Ha ka por kaba kyrpang bad kaba wanrah jingkylla ia ki jaka nongkyndong jong ka India, u Myntri Rangbah duh Narendra Modi mynta ka sngi u la pyniaid ia ka jingialang sam ia ki property card kaba heh tam hapoh ka Skhim SVAMITVA jong ka Tnad Panchayat Raj, kaba pynkupbor ia 65 lak ngut ki nongshong shnong ha ki jaka nongkyndong ba kin ioh ia ki kot ki sla ban  pyni ia ka jinglong trai ha ka shi sngi. Ha kane ka jingialang la iasohlang lyngba ka bor internet da u Myntri Sorkar Pdeng ba dei khmih ia ka Tnad Panchayati Raj Rajiv Ranjan Singh ba la tip kum u Lalan Singh, Myntri Khynnah, Tnad Panchayati Raj, Prof. S. P. Singh Baghel lem bad u Secretary, Tnad Panchayati Raj u Vivek Bharadwaj. Ha kane ka jingialang la iadonlang ruh ki Lat jong ki Jylla bapher bapher, ki Lieutenant Governor jong ka Jammu & Kashmir bad Ladakh, ki Myntri Rangbah jong ka Odisha, Chhattisgarh, Madhya Pradesh, Rajasthan, Uttar Pradesh, Maharashtra bad Gujarat, ki Myntri Sorkar Pdeng, ki dkhot jong ka iing dorbar thawain Parliament, ki dkhot jong ki Legislative Assembly bad ki Legislative Council, lem bad ki nongmihkhmat paidbah bad ki ophisar. La sakhi ia ka jingiashim bynta shitrhem ki nongshong shnong kumjuh ruh ki dkhot Panchayat bad ki ophisar na ki tnad bapher bapher na 237 tylli ki Distrik, bad 9 ngut ki Myntri Sorkar Pdeng kiba la peit kyrpang ia ki jingialang sam ba la pynlong ha ki thain.  

Ka jingialang e-distribution kaba kongsan, ba la pynlong lyngba ka video conferencing, ka kynthup palat 50,000 tylli ki shnong ha 10 tylli ki Jylla bad 2 tylli ki Union Territory, kaba long u mawmer ba kongsan ha ka rukom synshar ha ki jaka nongkyndong bad ka jingpynkupbor. Kane ka jingialang ka kynthup ia ki nongioh jingmyntoi na Chhattisgarh, Gujarat, Himachal Pradesh, Madhya Pradesh, Maharashtra, Mizoram, Odisha, Punjab, Rajasthan, Uttar Pradesh bad ki Union Territory jong ka Jammu & Kashmir bad Ladakh. Kane ka jingjop kaba khraw ka la pynlong ka jingpoi ka jingsam ia ki property card hapoh ka SVAMITVA sha ka 2.25 klur.

U Myntri Rangbah duh, Narendra Modi u la ong ba san snem mynshuwa, la plie paidbah ia ka skhim SVAMITVA ban pynthikna ba ki briew kiba sah ha ki jaka nongkyndong ki ioh ia ki property card jong ki. U la ong ba ki jylla bapher bapher ki peit ia ki syrnot long trai da kaba peit ia ki kyrteng bapher bapher kum Gharoni, Adhikar Abhilekh, Property Card, Malmatta Patrak, bad Awaasiya Bhumi Patta. “Palat 1.5 klur ki briew ki la ioh ia ki SVAMITVA card ha ki 5 snem ba la leit,” la ong u Modi. Ha kane ka prokram kaba mynta ka sngi, u la bynrap palat 65 lak ki longiing ki la ioh ia kine ki card. U Myntri Rangbah duh u la ong ba hapoh ka Swamitva Yojana,, kumba 2.25 klur ki briew ha ki shnong ki la ioh ia ki kot ki sla kiba iadei bad ka ain na ka bynta ki iing jong ki mynta. U la ai khublei bad kitbok kitrwiang ia baroh ki nongioh jingmyntoi. Da kaba ong ba ka spah snem ba 21 ka don shibun ki jingeh, kynthup ka jingkylla ka suinbneng, ka jingkyrduh um, ki jingeh ba iadei bad ka koit ka khiah, bad ki khlam, u Myntri Rangbah duh u la ban jur ba sa kawei ka jingeh kaba kongsan ba ka pyrthei ka mad kadei ka hok jong ki jingdon jingem bad ka jingbym don ki kot ki sla katkum ka ain ia ki jingdon jingem. U Myntri Rangbah duh u la kdew ia ka jingwad bniah ka United Nations kaba pyni ba bun ki briew ha ki ri bapher bapher kim don ia ki kot ki sla kiba biang katkum ka ain na ka bynta ki jingdon jingem jong ki. U la bynrap ba ka UN ka la ban jur ban pynduna ia ka jingduk ka donkam ia ki briew ban don ia ki hok ba iadei bad ki jingdon jingem.  U la ban jur hadien ba la iohpdiang ia ki kot ki sla katkum ka ain, da ki lak ki briew ki la shim ram na ki bank katkum ka nongrim jong ki jingdon jingem jong ki,  ki la sdang ia ki kam khaii pateng barit baria ha ki shnong jong ki. U la bynrap ba bun na kine ki nongioh jingmyntoi kidei ki longiing nongrep kiba rit ba ria bad kiba pdeng, bad ia ki, kine ki property card ki long ka jingpynthikna kaba kongsan ia ka jingshngain ha ka ioh ka kot. U Myntri Rangbah duh u la ong ba ki Dalit, ki longiing kiba dang sahdien bad ki riewlum kidei kiba shah ktah bha ha ki jingshim beain bad ki jingbishar kiba jrong ha ki iing shari. U la ong lyngba ka syrnot na ka ain, mynta kin lait na kane ka jingeh. U la ong la antad ba shisien ba la sam ia ki property card ha baroh ki shnong, kan plie lad ia ki kam ka ioh ka kot ba shongdor palat 100 lak klur tyngka.

Ha kane ka jingialang u Myntri Rangbah duh u la iakren ruh bad san ngut ki nongioh jingmyntoi jong ka Skhim SVAMITVA, kiba la iasam ia ki jingshem jong ki shaphang kumno ka Savmitva ka la pynkylla ia ka jingim jong ki da kaba pynduna ia ki jingiakajia, iarap ban pynkylla pisa ia ki jingdon jingem, kyntiew ia ki lad kamai kajih bad kyntiew ka jingpynkupbor ha ka ioh ka kot. Ki nongioh jingmyntoi kilong u Manohar Mewada na Sehore, Madhya Pradesh; ka Rachna na Sriganganagar, Rajasthan; u Roshan Sambha Patil na Nagpur, Maharashtra; ka Gajendra Sangita na Rayagada, Odisha; bad u Varinder Kumar na Samba, Jammu & Kashmir.

Ha ka jingai jingkren ha ka jingialang, u Myntri Sorkar Pdeng ba dei khmih ia ka Tnad Panchayati Raj, Rajiv Ranjan Singh ba la tip ruh kum Lalan Singh u la ban jur halor ka jingiar jong ka jingsam ia ki SVAMITVA Property Card, kaba la poi sha 237 tylli ki distrik lyngba ki prokram. U la ban jur ba ka jingsam 65 lak tylli ki property card kalong ka por jong ka jingkylla, kaba pynkupbor ia ki longiing ha ki jaka nongkyndong lyngba ki hok ha kaba iadei bad ka jinglong trai. “Haba ka shnong ka khlain, ka ri ka khlain (गांव मजबूत होगा तो देश मजबूत होगा)”, la ong u Myntri Sorkar pdeng, da kaba ban jur kumno ka skhim SVAMITVA ka la long ka nongrim jong ka jingpynkupbor ia ki jaka nongkyndong. U la iaroh kyrpang ia ka rukom treikam jong ka skhim ba don nongrim ha ka jingiamir jingmut lang ha kaba iadei bad ki kot ki sla kiba iadei bad ki jingdon jingem, bad u la ong ba kane ka rukom treikam ka la pynduna ia ki jingiakajia hapdeng ki shnong bad kyntiew ia ka jingiashongsuk shongsain ha ka imlang sahlang.

U Myntri sorkar pdeng u la ban jur ba 2.25 klur ki longiing ha ki jaka nongkyndong ki la ioh jingmyntoi na ka skhim SVAMITVA haduh mynta. U la ong ba kine ki property card ym tangba ka iarap ban ioh ia ki jingshakri jong ki bank bad ka jingioh ram hynrei kalong ruh kum ka atiar ba khlain ban pynbeit ia ki jingiakajia. U Myntri sorkar pdeng u la kdew ia ka bynta jong ka skhim ha ka jingpynkupbor ia ki longkmie ha kaba bun ki longkmie mynta ki ioh jingithuh kum ki trai lane kiba long trai lang ia ki jingdon jingem, kaba long ka sienjam ba kongsan sha ka jingryntih kyrdan hapdeng kynthei bad shynrang ha ki jaka nongkyndong. “Ka SVAMITVA kam dei tang shaphang ki hok kiba iadei bad ka jinglong trai, kadei shaphang ka jingpynlong ia ki shnong jong ngi kiba lah ban kyrshan dalade bad ki briew jong ngi ha ki jaka nongkyndong Atmanirbhar,” la ong u Myntri sorkar pdeng. U la kren shaphang kumno ka Skhim SVAMITVA ka plie ki lad ioh kam ba thymmai bad iarap ia ka jingseng kam lajong ha ki jaka nongkyndong lyngba ka jingioh lad shuh shuh ban ioh ia ki jingshakri kiba iadei bad ki kam pisa. Kane ka rukom treikam, u la ban jur, ba ka iahap bad ka thong Atmanirbhar Bharat  jong u Myntri Rangbah duh, ha kaba ki jaka nongkyndong jong ka ri ki don ka bynta kaba khraw ha ka jingkiew shaphrang bad ka jingseisoh jong ka ri.

Ka skhim SVAMITVA, kaba la plie paidbah da u Myntri Rangbah duh Narendra Modi ha ka 24 tarik Iaiong, 2020 ka la long ka sienjam wanrah jingkylla ha ka rukom peit ia ki kam kiba iadei bad ka jaka ha ki thain nongkyndong. Ka skhim ka la dep buh jingtip shaphang palat 3.17 lak tylli ki shnong da kaba pyndonkam ia ka drone technology, kaba kynthup 67,000 square kilometre ki jaka sah briew ha ki jaka nongkyndong ba shongdor T. 132 lak klur. Ka jingjop jong ka SVAMITVA ka la ioh jingithuh na kiwei kiwei ki ri, ha kaba la pyni ia ka rukom peit ka India ia ki kam kiba iadei bad ki jaka puta ha ka International Workshop ha u Lber 2025 bad ka World Bank Land Governance Conference ha u Jymmang 2025. Kane ka jingioh jingithuh na kylleng ki ri ka pyni ia ka jinglong nongialam ka India ha ka jingpyndonkam ia ka teknoloji na ka bynta ka roi ka par kaba iaineh bad ka rukom synshar ha ki jaka nongkyndong.

****