గణతంత్ర దినోత్సవం సందర్భంగా ప్రయాగరాజ్‌లోని మహాకుంభనగర్‌లో సమాచార - ప్రసార మంత్రిత్వ శాఖ ఏర్పాటు చేసిన డిజిటల్ ప్రదర్శనకు పెద్ద సంఖ్యలో ప్రజలు హాజరయ్యారు. ఈ ప్రదర్శన అవగాహన కల్పించేదిగా, ప్రయోజనకరమైనదిగా ఉందని భక్తులు, సాధారణ ప్రజలు ఎంతగానో ప్రశంసించారు. డిజిటల్ సెల్ఫీ పాయింట్ వద్ద సెల్ఫీలు తీసుకోవడానికి మహిళలు, పిల్లలు ఆసక్తి కనబరిచారు. సెల్ఫీ పాయింట్ తో పాటు వేదిక వద్ద సముద్ర మథన ప్రతీకాత్మక విగ్రహ ఏర్పాటునూ సందర్శకులు ప్రశంసించి, సెల్ఫీలు తీసుకున్నారు.

మహాకుంభమేళాను సందర్శించే యాత్రికులు, సాధారణ ప్రజల కోసం త్రివేణి రోడ్‌లోని పరేడ్ మైదానంలో ఈ నెల 13 నుంచి ఫిబ్రవరి 26 వరకు కేంద్ర సమాచార - ప్రసార మంత్రిత్వ శాఖ ఈ డిజిటల్ ప్రదర్శనను ఏర్పాటు చేసింది. గత పదేళ్లలో కేంద్ర ప్రభుత్వం సాధించిన విజయాలు, ప్రజాసంక్షేమ పథకాలు, విధానాలను ఈ ప్రదర్శన ద్వారా ప్రజలకు తెలియజేస్తున్నారు.

సమాచార - ప్రసార మంత్రిత్వ శాఖ ప్రదర్శన శిబిరంలో కేంద్ర వ్యవసాయ - రైతు సంక్షేమ మంత్రిత్వ శాఖ, ప్రచురణల విభాగం ఏర్పాటు చేసిన స్టాళ్లతోపాటు జాతీయ విపత్తు నిర్వహణ ఆధీకృత సంస్థ, ప్రధానమంత్రి ఇంటర్న్ షిప్ పథకంపై డిజిటల్ ప్రదర్శనలను కూడా సందర్శకులు పెద్దసంఖ్యలో వీక్షించి సమాచారాన్ని తెలుసుకుంటున్నారు.

ప్రధానమంత్రి జన ఆరోగ్య యోజన, డ్రోన్ దీదీ, లాఖ్ పతి దీదీ, వేవ్స్, ప్రధానమంత్రి ఇంటర్న్ షిప్ పథకం, ముద్ర పథకం, ప్రధానమంత్రి ఫసల్ బీమా యోజన, డిజిటల్ ఇండియా, ప్రధానమంత్రి ఆవాస యోజన, విద్యాంజలి, ఆత్మనిర్భర భారత్, స్కిల్ ఇండియా, ఏక్ భారత్ శ్రేష్ట్ భారత్, ప్రధానమంత్రి ఉజ్వల యోజన, హర్ ఘర్ జల యోజన, ప్రధానమంత్రి కౌశల వికాస్ మిషన్, స్వచ్ఛ భారత్ మిషన్, ప్రధానమంత్రి స్వనిధి యోజన, మూడు కొత్త నేర న్యాయ చట్టాలు, ప్రధానమంత్రి కిసాన్ సమ్మాన్ నిధి, మహిళా సాధికారతకు సంబంధించి వివిధ ఇతర పథకాల గురించి సమాచారాన్ని సాధారణ ప్రజలు తెలుసుకుంటుండడం గమనార్హం.  

***