U Myntri Rangbah duh, Narendra Modi u la ai ka jingkren jong u halor ka Mang Tyngka 2025-26 jong ka sorkar pdeng lyngba ka video message mynta ka sngi. Da kaba ban jur ba mynta ka sngi kadei u mawmer ba kongsan ha ka jingiaid lynti ka India sha ka roi ka par, u Modi u la ong ba kane ka mang tyngka ka pyni ia ki jingangnud jong ki 140 klur ki briew jong ka ri bad ka jingpynurlong ia ki jingangnud jong man u briew jong ka ri. U la ong ba bun ki kam la plie na ka bynta ki samla, bad ki briew jong ka ri kin rah shakhmat ia ka thong Viksit Bharat (Ka India kaba la kiew shaphrang). U Myntri Rangbah duh u la ban jur ba kane ka mang tyngka kadei kaba kyntiew ia ka bor ban kyntiew ia ka jingkynshew pisa, jingbei tyngka, jingpyndonkam bad ka jingkiew shaphrang. U la ai khublei ia ka Myntri Kam Pla Tyngka, Nirmala Sitharaman bad ka kynhun jong ka na ka bynta kane ka ‘Mang tyngka jong ki paidbah.’

U Myntri Rangbah duh u la ong ba bunsien ka jingphaikhmat jong ka mang tyngka kadei halor kumno ban pyndap ia ka pla tyngka jong ka sorkar. Hynrei, u la ong ba kane ka mang tyngka ka phaikhmat halor kumno ban pyndap ia ki pla jong ki briew ka ri, kyntiew ia ki jingkynshew pisa jong ki, bad pynlong ia ki, ki nongiatreilang ha ka roi ka par jong ka ri. U la ban jur ba kane ka mang tyngka ka buh nongrim na ka bynta kine ki thong.

“La shim ia ki sienjam ba kongsan na ka bynta ki jingpynkylla ha kane ka mang tyngka”, la ong u Modi bad u la ban jur ia ka rai ba kongsan ban kyntiew ia ka kam shimet ha ka bording nuclear. U la bynrap ba ka bording civil nuclear kan pynthikna ka jingnohsynniang ba kongsan sha ka roi ka par jong ka ri ha ki por ban wan. U la ban jur ba la phaikhmat kyrpang ha baroh ki kam pynrung kam ha ka mang tyngka. Da kaba kdew ia artylli ki jingpynkylla ki ban wanrah jingkylla ba kongsan ha ki por ban wan, u Modi u la ong ba ka jingmynjur ia ka kyrdan jingdon jingem ban shna lieng kan kyntiew ia ka jingshna ia ki lieng ba heh ha India, ka ban pynsted ia ka Atmanirbhar Bharat Abhiyaan bad kynthup ia ki hotel ha 50 tylli ki jaka jngoh kai hapoh ka thup jingdon jingem ka ban kyntiew ia ka kam jngoh kai, ka ban plie lad thymmai ia ka kam ba iadei bad ki jaka sah briew, kaba bun tam ka jingioh kam. U Myntri Rangbah duh u la ong ba ka ri ka iaid shaphrang bad ka mantra "Vikas bhi, Virasat bhi" (ka roi ka par bad ka hiar pateng). U la kren shaphang ki sienjam ba kongsan ba la shim ha kane ka mang tyngka ban pynneh pynsah shi klur ki jingthoh barim lyngba ka jingplie paidbah ia ka Gyan Bharatam Mission. Shuh shuh yn sdang ia ka National Digital Repository kaba ioh mynsiem na ki dustur tynrai jong ka India.

Ha ka jingkren shaphang ki jingpynbna ha ka mang tyngka na ka bynta ki nongrep kan buh nongrim ia ka jingkylla kaba thymmai ha ka kam rep bad ka ioh ka kot ha ki jaka nongkyndong baroh, u Modi u la ban jur ba hapoh ka PM Dhan-Dhanya Krishi Yojana, kan don ka jingkyntiew ka jingpynpoi um ha ki jaka rep bad ki jingdon jingem ha 100 tylli ki distrik. U la ban jur ba ka jingkyntiew ia u pud jong ka Kisan Credit Card na ka T. 3 lak sha ka T. 5 lak kan long ka jingiarap kaba khraw ia ki nongrep.

Ha ka jingban jur ba ka mang tyngka ka la pyllait ia ka jingkamai haduh T. 12 lak na ka khajna, u Myntri Rangbah duh u la ong ba la pynduna ia ka khajna ia baroh kiba ioh tulop, ka ban long ka jingmyntoi kaba khraw ia kiba pdeng ka ioh ka kot bad kito kiba dang ioh kam thymmai.

“Ka Mang Tyngka ka don ka jingphaikhmat kaba 360 degree ha ka kam shna tiar ban pynkhlain ia ki nongseng kam lajong, ki MSME, bad ki kam barit baria, ka jingplie lad ioh kam ba thymmai,” la ban jur u Myntri Rangbah duh. U la ong ba ki kam kum ka teknoloji kaba khuid, ka kam ba iadei bad ki snieh, juti, bad karkhana shna jinglehkai ki la ioh ka jingkyrshan ba kyrpang hapoh ka National Manufacturing Mission. U la ban jur ba ka thong kalong kaba shai ban pynthikna ki mar jong ka India ki paw ha ki iew kylleng ka pyrthei.

Da kaba kdew ba ka mang tyngka ka ban jur halor ka jingwanrah ia ka jingbei tyngka kaba khlain ha ki jylla, u Modi u la kren shaphang ka jingpynbna ban pynlong arshah ka jingthikna ioh ram ki MSME bad ki Startup. U la ong ba ka jingsdang ia ka skhim ban ai ram haduh T. 2 klur khlem ka jingpynthikna ia ki SC, ST bad ki longkmie kiba seng kam lajong ha ka sien ba nyngkong. U la ban jur ia ka jingpynbna ba kongsan na ka bynta ki nongtrei kiba shipor, bad ka jingkyntiew kyrteng jong ki ha ka rynsan e-Shram ha ka sien ba nyngkong, ka iarap ia ki ban ioh ia ki lad jingsumar bad kiwei kiwei ki skhim ba iadei bad ka jingshngain ha ka imlang sahlang. U Myntri Rangbah duh u la ong ba kane ka pyni ia ka jingkut jingmut ka sorkar na ka bynta ka burom jong ki nongtrei. U la ban jur ba ka jingpyrkhing bad ki jingpynkylla ha ki kam pisa, kum ka Jan Vishwas 2.0, kan pynkhlain ia ka jingkut jingmut ban pynduna ka jingsynshar bad wanrah ia ka jingsynshar kaba don nongrim ha ka jingshaniah.

Ha ka jingpynkut ia ka jingkren jong u, u Myntri Rangbah duh u la ong ba kane ka mang tyngka ym tangba ka peit ia ki jingdonkam ba mynta jong ka ri hynrei ka iarap ruh ban pynkhreh ia ka lawei. U la ban jur ia ki sienjam na ka bynta ki startup, ba kynthup ka Deep Tech Fund, Geospatial Mission, bad ka Nuclear Energy Mission. U la ai khublei ia baroh ki briew jong ka ri na ka bynta kane ka mang tyngka ba kongsan.

***