دیہی بھارت کے لیے ایک تاریخی اور تبدیلی کے لمحے میں ، وزیر اعظم جناب نریندر مودی نے آج پنچایتی راج کی وزارت کی سوامتوا اسکیم کے تحت پراپرٹی کارڈوں کی اب تک کی سب سے بڑی تقسیم کی تقریب کی صدارت کی ، جس سے 65 لاکھ دیہی شہریوں کو ایک ہی دن میں قانونی ملکیت کے دستاویزات کے ساتھ بااختیار بنایا گیا۔ تقسیم کی تقریب میں پنچایتی راج کے مرکزی وزیر جناب راجیو رنجن سنگھ عرف لالن سنگھ، پنچایتی راج کی وزارت کے وزیر مملکت پروفیسر ایس پی سنگھ بگھیل اور پنچایتی راج کی وزارت کے سکریٹری جناب وویک بھاردواج نے ورچوئل طور پر شرکت کی۔ اس تقریب میں کئی ریاستوں کے گورنروں، جموں و کشمیر اور لداخ کے لیفٹیننٹ گورنروں، اڈیشہ، چھتیس گڑھ، مدھیہ پردیش، راجستھان، اتر پردیش، مہاراشٹر اور گجرات کے وزرائے اعلیٰ، مرکزی وزراء، ارکان پارلیمنٹ، قانون ساز اسمبلیوں اور قانون ساز کونسلوں کے ارکان کے علاوہ دیگر عوامی نمائندوں اور سینئر عہدیداروں نے بھی شرکت کی۔ اس تقریب میں شہریوں کے ساتھ ساتھ 237 اضلاع کے پنچایت نمائندوں اور مختلف متعلقہ محکموں کے عہدیداروں نے بڑے پیمانے پر شرکت کی ، جس میں 9 مرکزی وزراء نے ذاتی طور پر علاقائی تقسیم کی تقریبات کی نگرانی کی۔

ویڈیو کانفرنسنگ کے ذریعے منعقد کی گئی ای-ڈسٹری بیوشن تقریب میں 10 ریاستوں اور 2 مرکز کے زیر انتظام علاقوں کے 50،000 سے زیادہ گاؤوں کا احاطہ کیا گیا، جو دیہی حکمرانی اور بااختیار بنانے میں ایک بے مثال سنگ میل ہے۔ تقسیم کی تقریب میں چھتیس گڑھ، گجرات، ہماچل پردیش، مدھیہ پردیش، مہاراشٹر، میزورم، اڈیشہ، پنجاب، راجستھان، اتر پردیش اور مرکز کے زیر انتظام علاقوں جموں و کشمیر اور لداخ کے مستحقین نے شرکت کی۔ اس قابل ذکر کامیابی کے ساتھ سوامیتوا کے تحت تقسیم کیے جانے والے پراپرٹی کارڈوں کی مجموعی تعداد 2.25کروڑ ہوگئی ہے۔

وزیراعظم جناب نریندر مودی نے کہا کہ پانچ سال قبل دیہی علاقوں میں رہنے والے لوگوں کو ان کے پراپرٹی کارڈ حاصل کرنے کو یقینی بنانے کے لیے سوامیتوا اسکیم شروع کی تھی۔ انھوں نے کہا کہ مختلف ریاستیں پراپرٹی کی ملکیت کے سرٹیفکیٹ کو مختلف ناموں سے پکارتی ہیں، جیسے گھرونی، ادھیکار ابھیلیکھ، پراپرٹی کارڈ، مالمتا پترک اور آواسیا بھومی پٹا۔ جناب مودی نے کہا کہ گذشتہ پانچ سالوں میں 1.5 کروڑ سے زیادہ لوگوں کو سوامیتوا کارڈ جاری کیے گئے ہیں۔ آج کے پروگرام میں مزید 65 لاکھ سے زیادہ کنبوں کو یہ کارڈ مل چکے ہیں۔ وزیر اعظم نے کہا کہ سوامیتو یوجنا کے تحت گاؤں کے تقریبا 2.25 کروڑ لوگوں کو اب ان کے گھروں کے لیے قانونی دستاویز مل چکے ہیں۔ انھوں نے تمام مستفیدین کو دلی مبارکباد اور نیک خواہشات پیش کیں۔ اس بات پر تبصرہ کرتے ہوئے کہ 21 ویں صدی میں موسمیاتی تبدیلی، پانی کی قلت، صحت کے بحران اور وبائی امراض سمیت متعدد چیلنجز درپیش ہیں، وزیر اعظم نے کہاکہ دنیا کو درپیش ایک اور اہم چیلنج جائیداد کے حقوق اور قانونی جائیداد کی دستاویزات کا فقدان ہے۔ وزیر اعظم نے اقوام متحدہ کے ایک مطالعے کا حوالہ دیا جس میں انکشاف ہوا ہے کہ مختلف ممالک میں بہت سے لوگوں کے پاس اپنی جائیداد کے لیے مناسب قانونی دستاویزات نہیں ہیں۔ انھوں نے مزید کہا کہ اقوام متحدہ نے اس بات پر زور دیا ہے کہ غربت کو کم کرنے کے لیے لوگوں کو جائیداد کے حقوق حاصل کرنے کی ضرورت ہے۔ انھوں نے کہاکہ قانونی دستاویزات حاصل کرنے کے بعد لاکھوں لوگوں نے اپنی جائیداد کی بنیاد پر بینکوں سے قرض لیا ہے اور اپنے گاؤوں میں چھوٹے کاروبار شروع کیے ہیں۔ انھوں نے مزید کہا کہ ان میں سے بہت سے فائدہ اٹھانے والے چھوٹے اور درمیانے درجے کے کسان کنبے ہیں ، جن کے لیے یہ پراپرٹی کارڈ معاشی تحفظ کی اہم ضمانت بن گئے ہیں۔ وزیر اعظم نے کہا کہ دلت، پسماندہ اور آدیواسی کنبے غیر قانونی پیشوں اور طویل عدالتی تنازعات سے سب سے زیادہ متاثر ہوئے ہیں۔ انھوں نے کہاکہ قانونی سرٹیفکیشن سے اب وہ اس بحران سے آزاد ہوجائیں گے۔ انھوں نے ایک اندازے کا ذکر کیا کہ ایک بار تمام گاؤوں میں پراپرٹی کارڈ جاری ہونے کے بعد اس سے 100 لاکھ کروڑ روپے سے زیادہ کی اقتصادی سرگرمیاں کھل جائیں گی۔

اس تقریب کے دوران وزیر اعظم نے سوامتوا اسکیم کے پانچ مستفیدین سے بھی گفت و شنید کی جنہوں نے اپنے تجربات سے آگاہ کیا کہ کس طرح سوامیتوا نے تنازعات کو کم کرکے، اثاثوں کی مونیٹائزیشن کو ممکن بنا کر، ذریعہ معاش میں اضافہ کرکے اور معاشی خودمختاری کو فروغ دے کر ان کی زندگیوں کو بدل دیا ہے۔ فائدہ اٹھانے والوں میں مدھیہ پردیش کے سیہور سے تعلق رکھنے والے جناب منوہر میواڑہ بھی شامل تھے۔ شری گنگا نگر، راجستھان سے تعلق رکھنے والی محترمہ رچنا۔ جناب روشن سمبھا پاٹل ناگپور، مہاراشٹر سے۔ اوڈیشہ کے رائے گڈا سے تعلق رکھنے والی محترمہ گجیندر سنگیتا۔ اور جموں و کشمیر کے سامبا سے جناب ورندر کمار شامل تھے۔

اس تاریخی تقریب سے خطاب کرتے ہوئے مرکزی وزیر پنچایتی راج جناب راجیو رنجن سنگھ عرف لالن سنگھ نے سوامتوا پراپرٹی کارڈ کی تقسیم کے بے مثال پیمانے پر زور دیا جو مربوط جسمانی پروگراموں کے ذریعے 237 اضلاع تک پہنچ چکا ہے۔ انھوں نے اس بات پر زور دیا کہ 65 لاکھ پراپرٹی کارڈوں کی تقسیم ایک تبدیلی کا لمحہ ہے ، جس سے اتنی ہی تعداد میں دیہی کنبوں کو قانونی ملکیت کے حقوق حاصل ہوں گے۔ ’’جب گاؤں مضبوط ہوتا ہے، تو قوم مضبوط ہوتی ہے ۔مرکزی وزیر نے بتایاکہ کس طرح سوامیتوا اسکیم دیہی بااختیاربنانے کا سنگ بنیاد بن گئی ہے۔ انھوں نے خاص طور پر جائیداد کی دستاویزات کے لیے اس اسکیم کے اتفاق رائے پر مبنی نقطہ نظر کی تعریف کرتے ہوئے کہا کہ اس مشترکہ طریقہ کار نے گاؤں کے تنازعات کو نمایاں طور پر کم کیا ہے اور کمیونٹی کی ہم آہنگی کو مضبوط کیا ہے۔

مرکزی وزیر نے اس بات کو اجاگر کیا کہ اب تک 2.25 کروڑ دیہی کنبوں نے سوامیتوا اسکیم سے فائدہ اٹھایا ہے۔ انھوں نے کہا کہ یہ پراپرٹی کارڈز نہ صرف بینکاری خدمات اور رسمی کریڈٹ تک رسائی کو آسان بناتے ہیں بلکہ تنازعات کے حل کے لیے طاقتور اوزار کے طور پر بھی کام کرتے ہیں۔ قابل ذکر ہے کہ مرکزی وزیر نے خواتین کو بااختیار بنانے میں اس اسکیم کے کردار کی نشاندہی کی ، جس میں بہت سی خواتین کو اب جائیداد کے مالک یا شریک مالک کے طور پر تسلیم کیا گیا ہے ، جو دیہی علاقوں میں صنفی مساوات کی سمت میں ایک اہم قدم ہے۔ انھوں نے کہا، ’سوامیتواصرف جائیداد کے حقوق کے بارے میں نہیں ہے، یہ ہمارے گاؤوں کو خود کفیل بنانے اور ہمارے دیہی شہریوں کو خود کفیل بنانے کے بارے میں بھی ہے۔ انھوں نے تفصیل سے بتایا کہ کس طرح سوامیتوا اسکیم روزگار کے نئے مواقع پیدا کر رہی ہے اور مالی خدمات تک بہتر رسائی کے ذریعے دیہی انٹرپرینیورشپ کو قابل بنا رہی ہے۔ انھوں نے زور دے کر کہا کہ یہ جامع نقطہ نظر عزت مآب وزیر اعظم کے آتم نربھر بھارت کے وژن کے ساتھ پوری طرح ہم آہنگ ہے، جس میں دیہی بھارت ملک کی ترقی اور خوشحالی میں مرکزی کردار ادا کرتا ہے۔

وزیر اعظم جناب نریندر مودی نے 24 اپریل 2020کو سوامیتوا اسکیم کا افتتاح کیا تھا، جو رورل لینڈ گورننس میں ایک انقلاب آفریں پہل کے طور پر ابھری ہے۔ اس اسکیم نے جدید ڈرون ٹکنالوجی کا استعمال کرتے ہوئے 3.17 لاکھ سے زیادہ گاؤوں کا کامیابی سے نقشہ بنایا ہے ، جس میں 132 لاکھ کروڑ روپے مالیت کی 67،000 مربع کلومیٹر دیہی رہائشی اراضی کا احاطہ کیا گیا ہے۔ سوامیتوا کی کامیابی نے بین الاقوامی توجہ حاصل کی ہے ، بھارت کے جدید لینڈ گورننس ماڈل کو مارچ 2025 میں ایک بین الاقوامی ورکشاپ اور مئی 2025 میں ورلڈ بینک لینڈ گورننس کانفرنس میں پیش کیا جائے گا۔ یہ عالمی اعتراف پائیدار ترقی اور نچلی سطح پر حکمرانی کے لیے ٹکنالوجی کا فائدہ اٹھانے میں بھارت کی قیادت کو اجاگر کرتا ہے۔

***

(ش ح – ع ا)

U. No. 5365