0 4

#IFFIWood, 22 नोव्‍हेंबर 2024 

चार फावटीं राष्ट्रीय पुरस्कार विजेतो आनी पद्मश्री मेळोवपी प्रशंसीत अभिनेतो मनोज बाजपेयी भारताच्या 55व्या आंतरराष्ट्रीय चित्रपट महोत्सवांत वाटेकार जाला, जंय ताचो खूब प्रतीक्षीत चित्रपट डिस्पॅच ‘स्पेशल प्रेजेंटेशन्स’ खाला सिनेप्रेक्षकांक दाखयतले. इफ्फी 2024 च्या फांटभुयेर  प्रेस इन्फॉर्मेशन ब्युरोन आयोजीत केल्ले पत्रकार परिशदे वेळार मनोज बाजपेयी, दिग्दर्शक कन्नू बेहल, इशानी बॅनर्जी, अभिनेत्री शहाना गोस्वामी सयत फिल्माचे हेर कलाकार आनी वांगड्यानी  प्रसार माध्यमां कडेन संवाद सादलो आनी फिल्माच्या निर्मिती, आव्हानां आनी पत्रकारितेची काळी बाजू मांडपी काणयेचेर उजवाड घालो.

मनोज बाजपेयी डिस्पॅच फिल्माच्या प्रवासाचेर आनी ताच्या निर्मिती वेळार आयिल्ल्या आव्हानां विशीं उमेदीन उलयलें. बाजपेयी हांणी दिग्दर्शक कन्नू बेहल हाच्या अभिनव चित्रपट निर्मिती पद्दतीची तोखणाय करून ताका आयच्या काळांतलो एक रोमांचक चित्रपट निर्मातो अशें म्हणलें.

“आमी महामारीच्या काळांत चित्रीकरणाक  सुरवात केल्ली, जें एक व्हड  आव्हान आशिल्लें. डेल्टा महामारी ल्हारां वेळार आमी मुंबय शूटिंग करताले, आनी आमच्यांतल्या जायत्या जाणांक संसर्ग जालो. पूण ताचे उपरांत जायत्या आडमेळींक तोंड दित शूटिंग चालू दवरले अशें बाजपेयी हांणी सांगले . “ईशानी आनी कान्नू हांणी बरयल्ली ही पटकथा अविश्वसनीय रितीन वास्तव आनी मन भुलोवपी आसा. ही एक पत्रकाराची काणी, जाची महत्वाकांक्षा आनी वेवसायीक तळमळ ताच्या वैयक्तीक जिविताचेर परिणाम करता,” अशी म्हायती तांणी दिली. 

पात्रांची खोलाय समजून घेवपाक गरजेच्या कार्यशाळांची पुराय प्रक्रिया उजवाडाक हाडून बाजपेयीन चित्रपटाच्या पटकथेच्या परिणामाचोय उल्लेख  केलो. पत्रकाराच्या भुमिके खातीर केल्ल्या खर तयारीचो मानसीक परिणाम जालो, पूण एक अभिनेतो म्हण उदरगत जावपाक आदार जालो अशे सांगतानाच तांणी आपलो अणभव उक्तायलो. 

“ईशानी आनी कन्नू हांची पटकथा सविस्तर आनी वास्तवांत रुजल्या. ह्या फिल्माखातीर सगळ्या कलाकारांकडल्यान मानसीक नदरेन मागणी आशिल्ली, पूण निमाणें दरेक यत्न करप फावो आशिल्ले अशें बाजपेयी हांणी सांगलें. पत्रकार परिशदेचें संचालन श्री धर्मेंद्र तिवारी हांणी केलें.

फिल्मा विशीं :

डिस्पॅच फिल्म जॉय ह्या क्राईम संपादकाची काणी सांगता, जो गॅंग झुजां कडेन संबंदीत खोल रुजल्ल्या भ्रश्टाचारा आड लडटाना करिअर-परिभाषित चवकशीत आडकता. वेवसायीक अस्थिरताये वांगडाच जॉयक आपलें लग्न तूटप आनी लागींच्या लोकां कडल्यान विश्वासघाताक तोंड दिवचें पडटा, निमाणें ताचे दुख्खद परिणाम जातात. महत्वाकांक्षा, लोभ आनी ताच्या वैयक्तीक आनी वेवसायीक जिणेचेर जावपी परीणाम ह्या विशयात हो चित्रपट खोलायेन पावता. ह्या सिनेमा  अधिकृतरित्या 13 डिसेंबर 2024 दिसा प्रदर्शीत जाता.

संवाद सत्र :

पत्रकार परिशदे भायर मनोज बाजपेयी हांणी इफ्फीच्या धर्तरेर मन भुलोवपी संवाद सत्रांत वांटो घेतलो. ह्या सत्रांत भारतांतल्या एका मानाच्या अभिनेत्याच्या मनांची एक दुर्मिळ झलक पळोवपाक मेळ्ळी.

“जर जिवीताच्या गाडयेची जनेलां काळीं दवरल्यार लोक,तांचीं दुख्खां, खोशी आनी जिविताचें निरिक्षण कशें करूंक मेळटले. एक नट म्हूण म्हाका गर्देंत अदृश्य रावून लोकांचें निरिक्षण करपाक आनी तांचे कडेन जोडून रावपाक आवडटा. लोकां पासून पयस रावल्यार केन्नाच बरें पात्र सादर करपाक जमना”, अशें नामनेचो अभिनेतो मनोज बाजपेयी हांणी सांगलें. 55व्या भारतीय आंतरराष्ट्रीय चित्रपट महोत्सवाच्या धर्तरेर मन भुलोवपी संवाद सत्रांत संबोधीत करतना तांणी सांगलें की, दुसऱ्या मनशाचें चित्रण करप हें संवसारांतलें सगळ्यांत कठीण काम आसा. 

ह्या चिंतनशील आनी प्रामाणीक संवादांत, जायत्या पुरस्कार फावो जाल्ल्या अभिनेत्यान ताची अभिनयाची पद्दत उक्ती केली. अभिनेतो म्हूण आपली भुमिका फकत प्रेक्षकांचें मनरिजवण करप न्हय, तर तांकां खऱ्या अर्थान प्रतिनिधित्व करप अशें तांणी सांगले . ताणें म्हणलें, “एक नटाच्या अभिनयान फकत लोकांचे  मनरिजवण करुंक जायना, पूण लोकांचें प्रतिनिधित्व करुंक जाय आनी खोलायेन तांच्या मनाक स्पर्श करुंक जाय.” अभिनय ही एक केन्नाच सोंपनाशिल्ली प्रक्रिया आसा जी आपल्याक मोहित करता आनी आपली उमळशीक वाडयता अशें सांगून ताणें अभिनयाचेर आशिल्ल्या आपल्या मोगाविशीं भावना उक्तायली. 

रंगमांची आनी चित्रपट हांचे मदल्या भेदाचेरूय अभिनेत्यान भासाभास करून रंगमांची हें अभिनेत्याचें माध्यम आसलें तरी चित्रपट मुळाव्यान दिग्दर्शकाचें माध्यम असो भर दिलो. "सिनेमांत आनीक जायते घटक आनी आयाम आसतात, जे निमाण्या कथनाक आकार दितात. ही एक सहकार्याची प्रक्रिया" अशें तांणी स्पश्ट केलें.

आपल्या बहुमुखी प्रतिभे खातीर नामना मेळिल्ल्या ह्या अभिनेत्यान खंयच्याय खाशेल्या प्रकारच्या सिनेमांत मर्यादीत रावपाक न्हयकार दिवन विंगड विंगड भुमिका आनी प्रकार सोदून काडपाची इत्सा उक्तायली. "हांव मुखेल प्रवाहांतल्या सिनेमाक वा खंयच्याय विशिश्ट प्रकाराक मर्यादीत करुंक सोदना. दर एका नव्या प्रकल्पा वांगडा म्हज्या पात्रांचो सोद घेवपाचो यत्न हांव सदांच करतां. मांचयेर  कितें तरी खाशेलें हाडपी सादरीकरण दिवपाचेर म्हजें लक्ष सदांच आशिल्लें," अशें तांणी सांगलें.

समाज आनी फिल्म उद्देग ह्या दोनूय मळार सध्याच्या स्थितीचेर हुस्को उक्तायतना तांणी सांगलें, हो कठीण काळ, जेन्ना समाज तशेंच उद्देग अनिश्चितताय, संघर्श आनी गोंदळ हांणी भरिल्लो आसा. स्वतंत्र सिनेमा हो एकूच प्रकार, जो सिनेमाचे कलेकडेन खरेपणान उरता. “भारतीय सिनेमाची वाड सुनिश्चीत करपाक शकता अशा स्वतंत्र सिनेमाक मार्गदर्शन करपाची वेळ आयल्या. ताचे बगर सिनेमा आनीक कांयच नासतलो, पूण फक्त वेवसाय आसतलो.”, अशे ताणें स्पश्ट केलें.

अभिनय कलेचेर आनी भारतीय सिनेमाच्या फुडाराचेर चिंतनांनी भरिल्लो हो  संवाद मनोज बाजपेयीच्या आपल्या कलेकडेन आशिल्ल्या वचनबद्धतेचें आनी कथाकथनाचेर आशिल्ल्या विस्वासाचे प्रतिबिंब आसा जे समाजाक आकार दिता. ह्या मन भुलोवपी सत्राचें संचालन नामनेचो फिल्म समीक्षक सुधीर श्रीनिवासन हाणें केलें.

* * *

PIB IFFI CAST AND CREW | Subhash/Utkarsha/Darshana | IFFI 55