Ka skhim ba kyrpang jong ka Sorkar Pdeng ka pynbiang ia ki mar bam ba bha ha ka dor kaba jem ia ki para ba ngeit ha ka Mahakumbh 2025 ha Prayagraj. Ka NAFED (National Agricultural Cooperative Marketing Federation of India) ka dang sam ia u atta, ki shana dai, u khaw bad kiwei kiwei ki mar bam ha ka dor kaba la pynduna. Ki para ba ngeit ki lah ban pan reshon ruh lyngba ka WhatsApp lane ka jingphone. La dep sam palat 1000 metric ton ki mar bam haduh mynta bad ka jingsam reshon ka dang iaid shakhmat ha baroh kawei ka Mahakumbh bad Prayagraj lyngba 20 tylli ki kali.

Ki kali ki pynpoi ia ki mar bam ba jem dor sha ki Ashram bad ki para ba ngeit

Ban pynthikna ba ki riewkhuid, ki kalpavasi bad ki para ba ngeit ha ka Mahakumbh kim duna mar bam, la sam ia ki mar bam lyngba ki kali. U Rohit Jain, u khliehduh jong ka NAFED ha ka jylla u la ong ba kane ka skhim kaba kyrpang ka dei kaba pyniaid da ka tnad Kam Iatreilang, khnang ban pynthikna ba ym don uno uno u para ba ngeit ba duna bam. U  Deepak Agrawal, MD ka NAFED, u dang peit ia kane ka kam khnang ban pynthikna ba baroh ki briew ki ioh ia ki mar bam ha ka por kaba biang.

Ki para ba ngeit kiba don  ha ka Mahakumbh ki lah ban pan ia ki reshon lyngba ka jingphone ne ka WhatsApp ha u nombor 72757 81810. Ki mar bam ba la pynduna dor ki kynthup u atta bad u khaw ba 10 kilo ha ka shi song, katba ia u moong, masoor, bad chana dal la sam ha ki song ba 1 kilo. Shisien ba kine ki mar bam ki poi sha ki kali, la sam mardor ia ki sha ki ashram bad ki briew.

Haduh mynta, la dep sam 700 metric ton u atta, 350 metric ton ki shana dai (moong, masoor, bad chana dal), bad 10 metric ton u khaw. Ki mar jong ka NAFED bad ‘Bharat Brand’ ki la iaid iew bha ha ki para ba ngeit.

Lyngba kane ka skhim, ka Sorkar ka pynbiang ia ki mar bam ba bha sha ki million ngut ki para ba ngeit ha ka Mahakumbh bad ki la pynsuk ia ka kam ban ioh ia kine ki mar bam. Ki kali bad ki lad ban shu phone ban ioh ia kine ki la pynsuk bha ia ki briew bad ki la pynthikna ka jingiaid ryntih ka Mahakumbh 2025 ha kaba baroh kiba iashim bynta ki sakhi ia ka jingsuk.

*****