিকাৰ সম্পৰ্কক লালন-পালন আৰু পুনৰুজ্জীৱিত কৰিছে।

তেওঁৰ প্ৰথম কাৰ্যকালত আমি যি উৎসাহেৰে হাতে হাতে কাম কৰিলোঁ! আজিও সেই একে উৎসাহ, উদ্দীপনা, দায়বদ্ধতা অনুভৱ কৰিছো।

আজিৰ আলোচনা তেওঁৰ প্ৰথম কাৰ্যকালত আমি লাভ কৰা সফলতা আৰু আমাৰ মাজত গঢ় লৈ উঠা পাৰস্পৰিক বিশ্বাসৰ গভীৰ সম্পৰ্কৰ মাজত এক সেতু আছিল। একে সময়তে আমি নতুন লক্ষ্যত উপনীত হ’বলৈ দৃঢ়প্ৰতিজ্ঞ। আমি বিশ্বাস কৰোঁ যে ভাৰত আৰু আমেৰিকাৰ মাজত সহযোগিতাই এখন উন্নত পৃথিৱী গঢ়ি তুলিব পাৰে।

বন্ধুসকল,

ৰাষ্ট্ৰপতি ট্ৰাম্পৰ মূল শ্লোগান "মেক আমেৰিকা গ্ৰেট এগেইন বা মাগা"ৰ সৈতে আমেৰিকাৰ জনসাধাৰণ পৰিচিত। ভাৰতৰ জনসাধাৰণেও ‘উন্নত ভাৰত ২০৪৭’ৰ সংকল্পৰে পৰম্পৰা আৰু উন্নয়নৰ পথ গ্ৰহণ কৰি দ্ৰুত গতিত আগবাঢ়িছে।

আমেৰিকাৰ ভাষাত উন্নত ভাৰতৰ অৰ্থ হ’ল মেক ইণ্ডিয়া গ্ৰেট এগেইন বা ‘মিগা’। যেতিয়া আমেৰিকা আৰু ভাৰতে একেলগে কাম কৰে, যেতিয়া ‘মিগা’ই ‘মাগা’ত যোগ দিয়ে, তেতিয়া সমৃদ্ধিৰ ‘মেগা’ অংশীদাৰিত্বৰ সৃষ্টি হয়। এই মেগা চেতনাই আমাৰ লক্ষ্যক নতুন মাত্ৰা আৰু পৰিসৰ দিয়ে।

বন্ধুসকল,

আমি ২০৩০ চনৰ ভিতৰত দ্বিপাক্ষিক বাণিজ্য দুগুণতকৈও অধিক বৃদ্ধি কৰি ৫০০ বিলিয়ন মাৰ্কিন ডলাৰ কৰাৰ লক্ষ্য নিৰ্ধাৰণ কৰিছো। আমাৰ দলসমূহে পাৰস্পৰিকভাৱে লাভজনক বাণিজ্যিক চুক্তি ক্ষিপ্ৰতাৰে চূড়ান্ত কৰাৰ কাম কৰিব।

ভাৰতৰ শক্তি সুৰক্ষা সুনিশ্চিত কৰিবলৈ আমি তেল আৰু গেছৰ বাণিজ্য শক্তিশালী কৰিম। শক্তিৰ আন্তঃগাঁথনিতো বিনিয়োগ বৃদ্ধি পাব।

নবীকৰণযোগ্য শক্তিৰ ক্ষেত্ৰত আমি সৰু মডিউলাৰ ৰিয়েক্টৰৰ ওপৰত সহযোগিতা আৰু অধিক বৃদ্ধিৰ কথা কৈছো।

বন্ধুসকল,

ভাৰতৰ প্ৰতিৰক্ষা প্ৰস্তুতিত আমেৰিকাই উল্লেখযোগ্য ভূমিকা পালন কৰিছে। কৌশলগত আৰু বিশ্বাসযোগ্য অংশীদাৰ হিচাপে আমি যৌথ উন্নয়ন, যৌথ উৎপাদন আৰু প্ৰযুক্তি হস্তান্তৰৰ সৈতে সক্ৰিয়ভাৱে আগবাঢ়িছো।

অনাগত দিনত নতুন প্ৰযুক্তি আৰু সঁজুলিয়ে আমাৰ সামৰ্থ্য আৰু অধিক বৃদ্ধি কৰিব। আমি স্বায়ত্তশাসিত ব্যৱস্থা উদ্যোগ মিত্ৰতা গঠন কৰাৰ সিদ্ধান্ত লৈছিলো।

অহা দশকৰ বাবে প্ৰতিৰক্ষা সহযোগিতাৰ কাঠামো প্ৰস্তুত কৰা হ’ব। প্ৰতিৰক্ষা খণ্ডত আন্তঃকাৰ্য্যক্ষমতা, লজিষ্টিক, মেৰামতি আৰু ৰক্ষণাবেক্ষণ ইয়াৰ মূল উপাদান হ’ব।

বন্ধুসকল,

একবিংশ শতিকাত প্ৰযুক্তিৰ দ্বাৰা পৰিচালিত শতিকা। গণতান্ত্ৰিক মূল্যবোধত বিশ্বাসী দেশসমূহৰ মাজত প্ৰযুক্তিৰ ক্ষেত্ৰত ঘনিষ্ঠ সহযোগিতাই সকলো মানৱজাতিক নতুন দিশ, শক্তি আৰু সম্ভাৱনা প্ৰদান কৰিব পাৰে।

ভাৰত আৰু আমেৰিকাই কৃত্ৰিম বুদ্ধিমত্তা, অৰ্ধপৰিবাহী, কোৱাণ্টাম, জৈৱ প্ৰযুক্তি আৰু অন্যান্য প্ৰযুক্তিৰ ক্ষেত্ৰত একেলগে কাম কৰিব।

আজি আমি ট্ৰাষ্টৰ ওপৰত একমত হ’লোঁ, যাৰ সম্পূৰ্ণ পাঠ হৈছে ট্ৰান্সফৰ্মিং ৰিলেচনশ্বিপছ ইউটিলাইজিং ষ্ট্ৰেটেজিক টেকন’লজি। ইয়াৰ অধীনত বিৰল খনিজ পদাৰ্থ, উন্নত সামগ্ৰী আৰু ঔষধৰ ক্ষেত্ৰত শক্তিশালী যোগান শৃংখল গঢ়ি তোলাৰ ওপৰত গুৰুত্ব দিয়া হ’ব। লিথিয়ামকে ধৰি বিৰল খনিজ পদাৰ্থ উদ্ধাৰ আৰু প্ৰক্ৰিয়াকৰণৰ বাবেও পদক্ষেপ আৰম্ভ কৰাৰ সিদ্ধান্ত লোৱা হৈছে।

মহাকাশৰ ক্ষেত্ৰত আমেৰিকাৰ সৈতে আমাৰ ঘনিষ্ঠ সহযোগিতা আছে। ইছৰো আৰু নাছাৰ যৌথ উদ্যোগ ‘নিছাৰ’ উপগ্ৰহ অচিৰেই ভাৰতীয় উৎক্ষেপণ বাহনৰ দ্বাৰা মহাকাশলৈ প্ৰেৰণ কৰা হ’ব।

বন্ধুসকল,

ভাৰত আৰু আমেৰিকাৰ মাজৰ অংশীদাৰিত্বই গণতান্ত্ৰিক মূল্যবোধ আৰু প্ৰক্ৰিয়াৰ ওপৰত গুৰুত্ব আৰোপ কৰে। আমি এছিয়া-প্ৰশান্ত মহাসাগৰীয় অঞ্চলত শান্তি, সুস্থিৰতা আৰু সমৃদ্ধিৰ বাবে একেলগে কাম কৰিম। এনে ক্ষেত্ৰত কোৱাডে গুৰুত্বপূৰ্ণ ভূমিকা পালন কৰিব।

এইবাৰ ভাৰতত অনুষ্ঠিত হ’বলগীয়া কোৱাড ছামিটত আমি অংশীদাৰ দেশসমূহৰ সৈতে নতুন ক্ষেত্ৰত সহযোগিতা সম্প্ৰসাৰণ কৰিম। আমি ‘আই এম ই চি’ আৰু ‘আই ২ ইউ ২’ পদক্ষেপৰ অধীনত অৰ্থনৈতিক কৰিড’ৰ আৰু সংযোগ আন্তঃগাঁথনি নিৰ্মাণৰ বাবে একেলগে কাম কৰিম।

সন্ত্ৰাসবাদৰ বিৰুদ্ধে যুদ্ধত ভাৰত আৰু আমেৰিকা ইজনে সিজনৰ পক্ষত দৃঢ়তাৰে থিয় দিছে। আমি বিশ্বাস কৰোঁ যে সীমা অতিক্ৰম কৰি সন্ত্ৰাসবাদ নিৰ্মূলৰ বাবে সমন্বিত পদক্ষেপৰ প্ৰয়োজন।

২০০৮ চনত ভাৰতত সংঘটিত হত্যাকাণ্ডৰ দোষীক ভাৰতক প্ৰত্যাৰ্পণ কৰাৰ সিদ্ধান্তৰ বাবে ৰাষ্ট্ৰপতি ট্ৰাম্পক ধন্যবাদ জনাইছো। ভাৰতীয় আদালতে এতিয়া এই সন্দৰ্ভত বিহিত ব্যৱস্থা গ্ৰহণ কৰিব।

বন্ধুসকল,

আমেৰিকাত বসবাস কৰা ভাৰতীয় সম্প্ৰদায় আমাৰ বাবে এক গুৰুত্বপূৰ্ণ লিংক। আমাৰ দুয়োখন দেশৰ নাগৰিকৰ মাজৰ সম্পৰ্ক আৰু অধিক গভীৰ কৰাৰ বাবে আমি অতি সোনকালে লছ এঞ্জেলছ আৰু বষ্টনত বাণিজ্যিক দূতাবাস মুকলি কৰিম।

আমি আমেৰিকাৰ বিশ্ববিদ্যালয় আৰু শিক্ষানুষ্ঠানসমূহক ভাৰতত তেওঁলোকৰ কেম্পাছ খুলিবলৈ আমন্ত্ৰণ জনাইছো।

ৰাষ্ট্ৰপতি ট্ৰাম্প, ভাৰতৰ প্ৰতি আপোনাৰ বন্ধুত্ব আৰু অদম্য দায়বদ্ধতাৰ বাবে আপোনাক ধন্যবাদ জনাইছো। ২০২০ চনত আপোনাৰ ভাৰত ভ্ৰমণৰ কথা আজিও ভাৰতবাসীৰ মনত আছে। তেওঁলোকে আশা কৰিছে যে তেওঁলোকৰ মাজত পুনৰ ৰাষ্ট্ৰপতি ট্ৰাম্প থাকিব।

১.৪ বিলিয়ন ভাৰতীয়ৰ হৈ আপোনালোকক ভাৰতলৈ আহিবলৈ আমন্ত্ৰণ জনাইছো।

সকলোকে বহুত বহুত ধন্যবাদ।

***

MJPS/SR/DB