#IFFIWood, দিসেম্বর ২, ২০২৪

৫৫শুবা ইন্তরনেস্নেল ফিল্ম ফেস্তিবেল ওফ ইন্দিয়া (IFFI) হন্দক্তা অচৌবা মওংদা লোইশিনখিবগা লোয়ননা নেস্নেল ফিল্ম দিভেলপমেন্ত কোর্পোরেসন (NFDC) না পাঙথোকপা ফিল্ম বাজার ২০২৪ না সিনেমাতিক স্তোরীতেল্লিংগী অনৌবা মীরোল অমু সেলেব্রেত তৌখি‍। থৌরমদুগী শিংথানিংঙাই ওইবশিংগী মরক্তা লেমজনিংঙাই ওইরবা স্ক্রীনরাইতর্স লেব কীদমক খনগৎখিবা কোনয়াক হায়রিবা ফীচর ফিল্ম অসিনি‍। NFDC স্ক্রীনরাইতর্স’ লেব ২০২৪ দা খনগৎলবা মতুংদা কোনয়াক হান্না থাজনরুদবা চাংদা মীয়ামগী পুক্নিং চিংশিনখি‍। ফিল্ম অসিগী স্ক্রিপ্ত অসিনা ফিল্ম প্রদ্যুসরশিংনা শৌগত্তুনা লুপা করোর ১০০ গী অচৌবা প্রদক্সন অমগী পুক্নিং থৌগৎহনখি‍।

উধব ঘোসনা ইবা ‘কোনয়াক’ অসি পঙ্কজ কুমারগী ইহান হান্বা দিরেক্সন পীবা ফীচর ফিল্মনি‍। ‘তুম্বদ’তা সিনেমাতোগ্রাফর ওইনা মাগী য়েঙবদা পুক্নিং চিংশিন্বা মওং মতৌগীদমক খঙনবা পঙ্কজ কুমারনা হন্দক মহাক্কী ৱারী লীবগী হৈশিংবা অদু ‘কোনয়াক’ অসিদা পুরক্লি‍। ফিল্ম অসিগী মতাঙদা মথুম মরাং হৌবা ফোঙদোক্লদুনা, মহাক্না হায়খি, “কোনয়াক অসি চুম্নগী এক্সন ৱারী অমখক্তা নত্তে; মসি নগালেন্দকী লিজেন্দ, মীয়াম, অমদি খুদোংথিনিংঙাই ওইরবা চীংমায়শিংগী নুংগী ওইবা মচৎশিং নৈনবনি‍। ফিল্ম অসিদা ঐখোয়না মফমসিগী য়ৌশিন্দ্রিবা স্পিরিত্তা থৱেয় হাপ্পা ঙমগদবা সিনেমাতিক এক্সপিরিএন্স অমা শেম্না পান্দম থম্লি‍।‍”

ইন্তরমেস্নেল এক্সপর্ত ক্লেএর দোব্বিন্না লজিংবা স্ক্রিপ্ত অমগা লোয়ননা, ‘কোনয়াক’ না কলচরেল দেপ্থকা পুন্সি হিংবা, ইকায় খুম্নবা, অমদি রিদেম্পসনগী মালেমগী ওইবা থীমগা পুনশিন্নবা মতিক লৈরবা সিনেমাগী খোঙচৎ অমা ওইনা তরং তরং ঙানখি‍। স্ক্রীনরাইতর্স’ লেব মেন্তোর, ক্লেয়রনা স্ক্রিপ্ত অসিবু থাগৎলদুনা, ‘কোনয়াক’পু “মীয়াম্না নীংথিনা খঙনদবা অদুবু কাউঙম্লোইদবা কোনয়াক মীয়ামগী মরমদা মীয়ামদা উৎলিবা মীনম্বা, থৌনা, অমদি খাঙবা কন্বগী মতিং লৈরবা ৱারী অমনি” হায়খি‍। লেব অসিনা উধব ঘোসকী মফমদা, পুৱারী অমদি লমদমদুগী নাৎকী ওইবা মচৎ চুম্না উৎপগা লোয়ননা এক্সনগা ফুঙ্গা ৱারী অমদি মীত্রংগী তাইবংপানগা পুনশিন্নবা মহাক্কী ৱারী লীবগী মওং হেন্না চেৎশিলহন্নবা ফম্পাক অমা ফংহনখি‍। ইনাক খুল্লবা নাৎকী পারী পুরীগী লন, মীত্রংগী তাইবংপান, অমদি মতিং লৈরবা ৱারীনা পুল্লবা ফিল্ম অসিনা মালেম পুম্বগী মীৎয়েঙ তারিবশিংগী পুক্নিং চিংশিন্নবা শেম শাদুনা, ভারতকী সিনেমাশিংবু মালেমগী স্তেন্দর্দতা পুখৎলকপদা ফিল্ম বাজারগুম্বা থৌশিলশিংনা লৌরিবা মরুওইবা থৌদাংশিং তাক্লি‍।         

ফিল্ম বাজার ২০২৪ দা অতোপ্পা স্ক্রীনরাইতর্স লেব প্রোজেক্তশিংদা ইন্তরেস্ত হেনগৎলকপা থেংনবগা লোয়ননা, স্ক্রিপ্ত কয়ানা লৈবকসিগী অমদি মালেমগী মাঙজিল থাবা ফিল্ম মেকরশিংগী পুক্নিং চিংশিন্দুনা, ক্রিএতিব তেলেন্ত অমদি মার্কেত দিমান্দগা মরী শমজিন্ননবা লেব অসিনা লেপ্পা লৈতনা হোৎনরিবা অসিবু উৎলি‍।

NFDC স্ক্রীনরাইতর্স লেবকী মরমদা

NFDC না চহি অসিদা স্তেত ২১ দগগী এপ্লিকেসন ১৫০ হেন্না ফংখি, মসিগী মনুংদা তোঙান তোঙানবা জেনরগী প্রোজেক্ত ৬ পু, ভারত পুম্বদগী অশেঙবা খোঞ্জেলশিং শেমগৎনবা, মখোঙ শোম্বিনবা, অমদি প্রমোত তৌনবা থৌশিল অমা ওইরিবা, ১৮শুবা NFDC স্ক্রীনরাইতর্স’ লেবকীদমক খনগৎখি‍। এদ ফিল্ম, সোর্ত ফিল্ম, নোভেলিস্ত, দোকুমেন্তরী, অমদি ফীচর ফিল্মগী ফিল্মমেকরশিংসু ওইরিবা স্ক্রীনরাইতর তরুক অদুনা খনগৎলবা স্ক্রিপ্তশিং অদু হিন্দী, উর্দু, প্রহারী, পঞ্জাবী, অসামিজ, মলয়ালম, কোনয়াক, ইংলিস অমদি মাইথিলি লোলশিংদা ইরকখি‍।

NFDC স্কক্রীনরাইতর্স লেব ২০২৪গীদমক খনগৎলবা প্রোজেক্ত তরুক মফমসিদা য়েংবিয়ু‍।

২০০৭ দগী হৌনা ফিল্ম বাজারগী মরুওইবা থৌশিল অমা ওইদুনা লাক্লিবা NFDC স্ক্রীনরাইতর্স লেব অসি নৌনা মচিন তুমখৎলক্লিবা তেলেন্তশিংবু মমিং লৈরবা স্ক্রিপ্ত অমদি ইন্দস্ত্রী এক্সপর্তশিংদগী মেন্তোরসিপ পীদুনা মখোঙ শোম্বিবদা মরুওইবা থৌদাং য়াদুনা লাক্লি‍। প্রোগ্রাম অসিনা মালেমগী ওদিয়েন্সশিংগীদমক ৱারীশিং রিফাইন তৌবা অমদি পিতচিং স্কিল হেনগৎহন্বদা মীৎয়েঙ থম্লিবা অসিনা মসিবু স্ক্রীনরাইতরশিং শকখঙনবা অমদি ঙাক্লৌ ফংনবা মরুওইবা ফম্পাক অমা ওইহল্লি‍। হৌখিবা চহিশিংসিদা, লেব অসিদগী থোরকখিবা ফিল্ম কয়ানা মীয়াম্না য়াম্না পাম্নুনা শেন্দোং মায় পাক্না ফংনখি, অমদি ‘কোনয়াক’ অসিসু মখোয়গী পরম অদুদা চৎকদৌরি‍।

* * *