Hapoh ka jingialam jong u Myntri Rangbah duh, Narendra Modi, ka Accessible India Campaign (AIC) ka la kylla long ka sienjam kaba thmu ban wanrah ia ka jinglong jingman kaba lait na ki jingwit ia ki briew kiba don jing duna ha ki dkhot met. La plie paidbah ha ka 3 tarik Nohprah, 2015 kane ka prokram ba kyrpang ka la pynkylla ia ka .jingkynthup bad jingdon bynta ha India, kaba iahap bad ka United Nations Convention on the Rights of Persons with Disabilities (UNCRPD).

Katba ka AIC ka rakhe ka jingdap 9 snem ki sienjam ban pynthikna ka jingai bynta lang ia baroh, ki jingjop jong ka ha ki lai tylli ki rishot kilong kumne harum:

1. Ki jaka paidbah:

• La pynlong ia ki Accessibility audit ia 1671 tylli ki building jong ka sorkar.
• La wanrah ia ki bynta jong ka Accesssibility ha 1748 tylli ki building jong ka sorkar, ba kynthup ka jingpynkhlain ia ki 1314 tylli ki jaka.
• Ki kad liengsuin, kynthup 35 tylli ki kad liengsuin shabar ri bad 55 tylli hapoh ri, kidei kiba la don ki rynsan, ki painkhana ba kyrpang bad ki jingthoh ha ka braille.

2.  Ki lad ka leit ka wan:

• 709 tylli ki steshon rel kiba don ki jingplie lad ba pura, bad sa 4068 kiwei pat kidei kiba don ki jingplie lad ba katto katne
• 8,695 tylli ki bus kiba la plie lad pura; 42,348 tylli ki bus kiba la pynkylla katto katne na ka bynta ka jingplie lad
• La kyntiew ia ki jaka ieng bus sha ka 3120 tylli ha 24 tylli ki jylla/UT.

3. Ka jingioh jingtip bad ki lad iakren:

• 95 tylli ki website jong ka sorkar pdeng la saindur thymmai na ka bynta ka jingplie lad
• 676 tylli ki website jong ka sorkar jylla/UT ki dei kiba la plié lad.

Ki sienjam ba kongsan:

• Sugamya Bharat App: ka rynsan mobile kaba la sdang ban ioh jingtip na ki paidbah shaphang ki jingeh bad pynthikna ka jingpynbeit kaba kloi ia kine.
• Indian Sign Language Research and Training Centre (ISLRTC): ka pynkup bor ia palat 1,000 ngut ki briew lyngba ka jingai jinghikai sign language bad wanrah ia ki rukom treikam na ka bynta ka jingplie lad ban ioh ia ki prokram TV.
• Ka jingioh iashim bynta ha ka elekshon: Ka Election Commission of India ka la kot 100% ka jingplie lad na ka bynta 10.5 lak tylli ki polling station jong ka.
• Ka jingtbit ha ka kam ialehkai: Ka Centre for Disability Sports ha Gwalior ka don ia ki jingpynbiang kiba biang na ka bynta ki nongialehkai kiba don jingduna ha ki dkhot met.

Ka jingktah ia ki Tnad Sorkar:

• Ka Pule Puthi: Bun na ki skul sorkar mynta ki don ki rynsan, ki painkhana, bad ki jingker.
• Ka jingkynthup ha ki kam pisa: Ka Tnad Kam pla tyngka bad ka RBI ki lamkhmat ia ka jingplie lad digital na ka bynta ki kam ka ioh ka kot.
• Ka jingmihkhmat ha ki kam deiriti: Ki film festival jong ka ri mynta ki kynthup ia ka jingpyni ia ki phlim ha kaba la pynbiang ia ki jingplie lad bad ka Indian Sign Language.

Ki rukom treikam ba phai sha ka lawei

Ka bynta ban wan jong ka AIC ka thmu ban:

• Saindur ia ki rukom treikam na ka bynta ka jingplie lad ha ki kam bapher bapher na ka bynta ki tnad ba dang sahteng.
• Ka jingpynkylla sa 500 tylli ki website jong ka Sorkar khnang ba kin long kiba la plié lad.
• Ka jingai jinghikai ia ki access auditor ha ka jingiatreilang bad ka Council of Architecture
• Ka jingshna ia ki jingpule kyrpang ba plié lad na ka bynta ki samla pule B.Tech, B.Plan, bad B.Arch ha ka jingiatreilang bad ka IIT Kharagpur bad AICTE.

Ka jingtei ia ka Lawei kaba khlain:

Ka rukom treikam kaba kynthup ia baroh jong ka AIC – ka jingpdiang ia ki jingdon jingem, ka teknoloji bad ki jinglong ha ka imlang sahlang – ka pyni ia ka jingkut jingmut jong ka sorkar na ka bynta ka ‘Accessible Bharat, Viksit Bharat’. Katba ka campaign ka kylla sha ka ‘Creation of Barrier-Free Environment’, ka sub-scheme hapoh ka SIPDA, kan bteng ban trei borbah ha ka jingkynthup ia baroh, ka jinglaitluid, bad ka jingryntih kyrdan na ka bynta ki briew kiba don jingduna ha ki dkhot met ha kylleng ka ri. Kane ka jingiaid lynti kaba wanrah jingkylla kalong ka dak jong ka jingbam smai ka India ban nym iehnoh iano iano ruh.

*****