কেন্দ্ৰীয় বন্দৰ, জাহাজ পৰিবহন আৰু জলপথ মন্ত্ৰী শ্ৰী সৰ্বানন্দ সোণোৱালে উত্তৰ-পূৰ্বাঞ্চলৰ শক্তি পুনৰুজ্জীৱিতকৰণ আৰু নৱীকৰণৰ ৰাজনৈতিক ৰণনীতিৰ অংশ হিচাপে সুশাসন আৰু উন্নয়নমূলক ৰাজনীতিৰ গুৰুত্বপূৰ্ণ ক্ষেত্ৰসমূহত কেন্দ্ৰীভূত কৰাৰ বাবে প্ৰধানমন্ত্ৰী শ্ৰী নৰেন্দ্ৰ মোদীক কৃতিত্ব প্ৰদান কৰে। উত্তৰ-পূবৰ জ্যেষ্ঠ নেতাগৰাকীয়ে মোদী চৰকাৰৰ দ্বাৰা শাসনৰ পৰিৱৰ্তনশীল দশকটোৱে কেনেদৰে উত্তৰ-পূব ভাৰতত এক নতুন শক্তিৰ সৃষ্টি কৰিছে সেই বিষয়ে উল্লেখ কৰি কয় যে ইয়াৰ লক্ষ্য হৈছে এখন দেশ আত্মনিৰ্ভৰ হোৱাৰ অন্বেষণৰ বাবে বিকাশৰ ইঞ্জিনক শক্তি প্ৰদান কৰা।

প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত এন ডি এ চৰকাৰৰ গুৰুত্বপূৰ্ণ সাফল্যৰ বিষয়ে আলোকপাত কৰি কেন্দ্ৰীয় মন্ত্ৰী শ্ৰী সৰ্বানন্দ সোণোৱালে কয়, "উত্তৰ-পূৰ্বাঞ্চলে এই সুন্দৰ অঞ্চলটো প্ৰকৃতি মাতৃৰ আশীৰ্বাদ হিচাপে লাভ কৰিছে, কিন্তু এন ডি এ চৰকাৰ শাসনলৈ অহাৰ পূৰ্বৰ চৰকাৰসমূহে এই অঞ্চলটোক উপেক্ষা কৰি আহিছে। প্ৰধানমন্ত্ৰী শ্ৰী নৰেন্দ্ৰ মোদী জীৰ গতিশীল নেতৃত্বত, নিষ্ক্ৰিয়তা, দুৰ্নীতি আৰু অজ্ঞতাত আৱদ্ধ চৰকাৰসমূহৰ দ্বাৰা দশকজুৰি জড়তাত থকা এই অঞ্চলৰ যোৱা এটা দশকত ডাঙৰ পৰিৱৰ্তন ঘটিছে। এই দশকৰ পৰিৱৰ্তনে উত্তৰ-পূবত নতুন শক্তিৰ সৃষ্টি কৰিছে। গৌৰৱ আৰু সম্ভাৱনাৰে আত্মবিশ্বাসী জনসাধাৰণে এতিয়া উপেক্ষিত অনুভৱ নকৰে, কিয়নো তেওঁলোকে দেশৰ আন প্ৰান্তৰ পৰা অহা তেওঁলোকৰ ভাই-ভনীসকলৰ সৈতে এক আত্মনিৰ্ভৰ ভাৰতত প্ৰধানমন্ত্ৰী নৰেন্দ্ৰ মোদী জীৰ দৃষ্টিভংগী উপলব্ধি কৰি কাম কৰি আছে।

প্ৰধানমন্ত্ৰী শ্ৰী নৰেন্দ্ৰ মোদীয়ে সুশাসন আৰু উন্নয়নমূলক ৰাজনীতি কেন্দ্ৰীভূত কৰি উত্তৰ-পূৰ্বাঞ্চলক ভাৰতৰ বিকাশ ইঞ্জিন হিচাপে পুনৰুজ্জীৱিত কৰাৰ ৰণনীতি স্থাপন কৰিছে। স্পষ্ট অভিপ্ৰায় আৰু কঠোৰ পৰিশ্ৰমৰ সৈতে সফলতাৰ প্ৰতি আগ্ৰহী এই দ্বৈত দৃষ্টিভংগীৰ ফল পোৱা গৈছে কিয়নো অঞ্চলটোৰ দূৰৱৰ্তী কোণৰ লোকসকলে তেওঁলোকৰ দুৱাৰমুখত কল্যাণমূলক সেৱা উপভোগ কৰিছে। ২০১৪ চনৰ আগতে উত্তৰ-পূবৰ বেছিভাগ লোকৰ বাবে এয়া কল্পনাৰ অগোচৰ আছিল। আজি আমি এই পৰিৱৰ্তন, এই বিকাশ, জীৱনৰ মানৰ এই উন্নীতকৰণক লৈ জীয়াই আছোঁ যিয়ে আমাক ৰাষ্ট্ৰ নিৰ্মাণৰ উদ্দেশ্যৰ বাবে আকাংক্ষা, সন্ধান আৰু প্ৰতিশ্ৰুতিবদ্ধ কৰাৰ ক্ষমতা প্ৰদান কৰিছে।"

অঞ্চলটোৰ কিছু গুৰুত্বপূৰ্ণ উন্নয়নৰ বিষয়ে উল্লেখ কৰি কেন্দ্ৰীয় মন্ত্ৰী শ্ৰী সৰ্বানন্দ সোণোৱালে কয়, "প্ৰধানমন্ত্ৰী নৰেন্দ্ৰ মোদী জীৰ নেতৃত্বত এন ডি এ চৰকাৰৰ বাবে উত্তৰ-পূব অগ্ৰাধিকাৰ হৈ আছে। ২০১৪ চনৰ পৰা, অঞ্চলটোৱে বাজেট ব্যয়ত ৩০০% তকৈও অধিক বৃদ্ধি লাভ কৰিছে। ২০১৪ চনত ৩৬,১০৮ কোটি টকাৰ পৰা ২০২৩-২৪ বিত্তীয় বৰ্ষত অঞ্চলটোৰ বাবে বাজেট ব্যয় ৯৪,৬৮০ কোটি টকা হৈছে। আন্তঃগাঁথনিৰ ক্ষেত্ৰত, ৰাষ্ট্ৰীয় ঘাইপথৰ সম্প্ৰসাৰণত ২৮% উল্লেখযোগ্য বৃদ্ধি পঞ্জীয়ন কৰা হৈছে। ২০১৪ চনলৈকে, অঞ্চলটোত ৮০টা ৰাষ্ট্ৰীয় ঘাইপথ (এনএইচ) আছিল যি ২০২৩ চনলৈ ১০৩টালৈ বৃদ্ধি হৈছে। আন্তঃগাঁথনি উন্নয়ন আঁচনিৰ সৰ্বাধিক ২৬ গুণ বৃদ্ধি হৈ ৯৪ কোটি টকাৰ পৰা ২,৪৯১ কোটি টকা হৈছে। প্ৰতি বছৰে ১৯৩ কিলোমিটাৰৰো অধিক ৰে'ল লাইন সম্প্ৰসাৰিত কৰি ৰে'ল বিভাগে অঞ্চলটোৰ যোগাযোগ ব্যৱস্থাৰ উন্নতি কৰিছে।

অঞ্চলটোৰ বাবে ৰে'ল বাজেট ৩৭০% বৃদ্ধি হৈছে। আমি অঞ্চলটোত ব্ৰডগজৰ ১০০% বৈদ্যুতিকীকৰণ সম্পূৰ্ণ কৰিছো। পূৰ্বৱৰ্তী শাসনৰ ৬০ বছৰত, অঞ্চলটোত মাত্ৰ ৯টা কাৰ্যকৰী বিমানবন্দৰ আছিল। প্ৰধানমন্ত্ৰী নৰেন্দ্ৰ মোদীৰ অধীনত এটা দশকৰো কম সময়ৰ ভিতৰত, অঞ্চলটোত এতিয়া ১৭টা কাৰ্যকৰী বিমান বন্দৰ আছে। অঞ্চলটোৰ দূৰৱৰ্তী এলেকাৰ লোকসকলক কল্যাণমূলক আঁচনি প্ৰদান কৰাৰ ক্ষেত্ৰত, ৭০০০ৰো অধিক গাঁৱত নলযোগে খোৱা পানীৰ সুবিধা আছে। এই দশকত, অঞ্চলটোত বিশ্ববিদ্যালয়ৰ সংখ্যা ৩৯% বৃদ্ধি হৈছে। জৈৱিক কৃষিৰ প্ৰচাৰৰ লক্ষ্যৰে ১.৫৫ লাখ হেক্টৰৰ অধিক ভূমি ব্যৱহৃত হৈছে। ৪,০১৬ কিলোমিটাৰৰো অধিক পথ প্ৰকল্প চলি আছে আনহাতে উত্তৰ-পূবৰ প্ৰায় সকলো স্থানতে ৪জি সংযোগ স্থাপন কৰা হৈছে।

জলপথৰ পুনৰুজ্জীৱিতকৰণৰ ক্ষেত্ৰত কৰা কামৰ বিষয়ে উল্লেখ কৰি কেন্দ্ৰীয় বন্দৰ, জাহাজ পৰিবহন আৰু জলপথ মন্ত্ৰীগৰাকীয়ে কয়, "প্ৰধানমন্ত্ৰী শ্ৰী নৰেন্দ্ৰ মোদীয়ে দেশৰ আভ্যন্তৰীণ জলপথসমূহক পৰিবহনৰ এক মূল্যৱান বিকল্প মাধ্যম হিচাপে পুনৰুজ্জীৱিত কৰাৰ বাবে সদায় গুৰুত্ব প্ৰদান কৰি আহিছে যিটো অৰ্থনৈতিক আৰু পাৰিপাৰ্শ্বিকভাৱে উন্নত তথা দক্ষ। ৰাষ্ট্ৰীয় জলপথ ২ হিচাপে মনোনীত ব্ৰহ্মপুত্ৰ বংগোপসাগৰৰ মাজেৰে বিশ্বৰ সৈতে বাণিজ্য কৰিবলৈ ব্যৱহাৰ কৰা হয়। প্ৰধানমন্ত্ৰী শ্ৰী নৰেন্দ্ৰ মোদী জীৰ দূৰদৰ্শী নেতৃত্বত আমি ভাৰত বাংলাদেশ প্ৰটোকল ৰুট (আইবিপিআৰ)ৰ জৰিয়তে এই পথটো পুনৰুজ্জীৱিত কৰিবলৈ সক্ষম হৈছো, যাৰ ভিতৰত আছে বাংলাদেশ, ভূটান আৰু নেপালৰ দৰে চুবুৰীয়া দেশসমূহৰ বাবে বাণিজ্যৰ সুবিধা প্ৰদান কৰা।

উত্তৰ-পূবৰ বাবে জলপথৰ তিনিকোণীয়া দৃষ্টিভংগীৰে আন্তঃগাঁথনিৰ বিকাশৰ ওপৰত গুৰুত্ব আৰোপ কৰা হৈছে, নদীৰ পৰ্যটনৰ অপৰিসীম সম্ভাৱনা বৃদ্ধি কৰাৰ লগতে জলপথৰ জৰিয়তে বাণিজ্য আৰু যাত্ৰীসকলৰ বাবে সামগ্ৰী কঢ়িয়াই অনাত উদগনি দিয়া হৈছে। চৰকাৰে ব্ৰহ্মপুত্ৰৰ ৮৯১ কিলোমিটাৰৰ লগতে বাংলাদেশ সীমান্তৰ পৰা নিমাতীলৈ ২.৫০ মিটাৰ, নিমাতীৰ পৰা ডিব্ৰুগড়লৈ ২ মিটাৰ আৰু ডিব্ৰুগড়ৰ পৰা ১.৫ মিটাৰ ফেয়াৰৱে বিকাশৰ কাম কৰি আছে। আন্তঃগাঁথনিৰ বাবে, পাণ্ডু বন্দৰত ২০৮ কোটি টকা বিনিয়োগেৰে অঞ্চলটোৰ প্ৰথমখন জাহাজ মেৰামতি কাৰখানা নিৰ্মাণ কৰা হৈছে আনহাতে পাণ্ডু বন্দৰৰ পৰা ৰাষ্ট্ৰীয় ঘাইপথ ২৭ লৈ ১৮০ কোটি টকা বিনিয়োগেৰে এটা উন্নত পথ নিৰ্মাণ কৰা হৈছে। পাণ্ডু, ধুবুৰী, বগীবিল আৰু যোগীঘোপাত স্থায়ী কংক্ৰিত টাৰ্মিনেল নিৰ্মাণ কৰা হয়। আনহাতে মাল্টি মডেল যোগীঘোপা টাৰ্মিনেল প্ৰায় সম্পূৰ্ণ হৈছে।

এনডব্লিউ ২ ৰ কাষৰ ১১ টা স্থানত ফ্লোটিং জেটি বা মঞ্চ নিৰ্মাণ কৰা হৈছে। চৰকাৰে বিশ্বৰ আটাইতকৈ দীঘল নদী ভ্ৰমণ গংগা বিলাসৰ সফলতাৰ সৈতে নদীৰ পৰ্যটন পুনৰুজ্জীৱিত কৰাৰ ওপৰতো কাম কৰি আছে। চৰকাৰে বিশ্বনাথ, নিয়মাতী, গুইজান আৰু শিলঘাটৰ দৰে এনডব্লিউ ২ৰ কাষৰ একাধিক স্থানত পৰ্যটকৰ বাবে ফ্লোটিং জেটি নিৰ্মাণ কৰি আছে, যি অঞ্চলটোত নদীৰ পৰ্যটনৰ সম্ভাৱনা অধিক শক্তিশালী কৰিব।"

সোণোৱালে বহু দশক ধৰি কৰা অপশাসনৰ বাবে পূৰ্বৰ চৰকাৰক তীব্ৰ সমালোচনা কৰে। সোণোৱালে কয়, "পূৰ্বৰ চৰকাৰে উত্তৰ-পূবৰ জনসাধাৰণৰ ওচৰত ক্ষমা বিচাৰিব লাগিব। প্ৰাক্তন প্ৰধানমন্ত্ৰী ড০ মনমোহন সিং উত্তৰ-পূবৰ এজন সাংসদ আছিল, কিন্তু তেওঁ কেতিয়াও অঞ্চলটোৰ উন্নতিৰ বাবে একো বিশেষ কাম কৰা নাছিল। প্ৰধানমন্ত্ৰী নৰেন্দ্ৰ মোদীৰ নেতৃত্বত বৰ্তমানৰ চৰকাৰে অঞ্চলটোত শান্তি নিশ্চিত কৰাৰ ফলত বিনিয়োগ আৰু উন্নয়নৰ পৰিৱেশ সৃষ্টি হৈছে আৰু পূৰ্বৰ চৰকাৰসমূহৰ বিদ্ৰোহ আৰু হিংসাৰ অন্ধকাৰৰ দিনবোৰ এতিয়া অতীত হৈ পৰিছে। আজি অঞ্চলটোৰ খেলুৱৈসকলে শীৰ্ষ গোলকীয় প্ৰতিযোগিতাত অংশগ্ৰহণ কৰিব পাৰিছে আৰু দেশৰ বাবে সুনাম অৰ্জন কৰিব পাৰিছে। এইটো কেৱল মোদী চৰকাৰৰ সুশাসন আৰু উন্নয়নৰ বাবেহে সম্ভৱ হৈছে।"

****

DS/AK/MK/BB