حکومتِ ہند کی جانب سے ایک خاص اسکیم کے تحت مہاکمبھ 2025 کے دوران پریاگ راج میں عقیدت مندوں کے لیے معیاری راشن کو مناسب قیمتوں پر فراہم کیا جا رہا ہے۔ نیفیڈ (نیشنل ایگریکلچر کوآپریٹو مارکیٹنگ فیڈریشن آف انڈیا) گندم کا آٹا، دالیں، چاول، اور دیگر ضروری اشیاء سبسڈی کی قیمتوں پر تقسیم کر رہی ہے۔ عقیدت مند واٹس ایپ یا کال کے ذریعے بھی راشن منگوا سکتے ہیں۔ اب تک 1000 میٹرک ٹن سے زائد راشن تقسیم کیا جا چکا ہے، اور یہ تقسیم مہاکمبھ شہر اور پریاگ راج میں 20 موبائل وینز کے ذریعے جاری ہے۔

موبائل وینز کے ذریعے آشرموں اور عقیدت مندوں تک سستا راشن پہنچایا جا رہا ہے

مہا کمبھ میں سنتوں، کلپواسیوں اور عقیدت مندوں کو خوراک کی قلت کا سامنا نہ ہو، اس کو یقینی بنانے کے لیے موبائل وینز کے ذریعے راشن کی ترسیل کی جا رہی ہے۔ نیفیڈ کے ریاستی سربراہ روہت جین نے بتایا کہ یہ خصوصی اسکیم وزارتِ تعاون کے تحت چلائی جا رہی ہے تاکہ کوئی بھی عقیدت مند خوراک کی کسی بھی پریشانی کا شکار نہ ہو۔ دیپک اگروال، ایم ڈی نیفیڈ، خود پوری کارروائی کی نگرانی کر رہے ہیں تاکہ ہر فرد کو وقت پر راشن فراہم کیا جا سکے۔

مہاکمبھ میں موجود عقیدت مند راشن کے لیے کال یا واٹس ایپ کے ذریعے نمبر 72757 81810  پر آرڈر دے سکتے ہیں۔ سبسڈی شدہ راشن میں 10 کلو گرام کے پیکٹوں میں گندم کا آٹا اور چاول شامل ہیں، جبکہ 1 کلوگرام کے پیکٹوں میں مونگ، مسور، اور چنا دال تقسیم کی جا رہی ہے۔ جیسے ہی موبائل وینز کے ذریعے آرڈر موصول ہوتا ہے، راشن فوری طور پر متعلقہ آشرموں اور سادھوؤں تک پہنچایا جاتا ہے۔

اب تک 700 میٹرک ٹن گندم کا آٹا، 350 میٹرک ٹن دالیں (مونگ، مسور، اور چنا دال)، اور 10 میٹرک ٹن چاول تقسیم کیے جا چکے ہیں۔ نیفیڈ کی مصنوعات اور 'بھارت برانڈ' کے اناج عقیدت مندوں میں تیزی سے مقبول ہو رہے ہیں۔

اس اسکیم کے ذریعے، حکومت نہ صرف لاکھوں عقیدت مندوں کو مہاکمبھ کے دوران اعلیٰ معیار کا راشن فراہم کر رہی ہے بلکہ اس عمل کو سہل اور قابل رسائی بھی بنا رہی ہے۔ موبائل وینز اور کال پر خدمات نے اس سروس کو مزید مؤثر بنا دیا ہے، اس بات کو یقینی بناتے ہوئے کہ مہاکمبھ 2025 ہر عقیدت مند کے لیے ایک آسان اور یادگار تجربہ رہے۔

************

ش ح ۔   م  د ۔  م  ص

 (U :   6306 )