0 9

#IFFIWood, 27 नोव्‍हेंबर 2024

55व्या भारतीय आंतरराष्ट्रीय चित्रपट महोत्सवांत, भारताचो गिरेस्त सिनेमा दायज "पुनर्स्थापित क्लासिक" विभागांत दाखयला. भारताचें अतुलनीय चित्रपट दायज सांबाळपाखातीर आनी तिचो उत्सव मनोवपा खातीर राष्ट्रीय चित्रपट दायज मिशनाच्या (एनएफएचएम) खाला एनएफडीसी-नॅशनल फिल्म आर्काइव्ह ऑफ इंडिया (एनएफडीसी-एनएफएआय) च्या अथक यत्नांचेर भर दिला. सिने मोगीक ह्या वर्सा फिल्म फेस्टिवलांत पुनर्स्थापित क्लासिकांची जादू अणभवपाची आनी भारतीय सिनेमाच्या दायजाची परब मनोवपाचो पर्याय उपलब्ध आसा.

देशभरांतल्यान बारीकसाणेन कांय उत्कृश्ट कलाकृती ह्या विभागा खाला दाखयतात त्यो अश्यो: 

मूक सिनेमा

कालिया मर्दन (1919) : दादासाहेब फाळके हाणें दिग्दर्शित केल्ल्या ह्या  कार्यांत उरिल्ल्या 35 मिमी.च्या ड्युप नेगेटिव्हाचो उपेग करून 4के रिस्टोरेशन केलां. सत्यकी बॅनर्जी आनी पंगडाचें लायव्ह संगीता वांगडा, ह्या प्रदर्शनांत फाळके हांच्या सिनेमाच्या प्रतिभाशालीपणाच्या अभिनव स्पेशल इफेक्ट्स आनी कथानकाचेर भर दिला.

तेलुगू सिनेमा

देवदासू (1953) बंगाली अभिजात ‘देवदास’ चें हें रुपांतर, अक्किनेनी नागेश्वर राव हें दुख्खद नायक म्हणून आशिल्लें, एएनआर हांचो हो शताब्दी उत्सव थारता. भारतीय सिनेमाचेर ताच्या अमिट प्रभावाक ह्या पुनर्स्थापनेंतल्यान श्रद्धांजली दिल्या.

हिंदी सिनेमा

आवारा (1951) 35 मिमी.च्या ड्युप नेगेटिव्हांतल्यान परतून तयार केल्लो राज कपूर हाणें दिग्दर्शीत केल्लो हो अभिजात चित्रपट गिरेस्तकाय, सत्ता आनी नशीब ह्या विशयांचेर भाष्य करता. एनएफडीसी-एनएफएआय खातीर कपूर कुटुंबान फिल्म साहित्याचें अमूल्य योगदान दिल्ल्यान, हे शक्य जाला.

हम दोनो (1961) दुसऱ्या म्हाझुजाचे फाटभुंयेर तयार जाल्लो, हो देव आनंद अभिजात, दुडवांचो आनी जयदेवाचे नीमुद्रण, मोहम्मद रफीच्या जल्म शताब्दीचो भोवमान करता.

सात हिंदुस्तानी (1969) गोंयांतल्या पोर्तुगेज सत्तेआड प्रतिकार करपाची ही कथा, जातूंत अमिताभ बच्चन तरणाटो आसा.  ही चित्रपटाच्या टिकपी दायजाची गवाय. 35 मिमी कॅमेरा नेगेटिव्हांतल्यान परतून तयार केल्लो हो एकचार आनी देशभक्तीची भावना मनयता.

बंगाली सिनेमा

हार्मोनियम (1976) नामनेचे तपन सिन्हा हाणें दिग्दर्शीत केल्लो हो अभिजात चित्रपट, निर्मात्याचो शताब्दी उत्सवाचो एक भाग म्हूण दाखयतले. अस्तंत बंगाल राज्य चित्रपट अभिलेखागारान सांबाळून दवरिल्ल्या 35 मिमी.च्या मूळ कॅमेरा नेगेटिव्हांतल्यान परतून तयार केल्ली, ही हार्मोनियमाच्या दुख्खद प्रवासाची मार्मिक कथा, जातूंत सिन्हान स्वता रचिल्लें संगीत आसा.

सीमाबध्द (1971) सत्यजीत रे हाच्या प्रतिकात्मक कलकत्ता त्रैलोजीचो एक भाग सीमाबध्द ही एक महत्वाकांक्षी विक्री वेवस्थापकाच्या जिवितांतल्यान कॉर्पोरेट निर्दयतायेचो अभ्यास करता. पुनर्स्थापनेंत पीटर फॅन जायरात दाखोवपी, आदीं उपलब्ध नाशिल्लो एक मिनटाचो रंग क्रम आसपावीत आसा. ह्या सिनेमाचे पुनर्स्थापन 2022 वर्सा जाले उपरांत, पुराय कलकत्ता त्रैलोजी परतून जिवीत करपाचो यत्न चालू आसा.

अ मायलस्टोन इन प्रीसर्व्हेशन :

ह्या सिनेमाच्या रत्नांचे रिस्टोरेशन 300 वयर समर्पीत वेवसायिकांनी प्रगत 4K स्कॅनिंग, रंग दुरुस्ती आनी आवाज पुनर्स्थापना तंत्रांचो उपेग करून हातांत घेतले. आर्विल्ल्या सिनेमाच्या मानकांक पाळो दितनाच, चित्रपटांचें मूळ सार तिगोवन दवरपाखातीर गळून पडपी फ्रेम, खरोशणी आनी हेर नुकसानाची बारीकसाणेन दुरुस्ती केल्ली.

केंद्रीय म्हायती आनी प्रसारण मंत्रालयाच्या खाला एनएफडीसी-एनएफएआयचे हे अपूर्व यत्न ,भारताचें सिनेमा दायज सांबाळपाक एक मुखेल मार्गदर्शक तत्व थारता. सगळ्यांत बरे तरेन सांबाळून दवरिल्ल्या फिल्म घटकांचे  सोर्सिंग करून, एनएफडीसी-एनएफएआय हांणी उंचेल्या दर्ज्याचे रिस्टोरेशन सुनिश्चीत केले. फुडल्या पिळग्यां खातीर ह्यो उत्कृश्ट कलाकृती परतून जिवीत केल्यात.

 55व्या इफ्फीत ह्या पुनर्स्थापित केल्ल्या अभिजात सिनेमाचें प्रदर्शन हे संवसारभरांतल्या प्रेक्षकांक प्रेरणा आनी शिक्षण दिवपी आसा आनी कथाकारांक मान दिवपाचोय हो यत्न आसा.

* * *

PIB IFFI CAST AND CREW | Subhash/Manali/Darshana | IFFI 55