دنیا کی سب سے بڑی مذہبی اور ثقافتی تقریب ، مہاکمبھ 2025 میں آج ماگھ پورنیما کے مبارک موقع پر چوتھے امرت اسنان کی کامیابی کے ساتھ تکمیل ہوئی ۔  لاکھوں عقیدت مندوں نے پریاگ راج میں تریوینی سنگم پر عقیدت کی ڈبکی لگائی ۔

ہندوستانیوں کے ساتھ ساتھ بڑی تعداد میں غیر ملکی عقیدت مندوں نے بھی امرت اسنان میں شرکت کی ۔  ریاستی حکومت کی طرف سے جاری کردہ اعداد و شمار کے مطابق ، ماگھ پورنیما کو شام 6 بجے تک کل 1.90 کروڑ عقیدت مندوں نے عقیدت کی ڈبکی لگائی تھی ۔

ہندو کیلنڈر کے مطابق، اس مبارک دن کا اسنان خاص اہمیت رکھتا ہے ، یہی وجہ ہے کہ رات سے سنگم پر لمبی قطاریں لگ جاتی ہیں ۔  ماگھ پورنیما کے مقدس اسنان کا وقفہ11 فروری کو شام 6:55 بجے شروع ہوا اور 12 فروری کو شام 7:22 بجے ختم ہوا۔

مہا کمبھ میلہ انتظامیہ نے میلے کے علاقے میں وسیع انتظامات کیے تھے تاکہ یہ یقینی بنایا جا سکے کہ کسی بھی عقیدت مند کو کسی قسم کی تکلیف کا سامنا نہ کرنا پڑے ۔  مزید برآں ، عقیدت مندوں پر مسلسل زور دیا گیا کہ وہ ڈبکی لگانے کے بعد گھاٹ پر زیادہ وقت نہ گزاریں،تاکہ وہ جلدی سے اپنی منزل کی طرف بڑھ سکیں ۔  ان کوششوں نے ماگھ پورنیما اسنان کو ایک انتہائی منظم تقریب بنا دیا ۔

عقیدت مندوں کی اتنی بڑی آمد کو سنبھالنے اور مقدس اسنان کے بعد ان کی محفوظ واپسی کو یقینی بنانے میں مدد کے لیے ، منگل کی رات سے پورے میلے کے علاقے میں ویریبل میسیجنگ  ڈسپلے (وی ایم ڈی) قائم کیے گئے ، جو ان کی سہولت کے لیے ضروری ہدایات اور پیغامات فراہم کرتے ہیں ۔

ماگھ پورنیما کے موقع پر کلپ واسیوں نے برہما مہورت کے دوران تریوینی میں آخری ڈبکی لگائی اور پھر اپنے کیمپوں میں واپس چلے گئے ۔  اپنی رسومات ادا کرنے کے بعد ، 10 لاکھ سے زیادہ کلپ واسیوں نے مہاکمبھ کو الوداع کہا اور اپنے گھروں کو روانہ ہوگئے۔  مہاکمبھ انتظامیہ کی طرف سے کلپ واسیوں کی محفوظ واپسی کو یقینی بنانے کے لیے خصوصی انتظامات کیے گئے تھے  جنہیں مؤثر طریقے سے انجام دیا گیا ۔

ماگھ پورنیما اسنان تہوار کی کامیابی مہاکمبھ میلہ انتظامیہ، مقامی حکام ، پولیس ، صفائی ستھرائی کے کارکنوں ، رضاکار تنظیموں ، ملاحوں اور مرکزی اور ریاستی حکومتوں کے مختلف محکموں کی مشترکہ کوششوں سے ممکن ہوئی، جنہوں نے اس تاریخی تقریب کو محفوظ اور منظم بنانے کے لیے انتھک محنت کی ۔

****

UR-6539

(ش ح۔ ف ا۔ش ہ ب)