0 5

Ka bynta jong ka Indian Panorama ha ka International Film Festival of India (IFFI), Goa, ka la sakhi ia ka jingpyni ia ka Hanu-Man, ka jingsdang ia ka kam shna phlim ba la direct da u Prasanth Varma. La ring ia kane ka phlim ha ka shnong Anjanadri kaba la shu mutdur, ka iathuh ia ka jingiaid lynti u Hanumanthu, u nongtuh barit baria uba ioh bor phylla ba la hap na ka snam jong u Blei Hanuman. Kane ka jingkylla ka wanrah ia ka jingiakhun bad uba kam ban dei u riewshlur, kaba pyniasoh ia ka khana hiar pateng, ka jingshlur bad ka jingskhem jingmut ki briew.

U Actor Teja Sajja, uba ak kum u Hanumanthu, u la pynpaw ia ka jingbah khlieh ban rah shakhmat ia ka khana ba don tynrai ha ki khana tynrai ka India. Haba kren shaphang ka kyrdan jong ka jingpynmih ia ka phlim, u la ban jur kumno ka kynhun ka la jop ia ki jingeh ba iadei bad ka jingpynlut pisa ban wanrah ia ki dur ba iadei bad ki kam shna phlim ha India.  Ka jingitynnad ka shnong Anjanadri kaba la shu mutdur la shna biang ha ka jaka ring phlim ha Hyderabad, kaba pyni ia ka jingtbit ki nongshna phlim.

U Sajja u la pynshai ruh halor ka jingthmu jong ka phlim, ha kaba u la ai jingiaroh ia ka jingkut jingmut bad jingthrang jong u Director Prasanth Varma ha ki lai snem jong ka jingiaid lynti ban pynmih ia kane ka phlim. U la ban jur kumno ka phlim ym tangba ka wanrah biang ia ki tynrai jong ka India hynrei ka kyntiew ruh ia ki kam shna phlim jong ka India ha ka rynsan kylleng ka pyrthei.

U Sajja u la pynpaw ka jingsngewsarong ban ak ia ka bynta ba iadei bad ka tynrai deiriti jong ka ri kaba iahap bad ki briew na kiwei kiwei ki ri kiba sngewthuh ia ki riewshlur ba iasyriem. La pynpaw ruh ia ki jingthmu ban pyniar ia ka Hanu-Man sha kaba kham heh bad u Teja u la pynthikna ban shna sa kawei ki phlim kaba kham khraw ka khana. U la ban jur ia ka jingkongsan jong ki bynta ba la thoh bha jong ki longkmie ha ka phlim da kaba kdew ia ka bynta ba kongsan ban rah shakhmat ia ka khana.

U actor u la iasam ruh ka jingkyrmen jong u ia ka pateng ban wan jong ki kam shna phlim jong ka India, da kaba ai jingiaroh ia ka jingieid ki paidbah ia ka jingiathuh khana kaba la kyntiew shaphrang ia ka. U la ong ba ki kam shna phlim Telegu ki bteng ban weng ia ki dieng pyngkiang lyngba ki khana kiba thymmai bad ki jingak kiba tbit, ka rukom kaba u kyrmen kan ioh jingithuh kylleng ka pyrthei.

Ka Hanu-Man ka pyni ia ka jingiakhleh lang kaba khlain jong ka hiar pateng deiriti bad ka jingiathuh khana katkum ka juk mynta, kaba thmu ban khring ia ki nongpeit ha India bad shabar ri. Ka jingkynthup ia ka ha ka bynta Indian Panorama ka pynthikna biang ia ka jingkongsan ka phlim ha ka jingsaindur bad ka deiriti.

Ia ka jingialang la pyniaid da u Mahesh Chopade.

Peit ia ka jingiakynduh bad ki lad pathai khubor hangne:

* * *