وزیر اعظم جناب نریندر مودی نے آج ویڈیو پیغام کے ذریعے انڈیا انرجی ویک2025 کے تیسرے پروگرام کے افتتاح کے موقع پر اپنے خیالات کا اظہار کیا ۔  یشو بھومی میں اجتماع سے خطاب کرتے ہوئے ، انہوں نے زور دے کر کہا کہ حاضرین صرف توانائی ہفتہ کا حصہ نہیں ہیں ، بلکہ ہندوستان کے توانائی کے عزائم کا بھی لازمی حصہ ہیں۔

انڈیا انرجی ویک کا تصور صرف ایک اور صنعتی کانفرنس سے زیادہ کے طور پر کیا گیا تھا-اسے توانائی سے متعلق  عالمی مذاکرات کی نئے سرے سے تعریف کرنے والے ایک متحرک پلیٹ فارم کے طور پر ڈیزائن کیا گیا تھا۔  صرف دو سالوں میں، اپنی ہی  مالی مددس سے چلنے والے اقدام نے بالکل وہی حاصل کیا ہے اور یہ دنیا کی   دوسری سب سے بڑی توانائی کی تقریب بن گیا ہے۔  نئی دہلی کے یشو بھومی میں11تا 14 فروری 2025 تک ہونے والا آئی ای ڈبلیو2025 عالمی توانائی کے بیانیے کی تشکیل میں ایک اہم سنگ میل کی عکاسی کرتا ہے۔

اس بات  کو اُجاگر کرتے ہوئے کہ دنیا بھر کے ماہرین اس بات پر زور دے رہے ہیں کہ 21 ویں صدی ہندوستان کی ہے ، جناب مودی نے کہا کہ ‘‘ہندوستان نہ صرف اپنی ترقی، بلکہ دنیا کی ترقی کو بھی آگے بڑھا رہا ہے ، جس میں توانائی کا شعبہ اہم کردار ادا کر رہا ہے۔’’  انہوں نے زور دے کر کہا کہ ہندوستان کے توانائی کے عزائم پانچ ستونوں پر  مبنی ہیں: وسائل کا استعمال، ذہین ذہنوں میں اختراع کی حوصلہ افزائی، اقتصادی طاقت اور سیاسی استحکام، اسٹریٹجک جغرافیہ توانائی کی تجارت کو پرکشش اور آسان بنانا اور عالمی پائیداری کے لیےعزم ۔  وزیر اعظم نے کہا کہ یہ عوامل ہندوستان کے توانائی کے شعبے میں نئے مواقع پیدا کر رہے ہیں۔

جناب مودی نے کہا کہ‘‘گزشتہ دہائی میں ہندوستان دسویں سب سے بڑی معیشت سے پانچویں سب سے بڑی معیشت کے طورپر فروغ پاچکا ہے۔’’  انہوں نے اس بات کو اُجاگر کیا کہ پچھلے دس سالوں میں ہندوستان کی شمسی توانائی پیدا کرنے کی صلاحیت میں بتیس گنا اضافہ ہوا ہے، جس سے یہ دنیا کا تیسرا سب سے بڑا شمسی توانائی پیدا کرنے والا ملک بن گیا ہے۔  انہوں نے کہا کہ ہندوستان کی غیر روایتی ایندھن توانائی کی صلاحیت تین گنا ہو گئی ہے اور ہندوستان پیرس معاہدے کے اہداف کو حاصل کرنے والا پہلا جی20 ملک ہے ۔  وزیر اعظم نے ایتھنول ملا ئے انے میں19 فیصد کی موجودہ شرح کے ساتھ ہندوستان کی کامیابیوں پر زور دیا ، جس سے زرمبادلہ کی بچت، کسانوں کی خاطر خواہ آمدنی اور کاربن ڈائی آکسائیڈ کے اخراج میں نمایاں کمی واقع ہوئی ہے۔  انہوں نے اکتوبر 2025 تک 20 فیصد ایتھنول مینڈیٹ حاصل کرنے کے ہندوستان کے ہدف پر روشنی ڈالی۔  انہوں نے کہا کہ ہندوستان کی حیاتیاتی ایندھن کی صنعت 500 ملین میٹرک ٹن پائیدار فیڈ اسٹاک کے ساتھ تیزی سے ترقی کے لیے تیار ہے۔  انہوں نے مزید کہا کہ ہندوستان کی جی 20 صدارت کے دوران، عالمی حیاتیاتی ایندھن اتحاد قائم کیا گیا تھا اور اس میں مسلسل توسیع ہو رہی ہے، جس میں اب 28 ممالک اور 12 بین الاقوامی تنظیمیں شامل ہیں۔  انہوں نے اس بات پر روشنی ڈالی کہ یہ اتحاد فضلہ کو دولت میں تبدیل کر رہا ہے اور مہارت کے مراکز قائم کر رہا ہے۔

اس بات  کو اُجاگر کرتے ہوئے کہ ہندوستان ہائیڈرو کاربن کے اپنے وسائل  میں مکمل طور پر امکانات  تلاش کرنے کے لیے مسلسل اصلاحات کر رہا ہے۔ جناب مودی نے اس بات کو اُجاگر کیا کہ بڑی دریافتیں اور گیس کے بنیادی ڈھانچے  میں وسیع پیمانے پر فروغ، گیس کے شعبے کی ترقی میں  اشتراک کررہی ہیں، جس سے ہندوستان کے توانائی مکس میں قدرتی گیس کا حصہ بڑھ رہا ہے ۔  انہوں نے کہا کہ ہندوستان فی الحال چوتھا سب سے بڑا ریفائننگ مرکز ہے اور اپنی صلاحیت میں20 فیصد اضافے کے لیے کام کر رہا ہے۔

اس بات کی طرف اشارہ کرتے ہوئے کہ ہندوستان کے تلچھٹ والے طاسوں میں متعدد ہائیڈرو کاربن وسائل موجود ہیں، جن میں سے کچھ کی شناخت پہلے ہی کی جا چکی ہے، جبکہ دیگر کی تلاش کا انتظار ہے، وزیر اعظم نے اس بات پر روشنی ڈالی کہ ہندوستان کےمنفرد شعبے کو مزید پرکشش بنانے کے لیے حکومت نے اوپن ایکریج لائسنسنگ پالیسی (او اے ایل پی) متعارف کرائی ہے۔  انہوں نے زور دے کر کہا کہ حکومت نے اس شعبے کو جامع تعاون فراہم کیا ہے، جس میں خصوصی اقتصادی زون کھولنا اور سنگل ونڈو کلیئرنس سسٹم قائم کرنا شامل ہے۔  جناب مودی نے کہا کہ آئل فیلڈز ریگولیشن اینڈ ڈیولپمنٹ ایکٹ میں تبدیلیاں اب فریقوں کو پالیسی استحکام، توسیعی لیز اور بہتر مالی شرائط فراہم کرتی ہیں۔  انہوں نے زور دے کر کہا کہ ان اصلاحات سے سمندری شعبے میں تیل اور گیس کے وسائل کی تلاش، پیداوار میں اضافہ اور اسٹریٹجک پیٹرولیم کے ذخائر کو برقرار رکھنے میں مدد ملے گی۔

وزیر اعظم نے اس بات پر زور دیا کہ متعدد دریافتوں اور ہندوستان میں پائپ لائن کے بنیادی ڈھانچے کی توسیع کی وجہ سے قدرتی گیس کی فراہمی بڑھ رہی ہے۔  انہوں نے زور دے کر کہا کہ اس سے مستقبل قریب میں قدرتی گیس کے استعمال میں اضافہ ہوگا۔  انہوں نے اس بات پر بھی روشنی ڈالی کہ ان شعبوں میں سرمایہ کاری کے بے شمار مواقع موجود ہیں۔

پٹرولیم اور قدرتی گیس کے وزیر جناب ہردیپ سنگھ پوری نے تقریب میں اپنے خطاب میں اس تقریب کی بڑھتی ہوئی اہمیت پر روشنی ڈالی ، جو تیزی سے صرف تین سالوں میں دنیا کی دوسری سب سے بڑی توانائی کانفرنس بن گئی ہے۔  اس سال کی تقریب نے 50 سے زیادہ ممالک کے 70,000 سے زیادہ توانائی کے پیشہ ور افراد کو اپنی طرف متوجہ کیا ہے، جن میں20 سے زیادہ وزراء اور فارچیون500 توانائی کمپنیوں کے 100 سی ای او شامل ہیں، جس سے یہ توانائی کے بدلتے ہوئے عالمی منظر نامے پر بات چیت کے لیے ایک اہم فورم بن گیا ہے۔

جناب پوری نے اس بات پر زور دیا کہ آئی ای ڈبلیو2025 بڑے جغرافیائی سیاسی تبدیلیوں کے درمیان ایک اہم موڑ پر آ رہا ہے، جس نے عالمی توانائی کے نظام کو نئی شکل دی ہے۔  انہوں نے زور دے کر کہا کہ یہ کانفرنس پالیسی سازوں، صنعت کاروں اور فریقوں کو بامعنی بات چیت، خیالات کے تبادلے اور متوازن اور جامع توانائی کی منتقلی کے لیے ایک کورس تیار کرنے کا ایک منفرد موقع فراہم کرتی ہے۔  پائیداری کے لیے ہندوستان کے عزم کا اعادہ کرتے ہوئے، انہوں نے اس بات پر زور دیا کہ قابل تجدید ذرائع، ہائیڈروجن اور حیاتیاتی ایندھن کے ساتھ ساتھ ہائیڈرو کاربن کے مسلسل کردار کو تسلیم کرتے ہوئے منتقلی عملی ہونی چاہیے۔  انہوں نے بین الاقوامی توانائی ایجنسی(آئی ای اے)کے 2024 میں3 ٹریلین امریکی ڈالر سے زیادہ کی عالمی توانائی کی سرمایہ کاری کے تخمینے کا حوالہ دیا، جس میں2 ٹریلین امریکی ڈالر صاف ستھری توانائی کی ٹیکنالوجیز کے لیے وقف ہیں، جو صاف ستھری توانائی کے ذرائع کی طرف تیزی سے تبدیلی کا واضح اشارہ ہے۔

وزیر موصوف نے توانائی کی اختراع اور صنعت کاری کو آگے بڑھانے میں ہندوستان کی قیادت پر روشنی ڈالی، اس بات پر زور دیتے ہوئے کہ بی پی ، شیل ، ایکسون موبل اور شیورون جیسی بڑی عالمی توانائی کمپنیاں ہندوستان میں عالمی صلاحیت مراکز چلاتی ہیں، جو ہزاروں ہندوستانی انجینئروں کو توانائی کی کارکردگی، ڈیٹا اینالیٹکس اور پائیدار کارروائیوں کے لیے جدید حل تیار کرنے کے لیے ملازمت دیتی ہیں۔  انہوں نے اوینیہ اور وسودھا جیسے اِسٹارٹ اَپ چیلنجوں میں حصہ لینے والے 500 سے زیادہ کاروباریوں اور 700 نمائش کرنے والی کمپنیوں کے کردار کو بھی تسلیم کیا، جن میں100 سے زیادہ اِسٹارٹ اَپس شامل ہیں، جن میں مصنوعی ذہانت سے چلنے والے توانائی کے حل، کوانٹم کمپیوٹنگ ایپلی کیشنز اور بائیو فیولز اور بیٹری ٹیکنالوجیز میں پیش رفت کی عکاسی کی گئی ہے ۔

ان کے خطاب کا ایک اہم موضوع توانائی کا انصاف تھا، جہاں انہوں نے بکھری ہوئی توانائی کی پالیسیوں کے خلاف خبردار کیاجو ترقی پذیر معیشتوں کو منتقلی میں پیچھے چھوڑ کر عدم مساوات کو گہرا کر سکتی ہیں۔  انہوں نے اہم معدنیات، سیمی کنڈکٹرز اور اُبھرتی ہوئی توانائی کی ٹیکنالوجیز میں لچکدار سپلائی چین کی ضرورت پر زور دیا اور عالمی تعاون پر زور دیا،تاکہ ان رُکاوٹوں کو روکا جا سکے، جو پیش رفت میں رُکاوٹ بن سکتی ہیں ۔  انہوں نے یہ بھی نشاندہی کی کہ ہندوستان توانائی کے متنوع ذرائع میں اسٹریٹجک سرمایہ کاری کر رہا ہے، جس میں بایو فیول کی پیداوار کو بڑھانا، گیس کا حصہ 6فیصد سے بڑھا کر 15فیصد کرنا اور 2030 تک 5 ملین میٹرک ٹن ہائیڈروجن کی پیداوار کا ہدف مقرر کرنا شامل ہے ،تاکہ توانائی کی یقینی فراہمی  سےسمجھوتہ کیے بغیر ہموار منتقلی کو یقینی بنایا جا سکے۔

اپنے خیالات کے اظہار کاختتام کرتے ہوئے ، جناب پوری نے تمام فریقین پر زور دیا کہ وہ تبدیلی لانے والی شراکت داری قائم کرنے اور عالمی توانائی کے ایجنڈے کی تشکیل کے لیے ایک پلیٹ فارم کے طور پر انڈیا انرجی ویک کا فائدہ اٹھائیں۔  انہوں نے 6,000 سے زیادہ مندوبین کو اگلے چار دنوں میں کانفرنس کے مباحثوں میں شامل ہونے کی دعوت دی ، جس میں توانائی کی منڈیوں کو مستحکم کرنے، تکنیکی ترقی کو آگے بڑھانے اور بین الاقوامی تعاون کو بڑھانے کی حکمت عملیوں پر توجہ دی جائے گی۔  عالمی توانائی ماحولیاتی نظام میں ہندوستان کے تیزی سے مرکزی کردار ادا کرنے کے ساتھ ، آئی ای ڈبلیو2025 توانائی کے مستقبل کی وضاحت کے لیے ایک تاریخی واقعہ بننے کے لیے تیار ہے۔

********

U.No:6433

ش ح۔اع خ۔ن ع