U Myntri Khynnah ka tnad Textiles, Pabitra Margherita u la ban jur halor ka jingkut jingmut ka Sorkar ban pynkupbor ia ki samla jong ka ri da ki sap bad ki atiar ban ialam shakhmat ia ka ri sha ka Viksit Bharat bad u la kdew sha ki sienjam jong ka tnad Textiles ba kynthup ia ka skhim SAMARTH, kaba ai jinghikai ban kyntiew ia ka lad ioh kam bad ka jingseisoh ki briew khnang ban pyndap ia ki jingdonkam ha ka kam textiles. U Myntri u la ong ia kane ha ka jingiakynduh bad ki lad pathai khubor ha New Delhi ha kaba u la ban jur ba ka jingthmu u Myntri Rangbah Duh Narendra Modi ban kyntiew ia ki sap ka dei kawei na ki kam ba kongsan jong ka Sorkar, bad ba kane kan ialam ia ka India ha ka lynti jong ka roi ka par bad u la ban jur ruh halor ka jingthmu jong ka India ban kan kot sha ka ‘Viksit Bharat’ shuwa u 2047,bad u la batai ruh ia ki sienjam ba la shim ban poi sha ka ioh ka kot kaba $30 trillion.

Ka tnad Textiles ka pynshlur ia ka jingkyntiew ia ki sap lyngba ka Samarth Yojana, kaba pynbiang ia ki kor thain jain kiba bha bad ka jingai ia ki ksai ha ka dor kaba duna. Ha kaba iadei bad ka jingkyntiew ia ki sap, u Myntri u la ong ba ka tnad ka dang trei shitom ban pyntreikam ia ka Samarth Yojana bad ba la dep ai jinghikai ia 3.48 lak ngut ki briew bad na kine, 79% ki dei kiba la ioh kam bad la ai jinghikai ruh ia 3.6 lak ngut ki longkmie. Ha ka Samarth Program, ka tnad Textile ka dang trei ruh na ka bynta ka Dakshta Aur Kushalta Vikas, bad 88% na ki nongioh jingmyntoi ki dei ki longkmie, bad 26% lane 90320 ngut ki dei ki Scheduled Caste, 12%, lane 42,857 ngut ki dei ki ST. U Myntri u la kdew sha ka jingkongsan jong ka National Technical Textile Mission bad ka grant na ka bynta ka jingwad bniah bad ka jingseng kam lajong da ki samla ha ki teknoloji ba iadei bad ki jain. Ka tnad ka pynshlur ia ki startup ba kin leh ia ki jingwad bniah bad ialam lynti ha ki teknoloji ba iadei bad ki jain. Ha ryngkat ka tnad kyntiew sap, ka tnad Textiles ka la shim ia ki sienjam ban iarap ia ki Startup ba kin wanrah ia ka teknoloji ha ki kam kiba iadei bad ki jain. Na ka bynta kane, ka tnad ka la mynjur ban pynbiang T 6.27 klur ia 12 tylli ki projek jong ki startup. U Myntri u la ban jur halor ka jingkongsan jong ki san tylli ki ‘F’s- “Farmer – Fiber – Factor – Fashion – Foreign”.

U Myntri u la kdew sha ka jingseisoh jong ki kam pyntbit hadien u 2014 hapoh ka jingialam jong u Myntri Rangbah Duh Narendra Modi bad kumno kane ka dei kaba la wanrah hapoh kawei ka rynsan lyngba ka tnad Skill Development and Entrepreneurship da ka jingthmu ban pynkylla ia ki kam pyntbit ha ka ri bad pyniahap bad ka jingthmu jong u Myntri Rangbah Duh ban pynlong ia ka India kum ka ‘Nongbah jong ka jingtbit’ ha ka pyrthei. U Myntri u la kdew ruh sha ki jingeh ha ka kam shuwa u 2014. Hynrei, hadien u 2014, ki la don 36 tylli ki Sector Skill Council (SSC) kiba mihkhmat ia kumba 40,000 tylli ki kompani ha ryngkat 978 tylli ki ITI kiba don ka Dual System of Training, 13 tyll ki Flexi MoU bad ki CSR na ka bynta ka jingpyntbit. Naduh u 2014, ka Sorkar ka la sdang ia ki skhim bapher bapher ban shim  ia ki lad ba don ki samla ka India ban pynkylla ia ka kam pyntbit bad ka jingseng kam lajong ha ka ri bad mynta, ka India ka don ka kam startup kaba don ha ka kyrdan kaba lai ha ka jingheh ha ka pyrthei. Ha u 2016, ki la don 13 tylli ki  Startup unicorn bad mynta ngi don 118 tylli ki unicorn kiba shongdor haduh $ 354 billion, la ong u Myntri. 90% ki distrik ha ka ri ki la ithuh ia ki startup bad ka thong jong ka Sorkar jong ngi ka dei ban don ia ki startup ba la ioh jingithuh na ka DPIIT ha baroh ki distrik shuwa ban kut u 2024-25. Ka India kaba don ki samla kiba 28.7 snem haba khein lang ia baroh ka dei kawei na ki ri ba dang samla duh ha ka pyrthei bad kane ka plié ia ki lad na ka bynta ka jingkiew ka ioh ka kot bad ka jinglong nongialam ha ka pyrthei. Ha u 2016-17, tang 17608 tylli ki jaka trei ki don ia ki apprentice katba ha u 2022-2024 kane ka la kiew ar shah sha ka 35229, la ong u Myntri.

U Pabitra Margherita u la ong ruh ba ka kam kaba iadei bad ki jain ka don ha ka kyrdan kaba ar ha kaba iadei bad ka jingai kam hadien ka kam rep ha kaba ka ai kam ia kumba 4.5 klur ngut ki briew bad ka tnad Textiles ka la buh ia ka thong ban poi sha ka 10 klur shuwa u 2030. Shuh shuh, u la ong ba ka jingheh ka iew jain ka long kumba USD 165 billion bad ba ka tnad ka la buh ia ka thong lajong ban kot sha ka USD 350 billion shuwa u 2030. U Myntri u la ban jur halor ka Skhim PM Internship ba la sdang dang shen ia kaba la mang T 2 lak klur, ka ban ai 1 klur tylli ki internship ia ki samla.

U Margherita u la batai ia ki lad pathai khubor ba hapoh ka Skhim PM Vishwakarma la ai ka jingkyrshan ia ki nongshna tiar ha 18 jait ki kam. U Myntri u la kdew ruh sha ki kyntien jong u Myntri Rangbah Duh uba la ong “La thoh ha ki jingthoh ba hyndai jong ngi, ‘यो विश्वं जगतं करोत्येसे स विश्वकर्मा’ kaba mut ba u nongthaw ia ka pyrthei ne uba don bynta ha ka kam tei jingtei ha kaba iadei bad kane u dei ba khot ‘Vishwakarma’.

*****