நிதியமைச்சர் நிர்மலா சீதாராமன் அவர்களே, நிதித்துறை இணையமைச்சர் பங்கஜ் சவுத்ரி அவர்களே, இங்கு கூடியிருக்கும் நபார்டு  நிர்வாகத்தின் மதிப்பிற்குரிய மூத்த உறுப்பினர்களே, சுய உதவிக் குழுக்கள், கூட்டுறவு வங்கிகள், வேளாண் உற்பத்தியாளர் அமைப்புகளின் உறுப்பினர்களே, இதர மதிப்புமிக்க விருந்தினர்களே, தாய்மார்களே, பொதுமக்களே, 

அனைவருக்கும் இனிய 2025 புத்தாண்டு நல்வாழ்த்துக்கள். 2025-ம் ஆண்டின் தொடக்கத்தில் கிராமிய பாரத் திருவிழாவின் பிரமாண்டமான கொண்டாட்டம், பாரதத்தின் வளர்ச்சிப் பயணத்தின் முன்னேற்றத்தை பிரதிபலிப்பதோடு ஒரு தனித்துவமான அடையாளத்தையும் உருவாக்கியுள்ளது. இந்த மகத்தான நிகழ்ச்சிக்கு ஏற்பாடு செய்த நபார்டு வங்கிக்கும், அவர்களுடன் இணைந்து செயல்படும் அனைவருக்கும் எனது மனமார்ந்த வாழ்த்துக்களைத் தெரிவித்துக் கொள்கிறேன்.

நண்பர்களே,

கிராமங்களுடன் இணைக்கப்பட்ட நாம், கிராமங்களில் வளர்ந்தவர்களாகிய நாம் பாரதக் கிராமங்களின் உண்மையான வலிமையைப் புரிந்துகொள்கிறோம். கிராமத்தில் வசிக்கும் ஒருவருக்கு, கிராமமும் அவர்களுக்குள்ளேயே வசிக்கும். ஒரு கிராமத்தில் வாழ்ந்தவர்களுக்கு கிராம வாழ்க்கையை உண்மையாக அரவணைப்பது எப்படி என்பது தெரியும். என் குழந்தைப் பருவம் ஒரு சிறிய நகரத்தில் ஒரு சுமாரான சூழலில் கழிந்தது என்னுடைய அதிர்ஷ்டமாகக் கருதுகிறேன்! அதன் பிறகு, நான் வீட்டை விட்டு வெளியேறிய பிறகும், நாட்டின் கிராமங்களிலும், கிராமப் புறங்களிலும் எனது பெரும்பாலான நேரம் கழிந்தது.  இதன் விளைவாக, கிராம வாழ்க்கையின் சவால்களை நான் நேரடியாக அனுபவித்தேன், மேலும் நமது கிராமங்களின் மகத்தான ஆற்றலை அங்கீகரித்தேன். கிராமங்களில் மக்கள் எவ்வளவு கடினமாக உழைக்கிறார்கள் என்பதை சிறுவயதிலிருந்தே நான் பார்த்திருக்கிறேன், ஆனால் மூலதனம் இல்லாததால், அவர்களுக்கு போதுமான வாய்ப்புகள் கிடைப்பதில்லை. கிராமங்களில் உள்ள மக்களிடம் உள்ள நம்பமுடியாத திறமை மற்றும் திறன்களின் நம்பமுடியாத பன்முகத்தன்மையை நான் கண்டேன்! ஆனாலும், இந்த ஆற்றல் பெரும்பாலும் வாழ்க்கையின் அடிப்படைப் போராட்டங்களில் வீணாகிவிடுகிறது. சில நேரங்களில், இயற்கை பேரழிவுகளால் பயிர்கள் சேதமடைகின்றன; மற்ற நேரங்களில்,  சந்தைகளுக்கு அணுகல் இல்லாததால் அவர்கள் தங்கள் அறுவடையைக் கைவிட வேண்டியதாகிறது.  இந்த சிரமங்களை மிக அருகில் இருந்து பார்த்த எனக்கு கிராமங்களுக்கும், பின்தங்கிய மக்களுக்கும் சேவை செய்ய வேண்டும் என்ற உத்வேகம் கிடைத்தது. அவர்களின் பிரச்சினைகளுக்கு தீர்வு காண வேண்டும் என்ற தீர்மானத்தை அது எனக்குள் விதைத்தது.

தற்போது நாட்டின் கிராமப்புறங்களில் மேற்கொள்ளப்படும் பணிகளும் கூட கிராமங்களில் இருந்து கற்றுக்கொண்ட பாடங்கள் மற்றும் அனுபவங்களால்தான் வடிவமைக்கப்பட்டுள்ளன. 2014-ம் ஆண்டு முதல், ஒவ்வொரு கணமும் கிராமப்புற இந்தியாவுக்கு சேவை செய்ய நான் தொடர்ந்து என்னை அர்ப்பணித்துக் கொண்டுள்ளேன். கிராமங்களில் உள்ள மக்களுக்கு கௌரவமான வாழ்க்கையை வழங்குவதற்கு இந்த அரசு முன்னுரிமை அளிக்கிறது.  பாரதத்தின் கிராமங்களில் உள்ள மக்களுக்கு அதிகாரம் அளிப்பதும், வேறு எங்கும் குடிபெயராமல் கிராமத்திற்குள்ளேயே முன்னேறுவதற்கு ஏராளமான வாய்ப்புகள் இருப்பதை உறுதி செய்வதும் எங்கள் நோக்கமாகும். கிராம வாழ்க்கையை எளிதாக்குவதை நோக்கமாகக் கொண்டுள்ளோம். இதற்காக ஒவ்வொரு கிராமத்திலும் அடிப்படை வசதிகளை உறுதி செய்வதற்கான இயக்கத்தை நாங்கள் தொடங்கியுள்ளோம்.  தூய்மை இந்தியா திட்டத்தின் மூலம் ஒவ்வொரு வீட்டிலும் கழிப்பறைகளைக் கட்டினோம். பிரதமரின் வீட்டுவசதித் திட்டத்தின் கீழ், கிராமப்புறங்களில் உள்ள லட்சக்கணக்கான குடும்பங்களுக்கு உறுதியான வீடுகளை நாங்கள் வழங்கினோம். தற்போது, ஜல் ஜீவன் இயக்கம் மூலம், ஆயிரக்கணக்கான கிராமங்களில் உள்ள ஒவ்வொரு வீட்டிற்கும் தூய்மையான குடிநீர் சென்றடைகிறது.

நண்பர்களே,

தற்போது, 1.5 லட்சத்துக்கும் மேற்பட்ட ஆயுஷ்மான் ஆரோக்கிய மையங்களில் மக்களுக்கு சிறந்த சுகாதார சேவைகள் கிடைக்கின்றன. டிஜிட்டல் தொழில்நுட்பத்தின் உதவியுடன், தொலை மருத்துவத்தின் சேவைகளைப் பயன்படுத்தி, நாட்டில் உள்ள சிறந்த மருத்துவர்களையும், மருத்துவமனைகளையும் கிராமங்களுடன் இணைத்துள்ளோம். கிராமப்புறங்களில் உள்ள லட்சக்கணக்கான மக்கள் ஏற்கனவே இ-சஞ்சீவனி தளத்தின் மூலம் தொலை மருத்துவ சேவைகளைப் பெற்றுள்ளனர்.  கோவிட்-19 பெருந்தொற்று காலத்தில், பாரதத்தின் கிராமங்கள்  நெருக்கடிகளை எவ்வாறு சமாளிக்கும் என்று உலகமே சந்தேகித்தது. ஆனால் ஒவ்வொரு கிராமத்திலும் கடைசி நபருக்கும் தடுப்பூசிகள் சென்றடைவதை நாங்கள் உறுதி செய்தோம்.

நண்பர்களே,

கிராமப்புற பொருளாதாரத்தை வலுப்படுத்த, கிராம மக்களின் ஒவ்வொரு பிரிவினரையும் கருத்தில் கொண்டு பொருளாதாரக் கொள்கைகளை உருவாக்குவது முக்கியம். கடந்த 10 ஆண்டுகளில், எங்கள் அரசு கிராமப்புற சமூகத்தின் ஒவ்வொரு பிரிவினருக்கும் சிறப்புக் கொள்கைகளை உருவாக்கி, முடிவுகளை எடுத்துள்ளது குறித்து நான் மகிழ்ச்சி அடைகிறேன். சில நாட்களுக்கு முன்பு, பிரதமர் பயிர்க் காப்பீட்டுத் திட்டத்தை மேலும் ஓராண்டுக்கு நீட்டிக்க அமைச்சரவை ஒப்புதல் அளித்தது.  டிஏபி (டை-அம்மோனியம் பாஸ்பேட்) உரத்தின் விலை உலகளவில் விண்ணை முட்டும் அளவுக்கு உயர்ந்து வருகிறது. நமது விவசாயிகள் சர்வதேச விலைக்கு வாங்க வேண்டியிருந்தால், அவர்கள் மீள முடியாத அளவுக்கு பெரும் சுமைக்கு ஆளாவார்கள். ஆனால், உலகளாவிய சூழ்நிலைகள் அல்லது நம் மீதான சுமை எதுவாக இருந்தாலும், அந்த சுமை நமது விவசாயிகள் மீது விழ அனுமதிக்கக் கூடாது என்று நாங்கள் முடிவு செய்தோம். டிஏபிக்கான மானியங்களை நாங்கள் அதிகரிக்கச்செய்து  விவசாயிகளுக்கான அதன் விலையை நிலைப்படுத்தினோம்.

நண்பர்களே,

கடந்த 10 ஆண்டுகளில், குறு சிறு மற்றும் நடுத்தர தொழில்துறையை ஊக்குவிக்க பல கொள்கைகள் செயல்படுத்தப்பட்டுள்ளன. ஒரு கோடிக்கும் அதிகமான கிராமப்புற குறு சிறு மற்றும் நடுத்தர தொழில்துறைகளுக்கு நேரடியாக ஆதரவளித்த கடன் உத்தரவாதத் திட்டத்தின் மூலம் இந்த வணிகங்கள் பயனடைந்துள்ளன.

நண்பர்களே,

விவசாயம் மட்டுமின்றி, நமது கிராமங்களில் ஏராளமானோர் பாரம்பரிய கலை மற்றும் திறன்களில் ஈடுபட்டு வருகின்றனர். உதாரணமாக, கொல்லர்கள், தச்சர்கள் மற்றும் குயவர்கள் - அவர்களில் பெரும்பாலோர் கிராமங்களில் வாழ்ந்து வேலை செய்துள்ளனர். இந்த கைவினைஞர்கள் கிராமப்புற மற்றும் உள்ளூர் பொருளாதாரத்திற்கு குறிப்பிடத்தக்க பங்களிப்பை வழங்கியுள்ளனர். இருப்பினும், கடந்த காலங்களில், அவை பெரும்பாலும் புறக்கணிக்கப்பட்டன.  இதை நிவர்த்தி செய்யும் வகையில் அவர்களுக்கு அதிகாரம் அளிப்பதற்காக விஸ்வகர்மா திட்டத்தை நாங்கள் தொடங்கியுள்ளோம்.

நண்பர்களே,

தற்போது இந்த வெற்றிகளைப் பார்க்கும்போது, முந்தைய அரசுகள் இந்த விவகாரங்களை ஏன் செய்ய முடியவில்லை என்று நான் அடிக்கடி ஆச்சரியப்படுகிறேன் - மோடிக்காக நாம் ஏன் காத்திருக்க வேண்டியிருந்தது? சுதந்திரத்திற்குப் பிறகு பல பத்தாண்டுகளாக, நாடு முழுவதும் மில்லியன் கணக்கான கிராமங்கள் அடிப்படைத் தேவைகளை இழந்திருந்தன.

நண்பர்களே,

தற்போது, நாட்டில் கிராமப்புற உள்கட்டமைப்பின் மீதான கவனம் முன்னெப்போதையும் விட அதிகமாக உள்ளது. நாட்டின் பெரும்பாலான கிராமங்கள் இப்போது நெடுஞ்சாலைகள், அதிவேக நெடுஞ்சாலைகள் மற்றும் ரயில்வேக்களுடன் இணைக்கப்பட்டுள்ளன. பிரதமரின் கிராமச் சாலைகள் திட்டத்தின் கீழ், கடந்த 10 ஆண்டுகளில் கிராமப்புறங்களில் சுமார் 4 லட்சம் கிலோமீட்டர் சாலைகள் அமைக்கப்பட்டுள்ளன. டிஜிட்டல் கட்டமைப்பைப் பொறுத்தவரை, நமது கிராமங்கள் 21-ஆம் நூற்றாண்டின் நவீன மையங்களாக மாறி வருகின்றன. கிராமப்புற மக்கள் டிஜிட்டல் தொழில்நுட்பத்தை பின்பற்ற முடியாது என்று நினைத்தவர்களை நம் கிராம மக்கள் நிராகரித்து விட்டனர். இங்கே எல்லோரும் மொபைல் போனில் வீடியோக்களைப் பதிவு செய்வதை நான் காண்கிறேன் - இவர்கள் அனைவரும் கிராமவாசிகள். தற்போது, நாட்டில் 94% க்கும் மேற்பட்ட கிராமப்புற வீடுகளில் தொலைபேசி அல்லது மொபைல் போன்கள்  உள்ளன.

நண்பர்களே,

இங்கு, நபார்டு வங்கியின் மூத்த நிர்வாகிகள் உள்ளனர். சுய உதவிக் குழுக்கள் முதல் விவசாயிகள் கடன் அட்டைகள் வரை பல்வேறு முயற்சிகளின் வெற்றியில் நீங்கள் முக்கிய பங்காற்றியுள்ளீர்கள். முன்னோக்கிச் செல்லும்போது, நாட்டின் நோக்கங்களை நிறைவேற்றுவதில் உங்கள் பங்கு தொடர்ந்து முக்கியமானதாக இருக்கும். உழவர் உற்பத்தியாளர் அமைப்புகளின் வலிமையை நீங்கள் அனைவரும் அறிவீர்கள். உழவர் உற்பத்தியாளர்  அமைப்புகள் நிறுவப்பட்டதன் மூலம், நமது விவசாயிகள் இப்போது தங்கள் பயிர்களுக்கு நல்ல விலையைப் பெற்று வருகின்றனர். 

நண்பர்களே,

உங்கள் கிராமத்தில் கட்டப்பட்ட அமிர்த நீர்நிலைகள் ஒட்டுமொத்த சமூகத்தாலும் கூட்டாக பராமரிக்கப்பட வேண்டும். அதே நேரத்தில், "தாயின் பெயரில் ஒரு மரக்கன்று நடுதல்" என்ற தேசிய பிரச்சாரம் உள்ளது. கிராமத்தில் உள்ள ஒவ்வொரு தனிநபரையும் இந்த முயற்சியில் ஈடுபட ஊக்குவிப்பது முக்கியம். இது நம் கிராமத்தில் முடிந்தவரை பல மரக்கன்றுகள் நடப்படுவதை உறுதி செய்கிறது. 

சகோதர சகோதரிகளே,

நமது தீர்மானங்கள் ஒவ்வொரு கிராமத்தையும் சென்றடைய வேண்டும். இந்த கிராமிய பாரதக் கொண்டாட்டம் அனைத்து கிராமங்களுக்கும் பரவ வேண்டும். நமது கிராமங்கள் வலுவானதாகவும், அதிக அதிகாரம் பெற்றதாகவும் மாறுவதை உறுதி செய்ய நாம் தொடர்ந்து ஒருங்கிணைந்து பணியாற்ற வேண்டியது அவசியம். இந்த நிகழ்வின் மூலம், கிராமங்களுக்கு அடிக்கடி செல்லும் வாய்ப்பு இல்லாத தில்லி மக்கள், குறைந்தபட்சம் ஒரு முறையாவது சென்று கிராமத்தின் திறனைக் காண வேண்டும் என்று கேட்டுக் கொள்கிறேன். நமது கிராமங்களில்  பன்முகத்தன்மை மற்றும் ஆற்றல் பேரளவில் உள்ளது. ஒருபோதும் ஒரு கிராமத்திற்குச் செல்லாதவர்கள் இந்த ஆற்றலைக் கண்டு ஆச்சரியப்படுவார்கள் என்று நான் நம்புகிறேன். இந்த வேலையை நீங்கள் செய்துள்ளீர்கள், நீங்கள் அனைவரும் பாராட்டுக்குரியவர்கள். உங்கள் ஒவ்வொருவருக்கும் எனது மனமார்ந்த வாழ்த்துக்களைத் தெரிவித்துக் கொள்கிறேன், உங்கள் அனைவருக்கும் மிக்க நன்றியைத் தெரிவித்துக் கொள்கிறேன்.

(பொறுப்பு துறப்பு: இது பிரதமர் இந்தி மொழியில் ஆற்றிய உரையின் தோராயமான மொழிபெயர்ப்பு ஆகும்

***

TS/IR/AG/KR/DL