U Myntri ki tnad Kam Pohiing bad Cooperation, Amit Shah u la pyniaid ia ka jingialang ba 12 jong ka North Eastern Space Applications Centre (NESAC) Society ha Agartala, Tripura mynta ka sngi. U Myntri Sorkar Pdeng ba dei khmih ia ka tnad Development of North Eastern Region (DoNER) Jyotiraditya M. Scindia, Myntri Rangbah ka Jylla Tripura Dr. Manik Saha, Myntri Rangbah ka jylla Assam Himanta Biswa Sarma, Myntri Rangbah ka Manipur N. Biren Singh, Myntri Rangbah ka Arunachal Pradesh Pema Khandu, Myntri Rangbah ka Sikkim Prem Singh Tamang, Myntri Khynnah ka tnad Development of North Eastern Region (DoNER) Sukanta Majumdar, Secretary ka tnad Kam Pohiing jong ka Sorkar Pdeng Govind Mohan, Secretary, ka Tnad Haw Haw Dr. S. Somnath bad u Director, Intelligence Bureau Tapan Deka, ki ophisar na ka Sorkar Pdeng bad ki Sorkr Jylla jong ka thain shatei lammihngi ki la iadon lang ha kane ka jingialang.

Ha ka jingai jingkren, u Amit Shah u la ong ba hapoh ka jingialam jong u Myntri Rangbah Duh, Narendra Modi, ki kam haw haw jong ka India ki la jam shaphrang ha kine ki 10 snem ba la dep. U la ong ba hadien 25 snem ka jingsdang ia ka NESAC Society, ki jingseisoh jong ki kam jong ka Society ki la sdang paw mynta. U la ong ba ka NESAC Society ka dei ban pyniar shuh shuh ia ki kam jong ka ha kine ki jylla bad na ka bynta kane, dei ban shim ia ki sienjam da ki Sorkar Jylla.

U Myntri ka tnad Kam Pohiing u la kyntu ia ka NESAC Society ba kan shim 100 ngut ki samla pule ha ki kam science na man ki jylla ka thain shatei lammihngi ba kin leit jngoh ia ka HQ jong ka Indian Space Research Organisation (ISRO) khnang ba kin don ka jingsngewtynnad ia ki kam kiba iadei bad ka haw haw bad ka teknoloji kaba iadei bad kane ka kam. U la kyntu ia ka tnad Development of North Eastern Region ba kan nohsynniang 60% na ka bynta kane ka kam. U Shah u la kyntu ruh ia ki Sorkar Jylla jong ka thain shatei lammihngi ba kin sdang ia ki jingpule ba thymmai kiba iadei bad ka teknoloji haw haw ha ki engineering kolej.

U Amit Sha u la ong ba la shna 20 tylli ki lad ka leit ka wan lyngba ki jaka shong um da ka jingiarap ka NESAC bad ka Society kadei ban peit ia ki lad ban shna shuh shuh kum kine ki lad ka leit ka wan. U la ong ba ka long kaba donkam ban pyniar ia ka jingithuh ia ki jak aba don ki mar poh khyndew, ka umphniang, bad ki par dewiong ha ki jylla ka thain. Kane kan iarap ia ka ioh ka kot jong ki jylla lynba ka jingkamai na ka jingtih ia kine ki mar.

U Myntri ki tnad Kam Pohiing bad Cooperation u la ong ba donkam ban tip ia ka jinglong jingman jong ka jingdon ki briew ha ki jaka khappud hapdeng ka India bad Myanmar, khamtam ha Nagaland, Mizoram bad Manipur ban iarap ia ka kam ban ker ia ki jaka khappud bad ka jingrung beain jong ki briew. U la ong ba na ka bynta kane, dei ban don ka khana samari kaba bniah ha ki jaka khappud.

U Amit Shah u la ong ba ka jingkyntiew ia ki jaka tap khlaw ka dei ban dei ka kam ba peit bniah da ka NESAC Society da kaba pyndonkam ia ka science kaba iadei bad ka haw haw. U la ong ba na ka bynta kane dei ban shim ia ki sienjam da kaba ianujor bad ki map kiba rim bad ki map ba thymmai bad bah aba don ka lad, dei ban shim ia ki sienjam ban thung ia ki dieng ha ka jingiatreilang bad ki Sorkar Jylla. Kumjuh u Myntri ka tnad Kam Poh Iing u la kyntu ia ka Society ba kan buh ia ki map shaphang ki jingshlei um ha ka thain shatei lammihngi.

U Myntri u la iaroh ia ki sienjam jong ka NESAC Society na ka bynta ka jingpyndonkam ia ka teknoloji haw haw na ka bynta ka jingpyniaid ia ki kam bad u la ban jur halor ka jingpyndonkam bha ia kane ha ka jingkyntiew ia ka jaka kaba bun ki jingeh kum ka thain shatei lammihngi ha ki por ban wan. U Shah u la ong ba ka NESAC Society ka dei ban peit bniah ia ki lad kamai pisa jong ka.

*****