مرکزی وزیر داخلہ اور امدادِ باہمی کے وزیر جناب امت شاہ نے آج نئی دہلی میں ہریانہ کے وزیر اعلیٰ جناب نائب سنگھ سینی کی موجودگی میں تین نئے فوجداری قوانین کے نفاذ پر ایک جائزہ میٹنگ کی صدارت کی۔ میٹنگ میں ہریانہ میں پولیس، جیلوں، عدالتوں، استغاثہ اور فارینسک سے متعلق مختلف نئی دفعات کے نفاذ اور موجودہ صورتحال کا جائزہ لیا گیا۔ مرکزی داخلہ سکریٹری، وزیر اعلیٰ ہریانہ کے چیف پرنسپل سکریٹری، ریاست کے چیف سکریٹری اور پولیس کے ڈائریکٹر جنرل (ڈی جی پی)، بیورو آف پولیس ریسرچ اینڈ ڈیولپمنٹ (بی پی آر اینڈ ڈی) کے ڈائریکٹر جنرلس، نیشنل کرائم ریکارڈ بیورو کے ڈائریکٹر جنرل (این سی آر بی) اور وزارت داخلہ اور ریاستی حکومت کے کئی سینئر افسران میٹنگ میں موجود تھے۔

میٹنگ میں تبادلہ خیال کے دوران مرکزی وزیر داخلہ نے کہا کہ وزیر اعظم جناب نریندر مودی کی قیادت میں تین نئے فوجداری قوانین شہری حقوق کے محافظ اور 'انصاف بہم رسانی میں آسانی' کی بنیاد بن رہے ہیں۔ وزیر داخلہ نے ہریانہ سے کہا کہ 31 مارچ 2025 تک ریاست میں نئے فوجداری قوانین کے 100 فیصد نفاذ کو یقینی بنایا جائے۔

ٹکنالوجی کے استعمال پر زور دیتے ہوئے جناب امت شاہ نے کہا کہ ریاست کے ہر ضلع میں ایک سے زیادہ فرانزک موبائل وین دستیاب ہونی چاہیے۔ انہوں نے اس بات پر زور دیا کہ زیرو ایف آئی آر کی نگرانی کی ذمہ داری ڈپٹی سپرنٹنڈنٹ آف پولیس (ڈی وائی . ایس پی) رینک کے افسر کی ہونی چاہئے، اور ریاستوں کے مطابق ان کا دوسری زبانوں میں ترجمہ یقینی بنایا جانا چاہئے۔ وزیر داخلہ نے کہا کہ ریاست کے ڈائرکٹر جنرل آف پولیس (ڈی جی پی) کو تمام پولیس اہلکاروں کو یہ احساس دلانا چاہئے کہ بروقت انصاف فراہم کرنا ان کی ترجیح ہے۔

مرکزی وزیر داخلہ اور تعاون کے وزیر نے ہریانہ کے پولیس ڈائریکٹر جنرل کو مشورہ دیا کہ وہ اس بات کو یقینی بنائیں کہ تمام سپرنٹنڈنٹ آف پولیس مقدمات کی جانچ مقررہ وقت کے اندر کریں۔ انہوں نے مزید کہا کہ ہریانہ کے وزیر اعلیٰ کو ہر 15 دن میں تین نئے قوانین کے نفاذ کی پیشرفت کا جائزہ لینا چاہئے اور چیف سکریٹری اور ڈائرکٹر جنرل آف پولیس کو ہفتہ میں ایک مرتبہ تمام متعلقہ محکموں کے عہدیداروں کے ساتھ ملاقات کرنی چاہئے۔

**********

 (ش ح –ا ب ن)

U.No:3771