કુંભ મેળામાં આવતા ભક્તો અને યાત્રાળુઓને સતત માહિતી પૂરી પાડવા માટે, ઓલ ઈન્ડિયા રેડિયોના કુંભવાણી ન્યૂઝ બુલેટિનનું પ્રયાગરાજ, ઉત્તર પ્રદેશના મહાકુંભ નગરમાં જાહેર સંબોધન પ્રણાલી પર જીવંત પ્રસારણ કરવામાં આવી રહ્યું છે. પ્રથમ કુંભવાણી સમાચાર બુલેટિન આજે, 18 જાન્યુઆરી 2025ના રોજ સવારે 8.30 વાગ્યે પ્રસારિત થયું.

કુંભવાણી સમાચાર બુલેટિન દિવસમાં ત્રણ વખત સવારે 8.30થી 8.40, બપોરે 2.30થી 2.40 અને રાત્રે 8.30થી 8.40 સુધી પ્રસારિત કરવામાં આવશે. આ મહા કુંભ મેળામાં યોજાનારી વિવિધ ઘટનાઓ વિશે નવીનતમ માહિતી પ્રદાન કરશે. આ ઉપરાંત, પ્રયાગરાજમાં ભક્તો 103.5 MHz ની ફ્રીક્વન્સી પર કુંભવાણી ન્યૂઝ બુલેટિન સાંભળી શકશે. આ સમર્પિત સમાચાર બુલેટિન NewsOnAIR એપ, વેવ્ઝ OTT પ્લેટફોર્મ અને ઓલ ઇન્ડિયા રેડિયોની સત્તાવાર યુટ્યુબ ચેનલ, News on AIR Official પર પણ ઉપલબ્ધ છે.

આ પહેલને ભક્તો અને યાત્રાળુઓ દ્વારા સારો પ્રતિસાદ મળ્યો છે અને ઘણા લોકોએ તેને "મહાકુંભ વિશે માહિતી ફેલાવવા માટેની એક પ્રશંસનીય પહેલ" ગણાવી છે. પ્રયાગરાજના રહેવાસી તનુ શર્મા કહે છે, "આકાશવાણીના કુંભ બુલેટિન વિશ્વસનીય, સચોટ અને માહિતીપ્રદ છે." મહાકુંભની મુલાકાત લેવા આવેલા મધ્યપ્રદેશના ઉજ્જૈનના રહેવાસી યોગરાજ સિંહ ઝાલા કહે છે, “મેળા પરિસરમાં આકાશવાણીનું કુંભ બુલેટિન સાંભળવું એ એક આનંદદાયક ક્ષણ છે. મહાકુંભમાં ભક્તોને માહિતીનો એક અધિકૃત સ્ત્રોત મળ્યો છે."

પ્રસાર ભારતીના અધ્યક્ષ શ્રી નવનીત કુમાર સહગલે જણાવ્યું હતું કે, “મહાકુંભ એક ભવ્ય આધ્યાત્મિક સામાજિક મેળાવડો છે અને પ્રસાર ભારતી વિશ્વસનીય વાસ્તવિક સમયના સમાચાર પ્રસારિત કરવા માટે સંપૂર્ણપણે પ્રતિબદ્ધ છે. ઓલ ઈન્ડિયા રેડિયો અને દૂરદર્શન પર મહાકુંભનું સતત કવરેજ સુનિશ્ચિત કરવા માટે પ્રયાગરાજમાં રિપોર્ટરો, સંપાદકો અને ન્યૂઝ એન્કર્સની એક સમર્પિત ટીમ તૈનાત કરવામાં આવી છે.

મહાકુંભ 2025ને સમર્પિત આકાશવાણીની કુંભવાણી ચેનલનું ઉદ્ઘાટન ઉત્તર પ્રદેશના મુખ્યમંત્રી યોગી આદિત્યનાથ દ્વારા 10 જાન્યુઆરીના રોજ કેન્દ્રીય માહિતી અને પ્રસારણ રાજ્યમંત્રી ડૉ. એલ મુરુગનની વર્ચ્યુઅલ હાજરીમાં કરવામાં આવ્યું હતું. આ ચેનલ 26 ફેબ્રુઆરી, 2025 સુધી સમાચાર અને અન્ય કાર્યક્રમોનું પ્રસારણ ચાલુ રાખશે.

AP/IJ/GP/JD