#IFFIWood, ২২ নবেম্বৰ ২০২৪

চাৰিবাৰৰ ৰাষ্ট্ৰীয় চলচ্চিত্ৰ বঁটা বিজয়ী আৰু পদ্মশ্ৰী বঁটা প্ৰাপ্ত প্ৰবীণ অভিনেতা মনোজ বাজপেয়ী ভাৰতৰ ৫৫ সংখ্যক আন্তঃৰাষ্ট্ৰীয় চলচ্চিত্ৰ মহোৎসৱত মুম্বাইত উপস্থিত থাকে, য'ত তেওঁৰ বহু প্ৰতীক্ষিত ছবি "দেচপাচ" 'বিশেষ উপস্থাপন'ৰ অংশ হিচাপে প্ৰদৰ্শিত হৈছে। আইএফএফআই ২০২৪ উপলক্ষে প্ৰেছ ইনফৰ্মেচন ব্যুৰো (পিআইবি)ৰ দ্বাৰা আয়োজিত এখন সংবাদমেলত মনোজ বাজপেয়ী, পৰিচালক কান্নু বেহ্ল, ঈশানী বেনাৰ্জী আৰু অভিনেত্ৰী শ্বাহনা গোস্বামীকে ধৰি ছবিখনৰ কলা-কুশলী আৰু কৰ্মচাৰীসকলে সংবাদ মাধ্যমৰ সৈতে বাৰ্তালাপ কৰে। তেওঁলোক সকলোৱে চলচ্চিত্ৰখনৰ প্ৰযোজনা, প্ৰত্যাহ্বান আৰু দেচপাচ চলচ্চিত্ৰৰ থীম সাংবাদিকতাৰ অন্ধকাৰ দিশটো আলোকপাত কৰা এই আকৰ্ষণীয় কাহিনীটোৰ ওপৰত আলোকপাত কৰে।

মনোজ বাজপেয়ীয়ে দেচপাচৰ যাত্ৰা আৰু ইয়াৰ নিৰ্মাণৰ সময়ত সন্মুখীন হোৱা প্ৰত্যাহ্বানৰ বিষয়ে আৱেগিকভাৱে কৈছিল। তেওঁ পৰিচালক কান্নু বেহ্লক তেওঁৰ অভিনৱ চলচ্চিত্ৰ নিৰ্মাণ পদ্ধতিৰ বাবে প্ৰশংসা কৰি তেওঁক আজিৰ দিনৰ আটাইতকৈ ৰোমাঞ্চকৰ চলচ্চিত্ৰ নিৰ্মাতা সকলৰ ভিতৰত এজন বুলি অভিহিত কৰিছিল।

“আমি মহামাৰীৰ সময়ত চিত্ৰগ্ৰহণ আৰম্ভ কৰিছিলো, যিটো নিজেই আছিল এক বৃহৎ প্ৰত্যাহ্বান। ডেল্টা ঢৌৰ সময়ত আমি মুম্বাইত শ্বুটিং কৰি আছিলো, আৰু আমাৰ বহুতেই আক্ৰান্ত হৈছিল। কিন্তু আমি তাৰ পিছতো প্ৰচণ্ড বাধা অতিক্ৰম কৰি শ্বুটিং অব্যাহত ৰাখিবলৈ উভতি আহিলোঁ।"-বাজপেয়ীয়ে শ্বেয়াৰ কৰে। “ঈশানী আৰু কান্নুৰ দ্বাৰা লিখা চিত্ৰনাট্যখন অবিশ্বাস্যভাৱে বাস্তৱ আৰু মনোমোহা। ই এজন সাংবাদিকৰ কাহিনী, যাৰ উচ্চাকাংক্ষা আৰু পেছাদাৰীত্বই তেওঁৰ ব্যক্তিগত জীৱনত প্ৰভাৱ পেলায়’-তেওঁ মন্তব্য কৰে।

বাজপেয়ীয়ে ছবিখনৰ চিত্ৰনাট্যৰ প্ৰভাৱৰ ওপৰতো চিন্তা-চৰ্চা কৰি চৰিত্ৰসমূহৰ গভীৰতা বুজিবলৈ অপৰিহাৰ্য কৰ্মশালাৰ বিস্তৃত প্ৰক্ৰিয়াটোৰ ওপৰত আলোকপাত কৰে। সাংবাদিকৰ চৰিত্ৰৰ বাবে কৰা তীব্ৰ প্ৰস্তুতিয়ে তেওঁক মানসিকভাৱে কেনেদৰে প্ৰভাৱিত কৰিছিল, কিন্তু অভিনেতা হিচাপেও তেওঁক বিকাশ হোৱাত সহায় কৰিছিল সেই বিষয়ে তেওঁ কয়।

“ঈশানী আৰু কান্নুৰ চিত্ৰনাট্য ইমান বিশদ আৰু বাস্তৱত শিপাই আছে। সকলো অভিনেতাৰ বাবে ই মানসিকভাৱে দাবীদাৰ আছিল যদিও শেষত ই প্ৰতিটো কষ্টৰ মূল্য আছিল।’-বাজপেয়ীয়ে লগতে কয়। সংবাদমেলৰ আঁত ধৰে ধৰ্মেন্দ্ৰ তিৱাৰী ডাঙৰীয়াই।

ছবিখনৰ বিষয়ে

দেচপাচত জয়ৰ কাহিনী অনুসৰণ কৰা হৈছে, এজন অপৰাধ সম্পাদক যিয়ে গেং যুদ্ধৰ সৈতে জড়িত গভীৰ শিপাই থকা দুৰ্নীতিৰ উন্মোচন কৰা কেৰিয়াৰ নিৰ্ধাৰণকাৰী তদন্তৰ সৈতে যুঁজিছে। পেছাদাৰী অস্থিৰতাৰ সমান্তৰালভাৱে জয়ে তেওঁৰ বিবাহৰ পতন আৰু তেওঁৰ আটাইতকৈ ওচৰৰ লোকসকলৰ পৰা বিশ্বাসঘাতকতাৰ সন্মুখীন হয়, যাৰ ফলত শেষত কৰুণ পৰিণতিৰ সৃষ্টি হয়। উচ্চাকাংক্ষা, লোভ আৰু ইয়াৰ দ্বাৰা নিজৰ ব্যক্তিগত আৰু পেছাদাৰী জীৱনত লোৱা ক্ষতিৰ সংযোগস্থলত ছবিখনে গভীৰভাৱে ডুব গৈছে। ২০২৪ চনৰ ১৩ ডিচেম্বৰত ছবিখনৰ আনুষ্ঠানিক মুক্তি।

কথোপকথন অধিবেশন

সংবাদমেলৰ উপৰিও মনোজ বাজপেয়ীয়ে আইএফএফআইৰ আঁৰত এক মনোমোহা কথোপকথন অধিবেশনত অংশগ্ৰহণ কৰে। এই অধিবেশনত ভাৰতৰ অন্যতম সন্মানীয় অভিনেতাজনৰ মনৰ এক বিৰল আভাস পোৱা গ’ল।

“যদি মই মোৰ গাড়ীৰ খিৰিকীখন ক’লা কৰি ৰাখোঁ, মই কেনেকৈ মানুহক, তেওঁলোকৰ দুখ আৰু সুখবোৰ চাম আৰু জীৱনটো নিৰীক্ষণ কৰিম। এজন অভিনেতা হিচাপে মই ভিৰৰ মাজত অদৃশ্য হৈ থাকিব বিচাৰো আৰু মানুহক পৰ্যবেক্ষণ কৰি তেওঁলোকৰ সৈতে সংযুক্ত হৈ থাকিব বিচাৰো। মানুহৰ পৰা আঁতৰি থাকিলে কেতিয়াও ভাল চৰিত্ৰ এটাক চিত্ৰিত কৰিব নোৱাৰিব”, প্ৰখ্যাত অভিনেতা মনোজ বাজপেয়ীয়ে এইদৰে কয়। ভাৰতীয় ৫৫ সংখ্যক আন্তঃৰাষ্ট্ৰীয় চলচ্চিত্ৰ মহোৎসৱ (আই এফ এফ আই)ৰ আঁৰত এক মনোমোহা ইন-কনভাৰ্চেচন চেচনত ভাষণ দি তেওঁ কয় যে আন এজন ব্যক্তিক চিত্ৰিত কৰাটো বিশ্বৰ আটাইতকৈ কঠিন কাম বুলি বাজপেয়ীয়ে আত্মপোষন কৰে।

এই প্ৰতিফলিত আৰু স্পষ্টবাদী কথোপকথনত একাধিক বঁটা বিজয়ী অভিনেতাগৰাকীয়ে অভিনয়ৰ ক্ষেত্ৰত তেওঁৰ দৃষ্টিভংগীৰ আভ্যন্তৰীণ কাম-কাজ উন্মোচন কৰি এই কথাত গুৰুত্ব আৰোপ কৰে যে অভিনেতা হিচাপে তেওঁৰ ভূমিকা কেৱল দৰ্শকক মনোৰঞ্জন বা মোহিত কৰাই নহয়, বৰঞ্চ তেওঁলোকক সঁচা অৰ্থত প্ৰতিনিধিত্ব কৰাহে। তেওঁ কয়, “এজন অভিনেতাৰ অভিনয়ে কেৱল মানুহক আকৰ্ষণ বা মনোৰঞ্জন দিয়াই নহয়, মানুহক প্ৰতিনিধিত্ব কৰি গভীৰভাৱে স্পৰ্শ কৰা উচিত।” তেওঁ এই কলাৰ প্ৰতি থকা আকৰ্ষণৰ বিষয়েও আবেগিকভাৱে কয়, অভিনয় কৰাটো এটা কেতিয়াও শেষ নহ’ব পৰা প্ৰক্ৰিয়া যিয়ে তেওঁক মোহিত আৰু পৰিচালিত কৰি থাকে বুলি উল্লেখ কৰে।

ভ্ৰাম্যমাণ আৰু চলচ্চিত্ৰৰ মাজৰ পাৰ্থক্যৰ বিষয়েও আলোচনা কৰি অভিনেতাগৰাকীয়ে এই কথাত গুৰুত্ব আৰোপ কৰে যে ভ্ৰাম্যমাণ অভিনেতাৰ মাধ্যম যদিও ছবি মৌলিকভাৱে পৰিচালকৰ মাধ্যম। তেওঁ ব্যাখ্যা কৰে যে, "চিনেমাত আন বহুতো উপাদান আৰু মাত্ৰা খেলা-ধূলা কৰা হয়, যিয়ে চূড়ান্ত আখ্যানক গঢ় দিয়ে। ই এক সহযোগিতামূলক প্ৰক্ৰিয়া।"

বহুমুখীতাৰ বাবে পৰিচিত অভিনেতাগৰাকীয়ে কোনো বিশেষ ধৰণৰ চিনেমাত আবদ্ধ হৈ থাকিবলৈ অস্বীকাৰ কৰি বিভিন্ন ভূমিকা আৰু ধাৰাসমূহৰ অন্বেষণ অব্যাহত ৰখাৰ ইচ্ছা প্ৰকাশ কৰিছিল। তেওঁ লগতে কয়, "মই নিজকে মূলসুঁতিৰ চিনেমা বা কোনো বিশেষ ধাৰাত সীমাবদ্ধ ৰাখিব নিবিচাৰো। মই সদায় প্ৰতিটো নতুন প্ৰজেক্টৰ সৈতে মোৰ চৰিত্ৰসমূহক অন্বেষণ কৰিবলৈ বিচাৰো। মোৰ মনোযোগ সদায় এনে এটা অভিনয় প্ৰদান কৰাতহে আছিল যিয়ে টেবুলত কিবা এটা অনন্য আনে।"

সমাজ আৰু চলচ্চিত্ৰ উদ্যোগ উভয়ৰে বৰ্তমানৰ অৱস্থাক লৈ উদ্বেগ প্ৰকাশ কৰি তেওঁ কয় যে এইটো এটা কঠিন সময়, যেতিয়া সমাজখনৰ লগতে উদ্যোগটোও অনিশ্চয়তা, সংঘাত আৰু বিভ্ৰান্তিৰে ভৰি আছে। স্বতন্ত্ৰ চিনেমা একমাত্ৰ ধাৰা, যি চিনেমাৰ কলাৰ প্ৰতি সত্যতাৰে থাকে। ‘ভাৰতীয় চিনেমাৰ বৃদ্ধি নিশ্চিত কৰিব পৰা স্বতন্ত্ৰ চিনেমাক মেণ্টৰ কৰাৰ সময় আহি পৰিছে। ইয়াৰ অবিহনে চিনেমা আন একো নহ’লহেঁতেন, ব্যৱসায়ৰ বাহিৰে।“, তেওঁ দৃঢ়তাৰে কয়।

অভিনয় কলা আৰু ভাৰতীয় চিনেমাৰ ভৱিষ্যতৰ প্ৰতিফলনেৰে সমৃদ্ধ এই কথোপকথনে মনোজ বাজপেয়ীৰ নিজৰ কলাৰ প্ৰতি থকা দায়বদ্ধতা আৰু গল্প কোৱাৰ শক্তিৰ ওপৰত সমাজক প্ৰতিফলিত আৰু গঢ় দিয়াৰ ওপৰত তেওঁৰ বিশ্বাসৰ প্ৰমাণ আছিল। এই আকৰ্ষণীয় অধিবেশনৰ আঁত ধৰে বিশিষ্ট চলচ্চিত্ৰ সমালোচক সুধিৰ শ্ৰীনিবাসনে।

******

PIB IFFI CAST AND CREW | Rajith/Nikita/Swadhin/Dhanalakshmi/Darshana | IFFI 55 - 45/AA