U Myntri ki tnad Kam Pohiing bad Cooperation, Amit Shah u la pyniaid ia ka jingialang ba nyngkong jong ka Parliamentary Consultative Committee jong ka tnad Cooperation halor ka phang ‘Initiatives taken and currently being taken to strengthen cooperative societies’ ha New Delhi. Ha kane ka jingialang la wan iashim bynta da ki Myntri Khynnah ka tnad Cooperation, Krishan Pal bad Murlidhar Mohol, ki dkhot jong ka komiti, Secretary ka tnad Cooperation bad ki ophisar jong ka tnad. Ka komiti ka la iakren shaphang ki kam bapher bapher kiba iadei bad ki sienjam ba la shim da ka tnad Cooperation naduh ba la sdang ia ka bad ki sienjam ba dang iaid shakhmat ban pynkupbor ia ki cooperative society.

Ha ka jingai jingkren, u Amit Shah u la ong ba u Myntri Rangbah Duh, Narendra Modi u la wanrah ia ka tnad Cooperation kaba kyrpang na ka bynta ka bha ka miat jong ki nongrep bad ki jaka nongkyndong ha kylleng ka ri bad u la wanrah ia ka jingong "Sahkar Se Samriddhi”. U la ong ba ka Sorkar Modi ka ngeit ba ka jingplie lad ioh kam bad ka jingriewspah ha ki jaka nongkyndong ka lah ban wan lyngba ka jingiatreilang.

U Amit Shah u la ong ba ka kam cooperative ka dei kaba khlain ha ka ri ha ki katto katne snem hadien ba la ioh ia ka jinglaitluid, hynrei hadien kane ka la tlot ha shibun ki jylla. U la ong ba hadien ba la sdang ia ka tnad Cooperation jong ka Sorkar Pdeng, ka kam kaba nyngkong ka dei ban pynbiang ia ka database jong ki Primary Agricultural Credit Society (PACS) ha ka jingiatreilang bad ki jylla bad sdang ia ka kam ban kyntiew kyrteng ia ki ar lak tylli ki PACS. U la ong ba ka kam ban pynbiang ia ka National Cooperative Database ka dei kaba la jan dep, bad mynta, ka jingtip shaphang ki cooperative society, katkum ki thain, ka dei kaba lah ban ioh da kaba suk. U Shah u la ong ba la shim ia ki sienjam ban wanrah ia ka jingpyndonkam ia ki kor computer ha ki PACS. U la ong ba ha ki por ban wan, yn ym don kano kano ka panchayat ha ka ri ha kaba ym don ka PACS.

U Myntri u la ong ba ki model by-laws ba la wanrah ban pynseisoh ia ki PACS ki dei kiba la pdiang da jan baroh ki jylla ha ka ri. U la ong ba ki PACS ki dei kiba la pyniasoh bad palat 20 jait ki kam bad mynta ki la sdang ai jingshakri bapher bapher kum ki Common Service Centre, Jan Aushadhi Kendra bad kiwei kiwei.

U Amit Shah u la ong ba ka tnad Cooperation ka la wanrah ia ka bill ban sdang ia ka Tribhuvan Sahkari University, bad ia kane shen yn ai jingmynjur da ka Parliament. Ka jingsdang ia kane ka skul bah kan pynbiang ka jingai jinghikai ha ki kam teknikal, accounting bad ka jingpyniaid ia ki kam, bad ruh ka jingai jinghikai ia kito kiba la tbit ha ka kam kiba wan ha ka kam cooperative. U Shah u la ong ba kane kan pynthikna ia ka jingdon ki nongtrei kiba la tbit ha ka kam cooperative.

U Myntri u la ong ba la sdang ia ki kynhun cooperative kiba trei ha baroh kawei ka ri kum ka National Cooperative Exports Limited (NCEL), National Cooperative Organics Limited (NCOL), bad Bharatiya Beej Sahakari Samriti Limited (BBSSL), bad kane kan kyntiew ia ka jingshalan mar, ki mar organic, bad ki symbai ba kham bha ha ka kam cooperative. U la ong ba kine ki sienjam kin ialam sha ki jingkylla ba heh ha ka kam cooperative ha ki snem ban wan.

U Amit Shah u la ong, ba ka dei ka jingpyrshang jong kane ka Sorkar ba ka kam cooperative ka ioh ia ki juh ki lad kumba ioh ki kompani. U la ong ba ka tnad Cooperation, ha ka jingiatreilang bad ka tnad Kam Pla Tyngka, Reserve Bank, bad tnad Income Tax ka la shim ia ki sienjam ban wanrah kawei ka rukom siew khajna na ka bynta ki kompani bad ki kam cooperative. U Myntri u la ong ba u ngeit skhem ba ki kynhun kiba iadei bad ki kam cooperative jong ka ri kin kiew shaphrang ha ka jingiakhun bad ki kompani bad ba kin pynurlong ia ka jingthmu u Myntri Rangbah Duh na ka bynta ka "Sahkar Se Samriddhi”.

U Myntri u la pyntip ia ka Consultative Committee ba la pynkhreh na ka bynta ka jingkiew sted ki national federation kiba iadei bad ka kam cooperation ha ka jingiatreilang bad ka Krishak Bharati Cooperative Limited (KRIBHCO), Indian Farmers Fertilizer Cooperative Limited (IFFCO), National Dairy Development Board (NDDB) bad kiwei kiwei ki federation. U la ong ba mynta, ki PACS ki don bynta ha ka jingthied ia ki tiket rel, bad u la ong ba u ngeit skhem ba namar ki sienjam jong ka tnad Cooperation, shen ki PACS kin sa lah ban die ia ki tiket liengsuin.

U Amit Shah u la ong ba namar ki jingiapher hapdeng ki thain ha kaba iadei bad ka jingkiew ki cooperative ha ka ri, ka Sorkar ka dang shim ia ki sienjam ba kyrpang ban wanrah ia ka jingkiew shaphrang ba ryntih ha baroh ki jylla.

Ha kane ka jingialang, ki dkhot ka komiti ki la ai ki jingmut jong ki shaphang ki bynta kiba iadei bad ka jingpynkupbor ia ki cooperative society ha ka ri bad ki la iaroh ia ki sienjam ba la shim da ka Sorkar ban pynkhlain ia ka kam cooperative ha ka ri.

****