কেন্দ্ৰীয় গৃহ আৰু সহযোগিতা মন্ত্ৰী শ্ৰী অমিত শ্বাহৰ সভাপতিত্বত আজি ত্ৰিপুৰাৰ আগৰতলাত উত্তৰ পূৰ্বাঞ্চল মহাকাশ প্ৰয়োগ কেন্দ্ৰ (নেছাক) সমিতিৰ দ্বাদশ বৈঠক অনুষ্ঠিত হয়। এই উপলক্ষে কেন্দ্ৰীয় যোগাযোগ আৰু উত্তৰ-পূৰ্বাঞ্চল উন্নয়ন মন্ত্ৰী শ্ৰীযুত জ্যোতিৰাদিত্য এম সিন্দিয়া, ত্ৰিপুৰাৰ মুখ্যমন্ত্ৰী ড° মানিক সাহা, অসমৰ মুখ্যমন্ত্ৰী শ্ৰী হিমন্ত বিশ্ব শৰ্মা, মণিপুৰৰ মুখ্যমন্ত্ৰী শ্ৰী এন বীৰেন সিং, অৰুণাচল প্ৰদেশৰ মুখ্যমন্ত্ৰী শ্ৰী পেমা খাণ্ডু, ছিক্কিমৰ মুখ্যমন্ত্ৰী প্ৰেম সিং তামাং, কেন্দ্ৰীয় উত্তৰ-পূব উন্নয়ন ৰাজ্যিক মন্ত্ৰী শ্ৰী সুকান্ত মজুমদাৰ, কেন্দ্ৰীয় গৃহ সচিব শ্ৰী গোবিন্দ মোহন, মহাকাশ বিভাগৰ সম্পাদক কে ড° এছ সোমনাথ আৰু চোৰাংচোৱা ব্যুৰোৰ সঞ্চালক শ্ৰী তপন ডেকা, কেন্দ্ৰীয় চৰকাৰ আৰু উত্তৰ-পূৰ্বাঞ্চলৰ ৰাজ্য চৰকাৰৰ উচ্চপদস্থ বিষয়াসকলৰ লগতে বহু বিশিষ্ট ব্যক্তি উপস্থিত থাকে।

নিজৰ ভাষণত শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীজীৰ নেতৃত্বত বিগত ১০ বছৰত ভাৰতৰ মহাকাশ খণ্ডই নতুন উচ্চতা লাভ কৰিছে। তেওঁ কয় যে নেছাক ছ’চাইটি প্ৰতিষ্ঠা হোৱাৰ ২৫ বছৰৰ পাছত এতিয়া ছ’চাইটিয়ে কৰি থকা কামৰ ইতিবাচক দিশবোৰ দেখা গৈছে। তেওঁ কয় যে নেছাক ছ’চাইটিয়ে এই ৰাজ্যসমূহত নিজৰ কামৰ পৰিসৰ আৰু অধিক বৃদ্ধি কৰিব লাগে। ইয়াৰ বাবে ৰাজ্য চৰকাৰসমূহেও প্ৰয়োজনীয় পদক্ষেপ গ্ৰহণ কৰিব লাগে।

শ্ৰী অমিত শ্বাহে নেছাক ছ’চাইটিক আহ্বান জনায় যে তেওঁ উত্তৰ-পূবৰ সকলো ৰাজ্যৰ পৰা বিজ্ঞানৰ পটভূমিৰ পৰা ১০০ জনকৈ ছাত্ৰ-ছাত্ৰীক ভাৰতীয় মহাকাশ গৱেষণা সংস্থা (ইছৰো)ৰ মুখ্য কাৰ্যালয় ভ্ৰমণ কৰাওক যাতে তেওঁলোকৰ মাজত অন্চৰীক্ষ আৰু ইয়াৰ লগত জড়িত প্ৰযুক্তিৰ বিষয়ে আগ্ৰহ জাগে। এই প্ৰকল্পৰ বাবে তেওঁ উত্তৰ-পূৰ্বাঞ্চল ৰাজ্যিক উন্নয়ন মন্ত্ৰালয়ক ৬০ শতাংশ বৰঙণি আগবঢ়াবলৈ অনুৰোধ জনায়। শ্ৰী শ্বাহে উত্তৰ-পূৰ্বাঞ্চলৰ ৰাজ্য চৰকাৰসমূহক অভিযান্ত্ৰিক মহাবিদ্যালয়সমূহত মহাকাশ প্ৰযুক্তি সম্পৰ্কীয় নতুন পাঠ্যক্ৰম আৰম্ভ কৰিবলৈও আহ্বান জনায়।

কেন্দ্ৰীয় গৃহমন্ত্ৰীগৰাকীয়ে কয় যে এতিয়ালৈকে নেছাকৰ সাহায্যই ২০টা জলপথ নিৰ্মাণত সহায় কৰিছে আৰু সমাজে অধিক জলপথ নিৰ্মাণৰ সম্ভাৱনাৰ সন্ধান কৰিব লাগে। তেওঁ কয় যে উত্তৰ-পূবৰ ৰাজ্যসমূহত খনিজ, তেল, কয়লাৰ মজুতৰ বিস্তৃত মেপিঙৰ প্ৰয়োজন আছে। উত্তৰ-পূৰ্বাঞ্চলৰ ৰাজ্যসমূহে এই খনিজসমূহৰ ওপৰত লাভ কৰা ৰয়েল্টিৰ পৰা অৰ্থনৈতিক লাভ পাব।

শ্ৰী অমিত শ্বাহে কয় যে ভাৰত-ম্যানমাৰ সীমান্তত বিশেষকৈ নাগালেণ্ড, মিজোৰাম, মণিপুৰত মানুহৰ বসতিস্থলসমূহৰ মেপিং হ’ব লাগে যাতে সীমান্তত বেৰ দিয়াত সহায়ক হয় আৰু অনুপ্ৰৱেশৰ গোচৰসমূহ তৎকালীনভাৱে ৰোধ কৰিব পৰা যায়। ইয়াৰ বাবে সীমান্ত অঞ্চলত এক বিস্তৃত জৰীপ চলোৱাৰ প্ৰয়োজনীয়তা আছে বুলিও তেওঁ কয়।

কেন্দ্ৰীয় গৃহমন্ত্ৰীগৰাকীয়ে কয় যে নেছাক ছ’চাইটিয়ে মহাকাশ বিজ্ঞান ব্যৱহাৰ কৰি বন সংবৰ্ধনৰ ওপৰত গুৰুত্ব দিব লাগে। তেওঁ কয় যে ইয়াৰ বাবে পুৰণি মানচিত্ৰসমূহ শেহতীয়া মানচিত্ৰৰ সৈতে তুলনা কৰি প্ৰয়োজনীয় পদক্ষেপ গ্ৰহণ কৰিব লাগে আৰু য’ত সম্ভাৱনা আছে তাত ৰাজ্য চৰকাৰসমূহৰ সহযোগত বৃক্ষৰোপণৰ বাবে প্ৰচেষ্টা চলাব লাগে। একেদৰে গৃহমন্ত্ৰীয়ে উত্তৰ-পূৰ্বাঞ্চলৰ ৰাজ্যসমূহত বানৰ মেপিং কৰিবলৈও কয়।

শ্ৰী অমিত শ্বাহে প্ৰশাসনত মহাকাশ প্ৰযুক্তিৰ উপযুক্ত আৰু ইতিবাচক ব্যৱহাৰৰ বাবে নেছাক ছ’চাইটিৰ প্ৰশংসা কৰে আৰু ভৱিষ্যতে উত্তৰ-পূৰ্বাঞ্চলৰ দৰে কঠিন ভৌগোলিক অঞ্চলৰ উন্নয়নত ইয়াৰ ব্যাপক ব্যৱহাৰৰ ওপৰত গুৰুত্ব আৰোপ কৰে। শ্ৰী শ্বাহে কয় যে নেছাক ছ’চাইটিয়ে নিজৰ ৰাজহ মডেল গঢ়ি তোলাৰ ওপৰতো গুৰুত্ব দিব লাগে।

**********

RK / VV / RR / PS