म्हायती आनी वितरावणी मंत्रालय
“म्हज्या राष्ट्राच्या प्रामाणीकतेची जाल्ली हानी, म्हाका म्हज्या चित्रपटांतल्यान चित्रीत करपाची आशिल्ली”: रास्टीस्लाव बोरोश दिग्दर्शक ‘द स्लगार्ड क्लान’
“आस्थापना कडेन जुळ नाशिल्ल्या विचारांक आनी चित्रपटांक निधी एकठांय करप कठीण जाता:” बेल्किस बायरॅक
“स्वतंत्र आनी तटस्थ सिनेमाक निधी मेळना:” फाइज अझीझखानी
#IFFIWood, 23 नोव्हेंबर 2024
वाडत वचपी भांडवलशाय आनी उपभोगवादाक लागून स्लोव्हाकिया ह्या तरणाटे राष्ट्राच्या प्रामाणीकतेची हानी जायत आसा, अशें ‘द स्लगार्ड क्लान’ ह्या चित्रपटाचे दिग्दर्शक रास्टीस्लाव बोरोश हाणी सांगले. 55व्या भारतीय आंतरराष्ट्रीय चित्रपट महोत्सवांत जाल्ले पत्रकार परिषदेत तांणी माध्यमांकडेन संवाद साधलो.
प्रसार माध्यमां कडेन संवाद सादतना तांणी उक्तायलें, कि “म्हाका म्हज्या राष्ट्राचो जीव दाखोवपाचो आशिल्लो. हें एक सामकें तरणाटे राष्ट्र आसा. ताका स्वातंत्र्य मेळून चड वेळ जावंक ना. फिल्मा वरवीं कितें तरी प्रामाणीक दाखोवपाचें आशिल्लें. देखून हांवें वास्तव दाखोवचें न्हय, अशें थारायलें. पूण ताचे एक रूपक सादर केले. म्हज्या देशा खातीर हे म्हजें सपन आसा. देशांतल्या तरणाट्यांच्यो सगळ्यो आकांक्षा उपभोगवादाचेर आदारिल्ल्यो आसात”.
बेल्किस बायरॅक, आपल्या ‘गुलिझार’ ह्या सिनेमा विशीं उलयतना, सिनेमा तयार करतना निधी खातीर जे संघर्श सोंसचे पडले, ताचे विशीं उलयली. “चड करून पूर्वग्रहाचेरच फिल्मा खातीर निधी मेळोवप कठीण जाता. मॅन्सप्लेनिंग उद्देगा कडल्यान येता आनी सांस्कृतीक संस्थां कडल्यान न्हय” अशें तिणें सांगलें. तिणें फुडें सांगलें, कि “समाजाच्या खंयच्याय वर्गाक विरोध करपी विचार आसत जाल्यार, ताका आव्हानां आसतलीं.”
मनिजेह हेकमत आणि फाइज अजीजखानी हांणी दिग्दर्शीत केल्ल्या ‘फीयर अॅंड ट्रेम्बलिंग’ ह्या सिनेमांत एके बायलेची कथा आसा, जाचो अखंड विश्वास तिका एकसुरेपणांत व्हरता, तिका कुटुंबीक आनी समाजीक संबंदांतल्यान पयस करून उडयता. एकाद्या गजालीवीशी खात्री जावप, हे तिच्या एकसुरेपणाचे मूळ कारण जाता. ह्या सिनेमाचे नांवच हो सिनेमा तयार करपाचो अणभव सुचयता, अशें फाइज अजीजखानी हांणी सांगलें.
निमाण्या उलोवपांत, ह्या सिनेमा खातीर निधी निर्माण करपा विशीं उलयतना अझीझखानी हांणी सांगलें, की आस्थापनाक आदार दिवपी सिनेमाक निधी मेळटा, स्वतंत्र आनी तटस्थ सिनेमाक निधी मेळना. अश्या वेळार ताका इश्ट, कुटुंब आनी स्वताच्या साधनसंपत्तीचेर आदारून रावचें पडटा.
आयज गोंयच्या सोबीत राज्यांत 55व्या इफ्फीत ‘द स्लगार्ड क्लान’, ‘गुलिझार’ आनी ‘फीयर अँड ट्रेम्बलिंग’ ह्या तीन चित्रपटांच्या दिग्दर्शकांनी पत्रकार परिशदेंत उलोवप केलें. पत्रकार परिशदेंचें संचालन श्रींयांका चॅटर्जी हांणी केलें.
पत्रकार परिशद हांगा पळोवंक मेळटा:
* * *
PIB IFFI CAST AND CREW | Subhash/Manali/Darshana | IFFI 55
(Release ID: 2076515)
Visitor Counter : 7