કેન્દ્રીય માહિતી અને પ્રસારણ, રેલવે તથા ઇલેક્ટ્રોનિક્સ તથા ઇન્ફોર્મેશન ટેકનોલોજી મંત્રી શ્રી અશ્વિની વૈષ્ણવે આજે પૂણેમાં ફિલ્મ એન્ડ ટેલિવિઝન ઇન્સ્ટિટ્યૂટ ઑફ ઇન્ડિયાનાં ઓડિટોરિયમનું ઉદઘાટન કર્યું હતું. શ્રી વૈષ્ણવ માહિતી અને પ્રસારણ મંત્રાલય હેઠળની સોસાયટી તરીકે નોંધાયેલી સ્વાયત્ત સંસ્થા ફિલ્મ એન્ડ ટેલિવિઝન ઇન્સ્ટિટ્યૂટ ઑફ ઇન્ડિયાની તેમની પ્રથમ મુલાકાતે આવ્યા હતા. શ્રી વૈષ્ણવ રિબન કાપીને વિદ્યાર્થીઓ સાથે દીપ પ્રાક્ટયમાં સામેલ થયા હતા.

ઉદ્ઘાટન પછી ઓપન ફોરમ પર વિદ્યાર્થીઓ અને ફેકલ્ટી સાથે વાતચીત કરતા, કેન્દ્રીય મંત્રીએ FTII ને વૈશ્વિક મંચ પર વધુ આગળ લઈ જવા માટેના તેમના વિઝનને વ્યક્ત કર્યું. તેમણે કહ્યું કે "આપણો વારસો અને પરંપરા વધુ શ્રેષ્ઠતાની યાત્રા શરૂ કરવા માટે એક મજબૂત પાયો પૂરો પાડે છે". શ્રી વૈષ્ણવે ફેકલ્ટી અને વિદ્યાર્થીઓના વિવિધ પ્રશ્નોના જવાબ આપ્યા અને પ્રસ્તાવિત ડીમ્ડ યુનિવર્સિટી દરજ્જાના વિવિધ પાસાઓ સ્પષ્ટ કર્યા.

શ્રી અશ્વિની વૈષ્ણવે દેશમાં સિનેમા એજ્યુકેશન માટે પોતાનું વિઝન વ્યક્ત કર્યું હતું. તેમણે વિદ્યાર્થીઓની કારકિર્દીની સંભાવનાઓને મજબૂત કરવા, ઉદ્યોગ સાથે વધુ જોડાણ પર ભાર મૂક્યો હતો. તેમણે 'ગતિ શક્તિ વિશ્વવિદ્યાલય'નું ઉદાહરણ આપ્યું હતું, જે ટૂંક સમયમાં જ વૈશ્વિક ખેલાડીઓ માટે મુખ્ય પ્રતિભા પ્રદાતા બની ગઈ છે.

મંત્રીશ્રીએ જણાવ્યું હતું કે, નવું ઓડિટોરિયમ એફટીઆઈઆઈના શિક્ષણશાસ્ત્ર માટે અમૂલ્ય તાકાત હોવાની સાથે પૂણેના સમૃદ્ધ સાંસ્કૃતિક ક્ષેત્રમાં પણ મહત્ત્વપૂર્ણ હાજરી પૂરવાર થશે.

586 બેઠકોનું ઓડિટોરિયમ સિનેમા પ્રોજેક્ટર, સ્ટેજ પરફોર્મન્સ માટે પીએ સિસ્ટમ અને અત્યાધુનિક ડોલ્બી એટમોસ સરાઉન્ડ સાઉન્ડ સિસ્ટમ જેવી તમામ આધુનિક સુવિધાઓથી સજ્જ છે. ઓડિટોરિયમની સૌથી વિશિષ્ટ લાક્ષણિકતાઓમાંની એક તેની નવીન, આડી ગતિશીલ સ્ક્રીન છે, જેની પહોળાઈ 50 ફૂટ અને ઊંચાઈ 20 ફૂટ છે. આ અત્યાધુનિક સ્ક્રીનને રિમોટ કન્ટ્રોલનો ઉપયોગ કરીને સહેલાઇથી સમાયોજિત કરી શકાય છે, જે ઓડિટોરિયમને સિનેમા થિયેટરમાં એકીકૃત રૂપાંતરિત કરવાની મંજૂરી આપે છે. માનવામાં આવે છે કે આ અગ્રણી સુવિધા આ પ્રકારની પ્રથમ સુવિધા છે, જે ઓડિટોરિયમ ડિઝાઇનમાં વૈવિધ્યતા અને લવચીકતા માટે એક નવું ધોરણ સ્થાપિત કરે છે. એફટીઆઈઆઈએ આ સુવિધા માટે પેટન્ટ માટે અરજી કરી દીધી છે.

આ કાર્યક્રમના ભાગરૂપે કેન્દ્રીય મંત્રી શ્રી વૈષ્ણવે સંસ્થાની વિવિધ સુવિધાઓની મુલાકાત લીધી હતી અને ફેકલ્ટી સાથે વાતચીત પણ કરી હતી. મંત્રીશ્રીએ ક્રિએટિવ ઇકોનોમી વિશે પોતાના વિચારો વ્યક્ત કર્યા હતા અને નોંધ્યું હતું કે, "એફટીઆઇઆઇની પ્રતિભા અને ઇકોસિસ્ટમ સાથે આપણે મોટા ખેલાડી બની શકીએ છીએ."

AP/IJ/GP/JD