ವಿಶ್ವದ ಅತಿದೊಡ್ಡ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಉತ್ಸವವಾದ ಮಹಾಕುಂಭ 2025ರಲ್ಲಿ, ಇಂದು ಮಾಘ ಪೂರ್ಣಿಮೆಯ ಪುಣ್ಯ ದಿನದಂದು ನಾಲ್ಕನೇ ಅಮೃತ ಸ್ನಾನವು ಯಶಸ್ವಿಯಾಗಿ ನೆರವೇರಿತು.  ಪ್ರಯಾಗರಾಜ್‌ ನ ಪವಿತ್ರ ತ್ರಿವೇಣಿ ಸಂಗಮದಲ್ಲಿ ಲಕ್ಷಾಂತರ ಭಕ್ತರು ಪವಿತ್ರ ಸ್ನಾನ ಮಾಡಿದರು.

ಭಾರತೀಯರೊಂದಿಗೆ, ಸಾಕಷ್ಟು ಸಂಖ್ಯೆಯ ವಿದೇಶಿ ಭಕ್ತರು ಕೂಡ ಅಮೃತ ಸ್ನಾನದಲ್ಲಿ ಪಾಲ್ಗೊಂಡರು. ರಾಜ್ಯ ಸರ್ಕಾರವು ಬಿಡುಗಡೆ ಮಾಡಿದ ಅಂಕಿಅಂಶಗಳ ಪ್ರಕಾರ, ಮಾಘ ಪೂರ್ಣಿಮೆಯಂದು ಸಂಜೆ 6 ಗಂಟೆಯವರೆಗೆ ಒಟ್ಟು 1.90 ಕೋಟಿ ಭಕ್ತರು ಪವಿತ್ರ ಸ್ನಾನ ಮಾಡಿದ್ದಾರೆ.

ಹಿಂದೂ ಪಂಚಾಂಗದ ಪ್ರಕಾರ, ಈ ಶುಭ ದಿನದ ಸ್ನಾನವು ವಿಶೇಷ ಮಹತ್ವವನ್ನು ಹೊಂದಿದೆ, ಅದಕ್ಕಾಗಿಯೇ ರಾತ್ರಿಯಿಂದಲೇ ಸಂಗಮದಲ್ಲಿ ಉದ್ದನೆಯ ಸರತಿ ಸಾಲುಗಳು ಕಂಡುಬಂದವು. ಮಾಘ ಪೂರ್ಣಿಮೆಯಂದು ಪವಿತ್ರ ಸ್ನಾನದ ಅವಧಿಯು ಫೆಬ್ರವರಿ 11 ರಂದು ಸಂಜೆ 6:55 ಕ್ಕೆ ಪ್ರಾರಂಭವಾಗಿ ಫೆಬ್ರವರಿ 12 ರಂದು ಸಂಜೆ 7:22 ಕ್ಕೆ ಕೊನೆಗೊಂಡಿತು.

ಮಹಾಕುಂಭ ಮೇಳದ ಆಡಳಿತವು ಮೇಳದಾದ್ಯಂತ ಭಕ್ತರಿಗೆ ಯಾವುದೇ ತೊಂದರೆಯಾಗದಂತೆ ಎಲ್ಲಾ ವ್ಯವಸ್ಥೆಗಳನ್ನು ಮಾಡಿತ್ತು.  ಸ್ನಾನದ ನಂತರ ಘಾಟ್‌ಗಳಲ್ಲಿ ಹೆಚ್ಚು ಹೊತ್ತು ನಿಲ್ಲದೆ ಬೇಗನೆ ಹೊರಡುವಂತೆ ಭಕ್ತರಿಗೆ ತಿಳಿಸಲಾಯಿತು. ಈ ಕ್ರಮಗಳಿಂದ ಮಾಘ ಪೂರ್ಣಿಮಾ ಸ್ನಾನವು ಅಚ್ಚುಕಟ್ಟಾಗಿ ಮತ್ತು ಸುಗಮವಾಗಿ ನಡೆಯಿತು.

ಇಷ್ಟು ದೊಡ್ಡ ಸಂಖ್ಯೆಯ ಭಕ್ತರ ನಿರ್ವಹಣೆಗಾಗಿ ಮತ್ತು ಪವಿತ್ರ ಸ್ನಾನದ ನಂತರ ಅವರ ಸುರಕ್ಷಿತವಾಗಿ ಹಿಂದಿರುಗುವಿಕೆಯನ್ನು ಖಚಿತಪಡಿಸಲು, ಮಂಗಳವಾರ ರಾತ್ರಿಯಿಂದ ಮೇಳದಾದ್ಯಂತ ದೊಡ್ಡ ವೇರಿಯಬಲ್ ಮೆಸೇಜಿಂಗ್ ಡಿಸ್‌ಪ್ಲೇ (VMD) ಗಳನ್ನು ಅಳವಡಿಸಲಾಯಿತು. ಇವು ಭಕ್ತರ ಅನುಕೂಲಕ್ಕಾಗಿ ಅಗತ್ಯ ಸೂಚನೆಗಳು ಮತ್ತು ಮಾಹಿತಿಗಳನ್ನು ನೀಡುತ್ತಿದ್ದವು.

ಮಾಘ ಪೂರ್ಣಿಮೆಯ ದಿನ ಕಲ್ಪವಾಸಿಗಳು ಬ್ರಹ್ಮ ಮುಹೂರ್ತದಲ್ಲಿ ತ್ರಿವೇಣಿಯಲ್ಲಿ ಕೊನೆಯ ಸ್ನಾನ ಮಾಡಿ ತಮ್ಮ ಶಿಬಿರಗಳಿಗೆ ತೆರಳಿದರು. ವಿಧಿವಿಧಾನಗಳನ್ನು ಮುಗಿಸಿದ ನಂತರ, 10 ಲಕ್ಷಕ್ಕೂ ಹೆಚ್ಚು ಕಲ್ಪವಾಸಿಗಳು ಮಹಾಕುಂಭದಿಂದ ನಿರ್ಗಮಿಸಿ ತಮ್ಮ ಮನೆಗಳಿಗೆ ಪ್ರಯಾಣ ಬೆಳೆಸಿದರು. ಕಲ್ಪವಾಸಿಗಳ ಸುರಕ್ಷಿತವಾಗಿ ಹಿಂದಿರುಗುವಂತೆ ನೋಡಿಕೊಳ್ಳಲು ಮಹಾಕುಂಭ ಆಡಳಿತವು ವಿಶೇಷ ವ್ಯವಸ್ಥೆಗಳನ್ನು ಮಾಡಿತ್ತು ಮತ್ತು ಅವುಗಳನ್ನು ಯಶಸ್ವಿಯಾಗಿ ಅನುಷ್ಠಾನಗೊಳಿಸಲಾಯಿತು.

ಮಹಾಕುಂಭ ಮೇಳ ಆಡಳಿತ, ಸ್ಥಳೀಯ ಆಡಳಿತ, ಪೊಲೀಸ್ ಇಲಾಖೆ, ನೈರ್ಮಲ್ಯ ಸಿಬ್ಬಂದಿ, ಸ್ವಯಂಸೇವಕ ಸಂಘಟನೆಗಳು, ದೋಣಿಗಾರರು ಹಾಗೂ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ವಿವಿಧ ಇಲಾಖೆಗಳ ಸಹಕಾರದಿಂದ ಮಾಘ ಪೂರ್ಣಿಮಾ ಸ್ನಾನವು ಯಶಸ್ವಿಯಾಗಿ ನೆರವೇರಿತು. ಈ ಐತಿಹಾಸಿಕ ಕಾರ್ಯಕ್ರಮವನ್ನು ಸುರಕ್ಷಿತವಾಗಿ ಮತ್ತು ಅಚ್ಚುಕಟ್ಟಾಗಿ ನಡೆಸಲು ಇವರೆಲ್ಲರೂ ಅವಿರತವಾಗಿ ಶ್ರಮ ವಹಿಸಿದ್ದರು.

*****